Кани бона «Бәрнама Щьвине, Бьжин у Хьзмәт кьн»
5-11 ТʹӘБАХЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 ТИМОТʹЕЙО 1-4
«Хԝәде Рʹӧһʹәки Тьрсе Нәда Мә»
(2 Тимотʹейо 1:7) Чьмки Хԝәде р′ӧһ′әки тьрсе нәда мә, ле Йе ԛәԝате, һ′ьзкьрьне у хԝәгьртьне.
ԝ09 15/5 15 ¶9
Щаһьлно, Бьра Пешдачуйина Ԝә Әʹйан бә
9 Сәва кӧ али Тимотʹейо бькә, Паԝлос готә ԝи: «Хԝәде р′ӧһ′әки тьрсе нәда мә, ле Йе ԛәԝате, һ′ьзкьрьне у хԝәгьртьне» (2 Тим. 1:7). «Хԝәгьртьн» те һʹәсабе, ԝәки бь сәрԝахти бьфькьрьн у шеԝьр кьн. Әв ӧса жи те һʹәсабе кӧ ль сәр тьшта рʹаст бьньһерʹьн, демәк нә ӧса чаԝа кӧ әм дьхԝазьн. Һьнә щаһьлед нәщерʹьбанди рʹӧһʹәки тьрсе дьдьнә кʹьфше у хԝә дур дьгьрьн жь ԝан дәрәща, кʹижан кӧ стресе зедә дькьн. Әԝана һʹәчʹи зәʹф ԝәʹде хԝә хәрщ дькьн сәр хәԝа хԝә, ньһерʹандьна телевизийоне, наркотика дьдьнә хәбате, зәʹф ичʹке ԝәдьхԝьн, тʹьме тʹоп дьбьн тʹәви һәвала у бенамусийе дькьн. Мәсиһи тенә һеланкьрьне, ԝәки «нәп′акийе у дьлһавьжийед дьнйайе инк′ар кьн у аԛьлда гьран, бь р′астийе у хԝәденасийе бьжин ль ве дьне» (Тит. 2:12).
(2 Тимотʹейо 1:8) Аԝа шәрм нәкә, кӧ бона Хӧдане мә шә′дәтийе бьди, нә жи бона мьн шәрм бькә, кӧ әз бона наве ԝи гьрти мә. Ле т′әви щәфайе Мьзгинийе бә, анәгори ԛәԝата Хԝәде.
ԝ03 1/3 9 ¶7
«Ԛәԝат у Әʹгит бьн!»
7 Паԝлос Тимотʹеорʹа ньвиси: «Хԝәде р′ӧһ′әки тьрсе нәда мә, ле Йе ԛәԝате, һ′ьзкьрьне у хԝәгьртьне. Аԝа шәрм нәкә, кӧ бона Хӧдане мә шә′дәтийе бьди» (2 Тимотʹейо 1:7, 8; Марԛос 8:38). Ԝәʹде хԝәндьна ԝан рʹеза дькарьн жь хԝә бьпьрсьн: «Әз баԝәрийа хԝә шәрм дькьм йан бь мерхаси әʹйан дькьм? Сәр хәбәте, мәкʹтәбе йане жи мәрьвед дор-бәре хԝәрʹа мьн готийә, кӧ әз Шәʹде Йаһоԝа мә, йан әз әве йәке вәдьшерьм? Әз шәрм дькьм кӧ жь мәрьвед дәр-доре хԝә щӧдә дьбьм, йан әз фьрнаԛ дьбьм ԝәки һәләԛәтийа мьн тʹәви Йаһоԝа, мьн жь мәрийа щӧдә дькә?» Һәрге кәсәк дьтьрсә мьзгинийе бәла кә, йан жи шәрм дькә һәла мәрьв ԝе дәрһәԛа ԝи чь бьфькьрьн, ԝе баш бә бькьнә бира хԝә гьлийе Йаһоԝа, чь кӧ әԝи готьбу Йешу: «Ԛәԝат у ә′гит бьн». Тʹӧ щар бир нәкә, ԝәки һәри фәрз нә әԝ ә, һәла һәвалед тәйи мәкʹтәбе йан хәбате чь дьфькьрьн, ле һе фәрз әԝ ә ԝәки Йаһоԝа у Иса Мәсиһ чь дьфькьрьн (Галати 1:10).
Хьзна Кʹьтеба Пироз Бьгәрʹьн
(2 Тимотʹейо 2:3, 4) Аԝа т′әви щәфе мә бә, мина әскәре Мәсиһ Исайи ԛәнщ. 4 Т′ӧ әскәр шьхӧле бьнәлитийева мьжул набә, ԝәки ль сәрәскәр хԝәш бе.
Һәбука Рʹаст Ԛазанщ кьн
13 Тимотʹейо мәрьвәки бь баԝәрийа ԛәԝи бу. Паԝлос ԝи нав кьр «әскәре Мәсиһ Исайи ԛәнщ» у паше сәр ԝан гьлийед хԝәда зедә кьр: «Тʹӧ әскәр шьхӧле бьнәлитийева мьжул набә, ԝәки ль сәрәскәр хԝәш бе» (2 Тимтʹ. 2:3, 4). Иро жи шагьртед Иса, жь ԝан милйонәки зедәтьр хьзмәткʹаред һәртʹьм ьн, әве ширәта Паԝлос дьдьнә хәбате. Әԝана чʹәʹв надьнә ве дьнйайе, кʹижан кӧ пʹәрәһʹьз ә у тьма йә у бир накьн әве принсипе: «Дәйндар дьбә хӧламе дәйндайи» (Мәтʹлк. 22:7). Шәйтʹан һәма әве йәке дьхԝазә ԝәки әм һʹәму ԝәʹде хԝә у ԛәԝата хԝә хәрщ кьн у бьбьнә хӧламед ве дьнйайе. Бәле, әм гәрәке мьԛати хԝә бьн, ԝәки сафикьрьнед ӧса нәкьн кӧ мә бькьнә хӧлам. Мәсәлә, һәрге әм пʹәре ԛальм дәйни һьлдьдьн сәва там бькʹьрьн, йан хԝәндьна бьльнд бьстиньн, йан жи авта бьһа бькʹьрьн, әм дькарьн сәр гәләк сала бькʹәвьнә бьн дәйна. Ләма жи аԛьлайи йә, кӧ пәй пʹәра нәкʹәвьн, дәйна нәкьнә стуйе хԝә у пʹәре хԝә рʹаст хәрщ кьн. Ӧса ԝе тʹӧ тьшт рʹе мә нәгьрә кӧ Хԝәдерʹа хӧламтийе бькьн у нәбьнә хӧламед комерсйа ве дьнйайе (1 Тимтʹ. 6:10).
(2 Тимотʹейо 2:23) Тӧ хԝә жь дә′ԝ-дозед ахмахә бефә′м дур бьгьрә, чьмки тӧ зани кӧ шәр′ жь ԝан пешда тен.
