Кани бона «Бәрнама Щьвине, Бьжин у Хьзмәт кьн»
2-8 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 САМУЙЕЛ 27-29
«Щурʹе Шәрʹкьрьна Даԝьд»
it-1 41
Акʹиш
Чахе Даԝьд хԝә жь Шаԝул вәдьшарт, әԝи дӧ щара хԝәрʹа щи-сьтʹар сәр ви әʹрди дит, йе кӧ бьн сәрԝертийа Акʹиш Пʹадшада бу. Щара пешьн чахе Фьльстийа шьк бьрьн у фькьрин ԝәки Даԝьд дьжмьн ә, Даԝьд хԝә дәԝса дина дани. Акʹиш Пʹадша ле бәрʹда, чьмки фькьри ԝәки әԝе беһʹьш ԝе нькарьбә зийане бьдә кәсәки (1 См. 21:10-15; Зб. 34:Бьнсәри; 56:Бьнсәри). Ле щара дӧда тʹәви Даԝьд 600 әскәр малбәтед хԝәва һатьн у Акʹиш ԝана Зиклагеда щиԝар кьр. Әԝана саләк у чар мәһа ԝедәре ман. Акʹиш баԝәр бу ԝәки Даԝьд тʹәви әскәред хԝә һʹьщуми сәр бажаред Щьһудайе дькьрьн, ле бь рʹасти Даԝьд мьләтед Гәшурийа, Гирзийа у Амалекийа дьшеланд (1 См. 27:1-12). Акʹиш Пʹадша ӧса һатә хапандьне, кӧ чахе Фьльстийа дьхԝәстьн һʹьщуми сәр Шаԝул Пʹадша кьра, әԝи Даԝьд кьрә нобәдаре хԝә, у чахе сәрԝеред Фьльстийа сәр йа хԝә сәкьнин, һьнге Акʹиш Даԝьд у әскәред ԝи пашда шандә Зиклаге (1 См. 28:2; 29:1-11). Чахе Даԝьд бу Пʹадша, у тʹәви Гат шәрʹ дькьр, ча те кʹьфше Акʹиш нәһатьбу кӧштьне. Әԝ һәла һе ԝәʹде пʹадшатийа Сьлеманда жи сах бу (1 Пʹд. 2:39-41; бьньһерʹә ГАТ).
ԝ21.03 4 ¶8
Бьред Щаһьл–Һун Чаԝа Дькарьн Итʹбарийа Хушк-Бьра Ԛазанщ кьн?
8 Даԝьд рʹасти зәʹмәтед дьн жи дьһат. Мәсәлә, паши кӧ әԝ һатә рʹункьрьне кӧ бьбә пʹадша, гәләк сал дәрбаз бун һʹәта кӧ әԝ бу пʹадша (1 Сам. 16:13; 2 Сам. 2:3, 4). Ԝәхта кӧ Даԝьд һивийа ве йәке бу, гәло чь али ԝи дькьр кӧ әԝ сәбьр бькә? Даԝьд бош-бәтал рʹунәдьньшт, ле әԝи шьхӧлед керһати дькьрьн. Мәсәлә, гава әԝ ча кʹочʹбәр ԝәлате Фьльстийада дьжит, әԝи тʹәви дьжмьнед Исраелийа шәрʹ дькьр. Бь ви аԝайи, әԝи синоред һәрема Щьһуда дьпарастьн (1 Сам. 27:1-12).
it-2 245 ¶6
Дәрәԝи
Кʹьтеба Пирозда те сущдаркьрьне әв дәрәԝи, йа кӧ бь нета хьраб те кьрьне. Ле мәрьв борщдар нинә әʹламәтийа рʹаст бьдә ԝан мәрьва, изьна кʹижана тʹӧнә дәрһәԛа ве йәке пебьһʹәсьн. Иса Мәсиһ гот: «Тьште бӧһӧрти нәдьнә са у нә жи дӧрʹед хԝә бавежьнә бәр бәраза. Һәгәр на, бәразе ԝан бьн ньгед хԝәда пʹепәс кьн у сәйе жи вәгәрʹьн ԝә бьдьрʹиньн» (Мт. 7:6). Ләма жи Иса һәр тьшт нә дьгот у щаба һьнә пьрса нәдьда, һәрге әве йәке дькарьбу зьрар бьанийа (Мт. 15:1-6; 21:23-27; Йн. 7:3-10). Ньһа фәʹмдари йә чьма Бьраһим, Исһаԛ, Рʹәхаб у Елиша һьнә дәрәщада рʹасти нәдьготьн ԝан мәрьварʹа, йед кӧ Йаһоԝарʹа хьзмәт нәдькьрьн (Дсп. 12:10-19; сәре 20; 26:1-10; Йеш. 2:1-6; Аԛб. 2:25; 2 Пʹд. 6:11-23).
Хьзна Кʹьтеба Пироз
ԝ10 1/1 20 ¶5-6
Гәло Мьри Дькарьн Али Саха Бькьн?
Дәрһәԛа ве йәке бьфькьрә. Кʹьтеба Пирозда те готьне, ԝәки паши мьрьне мәрьв «дьбә диса хԝәли» у ве «рʹоже шеԝьред ԝи дьтʹәрʹьбьн» (Зәбур 146:4). Шаԝул у Самуйел рʹьнд заньбун, ԝәки Хԝәде ԝан мәрьва сущдар дькә, йед кӧ дьчьнә щәм кʹочʹәк у сербаза. Пешийа ве йәке Шаԝул хԝәха фәрман дабу, ԝәки ԛьрʹа һʹәму кʹочʹәк у сербаза биньн! (Ԛануна Кʹаһинтийе 19:31).
Һәгәр Самуйел хьзмәткʹаре Хԝәдейи амьн, паши мьрьне бәрдәԝам кьра ча рʹӧһʹ бьжита, ԛә гәло әԝе Ԛануна Хԝәде бьтʹәрʹьбанда у бь сайа сербазийе тʹәви Шаԝул хәбәр да? Йаһоԝа нә дьхԝәст тʹәви Шаԝул хәбәр дә. Ләма жи гәло сербаз ԛә дькарьбу зоре Хԝәдейе Һьмзор бькьра, ԝәки Әԝ тʹәви Шаԝул бь сайа Самуйеле мьри хәбәр дә? Һәмьки на. Демәк әв «Самуйеле» кӧ Шаԝулрʹа әʹйан бу, нә кӧ пʹехәмбәре Хԝәде бу, ле щьн бу, йе кӧ хԝә дәԝса Самуйел дани.
(1 Самуйел 28:15, ИМ) Самуел Шаԝулрʹа гот: «Тә чьма гази мьн кьр у әз әʹщьз кьрьм?»
(Мәтта 17:1-15) Пәй шәш рʹожарʹа Иса тʹәви хԝә Пәтрус, Аԛуб у бьре ԝи Йуһʹәнна һьлдан у рʹакьрьнә чʹийаки бьльнд, ль ԝьр әԝ тʹәне бун. 2 Һьнге әԝ ль бәр чʹәʹве ԝан һатә гӧһастьне. Рʹуйе ԝи мина тәʹве бьрьԛи у кʹьнщед ԝи жи мина нуре чил-ԛәрԛаш бун. 3 Муса у Елйас ԝанва хӧйа бун у тʹәви ԝи хәбәр дан. 4 Һьнге Пәтрус Исарʹа гот: «Хӧдан! Чаԝа рʹьнд ә кӧ әм вьр ьн! Һәгәр тӧ бьхԝази, әзе се һʹолька ль ве дәре чекьм, йәке тәрʹа, йәке Мусарʹа, йәке жи Елйасрʹа». 5 Әԝи һе хәбәр дьда, әʹԝрәки рʹонайи һат у сәр ԝан кьрә си, дәнгәк жь әʹԝр һат у гот: «Әв ә Кӧрʹе мьни дәлал, кӧ әз же рʹази мә. Гӧһдарийа ԝи бькьн!» 6 Гава шагьрта әԝ дәнг бьһист, дәвәрʹуйа чун у рʹьсасе әԝ гьртьн. 7 Ле Иса незики ԝан бу, дәст да ԝан у гот: «Рʹабьн, нәтьрсьн». 8 Ԝана жи сәре хԝә бьльнд кьр у пештьри Иса кәсәк нәдитьн. 9 Чахе жь чʹийе дьһатьнә хԝаре, Иса тʹәми да ԝан у гот: «Әԝ дитьна кӧ ԝә дит кәсирʹа нәбежьн, һʹәта кӧ Кӧрʹе Инсан жь нав мьрийа рʹанәбә». 10 Шагьртед ԝи же пьрсин: «Ле чьма ԛанунзан дьбежьн пешийе гәрәке Елйас бе?» 11 Иса ль ԝан вәгәрʹанд у гот: «Рʹаст ә, пешийе Елйасе бе у әԝе һәр тьшти щи бь щи бькә. 12 Ле әз ԝәрʹа дьбежьм, кӧ Елйас һатийә жи, ле әԝ нас нәкьрьн у чаԝа кӧ хԝәстьн, ӧса сәре ԝи кьрьн. Ԝе ӧса жи сәре Кӧрʹе Инсан бькьн». 13 Һьнге шагьрта фәʹм кьр, кӧ бона Йуһʹәннайе ньхӧмдар ԝанарʹа гот. 14 Чахе һатьнә щәм әʹлаләте, мәрьвәк незики Иса бу, бәр чок да у готе: 15 «Хӧдан, ль кӧрʹе мьн ԝәрә рʹәʹме! Әԝ һиве дькʹәвә у гәләки щәфа дьбинә. Щарна дькʹәвә нава агьр у щарна жи нава аве.
9-15 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 1 САМУЙЕЛ 30-31
«Жь Йаһоԝа Хԝәдейе Хԝә Ԛәԝате Бьстинә»
ԝ06 1/8 28 ¶12
Хԝәдехоф бә у Бәхтәԝар бә!
