Һʹьзкьрьна Һьндава Йаһоԝа Бәрбь Ньхӧмандьне Һелан Дькә

1-2. Анәгори Кʹаред Шандийа 8:27-31, 35-38, чь нәмере Әтйопи һелан кьр, кӧ бе ньхӧмандьне?

ТӦ Дьхԝази бейи ньхӧмандьне сәва бьби шагьрте Мәсиһ? Гәләк мәрьв тенә ньхӧмандьне, чьмки әԝана Йаһоԝа һʹьз дькьн у һʹәму тьштед кӧ әԝи бона ԝан кьрийә у дькә, ԛимәт дькьн. Дина хԝә бьдьнә мәсәла мәрьвәки, йе кӧ ԝәзире пʹадшайа Әтйопйайе бу.

² Әԝ мәрьве Әтйопи чахе жь Ньвисаред Пироз пеһʹәсийа кӧ чь гәрәке бькә, дәрберʹа кьр, демәк һатә ньхӧмандьне. (Бьхунә Кʹаред Шандийа 8:27-31, 35-38.) Ле чь ԝи һелан кьр кӧ әве йәке бькә? Әʹйан ә кӧ әԝи ида Хәбәра Хԝәде ԛимәт дькьр, чьмки чахе әԝ жь Оршәлиме вәдьгәрʹийа Әтйопйайе, әԝи пʹарәкә жь кʹьтеба Ишайа дьхԝәнд. У гава Филипо тʹәви ԝи хәбәр да, у әԝ пеһʹәсийа кӧ Иса бона ԝи чь кьрьйә, дьле ԝи бь рʹазибуне тʹьжә бу. Ле чьрʹа әԝ чубу Оршәлиме? Чьмки әԝи ида Йаһоԝа һʹьз дькьр. Әм ве йәке жь кʹӧ заньн? Әԝ һатьбу Оршәлиме бона Йаһоԝа бьһʹәбинә. Демәк, ча те кʹьфше әԝи дине хԝә һишт у тʹәви щьмәʹта Хԝәде дәстпекьр Хԝәдейе рʹаст бьһʹәбинә. Һәма һʹьзкьрьна һьндава Йаһоԝа әԝ һелан кьр, ԝәки гавәкә фәрз бавежә, демәк бе ньхӧмандьне у бьбә шагьрте Мәсиһ (Мәт. 28:19).

3. Чь дькарә рʹийа мәрьв бьгьрә, кӧ бе ньхӧмандьне? (Бьньһерʹә чаргошә «Тӧ Дьлда Мәрьвәки Ча ни?»)

³ Һʹьзкьрьн һьндава Йаһоԝа ԝе тә һелан кә бейи ньхӧмандьне. Ле әԝ һʹьзкьрьн ӧса жи дькарә рʹийа тә бьгьрә кӧ ве йәке бьки. Чь щурʹәйи? Дина хԝә бьдә һьнә мәсәла. Тӧ нәфәред хԝәйи нәбаԝәр у һәвалед хԝә һʹьз дьки, у дьбәкә бәрхԝә дькʹәви, кӧ һәрге тӧ бейи ньхӧмандьне, те бәр чʹәʹве ԝан рʹәш би (Мәт. 10:37). Йан дьбәкә тә тьштед ӧса һʹьз дькьр, чь кӧ Хԝәде нәфьрʹәт дькә, у тәрʹа чәтьн ә ԝан тьшта бьтʹәркини (Зәб. 97:10). Йан жи дьбәкә тә жь бьчʹуктайе щәжьнед кӧ рʹелигийа ԛәлпва гьредайи нә, дәрбаз дькьр, у ньһа гава әԝи ԝәʹдәйи тини бира хԝә, тә хԝәш те. Ләма жи тәрʹа чәтьн ә ԝан әʹдәт у щәжьна, кӧ Йаһоԝа хԝәш найен, дәрбаз нәки (1 Корн. 10:20, 21). Ләма тӧ гәрәке хԝә бьпьрси: «Дьле мьнда чь йә лапә фәрз?»

ҺʹЬЗКЬРЬНА ЛАПӘ МӘЗЬН

4. Мәʹнийа сәрәкә, кӧ чьрʹа бенә ньхӧмандьне кʹижан ә?

