Ԝә Заньбу?

Ԝәʹде бәре Исраелийа чьрʹа ԛәлән дьдан?

ԜӘʹДЕ бәре, ԛәлән дьданә мала баве буке. Ԛәлән әԝ һәбу пʹәрә, һʹәйԝан йан жи тьштед дьн йед ԛимәт. Дәԝса ԛәлән, һьнә кәса бона мала баве буке дьхәбьтин. Мәсәлә, Аԛуб ԛәбул кьр ԝәки һʹәфт сала ль бәр дәсте баве Рʹаһеле бьхәбьтә (Дәстпебун 29:17, 18, 20). Гәло нета ви әʹдәти чь бу?

Зандар Карол Мейерс ӧса дьбежә: «Ԛәлән ча бәрдела кʹомәка буке бу. Бона малбәтед кӧ әʹбура хԝә бь щоткʹарийе дькьрьн, кʹомәка ԝе гәләк ԛимәт бу». Ӧса жи, ԛәлән дькарьбу достийа ортʹа малбәта зәʹва у малбәта буке дьһа ԛәԝи кьра. Әв дости ԝәʹде тәнгасийа гәләк фәрз бу. Ӧса жи, ԛәлән нишан дькьр ԝәки кәчʹьк ида дәргисти йә у зутьрәке ԝе жь мала баве хԝә дәрбази мала мере хԝә бә.

Әʹдәта ԛәләндайине нәдьһатә һʹәсабе кӧ кәчʹьк дьһатә фьротане. Кʹьтебәк ӧса дьбежә: «Әв йәк кӧ пʹәрә йан тьштәки дьн дьданә мала баве буке, ӧса дьһатә кʹьфше кӧ те бежи бук дькʹьрʹин. Ле [ԛәлән] бь әʹсле хԝә һәԛе буке нибу, ле бәрдел бу кӧ дьданә мала баве буке» (Ancient Israel—Its Life and Institutions states).

Һьнә ԝәлатада, әʹдәте ԛәләндайине һе һәйә. Һәгәр Мәсиһи ԛәлән бьхԝазьн, гәрәке бь «бәрбьһерийе» ԛәләнәки мәзьн нәхԝазьн (Филипи 4:5; 1 Корьнтʹи 10:32, 33). Бь ви щурʹәйи, әԝана ԝе нишан кьн, ԝәки «пʹәрәһʹьз» у чʹәʹвбьрʹчи ниньн (2 Тимотʹейо 3:2). Ӧса жи, һәгәр де-бав ԛәләнәки мәзьн нәхԝазьн, һьнге зәʹва ԝе мәщбур нибә ԝәки дәʹԝата хԝә паш хә, кӧ бь сала бьхәбьтә сәва кӧ ԛәлән һазьр кә. Һәгәр зәʹва пешәнг ә, әԝе мәщбур нибә хьзмәта хԝә бьһелә у сьбе һʹәта еваре бьхәбьтә, ԝәки бькарьбә ԛәләне буке бьдә.

Һьнә дәра, ԛанунед дәрһәԛа ԛәлән һәнә. Мәсиһийед кӧ щийед ӧса дьжин, гәрәке гӧһ бьдьн ԝан ԛануна. Гәло чьрʹа? Хәбәра Хԝәде дьбежә кӧ гәрәке Мәсиһи «гӧрʹа . . . һʹӧкӧмәтийада» бьн у гӧһ бьдьн ван ԛануна кӧ мьԛабьли ԛанунед Хԝәде ниньн (Рʹомайи 13:1; Кʹаред Шандийа 5:29).