ԝ14 15/7 14 ¶10
Щьмәʹта Йаһоԝа «жь Нәһәԛийе» Хԝә Дур Дьгьрьн
10 Иро щьмәʹта Йаһоԝа гәләк щар рʹасти проблемәкә ӧса найе, ча рʹабәрибун дь щьватеда. Чь жи һәбә, гава әм рʹасти һинкьрьнед ԛәлп тен, әм гәрәке дәрбера ԝана инкʹар кьн у фьрԛи тʹӧнә канийа ԝан чь йә. Ԝе баш ә тʹәви ԝан нәкʹәвнә шәрʹ-дәʹԝа нә шәхси, нә жи бь коментарийед хԝә ль сәр малпәред ԝани сосийал, нә жи бь щурʹе дьн. Һәла һәрге әм дьфькьрьн кӧ ӧса әм дькарьн али кәсәк бькьн, йәкә әм нахԝазьн һәләԛәтийа хԝә тʹәви ԝан чекьн, чьмки әв йәк мьԛабьли принсипед Кʹьтеба Пироз ә, кʹижан кӧ мә ньһа шеԝьр кьр. Ча щьмәʹта Йаһоԝа, әм бь тʹәмами жь рʹабәра хԝә дур дьгьрьн у ԝана инкʹар дькьн.
Хԝәндьна Кʹьтеба Пироз
(2 Тимотʹейо 1:1-18) Жь Паԝлосе бь ә′мьре Хԝәде шандийе Мәсиһ Иса бона ԝи созе жийине, йа кӧ бь сайа Мәсиһ Иса йә, 2 Тимот′ейойе лаԝе хԝәйи дәлалр′а: Дә бьра р′ә′м, к′әрәм у ә′дьлайи жь Бав Хԝәде у Мәсиһ Исайе Хӧдане мә ль тә бә. 3 Әз жь Хԝәде р′ази мә, кӧ мина пешийед хԝә бь исафа р′ьһ′әт ԝир′а хӧламтийе дькьм, һәр гав шәв у р′ож нава дӧайед хԝәда тә бир тиньм. 4 Гава әз һесьред тә тиньмә бира хԝә, дьк′әвьмә дәмана дитьна тә, ԝәки шабун бьк′әвә дьле мьн. 5 Әз ԝе баԝәрийа тәйә дьле сах тиньмә бира хԝә, йа кӧ бәре щәм пирька тә Лойисе у дийа тә Әйньке һәбу у әз баԝәр ьм, кӧ йа тә жи һәйә. 6 Бона ԝе йәке әз дькьм бира тә, кӧ тӧ агьре п′ешк′еша Хԝәде һе гӧр′ ки, йа кӧ бь дәстданина мьн тәр′а һатә дайине. 7 Чьмки Хԝәде р′ӧһ′әки тьрсе нәда мә, ле Йе ԛәԝате, һ′ьзкьрьне у хԝәгьртьне. 8 Аԝа шәрм нәкә, кӧ бона Хӧдане мә шә′дәтийе бьди, нә жи бона мьн шәрм бькә, кӧ әз бона наве ԝи гьрти мә. Ле т′әви щәфайе Мьзгинийе бә, анәгори ԛәԝата Хԝәде. 9 Хԝәде әм хьлаз кьрьн, пирозийер′а гази кьрьн, нә кӧ бона кьрьнед мә, ле ль гора ԛьрар у к′әрәма хԝә. Әва к′әрәма бь сайа Мәсиһ Иса, әԝ һе дәԝред бәреда мәр′а һатә дайине. 10 Ле ньһа бь хӧйабуна Хьлазкьре мә Мәсиһ Иса ә′йан бу, кӧ мьрьн бәтал кьр у жийина бе мьрьн, бь Мьзгинийе р′онайи кьр. 11 Ве Мьзгинийер′а әз даннасинкьр, шанди у дәрсдар һатьмә к′ьфшкьрьне 12 у ләма әз ви щәфайи дьк′ьшиньм. Ле әз шәрм накьм, чьмки заньм мьн баԝәрийа хԝә к′е анийә у гӧман ьм жи, кӧ әԝи чь кӧ спартийә мьн, ԝе һ′әта ԝе Р′оже жи хԝәй кә. 13 Тӧ хԝә ль ԝи нәхше һинкьрьна сахләм бьгьрә, йа кӧ тә жь мьн бьһист у нава ԝе баԝәри у һ′ьзкьрьнеда бьминә, к′ижан жь Мәсиһ Иса п′ара мә к′әт. 14 Әԝ тьштед ԛәнщә кӧ ль тә һатьнә спартьне бь ԝи Р′ӧһ′е Пирози нава мәда хԝәй кә. 15 Тӧ зани әԝед кӧ ԛәза Асйайеда бун пьшта хԝә данә мьн, Фугәло у Һермохенис жи т′әви ԝан. 16 Бьра Хӧдан р′ә′ма хԝә ль мала Онисифоро бькә, чьмки әԝи гәләк щара дьле мьн р′ьһ′әт кьр, жь гьртьна мьн шәрм нәдькьр, 17 ле гава һатә Р′омайе, гәләки ль мьн гәр′ийа, һ′әта әз дитьм, 18 (дә бьра Хӧдан бьде, кӧ әԝ ԝе Р′оже р′ә′ме жь Хӧдан бьбинә) у Әфәседа жи әԝи чьԛас мьнр′а хьзмәтк′ари кьр, тӧ р′ьнд зани.
12-18 ТʹӘБАХЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ТИТО 1-ФЬЛИМОН
«Рʹуспийа Кʹьфш кьн»
(Тито 1:5-9) Бона ԝе йәке мьн тӧ ль Кьретайе һьшти, ԝәки чь кемаси һәбьн бини сери у һәр бажарәкида бәрпьрсийара к′ьфш ки, чаԝа мьн әв т′әми ль тә кьр: 6 Гәрәке бәрпьрсийар беләк′ә бә, мере жьнәке бә, зар′ед ԝи баԝәрмәнд бьн, йед кӧ бона авитийе йан жи бона нәгӧһдарийе нәк′әтьнә нава дәв-дьрана. 7 Бәле сәрԝер чаԝа малкьре Хԝәде, гәрәке беләк′ә бә: Нә сәрһ′ьшк, нә һерс, нә пәй шәраве к′әти, нә сьр′тук, нә пәй к′әда һ′әрам, 8 ле меванһ′ьз, херхԝаз, аԛьлда гьран, сәр р′астийе, Хԝәдер′а дайи, хԝәгьрти. 9 Гәрәке ԝе готьна амьн ԛәԝин бьгьрә, чаԝа кӧ һин буйә, ԝәки бькарьбә бь һинкьрьна сахләм дьл бьдә йед майин у шашийед мьԛабьла бьдә р′уйе ԝан.
