Кани бона Бәрнама Щьвине, Бьжин у Хьзмәт кьн
3-9 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ СТЬРАНА СЬЛЕМАН 1-2
Сәрһатийа Дәрһәԛа Һʹәзкьрьна Амьн
(Стьрана Сьлеман 1:9-11, ИМ)
9 Әз тә . . . [бәрамбәри һәспа] әʹрәбәйед Фьрәԝьн [дькьм], йара мьн. 10 [Сурәтед] . . . тә бь хәмла, стуйе тә бь . . . [мори] чьԛас хԝәшьк ә. 11 Әме тәрʹа хәмлед зерʹин чекьн, бь пʹаред зивин.
(Стьрана Сьлеман 2:16, 17, ИМ)
16 Әвиндаре мьн, йе мьн ә, әз жи йа ԝи мә. Ль нав сосьна пәзе хԝә дьчʹеринә. 17 Гава дьнйа һеньк бу, си дьреж бун, дәлале мьн, бьбә мина хәзал у ԝәрә! Мина каре пәзкʹовийед ль сәр чʹийа у зьнара вәгәрʹә!
Хьзна Кʹьтеба Пироз
(Стьрана Сьлеман 2:7, ИМ)
7 Йа кәчʹед Оршәлиме! Әз бь хәзалед ме, бь пәзкʹовийед ме, бь ԝә сонд дьдьм хԝарьн, һʹәзкьрьне һʹьшйар нәкьн у рʹанәкьн, һʹәта әԝ бьхԝазә.
10-16 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ СТЬРАНА СЬЛЕМАН 3-5
Фәрз ә Дьлда Бәдәԝ Бьн
(Стьрана Сьлеман 4:3, ИМ)
3 Мина . . . [тʹелед] сор ьн левед тә, чь хԝәшьк ә дәве тә. Пьшт хелийеда . . . [сурәтед] тә, мина . . . [кӧдӧред] һʹьнаре хӧйа нә.
(Стьрана Сьлеман 4:11, ИМ)
11 Һьнгьв дьһәрʹькә жь левед тә, бука дәлал. Шир у һьнгьв бьн зьмане тәда йә. Бина Лӧбнане те жь кʹьнщед тә.
(Стьрана Сьлеман 4:12, ИМ)
12 Бахчәки гьрти йә . . . [хушка] мьн, бука дәлал, каникә гьрти у моркьри.
ԝ00 15/11 32
Бәдәԝбуна Дьл Тʹӧ Щар Начʹьлмьсә
Мәрьв дьһа зедә дина хԝә дьдьнә бәдәԝбуна физики, нә кӧ бәдәԝбуна дьлда, у жь бо ве йәке ньһерʹандьна нәрʹаст һьндава мәрьва пешда те. Ле Әʹфьрандаре мә кʹурайа дьл дьвинә, у бона ԝи фьрԛи тʹӧнә кӧ әм рʹува чь щурʹәйи нә. Әв йәк мәсәләкә баш ә бона мә, кӧ ньһерʹандьна мә һьндава мәрьва гәрәке чь щурʹәйи бә. Кʹьтеба Пирозда те готьне: «Хӧдан мина мәрьв дьвиньн навинә. Мәрьв ль рʹу дьньһерʹә, ле бәле Хӧдан ль дьл дьньһерʹә» (1 Самуйел 16:7, ИМ).
Хԝәде сафи дькә кӧ бәдәԝбун бь рʹасти чьда йә у Хәбәра Хԝәда әԝи әʹйан кьрийә, кӧ бәдәԝбуна рʹаст рʹӧһʹанийа мәрьвава гьредайи йә. Кʹьтеба Пирозда те готьне: «Дәрәԝ ә дәлалти у пʹучʹ ә бәдәԝәти, кʹӧлфәта жь Хӧдан дьтьрсә әԝә хԝәзити» (Мәтʹәлок 31:30). Гәләк щар ӧса дьбә, кӧ мәрьве бәдәԝ хԝәйе һʹӧнӧред баш ниньн (Әстәр 1:10-12; Мәтʹәлок 11:22). Рʹаст ә бәдәԝбуна физики дькарә һеди-һеди бьчʹьлмьсә, ле бәдәԝбуна дьлда, демәк һʹӧнӧред баш, дькарьн дьһа зедә бьн у дьһа бәдәԝ бьн.
Ләма жи чьԛас бь билани йә һʹӧнӧред ӧса нав хԝәда пешда биньн, ча «һʹәзкьрьн, шабун, әʹдьлайи, сәбьр, дьловани, ԛәнщи, баԝәри, шкәстибун, хԝәгьртьн» (Галати 5:22, 23). Һәрге әм ԝан һʹӧнӧра нав хԝәда пешда биньн, әме бькарьбьн бәдәԝбуна ӧса ԛазанщ кьн, кʹижан кӧ тʹӧ щар начʹьлмьсә (1 Пәтрус 3:3, 4).
Хьзна Кʹьтеба Пироз
(Стьрана Сьлеман 3:5, ИМ)
5 Йа кәчʹед Оршәлиме! Әз бь хәзалед ме, бь пәзкʹовийед ме, бь ԝә сонд дьдьм хԝарьн, һʹәзкьрьне һʹьшйар нәкьн у рʹанәкьн, һʹәта әԝ бьхԝазә.
17-23 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ СТЬРАНА СЬЛЕМАН 6-8
Нав-Намус бә
(Стьрана Сьлеман 8:8, 9, ИМ)
8 Хушкәкә мә йа бьчʹук һәйә, һе мәмькед ԝе тʹӧнәнә. Рʹожа кӧ ԝе бьхԝазьн, әме жь бо ԝе чь бькьн? 9 Һәрге әԝ сурәк буйа, мәйе ль сәр ԝе бьрщәкә зив ава бькьра. Һәрге әԝ дәрик буйа, мәйе бь тʹәхтькед дара . . . [әрзе] әԝ бьньхамта.
(Стьрана Сьлеман 8:10, ИМ)
10 Әз диԝар ьм, мәмькед мьн жи бьрщед ԝе нә. Ләма ль бәр чʹәʹве ԝи әз бум йа кӧ рʹьһʹәтийе тинә.
yp 188 ¶2
Гәло Хԝәде Ча Дьньһерʹә сәр Һәләԛәтийа Сексуалийә Пешийа Зәԝаще?
Гава хорт у ԛиз хԝә жь бенамусийе хԝәй дькьн, әԝана нә кӧ тʹәне хԝә жь ахьрийа хьраб хԝәй дькьн, ле ӧса жи тьштәки ԛимәт ԛазанщ дькьн. Кʹьтеба Пирозда дәрһәԛа ԛизәке те готьне, йа кӧ хортәки һʹәз дькьр, ле диса жи бәр чʹәʹве Хԝәде тʹәмьз дьма. Ләма жи әԝе бь сәрбәсти дькарьбу бьгота: «Әз диԝар ьм». Әԝ мина дәрики сьст нибу, кʹижан кӧ дькарьбу һеса вәбуйа, демәк бькʹәта бәр байе бенамусийе. Пьрсед нав-намусийева гьредайида, әԝ мина бьрщед ԛәԝи у диԝаред бьльнд бу, чьмки тʹӧ кәс нькарьбу бькʹәта бьрщед ӧса. Әԝ һежайи ве йәке бу, кӧ һатә навкьрьне «беԛьсур», у дәрһәԛа дәргистийе хԝә дькарьбу бьгота: «Бәр чʹәʹве ԝи әз бум йа кӧ рʹьһʹәтийе тинә». Әв йәк кӧ исафа ԝе тʹәмьз бу, баш һʹӧкӧм дькьр сәр һәләԛәтийа ԝе тʹәви дәргистийе ԝе (Стьрана Сьлеман 6:9, 10; 8:9, 10, ИМ).