⁴ Дьбәкә пешийа кӧ тә тʹәви Шәʹдед Йаһоԝа һинбуна Кʹьтеба Пироз дәстпекьра, тә ида Хԝәде һʹьз дькьр у дьхԝәст кӧ Әԝ тә ԛәбул кә. Ньһа тӧ Шәʹдед Йаһоԝа нас дьки у тә хԝәш те тʹәви ԝан ԝәʹдә дәрбаз ки. Ле гәрәке тʹәне әва мәʹни нибә, кӧ хԝә тʹәсмили Йаһоԝа ки у бейи ньхӧмандьне. Мәʹнийа сәрәкә, кӧ чьрʹа бейи ньхӧмандьне, гәрәке һʹьзкьрьна һьндава Йаһоԝа бә, Хԝәдайе рʹаст. Чахе тӧ жь һәр тьшти у һәр кәси зедәтьр Йаһоԝа һʹьз дьки, ԝе тʹӧ тьшт у тʹӧ кәс рʹе тә нәгьрә, ԝәки жерʹа хьзмәт ки. Тӧ гәрәке фәʹм ки, ԝәки һʹьзкьрьн һьндава Йаһоԝа мина рʹе йә бона ньхӧмандьне у чаԝа сур ә, кʹижан кӧ али тә дькә сәр рʹийа Хԝәде бьмини.

5. Әме кʹижан пьрса шеԝьр кьн?

⁵ Иса гот ԝәки әм гәрәке Йаһоԝа бь тʹәмамийа дьле хԝә, щанийа хԝә, һʹьше хԝә у ԛәԝата хԝә һʹьз бькьн (Марԛ. 12:30). Ле тӧ ча дькари ӧса ԛайим Йаһоԝа һʹьз бьки? Чахе тӧ дәрһәԛа һʹьзкьрьна Йаһоԝа һьндава хԝә бьфькьри, тӧйе жи ԝи һʹьз бьки (1 Йуһʹн. 4:19). Чахе тӧ Йаһоԝа ԛайим һʹьз бьки, тӧйе ида бьхԝази щурʹә-щурʹә гава бавежи.b

6. Ль гора Рʹомайи 1:20, диса чь щурʹәйи тӧ дькари Йаһоԝа нас ки?

⁶ Йаһоԝа нас кә бь сайа әʹфьринед ԝи. (Бьхунә Рʹомайи 1:20; Әʹйан. 4:11). Бьфькьрьн сәр биланийа Хԝәде, кӧ әԝи ча планет у һʹәйԝан чекьрьнә. Һе зедә пебьһʹәсә дәрһәԛа бәдәна хԝә, кӧ әԝ ча әʹщеб һатьйә чекьрьне (Зәб. 139:14). У бьфькьрә сәр ве ԛәԝате кӧ Йаһоԝа кьрә нав тәʹве, кʹижан кӧ стәйрк ә жь милиарда стәйркаc (Иша. 40:26). Чахе тӧ кʹур бьфькьри дәрһәԛа әʹфьринед Йаһоԝа, те һе зедә ԝи һӧрмәт ки. Ле сәва һәләԛәтийа тә тʹәви Йаһоԝа ԛәԝи бә, бәс нинә тʹәне бьзаньби, ԝәки Йаһоԝа билан ә у ԛәԝат ә. Һәрге тӧ дьхԝази ԝи ԛайим һʹьз бьки, тӧ гәрәке дәрһәԛа ԝи һе зедә бьзаньби.

7. Чьда тӧ гәрәке дӧдьли ниби, сәва Йаһоԝа ԛайим һʹьз бьки?

⁷ Тӧ гәрәке дӧдьли нәби, ԝәки Йаһоԝа рʹасти тә һʹьз дькә. Дьбәкә тәрʹа чәтьн ә баԝәр ки, ԝәки Әʹфьрандаре әʹрд у әʹзмана дина хԝә дьдә тә у бона тә хәм дькә. Һәрге ӧса нә, бир нәкә кӧ Йаһоԝа «жь мә һәр кәси нә дур ә» (Кʹар. Шанд. 17:26-28). Әԝ «леколине һʹәму дьла дькә» у әԝ соз дьдә тә, ча кӧ Даԝьд Сьлеманрʹа гот, «һәгәр тӧ ль ԝи бьгәрʹи, әԝе хԝә бь тә бьдә дитьн» (1 Дир. 28:9). Бь рʹасти мәʹнийа кӧ тӧ ньһа Кʹьтеба Пироз һин дьби әԝ ә, кӧ Йаһоԝа тӧ кʹьшанди щәм хԝә (Йерәм. 31:3). Чьԛас һе зедә тӧ рʹьнд фәʹм бьки, кӧ Йаһоԝа чь бона тә дькә, һаԛас ԝе һʹьзкьрьна тә һьндава ԝи һе зедә бә.