ԝ14 15/11 28-29
Пьрсед Хԝәндәвана
Рʹаст ә Ньвисаред Пирозда һур бь һур найе готьне, ԝәки чь щурʹәйи бәре бьра дьһатьнә кʹьфшкьрьне, ле йәкә әм дькарьн һьнә тьшт дәрһәԛа ве йәке пебьһʹәсьн. Мәсәлә, гава Паԝлос у Барнабас вәдьгәрʹийан мал жь рʹевитийа хԝәйи пешьн, әԝана һәр щьватәкеда рʹуспийа кʹьфш дькьрьн у «бь р′ожи дӧа кьрьн у әԝ спартьнә ԝи Хӧдане кӧ баԝәр кьрьбун» (Кʹр. Шд. 14:23). Чәнд сал шунда, Паԝлосе шанди ньвиси һәвалпʹаре хԝәрʹа тʹәви кʹижани кӧ әԝ дькʹәтә рʹевитийе: «Бона ԝе йәке мьн тӧ ль Кьретайе һьшти, ԝәки чь кемаси һәбьн бини сери у һәр бажарәкида бәрпьрсийара к′ьфш ки, чаԝа мьн әв т′әми ль тә кьр (Тито 1:5). Тʹимотʹейо, кʹижан кӧ тʹәви Паԝлосе шанди тʹьме рʹевитийеда бу, изьна ԝи жи һәбу рʹуспийа кʹьфш кә (1 Тимтʹ. 5:22). Зәлал ә, ԝәки бәрпьрсийаред рʹеви рʹуспийа кʹьфш дькьрьн, нә кӧ шанди йан жи рʹуспийед Оршәлиме.
Кʹома Рʹебәрийе йа Шәʹдед Йаһоԝа, һьлда һʹәсаб әԝ чь кӧ Кʹьтеба Пироз дьбежә дәрһәԛа кʹьфшкьрьна рʹуспийа у бәрдәстийед щьвате. Ләма жи ԝана әв кʹьфшкьрьн һәвәки гӧһаст. Жь 1 Илоне мәһа 2014 рʹуспийа ви щурʹәйи кʹьфш дькьн: Бәрпьрсийаре рʹеви рʹьнд леколин дькә һәла мьһала хԝәда әԝ кʹи дькарә кʹьфш кә ча бьред щабдар. Ԝәʹде сәрледана щьвата, әԝ һьлдьдә һʹәсаб гьлийе рʹуспийа дәрһәԛа ԝан бьра, кʹи кӧ дькарә ча рʹуспи хьзмәт кә. Әԝ тʹәви ԝана дәрдькʹәвә хьзмәте һәрге дьбә. Чахе бәрпьрсийаре мьһале тʹәви кʹома рʹуспийед щьвате шеԝьр дькә дәрһәԛа кʹьфшкьрьна ԝан бьра, әԝ дькарә сафи кә кʹьфш кә рʹуспийа у бәрдәстийед щьвате ве мьһаледа. Әв щурʹе кʹьфшкьрьне гәләк мина йа ԛьрна йәке йә.
Әԝед кӧ ве йәкеда кʹар дькьн, рола ԝан чь йә? Ча һәргав, щабдарийа «хӧламе амьн у сәрԝах» әԝ ә, ԝәки «ԝәхтда хԝарьна» рʹӧһʹани бьдә (Мәтта 24:45-47). Әв те һʹәсабе, ԝәки бьн рʹебәрийа рʹӧһʹе пироз, хӧламе амьн у сәрԝахт Хәбәра Хԝәде леколин дькә, сәва кӧ бьдә рʹебәри дәрһәԛа хәбьтандьна принсипед Кʹьтеба Пироз, кӧ гьредайи йә тʹәви тʹәрбәтийа щьватед һʹәмдьнйайе. Хӧламе амьн у сәрԝахт, ӧса жи кʹьфш дькә һʹәму бәрпьрсийаред рʹеви у әндәмед Комитейа Филиале. Филиал жи аликʹарийе дьдә, ԝәки рʹебәрийа ԝан рʹьнд бьдьнә хәбате. Ширәтед һәр рʹуспийед щьвате, гәрәке рʹьнд бенә леколинкьрьне, һәла әԝ бьра, кӧ дьхԝазьн ԝәк рʹуспи у бәрдәстийед щьвате хьзмәт кьн, принсипед Кʹьтеба Пироз дьдьнә хәбате йан на. Щабдарийа һәр бәрпьрсийаре мьһале әԝ ә, ԝәки бь дӧа бьфькьрә у леколин кә фькьред кʹома рʹуспийа дәрһәԛа кʹьфшкьрьна һьнә бьра, кӧ бьбьнә рʹуспи йан бәрдәстийед щьвате.
Хьзна Кʹьтеба Пироз Бьгәрʹьн
(Тито 1:12) Жь кьретийа һәма хут занәки ԝан жи готийә: «Кьрети т′ьме дәрәԝин ьн, әԝ р′ә′ԝьред хьраб ьн, у п′ьр′хӧред бехирәт ьн».
ԝ89 15/5 31 ¶5
Пьрсед Хԝәндәԝана
Әԝ ԛаил нәдьбу тʹәви бохданед һьнәка, йед кӧ щӧдәбун дькьрьнә ортʹа мьләта, һәла һе сәр Кьретийа жи. Паԝлос бешьк заньбу, ԝәки сәр Кьретайе һәбун Мәсиһийед баш, кʹижан кӧ Хԝәде хԝәш дьһатьн, у кʹижана Әԝи бь рʹӧһʹе пироз кʹьфш кьрьбу (Кʹаред Шандийа 2:5, 11, 33). Ԝе дәре епʹещә Мәсиһед амьн дьжитьн, у дькарьбун һәр бажарида щьват саз кьн. Рʹаст ә әԝ Мәсиһи нә кʹамьл бун, ле әм дькарьн баԝәр бьн, ԝәки әԝана дәрәԝа нәдькьрьн, тʹәмбәл нибун, ләма жи Хԝәде ԝана кʹәрәм дькьр (Филипи 3:18, 19; Әʹйанти 21:8). Чаԝа иро нава һәр мьләтида, һәнә мәрьвед дьлтʹәмьз, чаԝа кӧ ль Кьрите һәбун у кʹижан кӧ дьлтәнг дьбун, гава нормед навн-амусийе дьһатьнә инкʹаркьрьне. Әԝ мәрьв мьзгинийа хере бь һазьрбун ԛәбул дькьрьн (Һәзәԛел 9:4; бәрамбәри һәв кә тʹәви Кʹаред Шандийа 13:48).
(Фьлимон 15, 16) Бәлки бона ве йәке әԝ ԝәхтәке жь тә дур к′әт, кӧ әԝ һәр т′ьм бьбә п′ара тә, 16 нә кӧ чаԝа хӧлам, ле жь хӧламәки зедәтьр ә, чаԝа бьраки дәлал! Бона мьн әԝ чьԛаси дәлал ә, ле бона тә әԝе һе зедә бә, һьн алийе хӧламтийеда, һьн жи алийе Хӧданда.