yp2 33
Мәсәла Кәчʹька жь Шунәме
Кәчʹька жь Шунәме фәʹм дькьр, кӧ гәрәке сәрԝахт бә у нәкʹәвә бәр байе һәстед романтик. Әԝе һәвалед хԝәрʹа ӧса гот: «Әз бь ԝә сонд дьдьм хԝарьн, һʹәзкьрьне һʹьшйар нәкьн у рʹанәкьн, һʹәта әԝ бьхԝазә». Кәчʹька жь Шунәме заньбу, ԝәки һәстед романтик дькарьн ӧса сәр мәрьв һʹӧкӧм кьн, кӧ әԝе нькарьбә зәлал бьфькьрә. Мәсәлә, әԝе фәʹм дькьр кӧ бьн һʹӧкӧме һәвалада дькарә ԛайил бә һәләԛәтийа романтик тʹәви ԝи мәрьви дәстпекә, кʹижан кӧ лайиԛи ԝе нинә. Һәла һе һәстед ԝейә шәхси жи дькарьбун рʹийа ве бьгьртана кӧ рʹаст сәр тьшта бьньһерʹә. Ле кәчʹька жь Шунәме хԝәгьртьн дьда кʹьфше у хԝә бәрамбәри «диԝар» дькьр (Стьрана Сьлеман 8:4, 10, ИМ).
Гәло ньһерʹандьна тә жи һьндава һʹәзкьрьне мина йа кәчʹька жь Шунәме йә? Гәло тӧ дькари гӧһ бьди нә кӧ тʹәне дьле хԝә, ле ӧса жи һʹьше хԝә? (Мәтʹәлок 2:10, 11) Щарна мәрьвед дәр-дор дькарьн ӧса сәр тә һʹӧкӧм кьн, ԝәки тӧ бькʹәви бәр байе ԝан у тʹәви кәсәки һәләԛәтийа романтик дәстпеки, гава тӧ бона ве йәке һәла һе һазьр нини. Ле щарна дьбәкә ньһерʹандьна тә жи нәрʹаст бә. Мәсәлә, чахе тӧ дьвини кӧ хорт у ԛизәк дәсте һәв гьртьнә у хԝәрʹа дьгәрʹьн, дьбәкә тӧ дьлтәнг дьби, чьмки тӧ жи дьхԝази тʹәви кәсәки һәләԛәтийа романтик дәстпеки. Дьбәкә һәстед тә ӧса ԛәԝи бьн, ԝәки тӧ ԛайил би һәла һе кәсе нәбаԝәрмәнд жи бәгәм ки. Кәчʹька жь Шунәме ве пьрседа сәрԝахт бу. Тӧ жи дькари чʹәʹв бьди ԝе!
Хьзна Кʹьтеба Пироз
(Стьрана Сьлеман 8:6, ИМ)
6 Тӧ мьн мина морәки дайнә сәр дьле хԝә, мина морәки дайнә сәр зәнде хԝә. Чьмки һʹәзкьрьн мина мьрьне . . . [ԛәԝи] йә, дьлкʹәтьн мина дийаре мьрийа . . . [ԛайим] ә. Пʹета ԝе мина пʹета егьр [алава Йаһ, ДТʹ] дьшәԝьтинә у дьԛәдинә.
24-30 МЬЖДАРЕ
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 1-2
Гӧман бона Ԝан, Йед кӧ жь бо Гӧнед Хԝә Дьлтәнг ьн
(Ишайа 1:4-6, ИМ)
4 Ԝәй ль ԝи мьләте гӧнә дькә, . . . [щьмәʹта] нәһәԛи ль хԝә баркьри, зӧрʹәта хьрабкʹара, Зарʹокед хьраббуйи! Ԝана . . . [Хԝәде һишт] у Пирозе Исраел кем дит. Ԝана пьшта хԝә дане. 5 Чьма һун дьхԝазьн диса ледан бьхԝьн? Чьма һун сәри һьлдьдьн? Сәри бь тʹәмами нәхԝәш, дьл бь тʹәмами . . . [бьриндар] ә. 6 Жь бьне пʹийа һʹәта сәри сьһʹәта ԝә нәмайә. Тʹәне . . . [пьзьк], бьринед кәвьн у ну һәнә. Һʹәму бьринед ԝә жи нәпаԛьжкьри, нәпʹечайи, нәрʹункьри нә.
(Ишайа 1:16, ИМ)
16 Хԝә бьшон у паԛьж бькьн, жь бәр чʹәʹве мьн хьрабикьрьне рʹакьн, даԝи ль хьрабийе биньн.
(Ишайа 1:18, ИМ)
18 Хӧдан дьбежә: «Ньһа ԝәрен әм ль доза хԝә бьньһерʹьн. Гӧнед ԝә бь хуне сор жи бьбьн, ԝе мина бәрфе сьпи бьбьн. Бьбьн мина ԛьрмьзе сор жи, ԝе мина һьрийе сьпи бьбьн.
ip-1 14 ¶8
Бав у Кӧрʹед Ԝийә Рʹабәр
8 Ишайа ԝан гьлийед сәрт дьбежә Щьһуйа: «Ԝәй ль ԝи мьләте гӧнә дькә, гәле нәһәԛи ль хԝә баркьри, зӧрʹәта хьрабкʹара, зарʹокед хьраббуйи! Ԝана . . . [Хԝәде һишт] у Пирозе Исраел кем дит. Ԝана пьшта хԝә дане» (Ишайа 1:4, ИМ). Кьред хьраб дькарьн ӧса зедә бьн, кӧ бьбьнә мина барәки гьран. Ԝәʹде Бьраһим, Йаһоԝа дәрһәԛа Содом у Гоморайе гот, кӧ «гӧнед ԝан гәләки гьран бунә» (Дәстпебун 18:20). Тьштәки ӧса нава щьмәʹта Щьһудайеда жи дьԛәԝьми, чьмки Ишайа дьбежә ԝәки ԝана бь нәһәԛи хԝә бар кьрийә. Әԝ ӧса жи ԝана нав дькә «зӧрʹәта хьрабкʹара, зарʹокед хьраббуйи». Бәле, бьнәлийед Щьһудайе мина ԝан зарʹа бун, йед кӧ нәһәԛи кьрьбун. Ԝана пьшта хԝә да Хԝәде у һьндава ԝида ча һьндава хәрибәки бун.
Хьзна Кʹьтеба Пироз
(Ишайа 2:2, 3, ИМ)
2 Рʹожед пешда, ԝе чʹийайе Мала Хӧдан бе данин кӧ бьбә чʹийайе һәри бьльнд. Ԝе бь сәр һʹәму гьран бькʹәвә у һʹәму мьләт бьһәрʹькьне. 3 Ԝе пʹьрʹ гәл һәрʹьне у бежьн: «Ԝәрен Чʹийайе Хӧдан, ԝәрен, әм һәрʹьн Мала Хԝәдайе Аԛуб, кӧ әԝ рʹийед хԝә һини мә бькә у әм рʹечʹькед ԝида бьмәшьн». Чьмки ԝе рʹе у рʹебаз жь Сийоне у готьна Хӧдан жь Оршәлиме дәркʹәвә.
