Жийина Мьнә Хԝәш Хьзмәта Йаһоԝада

Саләк шунда, Бәйтʹәледа һат әʹламкьрьне ԝәки бона Бәйтʹәла Африкайа Башуре хәбаткʹар лазьм ьн, чьмки ԝедәре мәкʹинәкә чапкьрьне йа тʹәзә ԝе бьһата кʹьрʹине. Мьн гот ԝәки әз һазьр ьм һәрʹьм. Хенщи мьн, диса се бьред дьн жи һатьн бьжартьне – Деннис Лич, Бил Маклиан у Кен Нордьн. Мәрʹа һатә готьне кӧ ԝе лазьм бә, ԝәки әм ԝәʹдәки дьреж Африкайа Башурда бьминьн.

Мьн дийа хԝәрʹа тʹеле хьст у гот: «Дайе, хәбәрәк һәйә. Әзе һәрʹьм Африкайа Башуре!» Дийа мьн йәкә мьлук у рʹӧһʹанида ԛәԝи бу, у әԝе Йаһоԝа гәләк һʹьз дькьр. Әԝе гәләк тьшт нәгот, ле мьн заньбу ԝәки әԝ сафикьрьна мьнрʹа ԛайил ә. Де у баве мьн һьлбәт хәмгин бун, чьмки әзе жь ԝан гәләк дур бума, ле әԝана мьԛабьли ве сафикьрьна мьн дәрнәкʹәтьн.

АФРИКАЙА БАШУРЕ

Пешийе әм се мәһа Бәйтʹәла Бруклинеда ман, сәва кӧ бона хәбьтандьна мәкʹина чапкьрьне һинбуна мәхсус бьстиньн. Паше, әм бь гәмийе чун бажаре Кейптауне (Африкайа Башуре). Ԝи чахи әз 20 сали бум. Бәр еваре әм кʹәтьнә трене кӧ жь Кейптауне һәрʹьнә Йоһанесбурге. Сьбәтьре трен гӧндәки чола Каруйеда сәкьни. Һәԝа гәләк гәрм бу, тʹоз у дува тʹьжә бу. Мә жь пʹәнщәре дәрва дьньһерʹи у бәрхԝә дькʹәтьн, кʹа әм һатьнә кʹидәре. Ле чахе гәләк сал шунда әм диса чун ԝе һәреме, әв гӧнд у бажаред бьчʹук ида мәрʹа гәләк бәдәԝ дьһатьнә кʹьфше.

Чәнд сала әз сәр мәкʹинәйа бь наве «Линотайп» дьхәбьтим. Бь ве мәкʹине, мьн һʹәрф у рʹезед бона чапкьрьна журналед «Бьрща Ԛәрәԝьлийе» у «Һʹьшйар Бьн!» һазьр дькьрьн. Бәйтʹәл әв журнал сәр гәләк зьманед Африкайи чап дькьрьн – нә тʹәне бона Африкайа Башуре, ле бона гәләк ԝәлатед дьн жи. Бәле, мәкʹинәйа чапкьрьне бь щурʹе гәләк керһати дьһат хәбьтандьне.

Паше әз дәрбази офисе бум, кʹидәре кӧ әʹдәбйәт ԝәлдьгәрʹандьн, чап дькьрьн у щьватарʹа дьшандьн. Әз тʹьме шьхӧлва мьжул дьбум у гәләк жь әʹмьре хԝә рʹази бум.