8. Тӧ ча дькари Йаһоԝарʹа нишан ки кӧ һʹьзкьрьна ԝи дьшекьрини?

⁸ Тӧ дькари Йаһоԝарʹа рʹазибуне нишан ки бона һʹьзкьрьна ԝи, чахе дӧада тʹәви ԝи хәбәр ди. Һʹьзкьрьна тә һьндава Хԝәде ԝе һе ԛайим бә, чахе тӧ жерʹа тʹьме дәрһәԛа хәмед хԝә гьли ки у жь ԝи рʹази би бона һәр тьшти кӧ әԝ бона тә дькә. У достийа тә тʹәви Йаһоԝа ԝе һе ԛәԝи бә, гава тӧ бьвини кӧ әԝ ча щаба дӧайед тә дьдә (Зәб. 116:1). Тӧйе баԝәр би, ԝәки әԝ тә фәʹм дькә. Ле сәва һе незики Йаһоԝа би, тӧ гәрәке бьзаньби кӧ әԝ ча дьфькьрә. У тӧ гәрәке бьзаньби, ньһерʹандьна ԝи ча нә, әԝ чь һʹьз дькә ле чь һʹьз накә. Ве йәке тӧ дькари тʹәне бь сайа леколинкьрьна Хәбәра Хԝәде, демәк Кʹьтеба Пироз пебьһʹәси.

9. Тӧ ча дькари нишан ки, кӧ Кʹьтеба Пироз ԛимәт дьки?

⁹ Хәбәра Хԝәде, демәк Кʹьтеба Пироз ԛимәт кә. Тʹәне Кʹьтеба Пирозда һәйә рʹасти дәрһәԛа Йаһоԝа у ԛьрара ԝи һьндава тә. Те бь ве йәке бьди кʹьфше кӧ Кʹьтеба Пироз ԛимәт дьки, һәрге һәр рʹож бьхуни, хԝә һазьр ки бона һинбуна Кʹьтеба Пироз, у чь кӧ педьһʹәси әʹмьре хԝәда бьди хәбате (Зәб. 119:97, 99; Йуһʹн. 17:17). Ле бәрнама тәйә хԝәндьна Кʹьтеба Пироз һәйә? Һәрге әре, тӧ Кʹьтеба Пироз һәр рʹож дьхуни?

10. Чьда диса Кʹьтеба Пироз мәхсус ә?

¹⁰ Кʹьтеба Пироз мәхсус ә ве йәкеда жи, кӧ теда һәнә ԛәԝьмандьнед дәрһәԛа Иса, йед кӧ ԝан мәрьва ньвиси нә, кʹижан кӧ хԝәха шәʹде ԝан ԛәԝьмандьна бунә у хԝәха Иса дитьнә. Тʹәне жь Кʹьтеба Пироз тӧ дькари рʹастийе пебьһʹәси, кӧ Иса бона тә чь кьрьйә. Чахе тӧ пебьһʹәси, кӧ Иса чь дьгот у дькьр, тӧйе бьхԝази бьби досте ԝи.

11. Чь ԝе али тә бькә кӧ Йаһоԝа һʹьз бьки?

¹¹ Иса һʹьз бькә, у һʹьзкьрьна тә һьндава Йаһоԝа ԝе мәзьн бә. Чьрʹа? Чьмки Иса бь тʹәмами чʹәʹв дьда хәйсәт-һʹӧнӧред Баве хԝә (Йуһʹн. 14:9). Тӧ чьԛас һе зедә Иса нас ки, һаԛас тӧйе дьһа рʹьнд Йаһоԝа фәʹм бьки у һʹьз бьки. Бьфькьрә дәрһәԛа дьлшәԝатийа Иса һьндава ԝан мәрьва, йед кӧ бәр чʹәʹве һьнәка нә тʹӧ тьшт бун жь бо кʹәсиббуне, нәхԝәшийе у һесирбуне. Ӧса жи бьфькьрә сәр ԝан ширәта кӧ Иса дьдә тә, у ча жийина тә һе баш дьбә чахе тӧ ширәтед ԝи ԛәбул дьки (Мәт. 5:1-11; 7:24-27).