1-7 КАНУНА ПЕШЬН
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 3-5
Йаһоԝа Һежа бу кӧ Щьмәʹта Ԝи Гӧрʹа Ԝида бә
(Ишайа 5:1, 2, ИМ)
1 Әз жь бо рʹәзе әвиндаре хԝә, страна әвиндаре хԝә бежьм: Ль . . . [бьльндщики сәр әʹрде ԝийи] бәрдар, рʹәзәки әвиндаре мьн һәбу. 2 Ԝи рʹәз кʹола у кәвьр дәрхьстьн. Меԝед бьжарә ле чандьн у ль наве бьрщәк ава кьр. Һьндӧрʹе ԝеда . . . [щийе бона һʹьнщьрʹандьна тьрийа] жи кʹола. Әԝ ль бәнде ма кӧ рʹәз тьри бьдә, ле рʹәз тьрийе . . . [бәйани] да.
(Ишайа 5:7, ИМ)
7 Рʹәзе Хӧдане Кариндар Мала Исраел ә, . . . [хԝәйе ԝи] пе дьлша йә, . . . [щьмәʹта] ԝи Щьһуда йә. Һәԛи бу һевийа ԝи, ле ԝи дит . . . [нәрʹасти]. [Һәԛи] . . . бу һевийа ԝи, ле тʹәне ма һәԝари.
(Ишайа 5:4, ИМ)
4 Һе жи тьштәки кӧ жь бо рʹәзе хԝә бькьм майә? Ԛәй мьн һәр тьшти нәкьрийә? Әз ль бәнде бум тьри бьдә мьн, ле чьма тьрийе . . . [бәйани] да?
ԝ06 15/6 17 ¶1
«Ве Кʹола Тьрийе Тӧ Хԝәй кә»!
Сәва кӧ гәләк шәрав чекьн, щоткʹаред Исраели гәрәке рʹьнд мьԛати рʹәзед тьрийа буна. Кʹьтеба Ишайада те готьне, ԝәки пешийа кӧ рʹәзед тьрийайә бьжарә дачʹькинә, рʹәзван әʹрд сәр бьльндщики бещәр дькьр у жь кәвьред мәзьн тʹәмьз дькьр. Паше жь ԝан кәвьра әԝи дькарьбу диԝар ава кьра, сәва кӧ рʹәзед тьрийа хԝәй кьра жь һʹәйԝанед мале, жь рʹувийа, жь һьнә һʹәйԝанед бәйани у жь дьза. Хԝәйе рʹәзед тьрийа жь кәвьра тьштәки ӧса чедькьр, кʹидәре кӧ тьри дьһʹьнщьрʹанд у ӧса жи бьрщәкә бьчʹук чедькьр, кʹидәре кӧ һеньк бу у әԝи дькарьбу мьԛати рʹәзед хԝә бә. Тʹәне паши щәфед ӧса, хԝәйе рʹәз дькарьбу һивийе буйа, ԝәки бәред баш бьстинә (Ишайа 5:1, 2).
ip-1 76 ¶8-9
Ԝәй ль Рʹәзед Тьрийайә Нәамьн!
Ишайа, хԝәйе рʹәзед тьрийа, демәк Йаһоԝа, нав дькә «әвиндаре мьн» (Ишайа 5:1, ИМ). Ишайа дькарьбу ӧса Хԝәде нав кьра, чьмки һәләԛәтийа ԝи тʹәви Хԝәде незик бу (Бәрамбәр кә Ибо 29:4; Зәбур 25:14). Һʹәзкьрьна Ишайа һьндава Хԝәде ча бежи тʹӧ тьшт нибу һьмбәри һʹәзкьрьна Хԝәде һьндава щьмәʹта ԝи, демәк һьндава рʹәзед тьрийа кӧ әԝи «дачʹьканд» (Бәрамбәр кә Дәркʹәтьн 15:17; Зәбур 80:8, 9).
9 Йаһоԝа щьмәʹта хԝә әʹрде Кәнанеда «дачʹьканд», демәк щиԝар кьр у ԛанун у тʹәми да ԝан, кʹижан кӧ мина диԝар ԝана жь һʹӧкӧме хьраб йед мьләтед дәр-дор хԝәй дькьрьн (Дәркʹәтьн 19:5, 6; Зәбур 147:19, 20; Әфәси 2:14). Хенщи ве йәке, Йаһоԝа һʹакьм, кʹаһин у пʹехәмбәр кʹьфш дькьрьн ԝәки әԝана щьмәʹте һин кьн (2 Пʹадшати 17:13; Малахи 2:7; Кʹаред Шандийа 13:20). Гава дьжмьн мьԛабьли Исраелийа дәрдькʹәтьн, Йаһоԝа кәсед ӧса кʹьфш дькьрьн, йед кӧ щьмәʹта ԝи дьпʹарастьн (Ибрани 11:32, 33). Ләма жи мәʹнийа Йаһоԝа һәбу кӧ щьмәʹта хԝә бьпьрсә: «Һе жи тьштәки кӧ жь бо рʹәзе хԝә бькьм майә? Ԛәй мьн һәр тьшти нәкьрийә?»
ԝ06 15/6 18 ¶1
«Ве Кʹола Тьрийе Тӧ Хԝәй кә»!
Ишайа «Мала Исраел» бәрамбәри рʹәзед тьрийа кьр, кʹижан кӧ ԝәʹдә шунда ида бәред бәйани дьда (Ишайа 5:2, 7, ИМ). Тьрийед бәйани жь тьрийед бахчә бьчʹуктьр ьн у бь дәндька тʹьжә нә. Тьрийед бәйани найенә хԝарьне у нә жи шәраве жь ве чедькьн, ләма жи әв симбола щьмәʹта Хԝәде бу, йе кӧ пьшта хԝә дабу Хԝәде у нә кӧ бәред баш, ле бәред хьраб дьани. Ле ве йәкеда нәһәԛийа рʹәзван тʹӧнә бу. Йаһоԝа Хԝәде алийе хԝәда һәр тьшт кьр, сәва кӧ щьмәʹта ԝи бәред баш бьдә. Әԝи пьрси: «Һе жи тьштәки кӧ жь бо рʹәзе хԝә бькьм майә? Ԛәй мьн һәр тьшти нәкьрийә?» (Ишайа 5:4, ИМ).
ԝ06 15/6 18 ¶2
«Ве Кʹола Тьрийе Тӧ Хԝәй кә»!
Щьмәʹта Исраел бәред баш нәдьда, ләма жи Йаһоԝа готә ԝан, ԝәки ԝе әв диԝар һьлшинә, йе кӧ әԝи дора ԝан ава кьрьбу, сәва кӧ ԝана бьпʹарезә. Әԝе ида рʹәзед тьрийа нәбьрʹә у халийа ве бещәр нәкә. Баранед бьһаре, кʹижанава кӧ гьредайи йә һәла рʹәзед тьрийа ԝе бәр бьдьн йан на, ида ԝе нәбарьн, у рʹәзед тьрийа ԝе бь зиԝан у стьрийа тʹьжә бә (Ишайа 5:5, 6).
Хьзна Кʹьтеба Пироз
(Ишайа 5:20, ИМ)
20 Ԝәй ль ԝан кәса кӧ жь йа хьрабрʹа ԛәнщ, жь йа ԛәнщрʹа хьраб дьбежьн. Тәʹрийе дькьн . . . [дәԝса] рʹонайе, рʹонайе дькьн . . . [дәԝса] тәʹрийе. Тәʹл дькьн . . . [дәԝса] ширин, ширин дькьн . . . [дәԝса] тәʹл.