ЗӘԜАЩ У КʹЬФШКЬРЬНӘКӘ НУ

Сала 1968-да, әз пешәнгәкә бь наве Лаура Боԝенрʹа зәԝьщим. Лаура незики Бәйтʹәле дьма, у әԝе Идара Ԝәлгәрʹандьнеда хьзмәт дькьр. Ԝи чахи изьн тʹӧнә бу ԝәки щотед тʹәзә зәԝьщи Бәйтʹәледа бьминьн, ләма жи әм ча пешәнгед мәхсус һатьнә кʹьфшкьрьне. Паши 10 салед хьзмәта Бәйтʹәледа, әз һʹәвәки бәр хԝә дькʹәтьм, ԝәки әме чаԝа әʹбура хԝә бькьн. Бәйтʹәледа, һьм хԝарьн һьм жи щи-сьтʹара мьн һәр тʹьм һәбу. Ле ча пешәнгед мәхсус һәр йәк жь мә мәһе тʹәне 25 ранд (пе пʹәре ԝи ԝәʹдәйи ԝәкә 35 долар бун) дьстанд – әԝ жи һәгәр әм бьгьһиштана нетед жь бо сьһʹәт, сәрледанед дӧбарә у бәлакьрьна әʹдәбйәта. Бь ван пʹәра лазьм бу, ԝәки әм һʹәму хәрщед бона кʹьре, хԝарьн, пʹәре рʹе, һʹәким у тьштед дьн дадьн.

Бәйтʹәле әм шандьн кʹомәкә бьчʹук йа незики бажаре Дурбане, кʹеләка Окйануса Һьнди. Ԝедәре гәләк мәрьвед жь Һьндьстане һәбун. Гәләк жь ԝан, зарʹед хәбатчийед Һьнди бун, йед кӧ сала 1875-да һатьбун Африкайа Башур, ԝәки кʹарханәйа шәкьрда бьхәбьтьн. Ньһа әԝана ида щийед дьнда дьхәбьтин, ле ԝана култур у хԝарьнед хԝәйә тәʹмхԝәш һе жи хԝәй дькьрьн. Ԝана Инглизи заньбун, ләма жи мәрʹа һеса бу ԝанрʹа хәбәр дьн.

Ԝи чахи пешәнгед мәхсус һәр мәһ 150 сьһʹәт хьзмәт дькьрьн. Ләма жи әз у Лаура, мә рʹожа пешьн дьхԝәст дәркʹәвьн у шәш сьһʹәт хьзмәт кьн. Ԛәт сәрледанед дӧбарә у хԝәндәкʹаред мә тʹӧнә бун; лазьм бу ԝәки әм шәш сьһʹәта һәрʹьн мал бь мал. Һьнә ԝәхт паши дәстпекьрьна хьзмәтийе, мьн сьһʹәта хԝә ньһерʹи. Тʹәне 40 дәԛә дәрбаз бьбун! Әз бәр хԝә кʹәтьм, ԝәки әме чаԝа хьзмәта хԝә биньн сери.

Ԝәхт шунда, мә хԝәрʹа графика баш чекьр. Һәр рʹож, мә хԝәрʹа һʹочʹ чедькьрьн у термосед хԝә бь шорбә йан ԛәԝа тʹьжә дькьрьн. Гава мә дьхԝәст һеса бьн, мә әʹрәба хԝәйә бьчʹук бьн сийа дарәке дьда сәкьнандьн. Щарна зарʹед Һьнди дәр-дора мә дьсәкьнин у әʹщебмайи мә дьньһерʹин, чьмки әм гәләк жь ԝан щӧдә дьбун. Нава чәнд рʹожада, мә тʹәхмин кьр ԝәки паши дӧ-се сьһʹәта, рʹож ида гәләк зу дәрбаз дьбә.

Мәрьвед дәшта мә гәләк меванһʹьз бун, у мә жь хьзмәте шабунәкә мәзьн дьстанд. Мә дит ԝәки мьләте Һьнди бь ԛәдьр, дьлован у хԝәдехоф ә. Гәләка жь ԝан мьзгине ԛәбул кьр. Әʹламәтийа дәрһәԛа Йаһоԝа, Иса Мәсиһ, Кʹьтеба Пироз, щьнәта ль сәр әʹрде у рʹабуна мьрийа, ԝана хԝәш дьһат. Паши саләке, 20 хԝәндәкʹаред мә һәбун. Һәр рʹож, ԝана әм бона нанхԝарьне тʹәглифи мала хԝә дькьрьн. Кʹеф-кʹефа мә бу!