ԝ08 15/10 31 ¶4
Фькьред Сәрәкә жь Нәмед Тито, Фьлимон у Ибрани
15, 16: Чьма Паԝлос нәхԝәст жь Фьлимон, ԝәки азайе бьдә Онисимо? Паԝлос дьхԝәст бь амьни шьхӧле хԝә бинә сери, ԝәки дәрһәԛа Пʹадшатийа Хԝәде әʹлам кә у һин кә дәрһәԛа Иса Мәсиһ. Ләма жи әԝи сафи кьр нәбә тʹәви проблемәкә бәлабуйи, чь кӧ дилтийева гьредайи бу (Кʹаред Шандийа 28:31).
Хԝәндьна Кʹьтеба Пироз
(Тито 3:1-15) Бькә бира щьмә′те, кӧ гӧр′а сәрԝер у һ′ӧкӧмәта бькьн, гӧһдар бьн у бона һ′әму кьрьнед ԛәнщ һазьр сәкьни бьн. 2 Кәсәки беһӧрмәт нәкьн, шәр′уд нибьн, ле мьлук бьн у ширьнайийа хԝә һьндава һ′әму мәрьвада бьдьнә к′ьфше. 3 Чьмки әм жи ԝәхтәке бефә′м бун, хԝәсәрихԝә, хальфи у хӧламед щур′ә-щур′ә тәмед хьраб у к′ефа дьле хԝә бун, мә нава хьрабийе у һ′әвсудийеда дьжит, әм мина мә′ре р′әш, ль бәр ч′ә′ве һәв р′әш бун. 4 Ле гава ширьнайи у һ′ьзкьрьна Хԝәде, Хьлазкьре мә хӧйа бу, 5 ԝи әм хьлаз кьрьн. Нә кӧ бона ԝан кьрьнед р′астә кӧ мә кьрьн, ле ль гора р′ә′ма хԝә әм хьлаз кьрьн, бь шуштьне әм ну дьне к′әтьн у бь Р′ӧһ′е Пироз нуйәжийин бун. 6 Ԝи Хԝәдейи әԝ Р′ӧһ′ бь мәр′дани сәр мәда баранд, бь дәсте Иса Мәсиһе Хьлазкьре мә, 7 ԝәки бь к′әрәма ԝи әм р′аст бен һ′әсабе у бь ԝе гӧмане жийина һ′әта-һ′әтайе ԝар бьн. 8 Ве готьнеда хельф т′ӧнә. У әз дьхԝазьм кӧ тӧ ван тьшта ә′сәйи ки, ԝәки йед кӧ Хԝәде баԝәр дькьн, хирәт кьн, тьштед ԛәнщ бькьн. Әвана мәрьвар′а ԛәнщ у к′ар ьн. 9 Ле тӧ хԝә жь дә′ԝ-дозед ахмахти, р′әԛәма сьлсьләта, һәвр′ьк′ийе у шәр′-дә′ԝед ль сәр Ԛануне дур бьгьрә, чьмки әԝ бекер у бек′ар ьн. 10 Жь йе кӧ бет′ьфаԛийе дькә, щарәке-дӧда ширәт кә дур к′әвә. 11 Тӧ зани кӧ йе ӧса хальфи у гӧнәк′ар ә, әԝ хԝәха диԝане сәр хԝәда тинә. 12 Гава Артәмас йан Тьхико әз бьшиньмә щәм тә, бькә кӧ бейи Никополисе, щәм мьн, чьмки мьн ԛьрар да зьвьстана хԝә ль ԝьр дәрбаз кьм. 13 Зенасе ԛанунзан у Аполо зу вәр′екә, ӧса бә кӧ әԝ р′ева кемасийа тьштәки нәбиньн. 14 Йед жь мә жи бьра һин бьн, пәй кьрьнед ԛәнщ бьн, ԝәки кери һ′әԝщәтийа мәрьвайе бен у бе бәр нәбьн. 15 Һ′әмуйед т′әви мьн ль тә сьлав дькьн. Сьлаве бьдә ԝан, йед кӧ баԝәрийеда мә һ′ьз дькьн. К′әрәма Хԝәде ԝә һ′әмуйар′а бә.
19-25 ТʹӘБАХЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ИБРАНИ 1-3
«Рʹастийе Һʹьз Бькьн у Нәһәԛийе Нәфрʹәт Бькьн»
(Ибрани 1:8) Ле бәле бона Кӧр′ Хԝәде дьбежә: «Тʹәхте тә Хԝәдейо, т′әхте һ′әта-һ′әтайе йә, шьва п′адшатийа тә шьва р′астийе йә.
ԝ14 15/2 5 ¶8
Сьлав кьн Мәсиһ, Пʹадшайе Рʹумәткьри!
8 Дь сала 1914-да, Йаһоԝа Кӧрʹе хԝә кʹьфш кьр ча Пʹадше әʹзмани. Шьва пʹадшатийе йане «шьва һәԛийе», щәм ԝи һәйә, ләма жи әм дӧдьли набьн, ԝәки сәрԝертийа ԝи, ԝе һәԛ у рʹаст бә. Һʹӧкӧмәтийа Иса йа ԛануни йә, чьмки Йаһоԝа хԝәйе тʹәхте ԝи йә. Демәк Йаһоԝа йә һʹиме пʹадшатийа ԝи. Хенщи ԝе йәке, тʹәхте Иса ԝе һәрһәйи бә. Әм гәрәке фьрнаԛ бьн, кӧ дькарьн Йаһоԝарʹа хьзмәт кьн, бьн сәрԝертийа пʹадше ԝийи кʹьфшкьри.
(Ибрани 1:9) Тә һәԛи һ′ьз кьр, нәһәԛи жь бәр ч′ә′ве хԝә авит, ләма жи ԝи Хԝәдейи, Хԝәдейе тә тӧ жь һәвалед тә зедәтьр кьри, бь р′уне шабуне тӧ к′ьфш кьри».
ԝ14 15/2 4-5 ¶7
Сьлав кьн Мәсиһ, Пʹадшайе Рʹумәткьри!
7 Бьхунә Зәбур 45:6, 7. Иса рʹастийе һʹьз дькьр у нәфрʹәт дькьр һʹәму тьштед кӧ Баве ԝи беһʹӧрмәт дькьрьн. Йаһоԝа Иса кʹьфш кьр ча Пʹадше Пʹадшатийа хԝә. Хԝәде, Иса бь «рʹуне шабуне» жь «һәвалед» ԝи, зедәтьр кʹьфш кьр, демәк жь пʹадшед Щьһудайе жь рʹькʹьнйата Давьд. Чьма әм дькарьн ӧса бежьн? Бәри пешьн, чьмки Иса бь дәсте Йаһоԝа һатьбу кʹьфшкьрьне. Ӧса жи Йаһоԝа, әԝ ԝәк Пʹадша у Сәроккʹаһин кʹьфш кьр (Зәб. 2:2; Ибрн. 5:5, 6). Хенщи ԝе йәке, Иса нә бь рʹун һатьбу кʹьфшкьрьне, ле бь рʹӧһʹе пироз, у пʹадшатийа ԝи йа әʹзмани йә.