12 Хофа бәр Йаһоԝа, Даԝьд нә тʹәне жь гавәкә нәрʹаст хԝәй кьр, ле ӧса жи ԛәԝат да ԝи, ԝәки дәрәщед чәтьнда бь сәрԝахти у бь билани сафикьрьна бькә. Даԝьд у әскәред ԝи саләк у чар мәһа Зиклагеда сәр әʹрде Фьльстийа, хԝә жь Шаԝул вәдьшартьн (1 Самуйел 27:5-7). Щарәке чахе мер шәһәрда нибун, Амалекийа һʹьщуми сәр шәһәр кьрьн. Ԝана шәһәр шәԝьтандьн, жьн, зарʹ у һʹәйԝанед ԝан бьрьн зәфти хԝә кьрьн. Чахе Даԝьд у меред тʹәви ԝи вәгәрʹийан у дитьн кӧ чь ԛәԝьмийә, әԝана гьрийан. Ле паше әԝана сәр Даԝьд ԛайим һерс кʹәтьн у дьхԝәстьн пе кәвьра ԝи бькӧжьн. Рʹаст ә Даԝьд дьлтәнг бу, ле әԝи хԝә бечʹарә тʹәхмин нәдькьр (Мәтʹәлок 24:10). Хԝәдехофи ле һелан кьр һәԝара хԝә Йаһоԝа дахә, у әԝи дьлрʹьһʹәти станд, чьмки итʹбарийа хԝә Йаһоԝа дьани. Пе аликʹарийа Йаһоԝа Даԝьд у меред тʹәви ԝи данә пәй Амалекийа, нәфәред хԝә аза кьрьн у һәбука хԝә вәгәрʹандьн (1 Самуйел 30:1-20).
ԝ12 15/4 30 ¶14
Йаһоԝа бона Хьлазбуне, Мә Хԝәй Дькә
14 Даԝьд жийина хԝәда рʹасти гәләк тәнгасийа дьһат (1 Сам. 30:3-6). Гьлийед ԝи, йед кӧ әԝи жь бина бәр Хԝәде ньвисибу, нишан дькьн, ԝәки Йаһоԝа һаш жь тәнгасийед ԝи һәбу (Бьхунә Зәбур 34:18; 56:8). Йаһоԝа һаш жь кӧла дьле мә жи һәйә. Чахе әм дьлтәнг у хәмгин ьн, әв дьһа незики мә дьбә. Занәбуна ве йәке дьлбинийе дьдә мә, чаԝа кӧ дьда Даԝьд, йе кӧ дьстьра: «Пе һʹӧба Тә әзе әшԛ у ша бьм, чьмки сәр мәʹрьмийа мьнда Тә ньһерʹи у тәʹли-тәнгийа мьн пе һʹәсийайи» (Зб. 31:7). Ле Йаһоԝа нә тʹәне һаш жь дәрде мә һәйә, әԝ дәрәщед чәтьнда тʹьме мә дьшьдинә у бәр дьле мәда те. Мәсәлә, әԝ бь сайа щьвата бәрдьлийе дьдә мә.
Хьзна Кʹьтеба Пироз
ԝ05 15/3 24 ¶8
Фькьред Сәрәкә жь Кʹьтеба 1 Самуйел
30:23, 24. Әв сафикьрьна сәр һʹиме Жьмар 31:27, нишан дькә, ԝәки Йаһоԝа ԝан хьзмәткʹаред хԝә ԛимәт дькә, йед кӧ һәла һе шьхӧлед бьчʹукда жи аликʹарийе дьдьнә щьвате. Әм чь жи дькьн, ԝәрә әм ве йәке «бь дьл у щан бькьн, чаԝа бона Хӧдан, нә кӧ бона мәрьва» (Колоси 3:23).
(1 Самуйел 30:23, 24, ИМ) Ле Даԝьд гот: «На бьрано! Хӧдан дайә мә у әм нькарьн аһа бькьн. Әԝи әм пʹарастьн у еришкʹаред сьԝари да дәсте мә. 24 Ԝе кʹи гӧһ бьдә ван готьнед ԝә? Кәсе дьчә шәрʹ у кәсе ль бәр һур мура дьминә, пʹара ԝан йәк ә».
(Мәтта 18:1-15) Ԝи чахи шагьрт һатьнә щәм Иса у готьне: «Ль нав Пʹадшатийа Әʹзманада кʹи йә йе һәри мәзьн?» 2 Иса зарʹокәк гази щәм хԝә кьр, әԝ нав ԝанда да сәкьнандьне 3 у гот: «Әз рʹаст ԝәрʹа дьбежьм, һәгәр һун вәнәгәрʹьн у нәбьнә мина зарʹока, һун тʹӧ щар накʹәвьнә Пʹадшатийа Әʹзмана. 4 Аԝа кʹи кӧ мина ве зарʹоке хԝә бьчʹук кә, әԝ ә йе һәри мәзьн Пʹадшатийа Әʹзманада. 5 У кʹи кӧ зарʹокәкә аһа бь наве мьн ԛәбул кә, әԝ мьн ԛәбул дькә. 6 Ле кʹи кӧ жь ван бьчʹука йәки, йе кӧ баԝәрийа хԝә мьн тинә жь рʹе дәрхә, ԝирʹа һе ԛәнщ ә, ԝәки бәрашәк стуйе ԝива бе гьредане у бьне бәʹреда бьхәньԛә. 7 Ԝәй ль дьнйайе, бона әԝед кӧ мәрьва жь рʹе дәрдьхьн. Набә кӧ әԝ тьшт нәбьн, ле ԝәй ль ԝи кӧ мәрьв бь ԝи жь рʹе дькʹәвьн. 8 Һәгәр дәсте тә йан ньге тә, тә жь рʹе дәрхә, ԝи жекә у жь хԝә бавежә. Бона тә һе ԛәнщ ә кӧ тӧ ԛоп йан сәԛәт бькʹәви жийине, нә кӧ дӧ дәст йан дӧ ньгед тә һәбьн у бейи авитьне нава агьре һʹәта-һʹәтайе. 9 У һәгәр чʹәʹве тә, тә жь рʹе дәрдьхә, ԝи дәрхә у бавежә. Бона тә һе ԛәнщ ә кӧ тӧ бь чʹәʹвәки бькʹәви жийине, нә кӧ бь дӧ чʹәʹва бейи авитьне нава агьре доже. 10 Һаш жь хԝә һәбьн кӧ һун жь ван бьчʹука йәки беһӧрмәт нәкьн, чьмки әз ԝәрʹа дьбежьм, кӧ мьлйакʹәтед ԝан ль әʹзмана тʹьме рʹуйе Баве мьни әʹзмана дьбиньн. 11 Кӧрʹе Инсан һат кӧ йе ӧндабуйи бьгәрʹә у хьлаз кә. 12 Һун чаԝа тʹәхмин дькьн? Һәгәр сәд пәзед мәрьвәки һәбьн у йәк жь ԝан ӧнда бә, әԝе нод нәһа нәһелә чʹийабанийа у нәчә кӧ йа ӧндабуйи бьгәрʹә? 13 Ле гава бьбинә, әз рʹаст ԝәрʹа дьбежьм, әԝе бона ԝе һе гәләки ша бә, нә кӧ бона нод нәһед дьнә кӧ ӧнда нәбунә. 14 Ӧса жи Баве ԝәйи әʹзмана нахԝазә кӧ жь ван бьчʹука йәк ӧнда бә. 15 Һәгәр бьре тә нәһәԛийе ль тә бькә, гава тӧ у әԝ тʹәне нә, ԝи ширәт кә. Һәгәр әԝи гӧһдарийа тә кьр, иди тә бьре хԝә ԛазьнщ кьр.
16-22 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 1-3
«Әм жь Стьрана Даԝьд бь Наве ‹Кәван›, Чь Һин Дьбьн?»
ԝ00 15/6 13 ¶9
Ԛәдьре Ԝан Бьгьрьн, йед кӧ Рʹебәрийе Дьдьнә Ԝә
9 Гәло Даԝьдрʹа һеса бу, чахе һьндава ԝида берʹәʹм бун? Даԝьд гази Йаһоԝа дькьр: «Зӧлмкʹар пәй әʹмьре мьн кʹәтьнә» (Зәбур 54:3). Әԝи ӧса жи дьле хԝә Йаһоԝарʹа вәкьр у гот: «Мьн хьлаз кә жь дьжмьнед мьн, Хԝәдейе мьн! . . . Зордар мьԛабьли мьн щьвийанә, ле Хӧдан нә бона гӧнә у хьрабийед мьн, щийе һәԛи-нәһәԛ сәр мьнда дьгьрьн, кʹаре хԝә дькьн. Рʹабә һәԝара мьн у дина Хԝә бьде» (Зәбур 59:1-4). Ԛә тӧ жи мина Даԝьд рʹасти дәрәщәкә ӧса һати, чахе мәрьвәки хԝәйиһʹӧкӧм нәһәԛийе тә дькьр, ле тә ԛә хьраби ле нәкьрийә? Ле диса жи Даԝьд бәрдәԝам дькьр ԛәдьре Шаԝул бьгьрә. Чахе Шаԝул мьр, Даԝьд дьле хԝә ша нәдькьр, ле дәԝсе әԝи стьранәкә дьлшәԝат ньвиси: «Шаԝул у Йонатʹан ширин у бәшәрхԝәш бун, . . . Жь тәйра чалактьр [зутьр], жь шера һездартьр [ԛәԝаттьр] бун. Йа кәчʹед Исраеле! Жь бо Шаԝул бьгьрин» (2 Самуйел 1:23, 24, ИМ). Дә бьдьнә һʹәсабе хԝә, Шаԝул чьԛас жи нәһәԛи Даԝьд кьрьбу, Даԝьд диса жи ԛәдьрәки мәзьн һьндава ԝида да кʹьфше, чьмки әԝ бьжартийе Хԝәде бу. Бәле, әԝи мәсәләки гәләк баш мәрʹа һишт!
ԝ12 15/4 10 ¶8
Нәмами, Нишанәкә Рʹожед Ахьрийе йә!