Ԝәхт шунда мә кʹьфшкьрьнәкә тʹәзә станд: Әз бумә бәрпьрсийаре мьһале, у мә гәрәке тʹәсәлийа щьватед кʹеләка Окйануса Һьнди бькьра. Һәр һʹәфте, әм щаре мала малбәтәке дьман, у әм тʹәви мьзгинванед щьвате дьчун хьзмәте у мә әԝ һелан дькьрьн. Әм дьбун пʹара малбәта ԝан, у мә тʹәви зарʹед ԝан у һʹәйԝанед мале дьлист. Дӧ салед хԝәш ӧса дәрбаз бун. Рʹожәке, Бәйтʹәле мәрʹа тʹеле хьст. Ԝана гот: «Әм дьхԝазьн ԝә диса гази Бәйтʹәле бькьн». Мьн гот: «Рʹаст бежьн, әм ԝьра гәләк бәхтәԝар ьн». Ле әм һьлбәт һазьр бун кʹьфшкьрьнәкә тʹәзә ԛәбул кьн.

ӘМ ВӘДЬГӘРʹЬН БӘЙТʹӘЛЕ

Бәйтʹәледа, мьн Идара Хьзмәтийеда хьзмәт дькьр. Ве идареда, гәләк бьред щерʹьбанди һәбун. Ԝан чаха, бәрпьрсийаред мьһале бона һәр щьвата кӧ әԝ тʹәсәли дькьр, һʹәсабед хьзмәте дьшандьн Бәйтʹәле. Бәйтʹәл жи сәр һʹиме ԝан һʹәсаба нәʹмә дьшанд щьвата. Бь ван нәʹма, щьватарʹа һелан у рʹебәри дьһатә дайине. Лазьм бу ԝәки аликʹарчийед мә нәʹма жь зьманед Коса, Зулу у зьманед дьн сәр зьмане Инглизи у паше жи жь зьмане Инглизи сәр зьманед Африкайи ԝәлгәрʹиньн. Мьн ԛимәт дькьр ван ԝәлгәрʹед жир у хирәт, йед кӧ али мьн дькьрьн ԝәки әз тәнгасийед хушк-бьред чʹәрмәрʹәш дьһа баш фәʹм бькьм.

Ԝи чахи, Африкайа Башурда режима бь наве «апартеид» һәбу. Ль гора ве режиме, мәрьвед жь мьләтед щӧдә тʹахед щурʹә-щурʹәда дьжитьн, ләма жи әԝана гәләк щар рʹасти һәв нәдьһатьн. Хушк у бьред чʹәрмәрʹәш сәр зьманед хԝә хәбәр дьдан, сәр зьманед хԝә хьзмәт дькьрьн у дьчун щьватед сәр зьманед хԝә.

Жь бо ԝе йәке кӧ мьн һәр тʹьм щьватед зьмане Инглизида хьзмәт кьрьбу, мьн һʹәта ԝе ԝәʹдәйи гәләк мәрьвед чʹәрмәрʹәш нас нәдькьр. Ле ньһа, ида мәщал һәбу кӧ әз мәрьвед чʹәрмәрʹәш у әʹрф-әʹдәтед ԝан нас бькьм. Мьн дит, ԝәки бона хушк-бьред мә чьԛас зор ә һьмбәри әʹдәт у баԝәрийед ԛәлп дәрен у амьн бьминьн. Сәва кӧ бәр пәйкʹәтьна жь нәфәред мале у гӧндийед хԝә тәйах кьн у тʹәрка әʹдәтед сербазийева гьредайи бьдьн, ԝанарʹа мерхасийа мәзьн лазьм бу! Мәрьвед кӧ гӧндада дьжитьн гәләк һесир у кʹәсиб бун. Гәләк кәс нәхԝәнди бу, ле ԝана ԛәдре Кʹьтеба Пироз дьгьрт.

