Бь Баԝәрийе Бьньһерʹә ль сәр Кʹӧтасийа ве Дьнйа Зӧлм

Зутьрәке сәбьра Йаһоԝа ԝе хьлаз бә у Әԝе дьнйа зӧлм кʹӧта кә. Религийа ԛәлп ԝе кʹӧта бә, коалисйа мьләта ԝе һʹьщуми сәр щьмәʹта Хԝәде бькә у Йаһоԝа ԝе мәрьвед зӧлм Һармәгәдонеда кʹӧта кә. Мәсиһи гәләк һʹьзрәта ԝан ԛәԝьмандьнед фәрз ьн.

Һәмьки әм һʹәму тьшти дәрһәԛа тәнгасийа мәзьн һур бь һур ньзаньн. Мәсәлә, әм конкрет ньзаньн әв йәк ԝе чь чах дәстпебә. Әм ньзаньн кӧ ԛәԝатед политики ԝе чь мәʹнийа бьгьрьн, сәва кӧ һʹьщумкьрьна хԝәйә сәр религийа, һәԛ дәрхьн. Әм ньзаньн кӧ һʹьщумкьрьна мьләта сәр щьмәʹта Хԝәде ԝе чьԛас ԝәʹдә бькʹьшинә, йан жи ԝе чь щурʹәйи бә. Әм ӧса жи ньзаньн кӧ Йаһоԝа ԝе чь бьдә хәбате, сәва кӧ йед зӧлм Һармәгәдонеда кʹӧта кә.

Чь жи һәбә, Ньвисаред Пироз һʹәму информасийа кӧ мәрʹа лазьм ә дьдә мә, ԝәки әм бона ԛәԝьмандьнед ахьрийе баԝәри у мерхасийа хԝә, ӧнда нәкьн. Мәсәлә, әм заньн ԝәки әм «рʹожед ахьрийеда» дьжин (2 Тим. 3:1). Әм заньн ԝәки рʹожед һʹьщумкьрьна сәр религийа ԝе «кьн бьн», сәва кӧ религийа рʹаст нәйе кʹӧтакьрьне (Мт. 24:22). Әм ӧса жи заньн ԝәки Йаһоԝа ԝе щьмәʹта хԝә хьлаз кә (2 Пт. 2:9). Һьм жи әм һаш пе һәнә, ԝәки Йаһоԝа Иса бьжартийә, кʹижан кӧ йәки рʹаст у ԛәԝат ә, сәва кӧ йед зӧлм кʹӧта кә у әʹлаләта мәзьн Һармәгәдонеда хьлаз кә (Әʹнт. 19:11, 15, 16).

Жь бо ԛәԝьмандьнед ахьрийе «дьле мәрьва жи жь тьрса ԝе бьсәкьнә». Хенщи ԝе йәке чахе әм дьхуньн у дьфькьрьн, кӧ Йаһоԝа ча бәре щьмәʹта хԝә хьлаз дькьр у Әԝи дәрһәԛа ахьрийе чь әʹйан кьр, әм дькарьн «сәре хԝә бьльнд кьн» у баԝәр бьн кӧ азабуна мә ида незик ә (Лԛ. 21:26, 28).