Кʹьтеба Пироз ӧса жи бәʹса гәләк мәрьвед амьн дькә. Ԝәрә әм дина хԝә бьдьнә мәсәла дӧ мәрьва у пебьһʹәсьн әм чь дькарьн жь ԝана һин бьн. Пешийе ԝәрә әм мәсәла Йонатʹан шеԝьр кьн. Чаԝа нӧхрийе Шаԝул, һьлбәт паши баве хԝә, әԝ гәрәке бьбуйа пʹадша. Ле Йаһоԝа паши Шаԝул, Даԝьд ча пʹадше Исраеле кʹьфш кьр. Йонатʹан ԛәдьре сафикьрьна Йаһоԝа дьгьрт, ләма жи әԝи чʹәʹвнәбарийе Даԝьд нәдькьр у әԝ ча нәйаре хԝә һʹәсаб нәдькьр. Йонатʹан «ԝи бь дьл у щан, ԝәкә нәфса хԝә же һʹьз кьр», у сонд хԝар кӧ ԝе жерʹа амьн бьминә. Әԝи һәла һе кʹьнщ, шур, кәван у кʹәмбәра хԝә да Даԝьд, у бь ве йәке ԛәдьр-һӧрмәт һьндава ԝида да кʹьфше ча һьндава пʹадше (1 Сам. 18:1-4, ИМ). Йонатʹан һәр тьшт дькьр ԝәки Даԝьд бьшьдинә, у гәләк щар бона ԝи әʹмьре хԝә дькьрә бьн ԛәзийе, у бәр баве хԝә пьшта Даԝьд дьгьрт. Йонатʹан амьнийа хԝә Даԝьдрʹа бь ван гьлийа да кʹьфше: «Те бьби Пʹадше Исраеле, әзе жи бьбьм аликʹаре тә» (1 Сам. 20:30-34; 23:16, 17, ИМ). Ләма жи әʹщебмайи нинә кӧ чахе Йонатʹан мьр, Даԝьд һʹьзкьрьна хԝә һьндава ԝи у еша дьле хԝә бь стьранәкә дьлшәԝат нишан кьр (2 Сам. 1:17, 26).
Хьзна Кʹьтеба Пироз
it-1 369 ¶2
Бьра
«Бьра» ӧса жи әв мәрьв дьһатьнә һʹәсабе, йед кӧ тʹәвайи шьхӧлкʹари дькьрьн, у нет фькьред ԝан йәк бун. Мәсәлә, Һирам Пʹадше Суре, Сьлеман ча бьре хԝә нав дькьр, нә тʹәне бона ве йәке кӧ ԛӧльхе ԝан мина һәв бу, ле ӧса жи бона ве йәке кӧ нетед ԝан йәк бун. Һирам кʹенар у мәсәлед дьнә бона авакьрьна пʹарьстгәһе, дьда Сьлеман (1 Пʹд. 9:13; 5:1-12). Даԝьд ньвиси: «Чаԝа ԛәнщ ә, чаԝа хԝәш ә, кӧ бьра һәврʹа йәктийеда нә!» Бь ван гьлийа Даԝьд дьхԝәст бьгота, ԝәки әʹдьлайи у тʹьфаԛи нә тʹәне ортʹа бьред һʹәлалда һәйә (Зб. 133:1). Даԝьд Йонатʹан ча бьре хԝә һʹәсаб дькьр, нә кӧ чьмки әԝ бьре ԝийи һʹәлал бу, ле чьмки әԝана достед һәв бун у пьштгьрийа һәв дькьрьн (2 См. 1:26). Дькарьн бежьн, ԝәки әв һәвалед кӧ хәйсәт-һʹӧнӧрада мина һәв ьн, бьра нә (Мтʹл. 18:9).
(2 Самуйел 1:26, ИМ) Жь бо тә хәмгин ьм, бьрайе мьн Йонатʹан. Тӧ жь бо мьн пʹьр һежа буйи. Һʹьзкьрьна тә жь һʹьзкьрьна жьне бетʹьр [ԛәԝитьр] бу.
(Мәтта 18:16-30) Ле һәгәр гӧһдарийа тә нәкьр, йәки йан дӧдӧйед дьн жи тʹәви хԝә һьлдә, ԝәки: ‹Бь дәве дӧ йан се шәʹда һәр тьшт избат бә›. 17 Ле һәгәр әԝи гӧһдарийа ԝан жи нәкьр, щьвинерʹа бежә. У һәгәр гӧһдарийа щьвине жи нәкьр, бьра әԝ бона тә бьбә мина пʹутпʹарьст у хәрщгьра. 18 Әз рʹаст ԝәрʹа дьбежьм, чь кӧ һун сәр әʹрде гьредьн, ль әʹзмен жи ԝе гьредайи бә у чь кӧ һун ль сәр әʹрде вәкьн, ль әʹзмен жи ԝе вәкьри бә. 19 Диса әз рʹаст ԝәрʹа дьбежьм, һәгәр дӧдӧ жь ԝә ль сәр әʹрде бь тʹьфаԛ бона тьштәки дӧа бькьн у бьхԝазьн, Баве мьни әʹзмана ԝе бьдә ԝә. 20 Чьмки кʹидәре дӧ йан се мәрьв бь наве мьн бьщьвьн, әз ль ԝьр нава ԝанда мә». 21 Һьнге Пәтрус незики ԝи бу у готе: «Хӧдан. Гава бьре мьн нәһәԛийе ль мьн бькә, гәрәке әз чәнд щара бьбахшиньме, һʹәта һʹәфт щара?» 22 Иса готә ԝи: «Әз набежьмә тә һʹәта һʹәфт щара, ле һʹәта һʹәфте щара һʹәфт. 23 Чьмки Пʹадшатийа Әʹзмана мина ве йәке йә: Пʹадшаки хԝәст тʹәви хӧламед хԝә һәԛ-һʹәсабе хԝә рʹаст кә. 24 Гава дәст бь һʹәсаба кьр, йәк анинә щәм ԝи, кӧ дәһә һʹәзар тәланти дәйндаре ԝи бу. 25 Ле чьмки нькарьбу дәйне хԝә бьда, хԝәйе ԝи әʹмьр кьр, кӧ әԝ, жьна ԝи, зарʹед ԝи у һʹәму һәбука ԝи бенә фьротане, кӧ дәйне ԝи бе дайине. 26 Һьнге хӧлам дәвәрʹуйа чу ньге ԝи, лава же кьр у гот: ‹Ль мьн сәбьр кә. Әзе һʹәму жи ль тә вәгәрʹиньм›. 27 Гӧне хԝәйе ԝи ль ԝи һат, әԝ бәрʹда у дәйне ԝи жи бахшанде. 28 Ле чахе әԝ хӧлам дәркʹәт, рʹасти хӧлам-һәваләки хԝә һат кӧ сәд зиви дәйндаре ԝи бу, дәст кьрә хәнәԛе у готе: ‹Тӧ чьԛаси дәйндаре мьн и бьдә!› 29 Һьнге һәвале хӧлам хԝә авитә ньге ԝи, же лава кьр у готе: ‹Ль мьн сәбьр кә. Әзе ль тә вәгәрʹиньм›. 30 Ле әԝи гӧһ нәда ԝи, чу әԝ авитә кәле, һʹәта кӧ әԝ дәйне хԝә бьдә.
23-29 ГӦЛАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 4-6
«Хԝәдехоф бә ԝәки Дьле Йаһоԝа Нәешини»
ԝ05 15/5 17 ¶8
Фькьред Сәрәкә жь Кʹьтеба 2 Самуйел
6:1-7. Рʹаст ә нетед Даԝьд рʹаст бун, ле сафикьрьна ԝи ԝәки Сьндоԛа пәймане пе әʹрәбе дәрбаз кә, мьԛабьли тʹәмийа Хԝәде бу, ләма жи ахьрийа ве сафикьрьне хьраб бу (Дәркʹәтьн 25:13, 14; Жьмар 4:15, 19; 7:7-9). Ӧса жи чь кӧ һатә сәре Узза, гава әԝи дәсте хԝә авитә Сьндоԛе, нишан дькә кӧ чьԛас жи нетед мәрьва рʹаст бьн, йәкә тʹәмийед Хԝәде найенә гӧһастьне.
ԝ05 1/2 27 ¶20
Йаһоԝа Тʹьме Тьштед Рʹаст Дькә
20 Узза гәрәке дьһа фәсал буйа. Сьндоԛа пәймане бь симболик дьһатә һʹәсабе, ԝәки Йаһоԝа ԝедәре йә. Ԛанунеда зәлал дьһатә готьне, ԝәки хенщи мәрьвед кʹьфшкьри, изьна тʹӧ кәси тʹӧнә бу дәсте хԝә бьдә сьндоԛа пәймане, чьмки әԝе бь мьрьне бьһата щәзакьрьне (Жьмар 4:18-20; 7:89). Ләма жи чахе ве сьндоԛе щигӧһасти дькьрьн, мәрьва гәрәке сәр ве йәке сәрʹа-бәрʹа нәньһерʹийа. Рʹаст ә Узза кʹаһин нибу, ле ча Леԝи, әԝ гәрәке һаш жь ве Ԛануне һәбуйа. Хенщи ве йәке, чәнд сал пешийа ве ԛәԝьмандьне, сьндоԛ бона хԝәйкьрьне дәрбази мала баве Узза кьрьбун (1 Самуйел 6:20–7:1). Сьндоԛ ида ԝәкә 70 сал ԝедәре бу, гава Даԝьд дьхԝәст сьндоԛ щигӧһасти кьра. Ләма жи әшкәрә йә, ԝәки әԝи жь бьчʹуктайе һʹәму ԛанунед дәрһәԛа Сьндоԛе заньбу.
ԝ05 1/2 27 ¶21
Йаһоԝа Тʹьме Тьштед Рʹаст Дькә
21 Чаԝа мә жоре гот, Йаһоԝа дьле мәрьва дьвинә. У чьмки Кʹьтеба Пироз әв кьре Узза нав дькә ча ‹беԛәдьри›, Йаһоԝа дьԛәԝьмә дьле ԝида хԝәһʹьзи дит, дәрһәԛа чь жи Кʹьтеба Пирозда әшкәрә найе готьне. Дьбәкә Узза йәки ԛӧрʹә у бабах бу, йе кӧ жь синора дәрдькʹәт? (Мәтʹәлок 11:2). Йан дьбәкә чахе Сьндоԛа пәймане жь мала баве ԝи бәр чʹәʹве гьшка дәрдьхьстьн, ԝи чахи ԛӧрʹәбун кʹәтә дьле ԝи? (Мәтʹәлок 8:13). Йан жи дьбәкә баԝәрийа ԝи ӧса кем бу, кӧ әԝи тʹьре дәсте Йаһоԝа ԝе нәгьһиже ԝәки сьндоԛе бьгьрә? Нә әԝ Сьндоԛ бь симболик дьһатә һʹәсабе ԝәки Йаһоԝа ԝедәре йә? Чь жи һәбә, әм дькарьн баԝәр бьн ԝәки Йаһоԝа бь һәԛи ԝи щәза кьр. Дьԛәԝьмә Йаһоԝа дьле ԝида тьштәки ӧса дит, чь кӧ Ԝи һелан кьр дәрберʹа диԝана Узза бькә (Мәтʹәлок 21:2).