Хьзна Кʹьтеба Пироз Бьгәрʹьн
(Ибрани 1:3) Әԝ нура р′умәта Хԝәде йә, хут мина һәйинтийа ԝи йә, әԝ бь ԛәԝата хәбәра хԝә һәр тьшти хԝәй дькә. Гава ԝи мәщала шуштьна гӧнед мәрьва һазьр кьр, ль жор һәрәма мәзьнайийа Хԝәдейә р′асте р′уньшт.
it-1 1185 ¶1
Шькьл
Гәло Иса тʹьме нура рʹумәта Баве хԝә, ԝәк һәв әʹйан дькьр?
Кӧрʹе Хԝәдейи тайе-тʹәне, кʹижан кӧ паше бу бәндә, демәк Иса, сурәте Баве хԝә йә (2 Корн. 4:4). Хԝәде Кӧрʹе хԝәрʹа ԝан гьлийа готьбу: «Әм мәри дьлԛе хԝәда у мина хԝә бьхӧльԛиньн». Әв һәләԛәти ортʹа Бав у Кӧрʹ һьнгева дәстпебу, гава кӧрʹ һатә әʹфьрандьне (Дәстп. 1:26; Йуһʹн. 1:1-3; Колс. 1:15, 16). Чахе Иса ԝәк мәрьвәки кʹамьл ль сәр әʹрде бу, әԝи һәр дәрәщада бь тʹәмами хәйсәт-һӧнӧред Баве хԝә әʹйан дькьр (Йуһʹн. 14:9; 5:17, 19, 30, 36; 8:28, 38, 42). Әв һәләԛәти дьһа шьдийа, чахе Иса мина кәсе рʹӧһʹани һатә сахкьрьне. Әԝ ӧса жи алийе Баве хԝәда һатә хәлаткьрьне, гава «һ′әму һ′ӧкӧме ә′рд у ә′змен» ԝирʹа һатә дайине (1 Пәт. 3:18; Мәт. 28:18). Хԝәде Исарʹа щи у навәки ӧса да, кӧ жь һʹәму нава бьльндтьр ә. Жь ԝи чахи Иса һе зедә нурʹа рʹумәта Баве хԝә әʹйан дькә, нә кӧ пешийа ԝе йәке һʹәта кӧ бьһата сәр әʹрде (Фили. 2:9; Ибрн. 2:9). Иро Иса «хут мина һәйинтийа» Хԝәде йә (Ибрн. 1:2-4).
(Ибрани 1:10-12) У аһа жи дьбежә: «Йа Хӧдан, тә пешийе һ′име дьнйайе дани у ә′зман кьред дәстед тә нә. 11 Әԝе ԝеран бьн һәр′ьн, ле те бьмини, һ′әмуйе мина щьла бьп′ьзьньн. 12 Те ԝан һәв бьп′еч′и мина ԛап′ут, мина к′ьнща ԝе бенә гӧһастьне. Ле тӧ диса әԝ и у салед тә ԝе кем нәбьн».
it-1 1063 ¶7
Әʹзман
Гьлийе жь Зәбура 102:25, 26 дәрһәԛа Йаһоԝа Хԝәде нә. Ле Паԝлосе шанди ԝан гьлийа да хәбате сәр Иса Мәсиһ, чьмки һʹиме дьнйайе бь аликʹарийа Кӧрʹе Хԝәдейи тайе-тʹәне һатьбу әʹфьрандьне. Паԝлос гот ԝәки әʹфьрандьна Иса, нә мина әʹфьрандьна тьштед физики нә, кʹижана кӧ Хԝәде һәрге бьхԝазә дькарә мина щьла бьпʹьзьринә (Ибрн. 1:1, 2, 8, 10-12; бәрамбәри һәв кә тʹәви 1 Пәт. 2:3).
Хԝәндьна Кʹьтеба Пироз
(Ибрани 1:1-14) Гәләк щара у бь гәләк щур′а Хԝәде пешда пе п′ехәмбәра кал-бавед мәр′а хәбәр дайә, 2 ле ван р′ожед ахьрийеда пе Кӧр′е хԝә мәр′а хәбәр да, к′ижан кӧ к′ьфш кьр, ԝәки ахьрийе бьбә хԝәйиԝаре һәр тьшти у бь ԝи жи ә′рд у ә′зман ә′фьранд. 3 Әԝ нура р′умәта Хԝәде йә, хут мина һәйинтийа ԝи йә, әԝ бь ԛәԝата хәбәра хԝә һәр тьшти хԝәй дькә. Гава ԝи мәщала шуштьна гӧнед мәрьва һазьр кьр, ль жор һәрәма мәзьнайийа Хԝәдейә р′асте р′уньшт. 4 Кӧр′ һаԛаси жь мьлйак′әта жортьр к′әт, чьԛаси әԝ наве кӧ ԝи станд жь навед ԝан мәстьр ә. 5 Чьмки Хԝәде т′ӧ мьлйак′әтир′а аһа нәготийә: «Тӧ Кӧр′е мьн и, тӧ иро мьнр′а буйи» у диса: «Әзе бьбьм баве ԝи, әԝе жи бьбә Кӧр′е мьн». 6 У гава Хԝәде ньхӧрийе хԝә дьшинә дьнйайе, аһа жи дьбежә: «Бьра һ′әму мьлйак′әтед Хԝәде сәре хԝә бәр ԝи дайньн». 7 Ле бона мьлйак′әта аһа дьбежә: «Әԝ мьлйак′әтед хԝә дькә ба у бәрдәстийед хԝә алава егьр». 8 Ле бәле бона Кӧр′ Хԝәде дьбежә: «Т′әхте тә Хԝәдейо, т′әхте һ′әта-һ′әтайе йә, шьва п′адшатийа тә шьва р′астийе йә. 9 Тә һәԛи һ′ьз кьр, нәһәԛи жь бәр ч′ә′ве хԝә авит, ләма жи ԝи Хԝәдейи, Хԝәдейе тә тӧ жь һәвалед тә зедәтьр кьри, бь р′уне шабуне тӧ к′ьфш кьри». 10 У аһа жи дьбежә: «Йа Хӧдан, тә пешийе һ′име дьнйайе дани у ә′зман кьред дәстед тә нә. 11 Әԝе ԝеран бьн һәр′ьн, ле те бьмини, һ′әмуйе мина щьла бьп′ьзьньн. 12 Те ԝан һәв бьп′еч′и мина ԛап′ут, мина к′ьнща ԝе бенә гӧһастьне. Ле тӧ диса әԝ и у салед тә ԝе кем нәбьн». 13 К′ижан мьлйак′әтир′а Хԝәде готийә: «К′еләка мьнә р′асте р′уне, һ′әта әз нәйаред тә бькьмә бьне п′ийед тә»? 14 Иди мьлйак′әт чь нә? Әԝ һ′әму жи р′ӧһ′ед бәрдәсти нә, кӧ бона хьзмәтк′арийа ԝан тенә шандьне, йед кӧ хьлазбуне ԝе ԝар бьн.