8-14 КАНУНА ПЕШЬН
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 6-8
«Әз ль Вьр ьм, Мьн Бьшинә»!
(Ишайа 6:8, ИМ)
8 Пьштрʹа мьн дәнге Рʹәб бьһист. Ԝи дьгот: «Әз кʹе бьшиньм? Ԝе кʹи жь бо мә һәрʹә?» Мьн гот: «Әз ль вьр ьм, мьн бьшинә».
(Ишайа 6:9, 10, ИМ)
9 Ԝи гот: «Рʹабә һәрʹә у ви . . . [мьләтирʹа] бежә: «‹Чьԛас бьбьһизьн жи фәʹм нәкьн, Чьԛас бьбиньн жи тенәгьһижьн. 10 Дьле ви . . . [мьләти] һʹьшк бькә, гӧһе ԝан гьран бькә у чʹәʹве ԝан бьгьрә кӧ бь чʹәʹве хԝә нәбиньн, бь гӧһе хԝә нәбьһизьн у бь дьле хԝә фәʹм нәкьн. Ль мьн вәнәгәрʹьн у . . . [ԛәнщкьрьне] нәбиньн›».
ip-1 93-94 ¶13-14
Йаһоԝа Хԝәде Пʹарьстгәһа Хԝәйә Пирозда йә
13 Ԝәрә әм жи тʹәви Ишайа гӧһ бьдьнә ԝан хәбәра: «Мьн дәнге Рʹәб бьһист. Ԝи дьгот: ‹Әз кʹе бьшиньм? Ԝе кʹи бона мә һәрʹә?› Мьн гот: ‹Әз ль вьр ьм, мьн бьшинә›» (Ишайа 6:8, ИМ). Әшкәрә йә кӧ Йаһоԝа әв пьрс дьдә, сәва кӧ щаб жь Ишайа бьстинә, чьмки ве дитьнокеда тʹӧ пʹехәмбәрәки дьн тʹӧнә бу. Бе шьк, Йаһоԝа Ишайа тʹәглиф дькә кӧ бьбә әʹламәтчийе ԝи. Ле гәло чьма Йаһоԝа дьпьрсә: «Ԝе кʹи бона мә һәрʹә?» Гава Йаһоԝа дәстпедькә нә кӧ йәканида ле гәләканида хәбәр дә, ча те кʹьфше әԝ диса кәсәки һьлдьдә һʹәсаб. Гәло кʹе? Әԝ дәрһәԛа Кӧрʹе хԝәйи тайе-тʹәне дьбежә, йе кӧ паше ча мәрьв һатә сәр әʹрде, әԝ Иса Мәсиһ бу. Һәмьки, әԝ һәма әԝ кәс бу, кʹижанирʹа кӧ Йаһоԝа гот: «Әм мәри дьлԛе хԝәда у мина хԝә бьхӧльԛиньн» (Дәстпебун 1:26; Мәтʹәлок 8:30, 31). Бәле, сәр әʹзмана кʹеләка Йаһоԝа Кӧрʹе ԝийи тайе-тʹәне йә (Йуһʹәнна 1:14).
14 Ишайа дәрберʹа щаба хԝә дьдә! Бона ԝи фьрԛи тʹӧнә бу кӧ чь әԝи гәрәке әʹлами щьмәʹте кьра, әԝ дәрберʹа дьбежә: «Әз ль вьр ьм, мьн бьшинә». Әԝ нә жи дьпьрсә кӧ әԝе чь кʹаре бьстинә, һәрге ԝе тʹәмийе бинә сери. Рʹӧһʹе һазьрбуне кӧ Ишайа да кʹьфше, мәсәләкә баш ә бона һʹәму хьзмәткʹаред Хԝәдейә рʹожед мәда, кʹижанарʹа кӧ тʹәми һатийә дайине ԝәки ‹мьзгинийа Пʹадшатийе сәр тʹәмамийа дьнйайе бәла кьн› (Мәтта 24:14). Мина Ишайа, әԝана жи бь амьни әве тʹәмийе тиньн сери у «һʹәму мьләтарʹа» шәʹдәтийе дьдьн һәла һе ԝи чахи жи, гава мәрьв гӧһ надьнә ԝан у дьлсарийе дьдьнә кʹьфше. Әԝана мина Ишайа бәрдәԝам дькьн шьхӧле хԝә биньн сери, чьмки заньн кӧ әв шьхӧл кәсе Һәри Жорьн дьнйалькеда дайә ԝан.
ip-1 95 ¶15-16
Йаһоԝа Хԝәде Пʹарьстгәһа Хԝәйә Пирозда йә
15 Паше Йаһоԝа Ишайарʹа дьбежә кӧ чь әԝ гәрәке әʹлами щьмәʹте кә у щьмәʹт ԝе ча хԝә бьдә кʹьфше, гава ве әʹламәтийе бьбьһе. Йаһоԝа гот: «Рʹабә һәрʹә у ви . . . [мьләтирʹа] бежә: ‹Чьԛас бьбьһизьн жи фәʹм нәкьн, чьԛас бьвиньн жи тенәгьһижьн. Дьле ви . . . [мьләти] һʹьшк бькә, гӧһе ԝан гьран бькә у чʹәʹве ԝан бьгьрә кӧ бь чʹәʹве хԝә нәвиньн, бь гӧһе хԝә нәбьһизьн у бь дьле хԝә фәʹм нәкьн. Ль мьн вәнәгәрʹьн у . . . [ԛәнщкьрьне] нәвиньн›» (Ишайа 6:9, 10, ИМ). Гәло әв йәк дьһатә һʹәсабе кӧ Ишайа гәрәке сәрт у бәрзәԛ буйа, у бь ве йәке ӧса бькьра кӧ Щьһуйа нәхԝәста вәгәрʹьн щәм Йаһоԝа? Һәмьки на! Әв щьмәʹта Ишайа бу у әԝи ԝана һʹәз дькьр. Ле гьлийед Йаһоԝа әʹйан кьрьн, кӧ щьмәʹт ԝе ча хԝә бьдә кʹьфше, гава әʹламәти жь Ишайа бьбьһе. Фьрԛи тʹӧнә кӧ чьԛас рʹаст у бь амьни Ишайа әԝе щабдарийе бинә сери, йәкә әԝана ԝе гӧһ нәдьнә ԝи.
16 Ле диса жи әв йәк нәһәԛийа щьмәʹте бу. Ишайа ԝе диса у диса щьмәʹтерʹа хәбәр дә, ле әԝана ԝе әʹламәтийа жь ԝи ԛәбул нәкьн у фәʹм нәкьн. Һʹәчʹи зәʹф мәрьв ԝе сәрһʹьшкийе бьдьнә кʹьфше у гӧһ нәдьнә ԝи, те бежи әԝана кор у кәрʹ ьн. Бь ве йәке кӧ Ишайа диса у диса дьһатә щәм ԝан, әԝи мәщал дьда ԝан кӧ әԝана бьдьнә кʹьфше ԝәки нахԝазьн әве әʹламәтийе фәʹм кьн у ԛәбул кьн, у әв йәк сафикьрьна ԝан ә. Әԝана ԝе бьдьнә кʹьфше кӧ хԝәха һʹьше хԝә у дьле хԝә дадьдьн у әʹламәтийа Хԝәде инкʹар дькьн, йа кӧ Ишайа ԝанрʹа дьбежә. Һʹале мәрьвед рʹожа иройин жи һәма ӧса нә! Гәләк жь ԝан гӧһ надьнә Шәʹдед Йаһоԝа, йед кӧ мьзгинийа дәрһәԛа Пʹадшатийа Хԝәде бәла дькьн.