12. Чахе тӧ дәрһәԛа Иса һе зедә бьзаньби, те һелан би чь бьки?

¹² Һʹьзкьрьна тә һьндава Иса ԝе һе ԛайим бә, чахе тӧ кʹур сәр ве йәке бьфькьри, кӧ әԝи бона бахшандьна гӧнед мә, хԝә кьрә ԛӧрбан (Мәт. 20:28). Чахе тӧ фәʹм бьки, ԝәки Иса бь рʹәзәдьли бона тә әʹмьре хԝә да, тӧйе һелан би гӧне хԝә бини рʹуйе хԝә у жь Йаһоԝа бахшандьне бьхԝази (Кʹар. Шанд. 3:19, 20; 1 Йуһʹн. 1:9). У тӧ чьԛас зәʹф Йаһоԝа у Иса һʹьз бьки, һаԛас тӧйе бьхԝази нава ԝан мәрьвада би, йед кӧ мина тә Йаһоԝа у Иса һʹьз дькьн.

13. Йаһоԝа чь щурʹәйи аликʹарийе дьдә тә?

¹³ Һʹьз бькә ԝан мәрьва, йед кӧ Йаһоԝа һʹьз дькьн. Нәфәред тәйә нәбаԝәр у һәвалед тәйи бәре, дьбәкә фәʹм нәкьн чьрʹа тӧ дьхԝази хԝә тʹәсмили Йаһоԝа ки. Әԝана дьбәкә сәва ве йәке мьԛабьли тә дәрен. Ле Йаһоԝа ԝе али тә бькә бь ве йәке, кӧ малбәта рʹӧһʹани бьдә тә. Һәрге тӧ незики ве малбәта рʹӧһʹани би, тӧйе һʹьзкьрьн у аликʹарийе бьстини, кʹижан кӧ тәрʹа лазьм ә (Марԛ. 10:29, 30; Ибрн. 10:24, 25). Ԝәʹдә ԝе дәрбаз бә, у дьбәкә нәфәред тә жи дәстпекьн тʹәви тә Йаһоԝарʹа хьзмәт кьн у пе принсипед ԝи бьжин (1 Пәт. 2:12).

14. Ль гора 1 Йуһʹәнна 5:3, тӧ дәрһәԛа тʹәмийед Йаһоԝа чь пеһʹәсийайи?

¹⁴ Принсипед Йаһоԝа ԛимәт кә у жийина хԝәда бьдә хәбате. Пешийа кӧ тә Йаһоԝа нас кьра, тә хԝәха сәва хԝә сафи дькьр, кӧ чь рʹаст ә у чь нәрʹаст ә, ле ньһа тӧ дьвини, кӧ принсипед Йаһоԝа йед лапә баш ьн (Зәб. 1:1-3; бьхунә 1 Йуһʹәнна 5:3.) Бәʹса хәбәре, бьфькьрә сәр ширәтед Кʹьтеба Пироз бона жьна, мера, де-бава у зарʹа (Әфәс. 5:22–6:4). Тә тʹәхмин кьрьйә, кӧ чахе тӧ ԝан ширәта дьди хәбате, малбәта тә һе бәхтәԝар дьбә? Йан жи дьбәкә тә тедәрхьстьйә, кӧ тӧ буйи мәрьвәки һе баш, чьмки тӧ бьжартьна һәвалада ширәта Йаһоԝа дьди хәбате? Тӧ буйи мәрьвәки һе бәхтәԝар? (Мәтʹлк. 13:20; 1 Корн. 15:33) Бешьк, щаба тә сәр ԝан пьрса ԝе әре бә.

15. Тӧ чь дькари бьки чахе ньзани, кӧ чаԝа принсипед Кʹьтеба Пироз бьди хәбате?

¹⁵ Щара дьбәкә тәрʹа чәтьн ә фәʹм ки, кӧ принсипед Кʹьтеба Пироз ча бьди хәбате. Ләма жи сәва ве йәке Йаһоԝа бь сайа тʹәшкиләта хԝә әʹдәбйәтед сәр һʹиме Кʹьтеба Пироз дьдә, ԝәки тӧ бькарьби ԛәнщи у хьрабийе жь һәв дәрхи (Ибрн. 5:13, 14). Чахе тӧ бьхуни у леколин бьки ԝан әʹдәбйәта, тӧйе бьвини кӧ әԝ чьԛас керһати нә у кʹаре тиньн, у ӧса тӧйе һе незики тʹәшкиләта Йаһоԝа би.