26 ТʹӘБАХЕ-1 ИЛОНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | ИБРАНИ 4-6
«Әм Бьхәбьтьн кӧ Бькʹәвьнә Рʹьһʹәтийа Хԝәде»
(Ибрани 4:1) Аԝа әԝ созе кӧ бона к′әтьна нава р′ьһ′әтийа ԝи һе дьминә, ләма гәрәке әм һаш жь хԝә һәбьн, кӧ жь ԝә т′ӧ кәс жь ԝе р′ьһ′әтийе нәминә.
(Ибрани 4:4) Щики бона р′ожа һ′әфта аһа һатийә готьне: «У Хԝәде р′ожа һ′әфта жь һ′әму шьхӧлед хԝә р′ьһ′әт бу».
ԝ11 15/7 24-25 ¶3-5
Чь йә Рʹьһʹәтийа Хԝәде?
3 Дӧ хәз һәнә кʹижан кӧ избат дькьн, ԝәки ԛьрна йәке Д.М.-да рʹожа һʹәфта һе бәрдәԝам дьбу. Пешийе дәрһәԛа ве йәке гьлийе Иса дьдьнә кʹьфше, кʹижан кӧ әԝи нәйарарʹа дьгот, йед кӧ ԝи сущдар дькьрьн бона ԛәнщкьрьна мәрьва ль рʹожа Шәʹмийе. Хӧдан готә ԝан: «Баве мьн һ′әта ньһа шьхӧле хԝә дькә, әз жи дькьм» (Йуһʹн. 5:16, 17). Бь ве йәке Иса чь дьхԝәст бьгота? Иса ве йәкеда сущдар дькьрьн, кӧ әԝ ль рʹожа Шәʹмийе дьхәбьти. Ләма жи бь ԝан гьлийа «Баве мьн һ′әта ньһа шьхӧле хԝә дькә, әз жи дькьм», Иса щаба нәйара да. Бь ве йәке әԝи ча бежи ԝанарʹа гот: «Әз Баве хԝәва, шьхӧләки дькьн. Баве мьн бәрдәԝам дькә ль рʹожа Шәʹмийе дьхәбьтә, кʹижан кӧ ида чәнд һʹәзар сала дькʹьшинә, ләма изьна мьн жи һәйә бьхәбьтьм рʹожа Шәʹмийе». Демәк Иса дьхԝәст бьгота, ԝәки рʹожа Шәʹмийейә һәри мәзьн йа рʹьһʹәтийа Хԝәде, ԝе рʹожед ԝида хьлаз нәбә.
4 Хәза дӧда йа избатийе, Паԝлосе шанди әʹйан дькә. Әԝ дьԝәкʹьлинә гьлийе жь Дәркʹәтьн 2:2, кʹидәре кӧ дәрһәԛа рʹьһʹәтийа Хԝәде те готьне. Жь бина бәр Хԝәде Паԝлос ньвиси: «Әм кӧ баԝәр дькьн, әме бьк′әвьнә ԝе р′ьһ′әтийе» (Ибрн. 4:3, 4, 6, 9). Демәк рʹожа Шәʹмийе ԝәʹде Паԝлосда бәрдәԝам дьбу. Ле рʹожа рʹьһʹәтийе чьԛас гәрәке бькʹьшинә?
5 Сәва кӧ щаба ве пьрсе бьдьн, гәрәке бькьнә бира хԝә, ԝәки рʹожа һʹәфта сәва чь бу. Дәркʹәтьн 2:3-да те готьне: «Хԝәде дӧа р′ожа һ′әфта кьр у әԝ пироз кьр». Демәк әве рʹоже Йаһоԝа пироз кьр, йане башԛә кьр, сәва кӧ һʹәта хьлазийе ԛьрара хԝә бинә сери. Ԛьрара Хԝәде жи әв ә, ԝәки мәрьвед гӧһдар әʹрде тʹьжә кьн у хԝәйитийе ле бькьн (Дәстп. 1:28). Сәва әве ԛьрара хԝә бинә сери, Йаһоԝа Хԝәде у Иса Мәсиһ, «Хӧдане р′ожа шәмийе», һʹәта ньһа шьхӧл дькьн (Мәт. 12:8). Рʹожа рʹьһʹәтийа Хԝәде ԝе һаԛас бькʹьшинә, һʹәта кӧ ԛьрара ԝи бьгьһижә нета хԝә. Әв йәк ԝе бьԛәԝьмә хьлазийа Һʹәзарсалийа сәрԝертийа Иса.
(Ибрани 4:6) Аԝа һьнәке бьк′әвьнә ԝе р′ьһ′әтийе, ле әԝе кӧ пешда мьзгини бьһистьбун жь дәст нәбаԝәрийе нәк′әтьне.
ԝ11 15/7 25 ¶6
Чь йә Рʹьһʹәтийа Хԝәде?
6 Хԝәде ԛьрара хԝә Адәм у Һеԝайерʹа зәлал шьроԝәкьр, ле әԝана йәкә хԝәстьн бь сәре хԝә бькьн. Һәмьки Адәм у Һеԝа һьнге мәрьвед пешьн бун, кӧ рʹийа нәгӧһдарикьрьне бьжартьн. Бь милйона мәрьв чʹәʹв данә ԝан. Һәла һе щьмәʹта Хԝәдейи бьжарти, Исраел жи, нәгӧһдарийа хԝә да кʹьфше. Паԝлосе шанди Мәсиһийед ԛьрна йәкерʹа гот, ԝәки һьнәка жь ԝан ԝәк Исраелийед бәре, дькарьбун бькʹәтана ве тʹәльке. Әԝи ньвиси: «Аԝа әм бькьн кӧ бьк′әвьнә ԝе р′ьһ′әтийе, ԝәки т′ӧ кәс мина нәбаԝәрийа ԝан нәк′әвә р′ожа ԝан» (Ибрн. 4:11). Дина хԝә бьдьн, Паԝлос гот, кӧ жь бо нәгӧһдарийе бәндә ԝе нькарьбә бькʹәвә рʹьһʹәтийа Хԝәде. Әв чь те һʹәсабе бона мә? Гәло дькарә ӧса бьԛәԝьмә, кӧ жь бо нәһәԛийа һьмбәри ԛьрара Хԝәде, әме нәкʹәвьнә рʹьһʹәтийа Хԝәде? Һәмьки щаба ве пьрсе гәләк фәрз ә бона мә, у әме әве йәке шеԝьр кьн. Ле серида ԝәрен пебьһʹәсьн, чьма щьмәʹта Исраеле нәкʹәтә рʹьһʹәтийа Хԝәде, у әм чь дькарьн жь ве йәке һин бьн.
