Кʹьламед Тʹәзә сәва Ԛӧльхкьрьне!
1 Ль сәр «Щьвака Бьрща Ԛәрәԝьлийе» йа һәрсали, йа кӧ 4 Щотмәһе дь сала 2014-да дәрбаз бу, һатьбу әʹламкьрьне дәрһәԛа тʹәзәкьрьна кʹьтеба кʹьлама кӧ ньһа щәм мә һәйә. Бь рʹастийе жи әв әʹламәтикә пʹьрʹ баш бу! Ԝе дәре диса щарәке кьрьнә бира һʹәму гӧһдара, ԝәки кʹьламед мәйә Пʹадшатийе, ԛӧльхкьрьна мәда, щики фәрз дьгьрьн (Зәб. 96:2).
2 Дьбәкә тӧ дьшьрмиш дьби, ‹Гәло чьрʹа лазьм һат кʹьтеба кʹьлама тʹәзә кьн?› Чәнд мәʹни һәнә. Йа пешьн, фәʹмкьрьна мә һьндава Ньвисаред Пироз чьԛас дьчә һе зәлал дьбә, у әв йәк дькарә ль сәр лирика кʹьламед мә жи һʹӧкӧм кә (Мәтʹлк. 4:18). Диса мәʹник һәйә: Гәләк гьли-готьн у хәбәр, йед кӧ ньһа кʹьтеба кʹьламада тенә хәбьтандьне, жь «Ԝәлгәрʹандьна Дьнйа Тʹәзә» йа бәре, һатьбун һьлдане. Ләма жи әв лирика гәрәке бенә тʹәзәкьрьне, ԝәки ль гора ве йәке бә чь кӧ «Ԝәлгәрʹандьна Дьнйа Тʹәзә» йа тʹәзәкьрида һәйә. Бь рʹастийе жи әв хәбатәкә пʹьрʹ мәзьн ә, ԝәки һʹәму лирика ль гора ван гӧһастьна чеки. Хенщи ԝе йәке һатьбу сафикьрьне, ԝәки һьнә кʹьламед тʹәзә жи дь кʹьтеба кʹьламада зедә кьн.
3 Гәло әм гәрәке һивийе бьн, һʹәта кӧ әв кʹьтеба кʹьламед тʹәзә бе нәшьркьрьне кӧ паше бькарьбьн бьдьнә хәбате? На. Әм ша нә әʹлами ԝә бькьн, ԝәки чәнд мәһа шунда, һьнә кʹьламед тʹәзә ԝе ль сәр Малпәра jԝ.org бенә данине. Чахе кʹьламед тʹәзә бенә данине, һьнге хьлазийа бәрнама Щьвата Ԛӧльхийеда, әв йәк ԝе бь нишана «кʹьлама тʹәзә», бе кʹьфшкьрьне.
4 Чаԝа Кʹьламед Тʹәзә Һин бьн: Дьбәкә нә һеса бә кʹьлама тʹәзә һин бьн. Мина зәбурбеж, әм дьхԝазьн ль сәр щьвата бьстьрен у хԝә кәр нәкьн (Зәб. 30:12). Сәва кӧ кʹьлама тʹәзә һин би, дина хԝә бьдә ван тьштед жере ньвисар.
• Чәнд щара гӧһе хԝә бьдә ньвисандьна пиано йа кʹьламе, йа кӧ ԝе ль сәр Малпәра мә бе данине. Чьԛас һе зедә тӧйе гӧһе хԝә бьди мьԛаме, һаԛас һе ԝе тәрʹа һеса бә, әԝе бира хԝәда хԝәй ки.
• Лирикайе һин бә у бира хԝәда хԝәй кә.
• Мьԛаме тʹәви лирикайе бьстьре. Әԝе али тә бькә кӧ ида кʹьламе бьзаньби.
• Ԝәʹде Ԛьльхкьрьна тʹәви Малбәте, чәнд дәԛә ԝәԛәтиньн сәва кӧ кʹьламед тʹәзә бьстьрен у һин бьн.
5 Чахе нава чәнд мәһада, ль хьлазийа бәрнама Щьвата Ԛӧльхийеда, кʹьлама тʹәзә ԝе һәбә, һьнге щьват ԝе щарәке гӧһе хԝә бьдә ньвисандьна пиано йа ве кʹьламе. Паше гӧһдар ԝе бь ньвисандьна мьԛама пиано, тʹәвайи әве кʹьламе бьстьрен, чаԝа кӧ әм сәва кʹьламед дьн жи дькьн.
6 Чахе әм дәрһәԛа ве йәке дьшьрмиш дьбьн, әм дьвиньн ԝәки чахе әм ль сәр щьвата дьстьрен, әв мәщале дьдә мә, сәва кӧ дәнгед хԝәйә шабуне бькьнә йәк, кӧ бь ве йәке пәсьна бьдьнә Йаһоԝа. Хенщи ԝе йәке әм гәрәке хԝәрʹа бькьнә хәйсәт, кӧ чахе ль сәр щьвата кʹьлам дәстпедьбә, бе мәʹни щийе хԝә нәһельн у дәрнайен.
7 Диса тьштәк һәйә, кӧ чаԝа әм дькарьн рʹазибуна хԝә сәва ван кʹьламед пироз бьдьнә кʹьфше. Мәсәлә, пешийа кӧ бәрнама щьвата мәзьн дәстпебә, тʹьме мьԛам те вехьстьне. Сале дӧ щара, жь чар ԛолбед дьнйайе, хушк у бьра сәва шьхӧле кʹьфшкьри, бь кʹиси хԝә дьчьнә ль Патерсоне, Ниу Йорке, сәва кӧ һазьр кьн мьԛамәкә бәдәԝ, кӧ әм ԛӧльхкьрьна хԝәда бьдьнә хәбате. Ләма жи чахе бәрпьрсийаре бәрнаме, әʹлам дькә кӧ щийе хԝә бьгьрьн у гӧһ бьдьнә ԝе йәке кӧ чь оркестор сәва мә һазьр кьрийә, әм гәрәке һәма ӧса жи бькьн. Һәрге әме ӧса бькьн, әԝе али мә бькә ԝәки дьле хԝә һазьр кьн сәва ԝе информасийоне, кӧ ԝе бе готьне (Әзр. 7:10).
8 Иро, щьвата хԝә әме хьлаз кьн бь стьрана кʹьлама мәйә тʹәзә, йа кӧ бь наве ӧса нә «Бьра Пʹадшатийа Тә Бе!» Әв кʹьлама, дәрһәԛа кʹижани кӧ ль сәр щьвата һәрсали һатьбу готьне, бь рʹастийе жи ча нишанәкә мәхсус ә сәва сәдсалийа буйина Пʹадшатийе.
9 Кʹьламед тʹәзә бь рʹастийе жи «тьштед ԛәнщ ьн», кӧ Йаһоԝа дьдә мә (Мәт. 12:35а). Ԝәрен бьра нета мә әв бә, ԝәки әван кʹьламед тʹәзә һин бьн у бь дьл бьстьрен, кӧ бь ве йәке пәсьн у һӧрмәте бьдьнә Хԝәдайе хԝә! (Зәб. 147:1).