Мьн һьнә шьхӧлед диԝанеда жи аликʹари дьда, йед кӧ азайа һʹәбандьне у тʹәвнәбуйинева гьредайи бун. Әз жь амьни у мерхасийа зарʹед Шәʹдед Йаһоԝарʹа һʹәйран дьмам, йед кӧ жь мәкʹтәбе һатьбун дәрхьстьне чьмки ԝана дӧа у кʹьламед религи нәдьготьн.

Щарәке, хушк-бьред мәйә жь Сԝазиләнде рʹасти проблемәкә мәзьн һатьн. Гава Пʹадша Собуза II мьр, дәԝләте дьхԝәст кӧ һʹәму мер пʹорʹе хԝә кӧрʹ кьн у һʹәму жьн пʹорʹе хԝә кьн бьбьрʹьн. Гәләк хушк у бьра рʹасти зӧлме һатьн, чьмки ԝана әв әʹдәта шингьртьне, йа кӧ әʹдәте һʹәбандьна кал-бавава гьредайи йә, нәанин сери. Әм бь амьнийа ԝан гәләк фьрнаԛ дьбун. Бәле, амьни у сәбра хушк у бьред Африкайи баԝәрийа мә дьһа ԛәԝи дькьр.

ӘЗ ВӘДЬГӘРʹЬМ ЧАПХАНЕ

Сала 1981-да, әз һатьм кʹьфшкьрьне, ԝәки шьхӧле һазьркьрьна методед чапкьрьне йед бь дәсте компӧтәра, аликʹарийе бьдьм. Ләма жи әз вәгәрʹийам чапхане. Мьн жь ви шьхӧли гәләк шабуне дьстанд. Методед чапкьрьне ида һатьбун гӧһастьне. Фирмәке мәкʹинәкә тʹәзә да Бәйтʹәле, ԝәки әм ве мәкʹине бе пʹәрә бьщерʹьбиньн. Ахьрийеда мә дәԝса нәһ мәкʹинед бәре, пенщ мәкʹинед тʹәзә кʹьрʹин. Ӧса жи, мәкʹинәкә тʹәзә бона чапкьрьне жи һат саз кьрьн. Бәле, хәбата мә чьԛас дьчу, дьһа зу дьһатә кьрьне.

Бь сайа компӧтәра, мә дәстпекьр методед тʹәзә йед бона рʹезкьрьна рʹупʹелед әʹдәбйәта бьдьнә хәбате. Бона ви шьхӧли, мә ида програмәкә бь наве MEPS дьда хәбате, демәк Система Нәшьркьрьна Електроник йа Гәләк Зьмани. Жь ԝи чахи гава әм чар Бәйтʹәлван жь Канадайе һатьбун Африкайа Башуре ԝәки мәкʹинед чапкьрьне бьхәбьтиньн һʹәта ньһа, әм чьԛас пешда чун! (Ишайа 60:17) Әм гьшк пешәнгед хирәтрʹа зәԝьщин. Әз у Бил, әм һе Бәйтʹәледа бун. Кен у Деннис незики Бәйтʹәле дьжитьн у зарʹед хԝә мәзьн дькьрьн.

Шьхӧле Бәйтʹәле чьԛас дьчу, зедә дьбу. Әʹдәбйәтед сәр һʹиме Кʹьтеба Пироз сәр дьһа зедә зьмана дьһатьн ԝәлгәрʹандьне, чапкьрьне у вана дьшанд Бәйтʹәлед дьн. Ләма жи Бәйтʹәл һʹәԝще авайед тʹәзә бу. Щики хԝәшда йе рʹоавайа бажаре Йоһанесбурге, Бәйтʹәләкә тʹәзә һатә авакьрьне у сала 1987-да һатә тʹәсмилкьрьне. Ԝәхт шунда әз ча әндәмәки Комитейа Филиала Африкайа Башуре һатьм кʹьфшкьрьне, у мьн әв кʹьфшкьрьн гәләк сала бь шабуне дьани сери.