(Ибрани 4:9-11) Аԝа бона щьмә′та Хԝәде һе р′ожәкә р′ьһ′әтийе мина р′ожа шәмийе һәйә. 10 Бәле әԝе кӧ дьк′әвә р′ьһ′әтийа Хԝәде, әԝ иди жь шьхӧлед хԝә р′ьһ′әт дьбә, чаԝа Хԝәде жи жь шьхӧлед хԝә. 11 Аԝа әм бькьн кӧ бьк′әвьнә ԝе р′ьһ′әтийе, ԝәки т′ӧ кәс мина нәбаԝәрийа ԝан нәк′әвә р′ожа ԝан.
ԝ11 15/7 28 ¶16-17
Рʹьһʹәтийа Хԝәде; Әв Чь йә?
16 Иро һьнәк ьн Мәсиһийед ӧса, кʹижан кӧ ԝе сәр йа хԝә бьсәкьньн у бежьн, ԝәки сәва хьлаз бьн әм гәрәке һьнә пʹаред жь ԛануна Муса биньн сери. Гьлийе Паԝлосе шанди Әфәсийарʹа зәлал ьн: «Чьмки бь к′әрәме һун хьлазбуйи нә, пе баԝәрийе у әв йәк нә жь ԝә йә, ле дайина Хԝәде йә. Әв йәк нә жь кьрьна йә, ԝәки йәк п′әйе хԝә бьдә» (Әфәс. 2:8, 9). Чь щурʹәйи иро Мәсиһи дькарьн бькʹәвьнә рʹьһʹәтийа Хԝәде? Йаһоԝа рʹожа һʹәфта башԛә кьр, йане рʹожа рʹьһʹәтийа ԝи, сәва кӧ ԛьрара хԝәйә сәрәкә бона әʹрде бинә сери. Әм дькарьн бькʹәвьнә рʹьһʹәтийа Йаһоԝа, йан жи ве йәкеда тʹәви ԝи бьбьнә йәк, һәрге бь гӧһдари ль гора ԛьрара ԝи бьхәбьтьн, кʹижан кӧ бь сайа тʹәшкиләта ԝи мәрʹа вәдьбә.
17 Алийе дьнва, һәрге мәйе нәхԝәста һәр ширәтед Кʹьтеба Пироз һьлда һʹәсаб, кʹижан кӧ әм бь сайа хӧламе амьн у сәрԝахт дьстиньн, у хԝәсәрехԝә бькьрана, ӧса әме мьԛабьл ԛьрара Хԝәде дәркʹәтана, кʹижан кӧ һеди-һеди вәдьбә. Жь бо ве йәке һәләԛәтийа мә тʹәви Йаһоԝа дькарьбу хьраб буйа. Готара дьнда әме бьньһерʹьн чәнд дәрәщә, кʹижан кӧ ԝе али мә бькьн фәʹм бькьн һәла әм гӧрʹа Хԝәдеда ньн, йан на. Сафикьрьнед кӧ әм һәр дәрәщәда дькьн, ԝе бьдьнә кʹьфше, һәла әм кʹәтьнә рʹьһʹәтийа Хԝәде йан на.
Хьзна Кʹьтеба Пироз Бьгәрʹьн
(Ибрани 4:12) Хәбәра Хԝәде сах у зор ә у жь һәр шуре дӧдәви бьр′атьр ә, кӧ дәрбази һ′әта навбәра р′ӧһ′ у щан, һәсту у мәжу дьбә, нет у фькьред дьла жи ә′нәнә дькә.
ԝ16.09 13
Пьрсед Хԝәндәвана
Чь те һʹәсабе гьли «Хәбәра Хԝәде сах у зор ә», кӧ ньвисар ә Ибрани 4:12-да?
▪ Жь контексте те кʹьфше кӧ Паԝлосе шанди дәрһәԛа әʹламәтийа Хԝәде дьгот, демәк ԛьрара ԝи, кʹижан кӧ әм жь Кʹьтеба Пироз педьһʹәсьн.
Гәләк щар Ибрани 4:12 әʹдәбйәтед мәда бь ԝе нете те хәбьтандьне, кӧ бьдә кʹьфше ԝәки Кʹьтеба Пироз дькарә әʹмьре мәрьва бьгӧһезә, у әԝ йәк бь рʹастийе жи ӧса йә. Ле ԝе һе баш бә һәрге контекста ве рʹезе фәʹм кьн. Паԝлос Мәсиһийед Ибрани һелан дькьр, ԝәки әԝана пьштгьрийа нет-мәрәмед Хԝәде бькьн, демәк ԛьрара ԝи. Гәләк нет-мәрәмед Хԝәде, ньвисаред пирозда һатьнә ньвисаре. Паԝлос мәсәлә ани дәрһәԛа Исраелийа, йед кӧ бь сайа Хԝәде жь дилтийа Мьсьре аза бун. Исраели дькарьбун бькʹәтана әʹрде создайи кӧ «шир у һьнгьв же дькʹьшә», у кʹидәре кӧ ԝана дькарьбун рʹьһʹәти бьстандана (Дәркʹ. 3:8, ПКʹМ; Ԛан. Дщр. 12:9, 10).
Әԝ йәк ԛьрара Хԝәде бу. Ле гәләк Исраелийа дьле хԝә һʹьшк кьрьн у нәбаԝәри данә кʹьфше, ләма жи нәкʹәтьнә ви әʹрди, демәк рʹьһʹәтийе (Жьмар 14:30; Йешу 14:6-10). Ле Паԝлос гот кӧ созе «бона кʹәтьна нава рʹьһʹәтийа [Хԝәде]», диса жи ԛәԝатеда бу (Ибрн. 3:16-19; 4:1). Әʹйан ә, кӧ әԝ «соз» пʹарәкә жь ԛьрара Хԝәде бу. Мина Мәсиһийед Ибрани, әм жи дькарьн бьхуньн у пебьһʹәсьн дәрһәԛа ԛьрара Хԝәде, у пьштгьрийа ԛьрара ԝи бькьн. Паԝлос чәнд пʹар жь Дәстпебун 2:2, у Зәбур 95:11 да хәбате, сәва әʹйан кә, ԝәки әԝ соз сәр һʹиме Ньвисара йә.