ip-1 99 ¶23
Йаһоԝа Хԝәде Пʹарьстгәһа Хԝәйә Пирозда йә
23 Иса хәбәред жь Ишайа ԝәкʹьланд у бь ве йәке да кʹьфше ԝәки әԝ пʹехәмбәрти рʹожед ԝида жи дьһатә сери. Щьмәʹт хԝә ӧса дьда кʹьфше, чаԝа кӧ Щьһуйед рʹожед Ишайада. Ԝана һьндава рʹастийе ча бежи хԝә кор у кәрʹ кьр, у әԝана жи һатьнә ԛьрʹкьрьне (Мәтта 23:35-38; 24:1, 2). Әв йәк ԛәԝьми сала 70 Д.М.-да, гава ордийед Рʹомайи бьн рʹебәрийа сәрәскәр Тито мьԛабьли Оршәлиме дәркʹәтьн у шәһәр тʹәви пʹарьстгәһ ԝеран кьрьн. Ле һьнә мәрьв гӧһ данә хәбәред Иса у бунә шагьртед ԝи. Иса ԝан мәрьва нав кьр «бәхтәԝар» (Мәтта 13:16-23, 51). Әԝи ԝанрʹа гот, гава «бьвиньн кӧ ордийа дора Оршәлиме гьртийә», һьнге гәрәке «бьрʹәвьнә чʹийа» (Луԛа 21:20-22). Ӧса «зӧрʹәта пироз», кӧ баԝәри дьда кʹьфше, һатьбу хԝәйкьрьне, жь кʹижани кӧ щьмәʹта рʹӧһʹани һатьбу сазкьрьне, демәк «Исраела Хԝәде» (Галати 6:16).
Хьзна Кʹьтеба Пироз
(Ишайа 8:1-4, ИМ)
1 Хӧдан мьнрʹа гот: «Тӧ . . . [тʹәхтәки] мәзьн һьлдә у ль сәр бь ньвисәкә һеса, ‹Йе Маһер-Шалал-Һаш-Баз ә› бьньвисә. 2 Жь бо ве жи бьла Урийайе Кʹаһьн у Зәкәрийайе кӧрʹе Йәвәрекйа кӧ . . . [амьн] ьн бьбьн шәʹдед мьн». 3 Әз чум бал жьна хԝәйә пʹехәмбәр, әԝ бь зарʹо ма у кӧрʹәки ани. Хӧдан мьнрʹа гот: «Тӧ наве ԝи ‹Маһер-Шалал-Һаш-Баз› дайнә. 4 Чьмки һе кӧ зарʹок һини готьна: ‹Дайе, баво› нәбуйә, ԝе Пʹадшайе Ашуре дәԝләмәндийа Шаме у тʹалане Самәрйайе хԝәрʹа бьбә».
15-21 КАНУНА ПЕШЬН
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 9-10
Дәрһәԛа «Рʹонайикә Мәзьн» Һатә Пʹехәмбәртикьрьне
(Ишайа 9:1, 2, ИМ)
1 Ле ԝе тәʹритийа ԝәлате дьлтәнг нәминә. Бәре Хԝәде һәремед Нәфтәли у Зәвулон бьчʹук хьст, ле . . . [ахьрийеда], ԝе һәремед Рʹийа Дәрйайе, алийе дьн йе Чʹәме Шәриайе, Щәлиләйа мьләта бьрʹумәт бькә. 2 [Щьмәʹта] . . . кӧ тәʹрийеда дьчә, ԝе рʹонайикә мәзьн бьвинә. Ль сәр . . . [бьнәлийед] ԝәлате тәʹрийа кʹур, ԝе бьбә рʹонайи.
(Ишайа 9:3, ИМ)
3 Тә мьләт зедә кьр, Те шаһийа ԝан жи мәзьн бьки. Дәма . . . [нандьруне] шайи чаԝа бә, дәма пʹарәвәкьрьна тʹаленда . . . [шабун] чаԝа бә, ԝе ль пеш тә жи ӧса ша бьбьн.
(Ишайа 9:4, 5, ИМ)
4 Чьмки чаԝа кӧ тә рʹожа Мидйанеда шькандьн, Те нире ль сәр ԝан дьбә бар, даре зӧлма ль сәр мьле ԝан, гопале ль сәр пьшта ԝан бьшькени. 5 Һәр . . . [соле] шәрʹване чуйә шәрʹ, щьлед хунеда һатьнә . . . [ләԝьтʹандьне], ԝе жь бо егьр . . . бьшәԝьтьн.
ԝ11 15/8 10-11 ¶13
Әԝана Һивийа Мәсиһ Бун
13 Дәрһәԛа хьзмәтийа Мәсиһийә Щәлиледа жи һатьбу пʹехәмбәртикьрьне. Ишайа пʹехәмбәр дәрһәԛа «һәремед Нәфтәли у Зәбулон . . . Щәлиләйа мьләта» ӧса ньвиси: «[Щьмәʹта] . . . кӧ тәʹрийеда дьчә, ԝе рʹонайикә мәзьн бьвинә. Ль сәр . . . [бьнәлийед] ԝәлате тәʹрийа кʹур, ԝе бьбә рʹонайи» (Ишайа 9:1, 2, ИМ). Иса хьзмәтийа хԝә Щәлиледа, шәһәре Кәпәрнаһумеда дәстпекьр, кʹидәре кӧ бьнәлийед Нәфтәли у Зәбулон рʹонайа рʹӧһʹани дитьн, кʹижан кӧ Иса ԝанрʹа ани (Мәтта 4:12-16). Щәлиледа Иса Готара хԝәйә сәр Чʹийе гот, йа кӧ бь фькьред кʹур тʹьжә бу, шанди бьжартьн, кʹәрәмәта хԝәйә пешьн кьр, у ча те кʹьфше, паши сахкьрьна хԝәйә жь мьрьне, һәма ԝедәре 500 шагьртед хԝәрʹа әʹйан бу (Мәтта 5:1–7:27; 28:16-20; Маркос 3:13, 14; Йуһʹәнна 2:8-11; 1 Корьнтʹи 15:6). Ӧса бь сайа хьзмәтийа хԝәйә ‹һәремед Нәфтәли у Зәбулонда›, әԝи пʹехәмбәртийа жь Ишайа ани сери. Һәмьки, Исраеледа Иса һәремед дьнда жи хьзмәт дькьр.
ԝ01 15/7 14-15 ¶19-20
Бь Шабуне Шьхӧле Нандьрунеда Кʹар Бькә!
19 Ԝәʹде хьзмәтийа Исайә сәр әʹрде у паши хьлазкьрьна хьзмәтийа ԝи, шьхӧле нандьруне шабунәкә мәзьн дьани. Гәләк мәрьв бь һазьрбуне мьзгини ԛәбул дькьрьн. Рʹожа Пенщийе Һʹәсабе йа сала 33 Д.М. рʹожәкә мәхсус бу, чьмки ве рʹоже ԝәкә 3 000 мәрьв гӧһ данә хәбәред Пәтрус, рʹӧһʹе пироз стандьн у бунә пʹара щьмәʹта Хԝәде, демәк Исраела рʹӧһʹани. Һәжмара Исраела рʹӧһʹани зедә дьбу, чьмки «Йаһоԝа рʹож бь рʹож һәжмара кәсед кӧ дьһатьнә сәр рʹийа хьлазбуне, зедә дькьр», чь кӧ шабунәкә мәзьн дьани (Кʹаред Шандийа 2:37-41, 46, 47; Галати 6:16; 1 Пәтрус 2:9).