16. Йаһоԝа щьмәʹта хԝә ча организә кьр?

¹⁶ Тʹәшкиләта Йаһоԝа һʹьз бькә у пьштгьрийе бькә. Йаһоԝа сәва щьмәʹта хԝә щьват саз кьрийә, у Кӧрʹе ԝи Иса кʹьфш кьрийә ча сәре ԝан щьвата (Әфәс. 1:22; 5:23). Иса жь меред бь рʹӧһʹе пироз бьжарти, кʹомәкә бьчʹук кʹьфш кьрийә, сәва кӧ рʹебәрийа ԝи шьхӧли бькьн, кʹижан кӧ әԝ дьхԝазә иро бе кьрьне. Иса ԝана нав дькә «хӧламе амьн у сәрԝахт», у бона ԝан әԝ щабдари гәләк фәрз ә, кӧ хԝарьна рʹӧһʹани бьдьнә тә у тә рʹӧһʹанида хԝәй кьн (Мәт. 24:45-47). Мәсәлә, әԝ хӧламе амьн ԝан рʹуспийа кʹьфш дькә, йед кӧ лайиԛи ве щабдарийе нә, сәва әԝана шьвантийе тә бькьн (Иша. 32:1, 2; Ибрн. 13:17; 1 Пәт. 5:2, 3). Рʹуспи һазьр ьн чьԛас дәсте ԝан те аликʹарийе у дьлбинийе бьдьнә тә, у али тә бькьн һе незики Йаһоԝа би. Ле диса тьштәки фәрз кӧ әԝана дькарьн тә һин кьн әԝ ә, ԝәки тӧ бькарьби мәрьва дәрһәԛа Йаһоԝа һин ки (Әфәс. 4:11-13).

17. Ль гора Рʹомайи 10:10, 13, 14, чьрʹа әм дәрһәԛа Йаһоԝа гәрәке тʹәви мәрьва хәбәр дьн?

¹⁷ Али мәрьва бькә Йаһоԝа һʹьз бькьн. Иса готә шагьртед хԝә, ԝәки мәрьва дәрһәԛа Йаһоԝа һин кьн (Мәт. 28:19, 20). Тӧ дьбәкә жь бо ве йәке гӧрʹа ве тʹәмийе бьки, чьмки зани кӧ борщдар и. Ле чахе һʹьзкьрьна тә һьндава Йаһоԝа мәзьн бә, ньһерʹандьна тә ԝе мина йа Пәтрус у Йуһʹәннайе шанди бә, йед кӧ готьн: «Әм нькарьн бона ԝан тьштед, кӧ мә хԝәха дитьн у бьһистьн нәкьнә дәнги» (Кʹар. Шанд. 4:20). Чахе әм али мәрьва дькьн кӧ Йаһоԝа һʹьз бькьн, әм бәхтәԝар дьбьн. Бьдә бәр чʹәʹве хԝә, Филипойе мьзгинван чьԛас ша дьбу, кӧ али мәрьве Әтйопи кьр, ԝәки жь Ньвисаред Пироз рʹастийе пебьһʹәсә у бе ньхӧмандьне! Чахе тӧ чʹәʹв бьди Филипо у гӧрʹа тʹәмийа Иса бьки, тӧйе избат ки ԝәки дьхԝази бьби Шәʹде Йаһоԝа. (Бьхунә Рʹомайи 10:10, 13, 14.) Дьбәкә ԝи ԝәʹдәйи тӧйе ве пьрсе бьди хԝә, кʹижан Әтйопи да: «Иди чь наһелә кӧ әз бемә ньхӧмандьне?» (Кʹар. Шанд. 8:36)

18. Әме готара дьнда дәрһәԛа чь шеԝьр кьн?

¹⁸ Тӧйе әʹмьре хԝәда гавәкә лапә фәрз бавежи, чахе сафи ки кӧ бейи ньхӧмандьне. Әԝ гавәкә гәләк фәрз ә, ләма жи тӧ гәрәке кʹур бьфькьри кӧ ньхӧмандьн чь те һʹәсабе. Ле тӧ чь гәрәке бьзаньби дәрһәԛа ньхӧмандьне? Тӧ чь гәрәке бьки пешийа кӧ бейи ньхӧмандьне у паши ве йәке? Әме готара дьнда дәрһәԛа ԝан пьрса шеԝьр кьн.