«Созе кӧ бона кʹәтьна нава рʹьһʹәтийа ԝи һе дьминә», әв йәк дьле мә дьгьрә. Әв соз реали йә, кӧ әм дькарьн бькʹәвьнә нава рʹьһʹәтийа Хԝәдеда, чьмки Кʹьтеба Пироз әве йәке дьбежә. У сәва бькʹәвьнә ве рʹьһʹәтийе, мә гав авитийә. Ле мә әв гав авитийә нә кӧ чьмки пәй Ԛануна Муса чун, йан кьред баш кьрьн сәва ԛәбулкьрьна Хԝәде бьстиньн, ле мә әԝ кьр жь бо баԝәрийа хԝә һьндава Хԝәде. Әм бь шабуне пьштгьрийа ԛьрара ԝи дькьн, у бәрдәԝам дькьн ӧса бькьн. Гьли «Хәбәра Хԝәде» йа кӧ Ибрани 4:12-да ньвисар ә, ӧса жи дькарә бе һʹәсабе Кʹьтеба Пироз. У бь һʹәзара мәрьв нав тʹәмамийа дьнйайе дәстпедькьн һин бьн Кʹьтеба Пироз у педьһʹәсьн дәрһәԛа ԛьрара Хԝәде. Әве йәке али гәләка кьрийә кӧ әʹмьре хԝә бьгӧһезьн, баԝәрийе бьдьнә кʹьфше у бенә ньхӧмандьне. Гӧһастьнед кӧ әԝана әʹмьре хԝәда дькьн, избат дькә кӧ «Хәбәра Хԝәде» бь рʹастийе «сах у зор ә». Ԛьрара Хԝәде, кʹижан кӧ Кʹьтеба Пирозда әм педьһʹәсьн, ида ньһа әʹмьре мә алийе башда гӧһастийә, у ахьрийеда жи ԝе диса зорайа хԝә мәрʹа нишан кә.
(Ибрани 6:17, 18) Бь ве йәке Хԝәде хԝәст ԝанар′а, йед кӧ ԝе соз же бьстандана һе бьда к′ьфше, кӧ әԝ ԛьрара хԝә нагӧһезә, иди созе хԝә бь сондхԝарьне шьданд. 18 Аԝа иди дӧ тьшт һәнә, соз у сонде Хԝәдейә кӧ найенә гӧһастьне, к′ижанада набә кӧ әԝ дәрәԝ дәре. Ван һәр дӧ тьштада дьлдайинәкә мәйә ә′сәйи һәйә, кӧ әм ле сьт′ар бунә, ләма жи әм дькарьн хԝә бавежьнә ԝе гӧмана пешийа хԝә.
it-1 1139 ¶2
Һеви
Һевийа жийина һәрһәйи у нәрʹьзийайи, кʹижан кӧ һәвал-пʹаред әʹзмани ԝар дьбьн (Ибрн. 3:1), һʹимәки ԛәԝи йә у дькарьн бь тʹәмами итʹбарийа хԝә ве биньн. Әв йәк бь дӧ тьшта те ԛәԝикьрьне, ль кʹижанида Хԝәде дәрәԝа накә. Әв һәнә соз у сонде ԝи. У әв һеви Мәсиһва гьредайи йә, кʹижан кӧ ида ль әʹзменда әʹмьре нәмьри станд. Ләма жи, ль гора гьлийе Паԝлосе шанди, әв һеви «дьбә ләнгәрәкә һ′имгьрти у амьн, кӧ п′әр′да пирозгәһа ә′зменр′а дәрбази һьндӧр′е Щийе Һәри Пироз дьбә [ԝәк сәроккʹаһин дькʹәтә Р′ожа К′әԝандьне ль Щийе Һәри Пироз], ԝе дәра кӧ Иса чаԝа пешик′еш бона мә к′әтийе. Әԝ буйә сәрәкк′аһине һ′әта-һ′әтайе мина Мәлк′и-Садьԛ» (Ибрн. 6:17-20).
Хԝәндьна Кʹьтеба Пироз
(Ибрани 5:1-14) Һәр сәрәкк′аһинәк жь нав мәрьва те бьжартьне у к′ьфшкьрьне, кӧ бона мәрьва ль бәр Хԝәде бьсәкьнә, ԝәки һ′әди у ԛӧрбана бәр гӧна бьдә. 2 Әԝ чаԝа инсан дькарә бь дьле шәԝат к′омәка ԝанр′а бә, йед кӧ нәзан у хальфи нә, чьмки әԝ хԝәха жи нава кемасийада йә. 3 Ләма гәрәке әԝ чаԝа бона щьмә′те, ӧса жи бона хԝә ԛӧрбана бона гӧна бьдә. 4 Кәсәк хԝәсәрихԝә ви ԛәдьри настинә, ле т′әне әԝе кӧ жь Хԝәдеда те газикьрьне, чаԝа Һарун бу. 5 Ӧса жи Мәсиһ, нә кӧ хԝәха хԝә бьльнд кьр кӧ бьбә сәрәкк′аһин, ле Хԝәде әԝ бьльнд кьр у ԝир′а гот: «Тӧ Кӧр′е мьн и, тӧ иро мьнр′а буйи». 6 Чаԝа щики дьн жи дьбежә: «Тӧ һ′әта-һ′әтайе к′аһин и, мина Мәлк′и-Садьԛ». 7 Иса жийина хԝәйә ве дьнйайеда гәләки к′әсәр у бь һесьра лава у р′әща жь ԝи дькьрьн, йе кӧ дькарьбу әԝ жь мьрьне хьлаз бькьра у бона мьлукти у ельмийа ԝи һатә бьһистьне. 8 Р′аст ә әԝ Кӧр′е Хԝәде бу, ле диса бь ԝан щәфайед хԝә гӧһдарийе һин бу. 9 Гава ԝе йәкеда һатә к′амьлкьрьне, бона һ′әмуйед кӧ гӧһдарийа ԝи дькьн, әԝ бу канийа хьлазбуна һ′әта-һ′әтайе 10 у жь Хԝәде һатә навкьрьне «Сәрәкк′аһине мина Мәлк′и-Садьԛ». 11 Бона ве йәке гәләк тьштед мәйә готьне һәнә, ле шьровәкьрьна ван зә′мәт ә, чьмки гӧһада һун гьран бунә. 12 Р′астийе к′әвә һ′әта ньһа гәрәке һун дәрсдар буна, ле һун һе һ′әԝщә нә кӧ жь готьнед Хԝәде дәрсед пешьнә садә һин бьн. Һун һәла һе һ′әԝще шир ьн, нә кӧ хԝарьна гьран. 13 Әԝе кӧ ширхӧр ә, әԝ нькарә һинкьрьна р′астийе бьмәһ′инә, чьмки дәргуш ә. 14 Ле хԝарьна гьран бона мәрьвед гьһишти йә, йед кӧ сәԝдайе хԝәда к′әти-р′абуйи нә, ԛәнщи у хьрабийе жь һәв дәрдьхьн.