20 Ԝи чахи пʹехәмбәртийа жь Ишайа дьһатә сери: «Тә мьләт зедә кьр, Те шайа ԝан жи мәзьн бьки. Дәма . . . [нандьруне] шайи чаԝа бә, дәма пʹарәвәкьрьна тʹаленда . . . [шабун] чаԝа бә, ԝе ль пеш тә жи ӧса ша бьбьн» (Ишайа 9:3, ИМ). Рʹаст ә иро әм дьвиньн кӧ һәжмара кәсед бь рʹӧһʹе пироз кʹьфшкьри «зедә» буйә у ида те бежи тʹәмам буйә жи, әм ша дьбьн ве йәкерʹа кӧ һәр сал һәжмара ԝан кәса жи зедә дьбә, гӧмана кʹижана кӧ жийина сәр әʹрде йә (Зәбур 4:7; Зәкәрйа 8:23; Йуһʹәнна 10:16).
ip-1 128-129 ¶20-21
Созе Дәрһәԛа Мире Әʹдьлайе
Чаԝа кӧ жь ԝан хәбәред Ишайа те кʹьфше, кʹара жь шьхӧле кӧ Мәсиһ дькьр, ԝе һʹәта-һʹәтайе бә. Ишайа ньвиси: «Чьмки чаԝа кӧ тә рʹожа Мьдйанеда шькандьн, Те нире ль сәр ԝан дьбә бар, даре зӧлма ль сәр мьле ԝан, гопале ль сәр пьшта ԝан бьшькени» (Ишайа 9:4, ИМ). Бь сәда сала пешийа ԝәʹде Ишайа пʹехәмбәр, Мьдйана тʹәви Моԝабийа шеԝьра хԝә кьрьн, ԝәки Исраелийа бьвьнә бәрбь бенамусийе (Жьмар 25:1-9, 14-18; 31:15, 16). Ԝәʹдә шунда, нава һʹәфт салада Мьдйана тьрса хԝә кьрьбунә сәр Исраелийа, чьмки ԝана һʹьщуми сәр гӧндед Исраелийа дькьр у ԝана тʹалан дькьрьн (Һʹакьмти 6:1-6). Ле паше Йаһоԝа бь сайа Гидәйон ордийа Мьдйана кʹӧта кьр. У ида тʹӧ шәʹдәти тʹӧнә нә кӧ паши ԝан рʹожа щьмәʹта Йаһоԝа диса жь дәсте Мьдйана дьчәрчьри (Һʹакьмти 6:7-16; 8:28). Зутьрәке Иса Мәсиһ, йе кӧ Гидәйоне мәзьн ә, ԝе дьжмьнед щьмәʹта Хԝәдейә рʹожа иройин кʹӧта кә (Әʹйанти 17:14; 19:11-21). Паше, чаԝа кӧ Йаһоԝа ордийа Мьдйана кʹӧта кьр, һәма ӧса жи бь ԛәԝата Ԝи, нә кӧ бь ԛәԝата мәрьва, һʹәму дьжмьнед щьмәʹта Хԝәде ԝе бь тʹәмами бенә кʹӧтакьрьне (Һʹакьмти 7:2-22). Ида тʹӧ щар щьмәʹта Хԝәде ԝе нәйе зерандьне!
21 Әв йәк кӧ Йаһоԝа ԛәԝата хԝә бь ԝи щурʹәйи әʹйан дькә, найе һʹәсабе кӧ әԝ зордари у шәрʹ ԛәбул дькә. Исайе кӧ жь мьрьне һатийә сахкьрьне, Мире Әʹдьлайе йә, у чахе әԝе дьжмьна бь тʹәмами кʹӧта кә, бь сайа ве йәке әԝе әʹдьлайа һʹәта-һʹәтайе бинә сәр әʹрде. Паше Ишайа диса дьбежә, ԝәки һʹәму тьштед шәрʹ-дәʹԝава гьредайи ԝе бе кʹӧтакьрьне. «Һәр . . . [соле] шәрʹване чуйә шәрʹ, щьлед хунеда һатьнә гәвьзандьн, ԝе жь бо егьр . . . бьшәԝьтьн» (Ишайа 9:5, ИМ). Ида ԝе тʹӧ щар дәнге солед әскәра нәйенә бьһистьне. Тʹӧ кәс ԝе ида кʹьнщед әскәред кӧштийә хунеда ләԝьтʹи, нәвинә. Шәрʹ-дәʹԝ ида ԝе тʹӧнә бьн! (Зәбур 46:9)
Хьзна Кʹьтеба Пироз
(Ишайа 9:6, ДТʹ)
6 Бона мә зарʹок һатә буйине, кӧрʹ мәрʹа һатә дайине; Сәрԝерти ԝе сәр мьле ԝи бә, әԝе бе навкьрьне Ширәткʹаре Пʹьрʹ Баш, Хԝәдейе Зор, Баве Һʹәта-Һʹәтайе, Мире Әʹдьлайе.
22-28 КАНУНА ПЕШЬН
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 11-13
Кʹьтеба Пироз Дәрһәԛа Мәсиһ Чь Готьбу?
(Ишайа 11:1, ИМ)
1 Ԝе жь ԛӧрʹме Йеша . . . [чʹил] бавежә, жь кʹока ԝи чʹьԛләк феки бьдә.
(Ишайа 11:2, 3, ИМ)
2 Ԝе Рʹӧһʹе Хӧдан, Рʹӧһʹе . . . [биланийе] у фәʹмдарийе, Рʹӧһʹе ширәт у . . . [ԛәԝате], Рʹӧһʹе занин у тьрса Хӧдан ль сәр ԝи бә. 3 Ԝе бь тьрса Хӧдан ша бьбә. Ԝе ль гора дитьна чʹәʹве хԝә . . . [диԝане] нәкә у ль гора бьһистьна гӧһе хԝә . . . [ширәта] нәдә.
(Ишайа 11:3, ИМ)
3 Ԝе бь тьрса Хӧдан ша бьбә. Ԝе ль гора дитьна чʹәʹве хԝә . . . [диԝане] нәкә у ль гора бьһистьна гӧһе хԝә . . . [ширәта] нәдә.
(Ишайа 11:4, ДТʹ)
4 Әԝ ԝе бь һәԛийе диԝана бәләнгаза бькә, у пе рʹастийе ширәт кә бона кʹара мьлукед сәр әʹрде. Ԝе бь гопале готьна хԝә дьнйайе хә, бь һӧлма дәве хԝә хьраба бькӧжә.
(Ишайа 11:5, ИМ)
5 Ԝе пьштенка пьшта ԝи . . . [рʹасти], кʹәмбәра нава ԝи . . . [амьни] бә.
ԝ11 1/4 4 ¶6
Иса жь Кʹидәре Һат?