Хьзна Кʹьтеба Пироз
ԝ96 1/4 29 ¶1
Тʹьме Баре Хԝә Йаһоԝарʹа Бьһелә
Даԝьд ча пʹадша гәрәке әв щабдари һьлда сәр стуйе хԝә. Әԝ йәк кӧ әԝи хԝә ча да кʹьфше, нишан дькә ԝәки щара һәла һе достед Йаһоԝа жи, дәрәщед чәтьнда дькарьн хԝә нәрʹаст бьдьнә кʹьфше. Пешийе Даԝьд һерс кʹәт, ле паше әԝ тьрсийа (2 Самуйел 6:8, 9). Итʹбарийа ԝи һьндава Йаһоԝа һатә щерʹьбандьне. Дьԛәԝьмә һәма ве дәрәщеда Даԝьд баре хԝә нәда Йаһоԝа у гӧрʹа тʹәмийед ԝи нәкьр. Гәло тьштәк ӧса дькарә бе сәре мә жи? Гәло дьбәкә щара әм жи сәва проблемед хԝә, йед кӧ рʹуйе нәгӧһдарикьрьна мәда пешда тен, Йаһоԝа нәһәԛ дькьн? (Мәтʹәлок 19:3).
(2 Самуйел 6:8, 9, ИМ) Даԝьд һерс бу кӧ Хӧдан ль Узза хьст. Жь ԝе рʹоже у пева вьррʹа Перес-Узза те готьн. 9 Даԝьд ԝе рʹоже жь Хӧдан тьрсийа у гот: «Чаԝа дьбә кӧ Сьндоԛа Хӧдан те бал мьн?»
(Мәтта 19:1-15) Чахе кӧ Иса әԝ хәбәр сәр һәвда анин, жь Щәлиле дәркʹәт һатә синоре Щьһустане, ԝи али чʹәме Урдӧне. 2 Гәләк әʹлаләт ль пәй ԝи чун у әԝи әԝ ль ԝе дәре ԛәнщ кьрьн. 3 Жь ферьсийа һьнәк незики ԝи бун у бона щерʹьбандьне же пьрсин: «Гәло ль гора Ԛануне рʹаст ә, кӧ бона һәр мәʹнике мер жьна хԝә бәрʹдә?» 4 Әԝи щаба ԝан да у гот: «Ԝә нә хԝәндийә, сәре серида Әʹфьрандар ‹әԝ нер у ме хӧльԛандьн?› 5 у гот: ‹Бона ве йәке мер ԝе де у баве хԝә бьһелә, хԝә ль жьне бьгьрә у һәр дӧ ԝе бьбьнә бәдәнәк›. 6 Аԝа иди әԝ нә дӧдӧ нә, ле бәдәнәк ьн. Бона ве йәке әԝед кӧ Хԝәде кьрьнә йәк, бьра мәрьв жь һәвдӧ нәԛәтинә». 7 Ԝана жерʹа гот: «Ле чьма Муса тʹәми кьр, кӧ мер кʹахаза жьнбәрʹдане бьдә жьне у ԝе бәрʹдә?» 8 Әԝи ль ԝан вәгәрʹанд у гот: «Муса жь дәст сәрһʹьшкийа ԝә изьн да ԝә кӧ һун жьнед хԝә бәрʹдьн. Ле сәрида нә ӧса бу. 9 Әз ԝәрʹа дьбежьм, кʹи кӧ бе сәбәбийа ԛавийе жьна хԝә бәрʹдә у йәкә дьн бьстинә, әԝ зьнекʹарийе дькә». 10 Шагьртед ԝи жерʹа готьн: «Һәгәр нав жьн у мерда тьштәки аһа һәйә, һе ԛәнщ ә ԝәки ԛәт нәзәԝьщьн». 11 Иса ԝанрʹа гот: «Һәр кәсирʹа әв йәк дәст надә, ле тʹәне ԝанрʹа кʹижанарʹа һатийә дайине. 12 Чьмки нәмер һәнә, кӧ жь зькмакийеда ӧса бунә у нәмер жи һәнә, кӧ жь дәсте мәрьва бунә нәмер у нәмер жи һәнә, кӧ бона Пʹадшатийа Әʹзмана ԝана хԝә нәмер кьрьн. Кʹерʹа әв йәк дәст дьдә, бьра ӧса жи бькә». 13 Һьнге зарʹок анинә щәм Иса, кӧ дәстед хԝә дайнә сәр ԝан у дӧа ль ԝан бькә. Ле шагьртед ԝи ль йед данин һьлатьн. 14 Иса гот: «Бьра әԝ зарʹок бенә щәм мьн, пешийа ԝан нәгьрьн, чьмки Пʹадшатийа Әʹзмана пʹара йед ӧса йә». 15 У Иса дәстед хԝә данинә сәр ԝан у жь ԝьр чу.
30 ГӦЛАНЕ–5 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 7-8
«Йаһоԝа Тʹәви Даԝьд Пәймане Гьредьдә»
ԝ10 1/4 20 ¶3
«Пʹадшатийа Тә Һәр у Һәр . . . бә»
Гава Йаһоԝа ве хԝәстьна Даԝьд у амьнийа ԝи дит, әԝи тʹәви ԝи пәйман гьреда: демәк жь рʹькʹьнийата ԝи зӧрʹәта создайи ԝе пешда бьһата, йе кӧ ԝе һʹәта-һʹәтайе пʹадшатийе бькә. Натʹан дәрһәԛа созе Хԝәде Даԝьдрʹа дьбежә: «Ԝе мал у пʹадшатийа тә һәр у һәр ль бәр чʹәʹвед мьн бә, тʹәхте тә жи һәр у һәр хӧрт [ԛәԝи] бьминә» (Рʹеза 16, ИМ). Ле гәло әԝ зӧрʹәт кʹе бу, Йе кӧ ԝе һʹәта-һʹәтайе пʹадшатийе бькә? (Зәбур 89:20, 29, 34-36).
ԝ10 1/4 20 ¶4
«Пʹадшатийа Тә Һәр у Һәр . . . бә»
Исайе Ньсрәте жь рʹькʹьнийата Даԝьд бу. Чахе мәләк дәрһәԛа буйина Иса әʹлам кьр, әԝи гот: «Әԝе мәзьн бә у Кӧрʹе Йе Һәри Жорьн ԝе бе готьне. У Хӧдан Хԝәде ԝе тʹәхте баве ԝи Даԝьд бьдә ԝи. Әԝе һʹәта-һʹәтайе пʹадшатийе сәр мала Аԛуб бькә у хьлазийа Пʹадшатийа ԝи ԝе тʹӧнәбә» (Луԛа 1:32, 33). Пәймана тʹәви Даԝьд сәр Иса Мәсиһ һатә сери. Әԝи һʹӧкӧм жь Хԝәде станд, нә кӧ жь мәрьва. Хԝәде соз да, ԝәки Иса ԝе һʹәта-һʹәтайе пʹадшатийе бькә, у созед Хԝәде тʹьме тенә сери (Ишайа 55:10, 11).
ԝ14 15/10 10 ¶14
Бьра Баԝәрийа Тә Һьндава Пʹадшатийе Ԛәԝи Бә
14 Дина хԝә бьдьне, гава Йаһоԝа тʹәви Даԝьд, пʹадше Исраела бәре, пәйман гьреда, әԝи чь соз да. (Бьхунә 2 Самуйел 7:12, 16.) Йаһоԝа тʹәви Даԝьд әв пәйман гьреда, чахе әԝи Оршәлимеда пʹадшати дькьр, у соз да, ԝәки Мәсиһ ԝе жь рʹькʹьнийата ԝи пешда бе (Луԛа 1:30-33). Ӧса Йаһоԝа дьһа зәлал да кʹьфше, кӧ жь кʹижан рʹькʹьнийате ԝе зӧрʹәта создайи пешда бе, у гот ԝәки әԝ зӧрʹәт ԝе бь ԛануни тʹәхте Пʹадшатийа Мәсиһити ԝар бә (Һәзԛл. 21:25-27). Бь сайа Иса пʹадшатийа Даԝьд ԝе һʹәта-һʹәтайе бә. Бәле, зӧрʹәта Даԝьд ԝе «һʹәта-һʹәтайе бьминә, тʹәхте ԝи жи ԝәкә рʹойе» (Зәб. 89:34-37). Демәк, пʹадшатийа Мәсиһити ԝе тʹӧ щар һʹӧкӧме хԝә бона хьрабийе нәдә хәбате, у кʹәрәмед Пʹадшатийа ԝи ԝе һәр һәйи бьн!
Хьзна Кʹьтеба Пироз
it-2 206 ¶2
Рʹожед Ахьрийе
Пʹехәмбәртийа Бьлам. Пешийа кӧ Исраели бькʹәтана Әʹрде Создайи, Бьлам пʹехәмбәр пʹадше Моԝабе, Балаԛрʹа гот: «Ԝәрә әзе тәрʹа бежьм, кӧ рʹоже бен әв мьләт ԝе чь бинә сәрә мьләте тә . . . Стәйрке жь Аԛуб дәркʹәвә, шьва пʹадшатийе ԝе жь Исраел пешда бе, ԝе щеника Моԝаб һурдәхԝәши кә, һʹәму зарʹед Шетʹ ԛьрʹ кә» (Жм. 24:14-17). Пешийе әԝ пʹехәмбәрти һатә сери гава Даԝьд Пʹадша бу «стәйрк», йе кӧ щьмәʹта Моԝабе зәфт кьр (2 См. 8:2). Ләма жи хәбәра «рʹоже бен», демәк рʹожед ахьрийе, һьнге дәстпебун, чахе Даԝьд дәстпекьр пʹадшатийе бькә. Даԝьд ча сийа Иса бу, демәк Пʹадше Пʹадшатийа Мәсиһити, у ләма әԝ пʹехәмбәрти ӧса жи дәрһәԛа ԝи ԝәʹдәйи йә, чахе Иса ԝе дьжмьнед хԝә бьндәст кә (Иш. 9:7; Зб. 2:8, 9).
