ԜӘ Заньбу?

Археоложи ча избат дькә, кӧ Бәлшатсар сәрԝере Бабилоне бу?

ГӘЛӘК сала критикосед Кʹьтеба Пироз дьготьн, ԝәки Бәлшатсар Пʹадша, бәʹса кʹижани кʹьтеба Данийелда те кьрьне, тʹӧ щар тʹӧнә буйә (Дан. 5:1). Ԝана әԝ йәк дьгот, чьмки археоложа тʹӧ тьшт нәдьдитьн кӧ избат кьрьна, ԝәки әԝ пʹадша рʹасти һәбуйә. Ле сала 1854-да тьштәки мәхсус ԛәԝьми. Әԝ чь бу?

Ве сале консуле Британи, Щ. Г. Тейлор, шәһәре бәре Урда, кӧ иро Ираԛа башуре йә, авайед һьлшйайи леколин дькьр. Ԝедәре бьрща мәзьнда әԝи чәнд кәвьр дит, кӧ жь һәрʹийа сор чекьри бун. Сәр ԝан кәвьред кӧ дьрежайа ԝан ԝәкә 10 сантиметьр ә, ньвисаред кʹолайи һәнә. Сәр кәвьрәки дӧа ньвиси бу, кʹидәре дьһатә готьне, ԝәки Набонид Пʹадша у кӧрʹе ԝийи мәзьн Бәлшатсар, дьреж бьжин. Һәла һе критикос жи ԛайил бун, кӧ ньвисара сәр ви кәвьри әшкәрә избат дькә, кӧ Бәлшатсар һәбу.

Ле Кʹьтеба Пироз дьбежә, кӧ Бәлшатсар ӧса жи пʹадша бу. Ле ве йәкерʹа жи критикос ԛайил нибун. Мәсәлә, ԛьрʹна 19-да, зандарәки инглиз Ԝилиам Талбот ньвиси, ԝәки һьнәк дьбежьн кӧ Бәл-сар-уссур [Бәлшатсар] ԝәʹдәке тʹәви баве хԝә Набонид пʹадшати дькьр. Ле избаткьрьна ве йәке тʹӧнә йә».

Әԝ пьрс зәлал бу, чахе ньвисаред сәр кәвьред майин әʹйан кьрьн, ԝәки баве Бәлшатсар, Набонид, щара бь сала пайтʹәхтеда нибу. Ле һʹәта әԝ ԝедәре нибу, дәԝса ԝи кʹе бу? «Әнсиклопедийа Британида» те готьне: «Чахе Набонид жь шәһәр дәр бу, әԝи тʹәхте хԝә у ниве зәʹф ордийа хԝә, дьда кӧрʹе хԝә Бәлшатсар». Ләма жи Бәлшатсар ԝи ԝәʹдәйи ча сәрԝере Бабилоне бу. Археолож у зандаре зьман, Алан Милард, гот ԝәки логики йә кӧ «Кʹьтеба Данийелда сәр Бәлшатсар те готьне ‹пʹадша›».

Фәʹмдари йә, бона хьзмәткʹаред Хԝәде избаткьрьн хԝәха Кʹьтеба Пироз ә, кӧ кʹьтеба Данийелда информасийа рʹаст ә у жь бина бәр Хԝәде һатийә ньвисаре (2 Тимтʹ. 3:16).