Чәнд ԛьрʹна пешда Ньвисаред Пирозда һатьбу пʹехәмбәртикьрьне, ԝәки Мәсиһ ԝе бе навкьрьне «йе Ньсрәти». Мәтта ньвиси, ԝәки малбәта Иса «ль бажарәки бь наве Ньсрәт щиԝар бу, ԝәки әв готьна пʹехәмбәра бе сери: ‹Сәр ԝи, ԝе йе Ньсрәти бе готьне›» (Мәтта 2:19-23). Ча те кʹьфше, хәбәра «Ньсрәти» жь хәбәра Ибрани пешда те, кӧ те һʹәсабе «чʹил». Дьԛәԝьмә Мәтта дәрһәԛа пʹехәмбәртийа Ишайа дьхԝәст бьгота, кʹидәре кӧ Мәсиһ те навкьрьне чʹиле жь кʹока Йеша, йе кӧ баве Даԝьд Пʹадша бу (Ишайа 11:1). Иса бь рʹасти зӧрʹәта Йеша бу жь хәза Даԝьд Пʹадша (Мәтта 1:6, 16; Луԛа 3:23, 31, 32).
ip-1 159 ¶6
Сәрԝертийа Иса Хьлазбун у Шабуне Тинә
6 Гәло Иса ԝе сәрԝерәки чь щурʹәйи бә? Гәло әԝ ԝе мина Асур сәрт у зӧлм бә, йе кӧ һʹьщуми сәр пʹадшатийа Исраелейә бакӧре кьр? Һәмьки на. Дәрһәԛа Мәсиһ Ишайа ӧса гот: «Ԝе Рʹӧһʹе Хӧдан, Рʹӧһʹе . . . [биланийе] у фәʹмдарийе, Рʹӧһʹе ширәт у . . . [ԛәԝате], Рʹӧһʹе занин у тьрса Хӧдан ль сәр ԝи бә. Ԝе бь тьрса Хӧдан ша бьбә» (Ишайа 11:2, 3а, ИМ). Мәсиһ нә кӧ бь рʹун ле бь рʹӧһʹе пироз һате кʹьфшкьрьне. Гава Иса щәм Йуһʹәнна Ньхӧмдар һатә ньхӧмандьне, рʹӧһʹе пироз мина кәвотке һатә сәр ԝи. Ӧса Иса бь рʹӧһʹе пироз һатә кʹьфшкьрьне (Луԛа 3:22). Иса избат дькә кӧ әԝи рʹӧһʹе пироз жь Йаһоԝа стандийә бь ве йәке кӧ билани, фәʹмдари, заньбун у ԛәԝате дьдә кʹьфше. Бона сәрԝер әԝ һʹӧнӧр чьԛас ԛимәт ьн!
ip-1 160 ¶9
Сәрԝертийа Иса Хьлазбун у Шабуне Тинә
9 Ишайа һе зедә пʹехәмбәрти дькә дәрһәԛа Иса: «Әԝ ԝе тʹәне ль гора дитьна чʹәʹвед хԝә диԝане нәкә, у тʹәне ль гора бьһистьна гӧһед хԝә ширәт нәкә» (Ишайа 11:3б, ДТʹ). Һәрге диԝана ԝә бькьрана, гәло һуне ша нәбуна кӧ һʹакьмәки ӧса диԝана ԝә бькьра? Мәсиһ Һʹакьме тʹәмамийа дьнйайе йә у дәрәԝи, гәвәзти у фелбази сәр сафикьрьнед ԝи нькарьн һʹӧкӧм кьн. Хенщи ве йәке, әԝ дина хԝә надә тьштед ӧса, чь кӧ бона мәрьва фәрз ә, мәсәлә һәбуке. Әԝ дәрәԝийе дәрберʹа тедәрдьхә, чьмки «мәрьве һьндӧрʹе дьлда» дьньһерʹә, нә кӧ рʹуйе ԝан (1 Пәтрус 3:4). Иса мәсәләкә баш ә бона ԝан бьра, йед кӧ кʹьфшкьри нә ԝәки щьватада дәрәщед чәтьн сафи кьн (1 Корьнтʹи 6:1-4).
ip-1 161 ¶11
Сәрԝертийа Иса Хьлазбун у Шабуне Тинә
11 Иса пәйчуйед хԝә бь ви щурʹәйи рʹаст дькә, кӧ әԝ йәк кʹарәкә лапә баш ԝанрʹа бинә. У әԝ бона рʹуспийа мәсәләкә баш ә ве йәкеда, кӧ ча али Мәсиһийа бькьн, ԝәки әԝана жи хԝә рʹаст кьн. Әԝе бь щурʹе сәрт диԝана ԝан мәрьва бькә, йед кӧ һини хьрабийе бунә. Чахе Хԝәде жь мәрьвед ве дьнйайе щабе бьхԝазә, Мәсиһ ԝе «дьнйайе хә», демәк ԝе һʹәму мәрьвед зӧльм кʹӧта кә (Зәбур 2:9; бәрамбәр кә Әʹйанти 19:15). Ахьрийа-ахьрийе мәрьвед зӧльм, йед кӧ әʹдьлайийе хьраб дькьн, ԝе ԛә нәминьн (Зәбур 37:10, 11). Иса йәки рʹаст у амьн ә у ԛәԝата ԝи дьгьһиже, ԝәки ве йәке бинә сери (Зәбур 45:3-7).
Хьзна Кʹьтеба Пироз
(Ишайа 11:9, 10, ИМ)
9 Ԝе тʹӧ кәс ль сәр тʹәмамийа чʹийайе мьне пироз, зьраре нәдә у ԝеран нәкә. Чьмки чаԝа ав . . . [бәʹре] тʹьжә дькә, дьнйа жи ԝе бь занина Хӧдан тʹьжә бьбә. 10 Ԝе рʹоже, ԝе кʹока Йеша мина . . . [нишана бона мьләта] бьсәкьнә. Ԝе мьләт ле бьгәрʹьн у щийе ԝи бьрʹумәт бә.
29 КАНУНА ПЕШЬН–4 ЧЬЛӘЙЕ
ФЬКЬРЕД ԚИМӘТ ЖЬ ХӘБӘРА ХԜӘДЕ ИШАЙА 14-16
Дьжмьнед Щьмәʹта Хԝәде ԝе Әʹсәйи Бенә Щәзакьрьне
(Ишайа 14:13-15, ИМ)
13 Тә дьле хԝәда дьгот: «Әзе рʹабьм әʹзмана, әзе тʹәхте хԝә дайньм сәр стеред Хԝәде. Әзе . . . ль бьльндайа Сийоне рʹунем. 14 Әзе һьлкʹьшьм сәре бьльндайа әʹԝра, әзе хԝә бькьм мина Хԝәдайе Һәри Бәрз». 15 Ле те бькʹәви дийаре мьрийа, һʹәта чʹәʹла кʹур йа мьрьне.
(Ишайа 14:22, 23, ИМ)
22 Готьна Хӧдане Кариндар әв ә: «Әзе сәр ԝанва һәрʹьм. Әзе жь Бабиле, наве ԝан, кәсед сахмайи, һʹәму бьнәли у зӧрʹәта . . . [кʹӧта кьм]». Әв ә готьна Хӧдан. 23 «Әзе Бабиле бькьм мал у мьлкʹе . . . [һʹәйԝанед бәйани у щьмщьмә]. Әзе ԝе бь гезийа . . . [кʹӧтакьрьне гези кьм]». Әв ә готьна Хӧдане Кариндар.
(Ишайа 14:24, 25, ИМ)
24 Хӧдане Кариндар сонд хԝар у гот: «Әз чаԝа фькьрибьм ԝе ӧса бә, Мьн чаԝа план кьрьбә ԝе пек бе. 25 Әзе ль ԝәлате хԝә Ашурийа бьшькеньм, ль чʹийайед хԝә ԝан бьн льнгада бьпʹәрчʹьԛиньм. Ԝе нире ԝан жь сәр . . . [щьмәʹта] мьн рʹабә, баре ԝан жь сәр пьшта ԝан рʹабә.