(2 Самуйел 8:2, ИМ) Әԝи Моавийа жи тʹек бьр. Ԝан бь аԝайәки дьрежкьри рʹез кьрьн у бь бәньке пива. Һәрдӧ рʹезед кӧ пива кӧшт, рʹезәк һʹәму сах һишт. Моави бун хӧлам у бащдаред Даԝьд.
(Мәтта 19:16-30) Йәк незики ԝи бу у готе: «Дәрсдар! Әз чь ԛәнщийе бькьм, ԝәки жийина һʹәта-һʹәтайе ԝар бьм?» 17 Әԝи жерʹа гот: «Тӧ чьма бона ԛәнщийе жь мьн дьпьрси? Тʹәне Йәки ԛәнщ һәйә. Ле һәгәр тӧ дьхԝази, бькʹәви жийина һʹәтаһʹәтайе, тʹәмийед Хԝәде бинә сери». 18 Әԝи жь Иса пьрси: «Кʹижан ьн?» Иса готе: «Нәкӧжә, зьнекʹарийе нәкә, нәдьзә, шәʹдәтийа дәрәԝ нәдә, 19 ԛәдьре де у баве хԝә бьгьрә у һәвале хԝә ԝәкә хԝә һʹьз бькә». 20 Хорт жерʹа гот: «Мьн әв һʹәму хԝәйи кьрьнә. Иди чь кемасийа мьн һәйә?» 21 Иса готе: «Һәгәр тӧ дьхԝази кʹамьл би, һәрʹә һәбука хԝә бьфьрошә бьдә фәԛира, һьнге хьзна тә ԝе ль әʹзмана һәбә. У пәй мьн ԝәрә». 22 Гава хорт әв хәбәр бьһистьн, бәр хԝә кʹәт у чу, чьмки гәләк һәбука ԝи һәбу. 23 Һьнге Иса готә шагьртед хԝә: «Әз рʹаст ԝәрʹа дьбежьм, дәԝләтийарʹа зәʹмәт ә кӧ бькʹәвьнә Пʹадшатийа Әʹзмана. 24 Әз диса ԝәрʹа дьбежьм, дәвә ԝе ԛӧла дәрзийерʹа һе рʹьһʹәт дәрбаз бә, нә кӧ дәԝләти бькʹәвә Пʹадшатийа Хԝәде». 25 Гава шагьрта әв йәк бьһист, гәләки әʹщебмайи ман у готьн: «Иди кʹи дькарә хьлаз бә?» 26 Иса ль ԝан ньһерʹи у гот: «Әԝ тьшт жь дәсте мерьв найе, ле һәр тьшт жь дәсте Хԝәде те». 27 Ԝе гаве Пәтрус ле вәгәрʹанд у готе: «Аԝа мә һʹәму тьшт һьштийә у пәй тә һатьнә, ле ахьрийа мә ԝе чаԝа бә?» 28 Иса готә ԝан: «Әз рʹаст ԝәрʹа дьбежьм, гава Кӧрʹе Инсан Дьнйа Нуда ль сәр тʹәхте хԝәйә рʹумәт рʹуне, һунед кӧ ль пәй мьн тен, сәр донздәһ кʹӧрсийа рʹунед у диԝана донздәһ ԛәбилед Исраеле бькьн. 29 У һʹәмуйед кӧ мала хԝә, йан бьред хԝә, йан хушкед хԝә, йан баве хԝә, йан дийа хԝә, йан жьна хԝә, йан зарʹед хԝә, йан әʹрдед хԝә бона наве мьн һьштьнә, әԝе сәд ԛат бьстинә у ԝе жийина һʹәта-һʹәтайе жи ԝар бә. 30 Ле гәләкед пеш ԝе бьбьнә паш у йед паш ԝе бьбьнә пеш».
6-12 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 9-10
«Даԝьд Һʹьзкьрьна Амьн Да Кʹьфше»
ԝ06 15/6 14 ¶6
Тӧ Дькари Бәхтәԝар би
Даԝьд ньвиси: «Хԝәзи ль ԝи кӧ хәм дькә бона йе кʹәсиб, рʹожед тәнгасийеда Хӧдане ԝи хьлаз кә. Хӧдане ԝи хԝәй кә у әʹмьр бьде, әԝе ль сәр дьне хԝәзьли бә у ԝе нәдә дәсте хԝәстьна нәйар» (Зәбур 41:1, 2). Чахе Даԝьд бона Мәфибошәте тʹопал, кӧрʹе һәвале хԝәйи дәлал Йонатʹан, хәм дькьр, әԝи мәсәләкә баш һишт ве йәкеда, кӧ әм гәрәке һьндава кʹәсиб у бәләнгазада чь щурʹәйи бьн (2 Самуйел 9:1-13).
ԝ05 15/5 17 ¶12
Фькьред Сәрәкә жь Кʹьтеба 2 Самуйел
9:1, 6, 7. Даԝьд хԝәйе созе хԝә бу. Әм жи гәрәке тʹьме хԝәйе созед хԝә бьн.
ԝ02 15/2 14 ¶10
Ԝана бәр Стьруйе Бәдәна Хԝә Сәбьр Дькьр
10 Чәнд сал шунда, һʹьзкьрьна мәзьн һьндава Йонатʹан Даԝьд Пʹадша һелан кьр, ԝәки рʹәʹма хԝә кӧрʹе ԝи Мәфибошәтрʹа бьдә кʹьфше. Даԝьд һʹәму әʹрдед кӧ пʹара Шаԝул бун, вәгәрʹандә Мәфибошәт. Әԝи Сиба, хӧламе Шаԝул кʹьфш кьр, ԝәки мьԛати ви әʹрди бә. Даԝьд готә Мәфибошәт: «Те һәрдәм ль сәр сьфра мьн хԝарьне бьхԝи» (2 Самуйел 9:6-10, ИМ). Бешьк, рʹәʹм у ԛәнщийа Даԝьд дьлбини данә Мәфибошәт у еша кӧ әԝи жь бо сәԛәтбуне дькʹьшанд, һьнәки сьвьк кьр. Дәрсәкә чьԛас баш ә бона мә! Әм жи гәрәке ԝан мәрьварʹа ԛәнщийе бькьн, йед кӧ жь бо ‹стьруйе бәдәне› дьчәрчьрьн.
Хьзна Кʹьтеба Пироз
it-1 266
Рʹу
Нава мьләтед бәре йед Рʹоһьлате, ӧса жи нава Исраелийада, бәлабуйи бу ԝәки мер рʹуйе хԝә бәрʹдьн. Рʹуйе мер дьда кʹьфше ԝәки әԝ щамер ә у хԝәйиԛәдьр ә. Ԛануна Хԝәде ԛәдәхә дькьр, ԝәки Исраели «сәре рʹудана хԝә нәбьрʹьн», демәк бьскед хԝә кӧрʹ нәкьн у ньчʹа рʹуйе хԝә нәбьрʹьн (Ԛн.Кһ. 19:27; 21:5). Бешьк, әԝ ԛанун һатә дайине, чьмки һьнә мьләтед пʹутпʹарьст ве йәке жь бо әʹдәтед хԝә дькьрьн.
(2 Самуйел 10:4, 5, ИМ) Ль сәр ве йәке, Һанун зьламед Даԝьд дан гьртьн. Ниве рʹуйед ԝан да ԛӧсандьн. Кьрасед ԝан һʹәта ԛорьке ԝан же кьр у әԝ пашда вәгәрʹандьн. 5 Гава Даԝьд бьһист, шанд пәй ԝан. Чьмки зьламед ԝи пʹьр шәрм дькьрьн. Пʹадша гот: «Һʹәта рʹуйе ԝә дьреж бьбә, ль Әриһайе бьминьн, паше вәгәрʹьн.»
(Мәтта 20:1-16) «Пʹадшатийа Әʹзмана мина ве йәке йә: Мәрьвәки хԝәйимьлкʹ сьбәһе зу рʹабу, ԝәки бона рʹәзе тьрийе хԝә пʹала бьгьрә. 2 Әԝи пʹаларʹа рʹоже зивәк ԛьрар кьр у әԝ шандьнә нава рʹәзе хԝә. 3 Незики сьһʹәта нәһа дәркʹәт, һьнәкед дьнә кӧ базареда бәтал сәкьнибун дитьн 4 у готә ԝан: ‹Һун жи һәрʹьнә нава рʹәзе мьн у чь һәԛе ԝә йә, әзе бьдьмә ԝә›. Әԝ жи чун. 5 Диса сьһʹәта донздәһа у сьһʹәта сьсийа дәркʹәт у ӧса кьр. 6 У незики сьһʹәта пенща дәркʹәт, һьнәкед дьн жи кӧ бәтал сәкьнибун дитьн у готә ԝан: ‹Чьма тʹәмамийа рʹоже һун ль вьр бәтал сәкьнинә?› 7 Ԝана жерʹа гот: ‹Кәсәки әм пʹалә нәгьртьн›. Әԝи ԝанарʹа гот: ‹Һун жи һәрʹьнә нава рʹәзе мьн›. 8 Гава рʹо чу ава, хԝәйе рʹәз ԝәкʹиле мала хԝәрʹа гот: ‹Гази пʹала кә, һәԛе ԝан бьде, жь йед пашьн дәстпебькә һʹәта йед пешьн›. 9 Әԝ пʹалед кӧ сьһʹәта пенща гьртьбун, һатьн у һәр йәки зивәк станд. 10 Гава йед пешьн жи һатьн, ԝана тʹьре әԝе зедә бьстиньн. Ле ԝана жи һәр йәки зивәк станд. 11 Гава һәԛе хԝә стандьн, һьндава хԝәйе рʹәзда бина хԝә тәнг кьрьн у готьн: 12 ‹Мә тʹәмамийа гьранийа рʹоже у гәрма ԝе кʹьшанд, ле әвед пашԝәхтийе кӧ һатьн сьһʹәтәке жи нәхәбьтин, тә әԝ һьмбәри мә кьрьн›. 13 Малхе жь ԝан йәкирʹа гот: ‹Һәвал! Әз нәһәԛийе ль тә накьм. Тӧ мьнрʹа зивәки ԛайл нәбуйи? 14 Һәԛе хԝә бьстинә у һәрʹә. Әз дьхԝазьм чаԝа кӧ мьн да тә, ӧса жи бьдьмә әве пашьн. 15 Йан изьна мьн ль сәр мале мьн тʹӧнә, чь кӧ әз бьхԝазьм ԝе жи бькьм? Йан тӧ һʹәвсудийе дьки, кӧ әз мәрʹд ьм?› 16 Бь ви аԝайи йед паш ԝе бьбьнә пеш у йед пеш ԝе бьбьнә паш».
