Дь Ԛӧльхкьрьнеда Тʹьме Пешда Һәрʹьн
1. Кʹижан мәсәлед жь ԛьрʹна йәке нишан дькьн, ԝәки әм гәрәке дь ԛӧльхкьрьнеда тʹьме пешда һәрʹьн?
1 Мәсиһи гәрәке тʹьме пешда һәрʹьн. Ләма жи Иса шагьртед хԝәрʹа һинбунәкә рʹьнд да, чь кӧ али ԝан кьр даннасинкьрьнеда пешда һәрʹьн (Луԛа 9:1-5; 10:1-11). Жь бо ве мәʹнийе жи Әкила у Прьскила, Аполо бьрьнә щәм хԝә, сәва кӧ «һе рʹаст Рʹийа Хԝәде ԝирʹа шьровәкьн» (Кʹар. Шанд. 18:24-26). Паԝлосе шанди жи жь бо ве мәʹнийе, һелан кьр мьзгиндаре щерʹьбанди демәк Тимотʹейо, ԝәки әԝ хԝә бьдә һинкьрьне, ԝәки пешдачуйина ԝи «һʹәмуйава әʹйан бә» (1 Тимтʹ. 4:13-15). Фьрԛи тʹӧнә әм чьԛас ԝәʹдә Хӧданрʹа ԛӧльх дькьн у мьзгинийе бәла дькьн, әм гәрәке бәрдәԝан кьн фәрәсәтед хԝәйә даннасинкьрьне һе баш кьн.
2. Ча әм дькарьн жь йед дьнена һин бьн?
2 Жь Йед Дьнена Һин бьн: Сәва кӧ әм фәрәсәтед хԝә баш кьн, лазьм ә пешийе жь йед дьнена һин бьн (Мәтʹлк. 27:17). Чахе һʹәвал-хьзмәткʹаре тә пешанине дькә, дина хԝә бьде. Тӧ дькари һьнә ширәта бьпьрси жь ԝана, йед кӧ дь ԛӧльхкьрьнеда щерʹьбанди нә, у рʹьнд гӧһе хԝә бьдә һәла чь әԝ дьбежьн (Мәтʹлк. 1:5). Дьбәкә тӧ дӧдьли у ньзани кӧ ча гәрәке рʹьнд сәрледана дӧбарә бьки, дәстпеки һинкьрьна Кʹьтеба Пироз, йан жи бь щурʹе дьн даннасин бьки. Жь алийе хԝәда гава пешьн бькә у аликʹарийе бьхԝазә жь бәрпьрсийаре кʹома хԝә, йан жи жь ԛӧльхкʹаре щерʹьбанди, сәва кӧ бькарьби рʹьнд һин би. Ӧса жи бира хԝәда хԝәй кьн, ԝәки рʹӧһʹе Йаһоԝайи Пироз дькарә али мә бькә ԝәки фәрәсәтед хԝә мәзьн кьн. Ләма жи һәр рʹож дәрһәԛа ве йәке дӧа бькьн (Луԛа 11:13).
3. Әм ча гәрәке хԝә кʹьфш кьн, һәрге әм һивийе нибун у кәсәки ширәт да мә?
3 Һәрге тӧ һивийе нибуйи у кәсәки тәрʹа ширәт да ԝәки чаԝа дькари ԛӧльхкьрьна хԝә баш ки, нәхәйидә (Ԝаиз 7:9). Анәгори Аполо, бь мьлукти у рʹазибуне аликʹарийе ԛәбул кә. Кьред ӧса, биланийа тә ԝе бьдьнә кʹьфше (Мәтʹлк. 12:15).
4. Чь мәʹнийа фәрз Иса дабу дәрһәԛа ԝе йәке, кӧ дь ԛӧльхкьрьнеда пешда һәрʹьн?
4 Пешдачуйина Мә, Хԝәде Рʹумәт Дькә: Иса мәсәлә дьдан хәбате, бь аликʹарийа кʹижана кӧ шагьртед хԝә һелан дькьр, ԝәки әԝана дь ԛӧльхкьрьнеда пешда һәрʹьн. Иса хԝә бәрамбәри дара тьрийа кьр, у шагьртед хԝәйә рʹункьри жи бәрамбәри чʹьԛьла кьр. Әԝи гот, ԝәки Бав әԝ чʹьԛьле кӧ бәр дьдә паԛьж дькә, кӧ әԝ «һе гәләк бәр бьдә» (Йуһʹн. 15:2). Анәгори хԝәйе рʹеза тьрийа, йа кӧ дьхԝазә ԝәки чʹьԛьлед кʹола тьрийа ԝи һе бәрдар у керһати бьн, Йаһоԝа жи дьхԝазә ԝәки әм фәрәсәтед хԝә мәзьн кьн, сәва кӧ «бәре зар-зьмане» керһати бьн (Ибрн. 13:15). Чь кʹаре дьдә, чахе әм ԛӧльхкьрьнеда пешда дьчьн? Иса щаба ве пьрсе дьдә мә: «Бь ве йәке Баве мьне бе рʹумәткьрьне, гава һун пе гәләк бәрдайине бьдьнә кʹьфше» (Йуһʹн. 15:8).