(Ишайа 16:13, 14, ИМ)
13 Әв ә готьна Хӧдан кӧ жь бәрева ль сәр Моаве готийә. 14 Ле ньһа Хӧдан дьбежә: «Тʹам пьшти се сала, ԝе рʹумәта Моаве, тʹәви һʹәму ԛәрәбальха ԝе йа мәзьн рʹәзил бьбә. Кем кәсед сахмайи жи, ԝе . . . [бе ԛәԝат] бьбьн».
ip-1 180 ¶16
Йаһоԝа Шәһәре Бабах Ньмьз Дькә
16 Ԝеранкьрьна Бабилоне дәрберʹа сала 539 Б.Д.М.-да нәԛәԝьми. Ле иро әм заньн ԝәки һʹәму тьшт чь кӧ Ишайа дәрһәԛа Бабилоне пʹехәмбәрти кьрьбу, һатә сери. Лекʹолинкʹарәки Кʹьтеба Пироз гот, ԝәки «иро дәԝса Бабилоне тʹәне кәвьр-кӧчʹьк у щийе хьки-хали майә. Әԝ йәк әшкәрә дькә кӧ һʹәму тьшт, чь кӧ Ишайа у Йерәмйа пʹехәмбәрти кьрьбун, рʹастә-рʹаст һатә сери». Зәлал ә кӧ ԝәʹде Ишайа тʹӧ кәс нькарьбу пʹехәмбәрти бькьра, ԝәки Бабилон ԝе сәр һʹәта-һʹәтайе ԝеран бә у бьбә щийе вьки-вала. Паши ве йәке ча Ишайа пʹехәмбәр кʹьтеба хԝә ньвиси, 200 сал дәрбаз бу, гава Мәди-Фарсийа Бабилоне кьрьнә бьн дәсте хԝә. У тʹәне бь ԛьрʹна шунда Бабилон бь тʹәмами вала бу. Гәло әԝ йәк баԝәрийа мә һьндава Кʹьтеба Пироз ԛәԝи накә, кӧ әԝ бь рʹасти Хәбәра Хԝәде йә? (2 Тимотʹейо 3:16) Хенщи ве йәке, Йаһоԝа ԝәʹде бәре пʹехәмбәрти дьанинә сери, ләма әԝ йәк мә дьдә баԝәркьрьне кӧ һʹәму пʹехәмбәртийед дәрһәԛа ахьрийе жи ԝе бенә сери.
ip-1 184 ¶24
Йаһоԝа Шәһәре Бабах Ньмьз Дькә
24 Кʹьтеба Пироз пʹадшед жь хәза Даԝьд бәрамбәри стәйрка дькә (Жьмар 24:17). Сәрԝертийа ԝан пʹадша жь Даԝьд дәстпебу, йе кӧ жь чʹийайе Сийоне сәрԝертийе дькьр. Чахе Сьлеман Оршәлимеда пʹарьстгәһ ава кьр, тʹәмамийа шәһәр һатьбу навкьрьне Сийон. Ль гора Ԛануне һʹәму меред Исраели, гәрәке сале се щара бьчуна Сийоне. Ӧса Сийон бу әԝ чʹийа, кʹидәре кӧ щьвин дәрбаз дькьрьн. Нәбукәднәсәр сафи дькә пʹадшед Щьһуйа бькә бьн дәсте хԝә у жь ви чʹийайи бәри ԝан дә. Бь ве йәке әԝ ча бежи дьхԝазә жь ԝан «стәйрка» бьльндтьр бә. Нәбукәднәсәр бона сәркʹәтьна хԝә рʹумәте надә Йаһоԝа, ле бабахийе дьдә кʹьфше у хԝә дәԝса Йаһоԝа датинә.
ip-1 189 ¶1
Пʹехәмбәртийа Йаһоԝа Дәрһәԛа Мьләта
Йаһоԝа дькарә мьләтед дьн бьдә хәбате, сәва кӧ щьмәʹта хԝә бона зӧлмийа кӧ әԝана дькьн, щәза кә. Ле һәла һе ԝи чахи жи Хԝәде нәдьхԝаст, ԝәки мьләтед дьн бь зедәйи сәрт буна һьндава щьмәʹта ԝи у һʹәбандьна рʹаст пʹепәс кьрана. Ләма жи әԝ бь сайа Ишайа пешда дәрһәԛа Бабилоне пʹехәмбәрти дькә (Ишайа 13:1). Ле ви чахи Бабилон бона щьмәʹта Хԝәде хоф нибу. Рʹожед Ишайада Асур щьмәʹта Хԝәде дьзеранд. Әԝи һʹьщуми Исраела бакӧре у һʹәчʹи зәʹф шәһәред Щьһудайе дькьр. Ле диса жи Асур ԝе һәртʹьм сәркʹәти нибуйа. Ишайа ньвиси: «Хӧдане Кариндар сонд хԝар у гот: ‹Әз ча фькьрибьм ԝе ӧса бә, мьн ча план кьрьбә ԝе пек бе. Әзе ль ԝәлате хԝә Асурийа бьшькеньм, ль чʹийайед хԝә ԝан бьн льнгада бьпʹәрчʹьԛиньм. Ԝе нире ԝан жь сәр . . . [щьмәʹта] мьн рʹабә, баре ԝан жь сәр пьшта ԝан рʹабә›» (Ишайа 14:24, 25, ИМ). Һьнә ԝәхт шунда паши ве пʹехәмбәртийа Ишайа, Асур ида бона Щьһудайе хоф нибу.
ip-1 194 ¶12
Пʹехәмбәртийа Йаһоԝа Дәрһәԛа Мьләта
12 Гәло кʹәнге әԝ пʹехәмбәрти ԝе бе сери? Зутьрәке. «Әв ә готьна Хӧдан кӧ жь бәрева ль сәр Моаве готийә. Ле ньһа Хӧдан дьбежә: ‹Тʹам пьшти се сала, ԝе рʹумәта Моаве, тʹәви һʹәму ԛәрәбальха ԝе йа мәзьн рʹәзил бьбә. Кем кәсед сахмайи жи, ԝе . . . [бе ԛәԝат] бьбьн›» (Ишайа 16:13, 14, ИМ). Ль гора избатийед археоложи ԛьрʹна һʹәйштада Б.Д.М., Моԝаб гәләк дьчәрчьри у шәһәред ве вала бун. Тиглат-Пиләсәр III дәрһәԛа пʹадше Моԝабе Саламану дьбежә кӧ әԝ йәк жь ԝан пʹадша бу, йе кӧ хәрщ дьдане. Санһәриб хәрщ жь пʹадше Моԝабе Камусунадби дьстанд. Пʹадшед Асури Есар-Һаддон у Ашурбанипал дьготьн кӧ ԝана пʹадшед Моԝабе Мусури у Камашалту кьрьбун бьн дәсте хԝә. Бь сәда сала пешда бь тʹәмами ԛьрʹа щьмәʹта Моԝаби һат. Зандара кәвьр-кӧчʹькед ԝан шәһәра дитьн, йед кӧ ль гора ньһерʹандьна ԝан, шәһәред Моԝабийа бун. Ле избатийед археоложи дәрһәԛа ве дьжмьне Исраелейә ԛәԝи, һʹәта ньһа гәләк һьндьк ьн.
Хьзна Кʹьтеба Пироз
(Ишайа 14:17, ИМ)
17 Рʹуйе әʹрде кьр бәрʹи, бажаред дьнйайе һьлшандьн у нәһьшт дил һәрʹьн малед хԝә, әв кәс ә?