13-19 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 11-12
«Нәһелә ԝәки Хԝәстьнед Нәрʹаст Тә Контрол кьн»
ԝ21.06 17 ¶10
Жь Тʹәлькед Мире-щьна Бьрʹәвә!
Даԝьд Пʹадша сәва тьмайе бир кьр кӧ Йаһоԝа чьԛас мал у мьлкʹ, навдари у сәркʹәтьна сәр дьжмьна, дабу ԝи. Даԝьд бь рʹазибуне готьбу кӧ пʹешкʹешед Йаһоԝа беһʹәсаб ьн (Зәбур 40:5). Ле щарәке, Даԝьд бь тьштед кӧ дәсте ԝида һәбун, нә рʹази бу. Рʹаст ә чәнд жьнед Даԝьд һәбун, йәкә диса жи дьле ԝи кʹәтә Бат-Шәба, демәк жьна мерәки дьн, жьна Урийайе Һитти. Даԝьд тʹәви Бат-Шәбайе зьне кьр, у Бат-Шәба һʹәмлә ма. Сәрда жи, Даԝьд Урийа да кӧштьне! (2 Самуйел 11:2-15) Гәло Даԝьд чьрʹа ӧса кьр? Гәло әԝ дьфькьри кӧ Йаһоԝа ԝи навинә? Рʹаст ә Даԝьд гәләк Йаһоԝа һʹьз дькьр, ле ижар, әԝи сәва тьмайе гӧнед гьран кьрьн. Ахьрийеда, тьштед гәләк хьраб һатьн сәре ԝи. Чьԛас баш ә кӧ ԝәхт шунда, Даԝьд сәва гӧнед хԝә пʹошман бу у тʹобә кьр, у Йаһоԝа бахшандә ԝи. Бьдьнә бәр чʹәʹве хԝә кӧ Даԝьд бона рʹәʹма Йаһоԝа чьԛас рʹази бу! (2 Самуйел 12:7-13)
ԝ19.09 17 ¶15
Бь Дьл у Щан Тʹьме Гӧрʹа Йаһоԝада бьн
15 Йаһоԝа Даԝьд нә тʹәне ча сәре малбәте кʹьфш кьр, ле ча сәрԝере тʹәмамийа щьмәʹта Исраеле. Чаԝа пʹадша, ԛәԝата Даԝьд гәләк мәзьн бу. Щара әԝи ԛәԝата хԝә нә рʹаст дьда хәбате у шашийед мәзьн бәрʹдьда (2 Сам. 11:14, 15). Ле әԝи дьхԝәст гӧрʹа Йаһоԝа бькә. Ча? Әԝи ширәтед Йаһоԝа ԛәбул кьр. Әԝи дӧада дьле хԝә Йаһоԝарʹа вәкьр у кʹәла дьле хԝә рʹет. Даԝьд алийе хԝәда һʹәму тьшт дькьр, сәва гӧрʹа Йаһоԝа бькә у ширәткьрьна ԝи ԛәбул кә (Зәб. 51:1-4). Әԝ ӧса мьлук бу, кӧ нә тʹәне жь мера ширәт ԛәбул дькьр, ле ӧса жи жь жьна (1 Сам. 19:11, 12; 25:32, 33). Даԝьд жь шашийед хԝә хԝәра дәрс һьлда у әʹмьре хԝәда һʹьш-аԛьле хԝә да сәр хьзмәтийа хԝә Йаһоԝарʹа.
ԝ18.06 17 ¶7
Бьра Ԛанун у Принсипед Хԝәде Исафа Тә Һин кьн
7 Нәлазьм ә әм ԛанунед Хԝәде бьтʹәрʹьбиньн у ахьрийа хьраб бьстиньн, у паше фәʹм кьн чь рʹаст ә чь хьраб ә. Әм дькарьн жь шашийед мәрьвед бәре һин бьн, сәрһатийед кʹижана Хәбәра Хԝәдеда ньвисар ьн. Мәтʹәлок 1:5-да те готьне: «Йе сәрԝахт бьбьһе һе занәбуна хԝә зедә кә». Бь рʹасти чахе әм сәрһатийед жь Кʹьтеба Пироз дьхуньн у сәр дьфькьрьн, бь ве йәке әм занәбун у һинкьрьна жь Хԝәде дьстиньн. Һинкьрьна Хԝәде лапә баш ә. Бәʹса хәбәре, бьфькьрьн кӧ Даԝьд Пʹадша чьԛас кӧл-дәрд кʹьшанд, гава гӧрʹа тʹәмийа Йаһоԝа нәкьр у тʹәви Бат-Шәбайе бенамуси кьр (2 Сам. 12:7-14). Чахе әм әве сәрһатийе дьхуньн у сәр дьфькьрьн, әм дькарьн пьрсе бьдьнә хԝә: «Даԝьд ча дькарьбу хԝә жь ахьрийа хьраб у еше хԝәй кьра, йа кӧ әԝи бона бенамусийа тʹәви Бат-Шәбайе станд?» Һәрге әз рʹасти щерʹьбандьнәкә ӧса бьһатама, гәло мьне бькарьбуйа хԝә зәфт кьра у мина Усьв жь ве тʹәльке бьрʹәвийама? (Дәстп. 39:11-15). Һәрге әм бьфькьрьн кӧ гӧнә чь ахьрийе тинә, әме һе ԛайим хьрабийе нәфрʹәт кьн.
Хьзна Кʹьтеба Пироз
it-1 590 ¶1
Даԝьд
Йаһоԝа, йе кӧ һәр тьшт дьдит, ӧса кьр ԝәки бенамусийа Даԝьд тʹәви Бат-Шәбайе, әшкәрә бә. Һәгәр Йаһоԝа бьһишта ԝәки һʹакьм ль гора Ԛануна Муса диԝана ԝан бькьрана, ԝе ԝана һәрда жи бьдана бәр кәвьра у әԝ зарʹ кӧ һе нәһатийә буйине жи, ԝе зьке деда бьмьрийа (Ԛн.Дщ. 5:18; 22:22). Ле Йаһоԝа әԝ шьхӧл һьлда дәсте хԝә, у жь бо пәймана Пʹадшатийе, һьндава Даԝьд рʹәʹма хԝә да кʹьфше (2 См. 7:11-16), у жь бо ве йәке кӧ Даԝьд хԝәха жи рʹәʹмтийе дьда кʹьфше (1 См. 24:4-7; бәрамбәр кьн Аԛб. 2:13), у ӧса жи чьмки Хԝәде дьле ԝан дит, кӧ әԝана гӧнед хԝә дьдьнә рʹуйе хԝә (Зб. 51:1-4). Ле йәкә әԝана жь бо гӧнед хԝә бе щәза нәман. Бь сайа Натʹан пʹехәмбәр Йаһоԝа жерʹа әʹлам кьр: «Әзе жь зӧрʹәта тә хьрабийе ль тә бькьм» (2 См. 12:1-12, ИМ).
(2 Самуйел 12:13, ИМ) Даԝьд гот: «Мьн ль бәр Хӧдан гӧнә кьр.» Натʹан жерʹа гот: «Хӧдан гӧне тә әʹфу кьр, те нәмьри.»
(Мәтта 20:17-32) Чахе Иса һьлдькʹьшийа Оршәлиме, тʹәне һәр донздәһ шагьртед хԝә тʹәви хԝә бьрьн у рʹеда готә ԝан: 18 «Ва йә әм һәвраз дьчьнә Оршәлиме. Кӧрʹе Инсан ԝе бькʹәвә дәсте сәрәкед кʹаһина у ԛанунзана. Әԝе жерʹа кӧштьне дәрхьн 19 у ԝи бьдьнә дәсте нәщьһуйа, ԝәки ԛәрфе хԝә ль ԝи бькьн, бьдьн бәр ԛамчийа у хач кьн. Ле рʹожа сьсийа әԝе жь мьрьне рʹабә». 20 Һьнге дийа кӧрʹед Зәбәди тʹәви һәр дӧ кӧрʹед хԝә һатә щәм Иса, хԝә авитә ньге ԝи тьштәк же дьхԝәст. 21 Иса же пьрси: «Тӧ чь дьхԝази?» Әԝе готә ԝи: «Бежә, кӧ әв һәр дӧ кӧрʹед мьн ль нав Пʹадшатийа тәда, йәк ль мьле тәйи рʹасте, йе дьн жи ль мьле тәйи чʹәпе рʹуне». 22 Ле Иса ль ԝан вәгәрʹанд у гот: «Һун ньзаньн чь дьхԝазьн. Гәло һун дькарьн жь ԝе кʹасе вәхԝьн, йа кӧ әзе вәхԝьм?» Ԝана готә ԝи: «Бәле, әм дькарьн». 23 Әԝи ԝанарʹа гот: «Рʹаст ә һуне ԝе кʹаса мьн вәхԝьн, ле изьна ль мьле мьни чʹәп у рʹасте рʹуньштьне нә дәсте мьнда йә. Әԝ щи бона ԝан ьн, кʹижанарʹа алийе Баве мьнда һатьнә һазьркьрьне». 24 Гава һәр дәһә шагьртед дьн әв йәк бьһист, дьле ԝан жь һәр дӧ бьра ма. 25 Ле Иса әԝ гази щәм хԝә кьрьн у гот: «Һун заньн кӧ миред мьләта сәрԝерийе ԝан дькьн у гьрәгьред ԝан һʹӧкӧми сәр ԝан дькьн. 26 Ле нава ԝәда гәрәке ӧса нибә. Кʹи кӧ нава ԝәда дьхԝазә бьбә йе мәзьн, гәрәке бьбә бәрдәстийе ԝә. 27 У кʹи кӧ нава ԝәда дьхԝазә бьбә пеш, гәрәке бьбә хӧламе ԝә, 28 чаԝа кӧ Кӧрʹе Инсан нәһатийә кӧ жерʹа бәрдәстийе бькьн, ле ԝәки әԝ хԝәха бәрдәстийе бькә у әʹмьре хԝә бьдә, кӧ гәләка бькʹьрʹә». 29 Гава әԝана жь Әриһайе дәркʹәтьн, әʹлаләтәкә гьран да пәй ԝи чу. 30 Дӧ кор сәр ԝе рʹе рʹуньштьбун. Гава бьһистьн кӧ Иса дәрбаз дьбә, кьрьнә ԛирʹин у готьне: «Хӧдан, Кӧрʹе Даԝьд, ль мә ԝәрә рʹәʹме». 31 Әʹлаләте ль ԝан һьлат, кӧ дәнге хԝә бьбьрʹьн, ле ԝана һе кьрә ԛирʹин у готьне: «Хӧдан, Кӧрʹе Даԝьд, мә ԝәрә рʹәʹме!» 32 Иса сәкьни, гази ԝан кьр у гот: «Һун чь жь мьн дьхԝазьн кӧ әз бона ԝә бькьм?»
20-26 ҺʹӘЗИРАНЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 13-14
«Хԝәһʹьзийа Амнон Бәла Ани»
it-1 32
Абшалом
Кӧштьна Амнон. Амнон, нив бьрайе Абшалом, сәр хушка ԝи Тамар бәнги бу, йа кӧ гәләк бәдәԝ бу. Амнон хԝә ԛәста нәхԝәш авит, сәва кӧ Тамар бе у жерʹа хԝарьне чекә. Гава әԝе жерʹа хԝарьн ани, әԝи дәсте зоре ле хьраб кьр. Әԝ бәнгибуна ԝийә гӧрʹ у тәме ԝийә хьраб һьндава Тамаре, дәрберʹа сәр нәфрʹәтийе һатә гӧһастьне у әԝи ле пьшт дери хьст. Әԝе кʹьнщед хԝәйә рʹәнг-рʹәнги кӧ ԛизед пʹадше йед бькʹьр ль хԝә дькьрьн, сәр хԝә чьрʹанд, у хԝәли сәр сәре хԝәда кьр. Һьнге Абшалом рʹасти ԝе һат. Әԝи фәʹм кьр чь ԛәԝьмийә, у дәрберʹа сәрва чу кӧ әва кьре Амнон ә. Әԝ йәк дьдә кʹьфше ԝәки Абшалом һаш жь тәме ԝийә хьраб һәбу. Ле йәкә әԝи Тамарерʹа гот, ԝәки дәрһәԛа ве йәке кәсәкирʹа нәвежә, у ле мала хԝәда хԝәй кьр (2 См. 13:1-20).
Хԝәгьрти бьн
11 Кʹьтеба Пирозда һәнә сәрһатийед ԝан мәрьва, йед кӧ алийе сексуалида кем хԝәгьрти бун. Әԝ сәрһати рʹьнд нишан дькьн кӧ чахе мәрьв ви тьштида хԝәгьрти нинә, әԝ ахьрийа хьраб дьстинә. Әԝед кӧ мина Ким рʹасти щерʹьбандьна ӧса тен, ԝе кʹаре бьстиньн һәрге бьфькьрьн дәрһәԛа сәрһатийа гәде дьлсах, кʹижан кӧ Мәтʹәлок сәре 7-да те гьли кьрьне. Ӧса жи бьфькьрьн дәрһәԛа зьнекʹарийа Амнон у ахьрийа ԝийә гәләк хьраб (2 Сам. 13:1, 2, 10-15, 28-32). Де-бав дькарьн али зарʹед хԝә бькьн, ԝәки һьндава һәләԛәтийа романтики хԝәгьрти у сәрԝахт бьн. Мәсәлә, ԝәʹде ԛӧльхкьрьна тʹәви малбәте, әван сәрһатийед жь Кʹьтеба Пироз шеԝьр кьн.
it-1 33 ¶1
Абшалом
Дӧ сал дәрбаз бу. Ԝәʹдә һат ԝәки кәрийед пез һәвринг кьн, у Абшалом хԝәст бона ве йәке сьфрәкә мәзьн рʹаст кә Баал-Һасореда, кʹижан кӧ ԝәкә 22 километьр дури Бакӧр-Рʹоһьлата Оршәлиме бу. Әԝи кӧрʹед пʹадше у хԝәха Даԝьд жи тʹәглифи сәр ве щәжьне кьр. Даԝьд гот ԝәки әԝ нькарә бе, у һьнге Абшалом готе, ԝәки ӧса нә бьра нӧхрийе хԝә Амнон бьшинә (Мтʹл. 10:18). Гава Амнон жь шәраве сәрхԝәш бу, Абшалом фәрман да хӧламед хԝә ԝәки әԝ бькӧжьн. Кӧрʹед Даԝьдә майин вәгәрʹийанә Оршәлиме, Абшалом жи рʹәви щәм кальке хԝәйи Сури, пʹадшатийа Гәшуреда, кӧ жь Бәʹра Щәлиле алийе рʹоһьлате бу (2 См. 13:23-38). Ӧса «шуре» кӧ Натʹан пʹехәмбәрти кьрьбу, кʹәтә мала Даԝьд у жь ԝи ԝәʹдәйи һʹәта мьрьна ԝи жь мала ԝи дур нәдькʹәт (2 См. 12:10).
Хьзна Кʹьтеба Пироз
g04 22/12 8-9
Кʹижан Бәдәԝбун Дьһа Фәрз ә
Ԝәрә әм мәсәла Абшалом шеԝьр кьн, йәк жь кӧрʹед Даԝьд. Рʹаст ә әԝ зәʹф бәрбьчʹәʹв бу, ле әԝ йәки ԛәлп бу. Кʹьтеба Пирозда дәрһәԛа ԝи те готьне: «Ль тʹәмамийа Исраеле кәсәки бь ԛаси Авшалом кӧ жь бо бәдәԝийа ԝи пәсне ԝи дьһат дайин тʹӧнәбу, жь сәри һʹәта бьни льһәвһати у беԛьсур бу» (2 Самуйел 14:25, ИМ). Ле жь бо хԝәһʹьзийе у бабахийе, әԝ мьԛабьли баве хԝә дәркʹәт, ԝәки тʹәхте пʹадшатийе зәфти хԝә кә. Әԝи һәла һе сәре хԝә щарийед баве хԝәрʹа дани. Бь ве йәке әԝи һерса Хԝәде сәр хԝәда ани у чәрчьри ӧса мьр (2 Самуйел 15:10-14; 16:13-22; 17:14; 18:9, 15).
Ԛә ԝәйе Абшалом бәгәм кьра? Һәмьки на. Хәйсәте ԝи гәләк мьрʹдарʹ бу. Бәдәԝбуна ԝи, ԛӧрʹәбун у нәамьнийа ԝи һәԛ нәдькьр у ԝи жь бәлайе хьлаз нәкьр. Ле Кʹьтеба Пирозда һәнә гәләк мәсәлед мәрьвед сәрԝахт у хунширьн, дәрһәԛа бәдәԝбуна кʹижана Кʹьтеба Пирозда тʹӧ тьшт найе готьне. Әшкәрә йә, ԝәки бәдәԝбуна дьле ԝан дьһа фәрз бу.
(2 Самуйел 14:25, 26, ИМ) Ль тʹәмамийа Исраеле кәсәки бь ԛаси Авшалом кӧ жь бо бәдәԝийа ԝи пәсне ԝи дьһат дайин тʹӧнәбу, жь сәри һʹәта бьни льһәвһати у беԛьсур бу. 26 Авшалом сале щарәке тʹәне пʹорʹе хԝә дьԛӧсанд кӧ дьреж бьбә. Гава дькʹьшанд, ль гори пивана пʹадишаһийе гьранийа пʹорʹе ԝи дӧ сәд шәкәл бу.
(Мәтта 21:1-14) Гава әԝ незики Оршәлиме бун, һатьнә гӧнде Бәйтфаще, чʹийайе Зәйтʹуне. Һьнге Иса дӧ шагьртед хԝә шандьн 2 у ԝанарʹа гот: «Һәрʹьнә ԝи гӧнде пешбәри хԝә у һуне кʹәрәкә гьредайи щәʹшьк бәр бьбиньн. Ԝан кʹәра вәкьн биньнә щәм мьн. 3 Һәгәр йәк ԝәрʹа тьштәки бежә, һун бежьн: ‹Хӧданрʹа лазьм ьн› у әԝе зу ԝан бьшинә». 4 Әва ӧса ԛәԝьми, кӧ әԝ готьна бь заре пʹехәмбәр бе сери: 5 «Бежьнә бажаре Сийоне: ‹Ва Пʹадше тә те щәм тә, шкәсти, ль кʹәре у щәʹшька кʹәре сийарбуйи›». 6 Шагьрт чун у чаԝа кӧ Иса тʹәми дабу ԝан ӧса кьрьн. 7 Кʹәр у щәʹшьк анин, кʹьнщед хԝә авитьнә сәр ԝан у әԝ ль ԝан сийар бу. 8 Әʹлаләтәкә гьран кʹьнщед хԝә сәр рʹе рʹадьхьстьн, һьнәка жи чʹьԛьле дара дьбьрʹин у сәр рʹе рʹадьхьстьн. 9 Әʹлаләта кӧ ль пешийа ԝи у ль пәй ԝи дьчу, дькьрә ԛирʹин у дьгот: «Һосанна Кӧрʹе Даԝьдрʹа! Бьмбарәк ә әԝе кӧ бь наве Хӧдан те! Һосанна Йе Һәри Жорьнрʹа!» 10 Гава Иса кʹәтә Оршәлиме, тʹәмамийа бажер һʹәжийа у пьрсин: «Әв кʹи йә?» 11 Әʹлаләте гот: «Әва Исайе Пʹехәмбәр ә, жь Ньсрәта Щәлиле». 12 Иса кʹәтә пʹарьстгәһе у һʹәмуйед кӧ пʹарьстгәһеда тʹӧщарәти дькьрьн дәрхьстьн. Тʹәхтед сәрафа у кʹӧрсийед кәвоткфьроша ԝәлгәрʹандьн 13 у готә ԝан: «Ньвисар ә: ‹Мала мьн мала дӧа ԝе бе һʹәсабе›, ле ԝә әԝ кьрийә ‹шкәфта ԛачаха›!» 14 Ль ԝьр пʹарьстгәһеда кор у сәԛәт һатьнә щәм ԝи у әԝи әԝ ԛәнщ кьрьн.