ДИСА КʹЬФШКЬРЬНӘКӘ НУ

Сала 2001-да, тʹәшкиләте гази мьн кьр кӧ әз Комитейа Филиала Дәԝләтед Йәкбуйида хьзмәт бькьм, йа кӧ тʹәзә һатьбу сазкьрьн. Әм гәләк хәмгин бун, чьмки әм жь хьзмәта Африкайа Башурда у жь һәвалед хԝә дур кʹәтьн, ле әм ша бун кӧ әм бун пʹара малбәта Бәйтʹәла Америкайе.

Ле әм бәрхԝә дькʹәтьн бона һʹале дийа Лаурайе. Жь Нийу Йорке, мә ида нькарьбу мьԛати ԝе буна, ле се хушкед Лаурайе готьне кӧ һазьр ьн дийа хԝә хԝәй бькьн у әʹбура ԝе бькьн. Ԝана гот: «Әм нькарьн бьбьнә хьзмәткʹаред һәртʹьм, ле һәгәр әм пәй дийа хԝә бьньһерʹьн, әв йәк ԝе али ԝә бькә ԝәки һун кʹьфшкьрьна хԝә бәрдәԝам бькьн». Әм гәләк жь ԝан рʹази нә.

Ӧса жи, бьре мьн у жьна ԝи, йед кӧ ль Торонтойе (Канада) дьжитьн, пәй дийа мә дьньһерʹин. Һʹәта ԝи ԝәʹдәйи, әԝ ида 20 сала зедәтьр щәм ԝан дьма, у әм бона һʹьзкьрьн у аликʹарийа ԝан, гәләк жь ԝан рʹази нә. Сәд һʹәйф ԝәʹдәки кьнда, паши кӧ әм һатьн Нийу Йорке, дийа мьн мьр. Мә рʹьнд фәʹм кьр ԝәки нәфәред мале, йед кӧ һазьр ьн жийина хԝәда гӧһастьна бькьн, ԝәки щабдарийед мәзьн бьстиньн, чьԛас ԛимәт ьн!

Америкайеда, әз чәнд сала сәр шьхӧле һазьркьрьна әʹдәбйәтада дьхәбьтим. Методед кӧ ви шьхӧлида дьданә хәбате гәләк һатьнә гӧһастьне у дьһа һеса у модерн бунә. Ньһа әз Идара Кʹьрʹинеда хьзмәт дькьм. Ида 20 сал ә ча әз ве Бәйтʹәла мәзьнда хьзмәт дькьм. Ԝьра ԝәкә 5 000 Бәйтʹәлван һәнә, у ԝәкә 2 000 кәс жь дәрва тен ԝәки Бәйтʹәледа хьзмәт кьн.

Шест сал пешда, мьн нә жи дьда бәр чʹәʹве хԝә, ԝәки жийина мьн ԝе һаԛас хԝәш буйа. Бь сала Лаурайе бь дьл у щан пьштгьрийа мьн дькә. Әм ша нә ԝәки мә щурʹә-щурʹә шьхӧлед Йаһоԝада хьзмәт кьрийә у кӧ мә һаԛас хушк-бьред сәр тʹәмамийа дьнйайе нас кьрьнә. Әз ида 80 сали зедәтьр ьм, у жь бо ԝе йәке кӧ гәләк бьред щаһьл һәнә, йед кӧ дькарьн хәбата мьн бькьн, шьхӧле мьн ида кем буйә.

Зәбурбеж ӧса ньвисибу, ԝәки «хԝәзи ль ԝи мьләти, Хԝәдейе кʹижани» Йаһоԝа йә (Зәбур 33:12). Әв готьн чьԛас рʹаст ә! Әз гәләк рʹази мә у бәхтәԝар ьм, чьмки әз нав щьмәʹта Йаһоԝада мә!