27 ҺʹӘЗИРАНЕ–3 ТИРМӘҺЕ
ФЬКЬРЕД ԚИМӘТ ЖЬ ХӘБӘРА ХԜӘДЕ | 2 САМУЙЕЛ 15-17
«Абшалом жь бо Ԛӧрʹәбуне Мьԛабьл Рʹабу»
it-1 860
Зугәрʹ
Бәре ԝәлатед Рʹоһьлатеда әʹдәт бу, ԝәки меред кӧ зу дьрʹәвьн, пешийа әʹрәба пʹадше бьрʹәвийана, дәрһәԛа һатьна ԝи әʹлам кьрана у ӧса жи аликʹари бьдана ԝи (1 См. 8:11). Абшалом у Адонийа, сәва кӧ тʹәхте пʹадшатийе зәфти хԝә кьн, наве хԝә бьльнд кьн у бьдьнә кʹьфше кӧ йанчь кьред ԝан бь ԛануни нә, ԝана 50 меред зугәрʹ кʹьфш кьрьн, ԝәки пешийа әʹрәбед ԝан бьрʹәвьн (2 См. 15:1; 1 Пʹд. 1:5; бьньһерʹә РʹӘВОК).
ԝ12 15/7 13 ¶5
Хԝәдейе Азайерʹа Хьзмәт кьн
5 Кʹьтеба Пирозда гәләк мәсәлед кәсед ӧса һәнә, йед кӧ сәр мәрьва хьраб һʹӧкӧм дькьрьн. Йәк жь ԝан Абшалом, кӧрʹе Даԝьд бу. Әԝ йәки гәләк бәрбьчʹәʹв бу. Ле ԝәʹдә шунда, әԝи мина Мире-щьна, изьн да ԝәки тьмайи у ԛӧрʹәбун дьле ԝида пешда бен. Рʹаст ә изьна ԝи тʹӧнә бу тʹәхте баве хԝә ԝар бә, ле әԝи бь дәсте зоре дьхԝәст әԝ тʹәхт зәфти хԝә кьра. Әԝи бь фелбази дьхԝәст һʹӧкӧме пʹадшатийе бькә бьн дәсте хԝә, ләма жи хԝә ӧса да кʹьфше йанчь әԝ бона һʹалхԝәшийа щьмәʹта Исраел хәм дькә, у пʹадшатийеда тʹалаша тʹӧ кәси нинә кӧ бона ԝан хәм бькә. Чаԝа кӧ Мире-щьна бахче Еденеда хԝә дәԝса херхԝазәки дани, Абшалом жи хԝә дәԝса мәрьвәки ӧса дани, у һьм жи бӧхдан авитә баве хԝә (2 Сам. 15:1-5).
it-1 1083-1084
Һәброн
Чәнд сал шунда, Абшаломе кӧрʹе Даԝьд диса вәгәрʹийа Һәброне, у ԝедәре хԝәрʹа план чекьр кӧ чь щурʹәйи баве хԝә жь тʹәхте пʹадшатийе бавежә. Ле әԝ йәк щәм ԝи нәһатә стандьне (2 См. 15:7-10). Сәва кӧ бьгьһижә нета хԝә, әԝи хут Һәброн бьжарт, дьԛәԝьмә жь бо ве йәке кӧ бәре әв пʹайтʹәхте Щьһудайе бу, у бажаре ԝи бу. Паше Рʹәһобоԝам Пʹадша, нәбийе Даԝьд, Һәброн тʹәзәда ава кьр (2 Др. 11:5-10). Паши ве йәке гава Бабилонийа Щьһуда ԝеран кьрьн у Щьһуйед дил вәгәрʹийан әʹрде хԝә, һьнәк жь ԝан Һәбронеда (Ԛирйат-арба), щиԝар бун (Нм. 11:25).
Хьзна Кʹьтеба Пироз
ԝ18.08 6 ¶11
Тӧ Рʹаст Зани Һәр Тьшти?
11 Щара әм дькарьн рʹасти нәһәԛийе бен, мәсәлә мәрьв дәрһәԛа мә тьштед ӧса дькарьн бәла кьн, кʹижан кӧ нивида рʹаст ьн йан жи информасийа нә бь тʹәмами йә. Әԝ йәк дькарә дьле мә бешинә. Дина хԝә бьдьнә мәсәла Даԝьд Пʹадша у Мәфибошәт. Даԝьд ԛәнщийа мәзьн да кʹьфше һьндава Мәфибошәт, кӧ һʹәму әʹрде кальке ԝи Шаԝул, вәгәрʹандә ԝи (2 Сам. 9:6, 7). Ле ԝәʹдә шунда, Даԝьд дәрһәԛа Мәфибошәт тьштед нәбаш пеһʹәсийа. Даԝьд нә жи пеһʹәсийа һәла әԝ йәк рʹаст ә йан на, у сафи кьр ԝәки һʹәму мьлкʹе Мәфибошәт жь ԝи бьстинә (2 Сам. 16:1-4). Ахьрийеда чахе Даԝьд шашийа хԝә фәʹм кьр, әԝи пʹарәкә мьлкʹе ԝи пашда да ԝи (2 Сам. 19:24-29). Ле әԝ нәһәԛи ԝе тʹӧнә буйа, һәрге Даԝьд дәԝса кӧ сафикьрьнеда ләз кʹәта, пешда һәр тьшт пебьһʹәсийа.
(2 Самуйел 16:4, ИМ) Пʹадша гот: «Һәр тьште Мәфибошет йе тә йә.» Сива гот: «Әз ль бәр тә хԝә дьтәԝиньм, хԝәйе мьн пʹадша! Бьра дьле тә һәргав бь мьн хԝәш бә.»
(Мәтта 21:15-30) Ле гава кӧ сәрәкед кʹаһина у ԛанунзана әԝ кʹәрәмәтед кӧ Иса кьрьн дитьн у ӧса жи әԝ зарʹед кӧ пʹарьстгәһеда дькьрьнә ԛирʹин у дьготьн: «Һосанна Кӧрʹе Даԝьдрʹа!» һерс кʹәтьн 16 у готьнә ԝи: «Тӧ дьбьһейи әв чь дьбежьн?» Иса ԝанарʹа гот: «Бәле. Ԝә ԛәт нәхԝәндийә кӧ: ‹Тә бь заред тʹьфал у дәргуша пәсьндайин ани сери›?» 17 У әԝи әԝ ль ԝьр һьштьн, жь бажер дәркʹәт, чу Бәйтанйайе у шәв ль ԝьр ма. 18 Сьбәһе зу, чахе әԝ вәгәрʹийа бажер, бьрʹчи бу. 19 Сәр рʹе дарәкә һежире дит, незики ԝе бу, ле пештьри бәлга тьштәки дьн пева нәдит у дарерʹа гот: «Жь вьр шунда тӧ һʹәта-һʹәтайе бәр нәди!» У дар перʹа-перʹа һʹьшк бу. 20 Гава шагьрта әв йәк дит, зәндәгьрти ман у готьн: «Чаԝа әв дара һежире перʹа-перʹа һʹьшк бу?» 21 Иса щаба ԝан да у гот: «Әз рʹаст ԝәрʹа дьбежьм, һәгәр баԝәрийа ԝә һәбә у дӧдьли нәбьн, һуне нә тʹәне чь кӧ һатә сәре ве дара һежире бькьн, ле һәгәр һун ви чʹийайирʹа жи бежьн: ‹Рʹабә хԝә бавежә бәʹре›, ԝе бьбә. 22 Һәгәр баԝәрийа ԝә һәбә, һун чь кӧ нава дӧада бьхԝазьн, һуне бьстиньн». 23 Гава әԝ һатә пʹарьстгәһе у щьмәʹт һин кьр, сәрәкед кʹаһина у рʹуспийед щьмәʹте һатьнә щәм ԝи у готьне: «Тӧ бь чь һʹӧкӧми ван кьра дьки? У кʹе әв һʹӧкӧм дайә тә?» 24 Иса ль ԝан вәгәрʹанд у гот: «Әзе жи тьштәки жь ԝә бьпьрсьм. Һәгәр ԝә щаба мьн да, әзе жи ԝәрʹа бежьм әз бь чь һʹӧкӧми ван кьра дькьм. 25 Һʹӧкӧме ньхӧмандьна Йуһʹәнна жь кʹӧ бу, жь әʹзмен бу, йан жь мәрьва бу?» Әԝана нав һәвда шеԝьрин у готьн: «Һәгәр әм бежьн: ‹Жь әʹзмен бу›, әԝе мәрʹа бежә: ‹Ле ԝә чьма баԝәрийа хԝә ԝи нәани?› 26 Ле һәгәр әм бежьн: ‹Жь мәрьва бу›, әм жь әʹлаләте дьтьрсьн, чьмки һʹәмуйа ԛәбул дькьр кӧ Йуһʹәнна пʹехәмбәр бу». 27 Ԝана щаба Иса да у готьн: «Әм ньзаньн». Әԝи ԝанрʹа гот: «Әз жи ԝәрʹа набежьм кӧ әз бь чь һʹӧкӧми ван кьра дькьм. 28 Һун чаԝа тʹәхмин дькьн? Дӧ кӧрʹе мәрьвәки һәбун. Әԝи кӧрʹе хԝәйи мәзьнрʹа гот: ‹Лаԝо! Иро һәрʹә нав рʹәз, шьхӧл бькә›. 29 Әԝи ле вәгәрʹанд у гот: ‹Әз начьм›, ле паше пʹошман бу у чу. 30 Һьнге бав чу щәм йе дьн әԝи жи аһа гот: ‹Бәле, әзе һәрʹьм баво›, ле нәчу.