Пьрсед Хԝәндәвана
Гәло Иса Мәсиһ бь ван готьна чь дьхԝәст бьгота: «Нәфькьрьн кӧ әз һатьмә дьне әʹдьлайийе биньм»?
Мьзгинийа кӧ Иса бәла дькьр, хәбәра әʹдьлайе бу. Ле әԝи щарәке шандийед хԝәрʹа ӧса гот: «Нәфькьрьн кӧ әз һатьмә дьне әʹдьлайийе биньм. Әз нәһатьм әʹдьлайийе биньм, ле шур. Чьмки әз һатьм кӧрʹ жь баве, ԛизе жь де у буке жь хԝәсийе бьԛәтиньм» (Мәтта 10:34, 35). Гәло Иса бь ван гьлийа чь дьхԝәст бьгота?
Һәмьки Иса нәдьхԝәст нәфәред мале жь һәв бьԛәтинә, ле әԝи заньбу кӧ сәва һинкьрьнед ԝи, «шур» ԝе бькʹәвә нава һьнә малбәта. Ләма жи, гава кәсәк дьхԝазә бьбә шагьрте Иса у бе ньхӧмандьне, гәрәке әԝ бьзаньбә ԝәки чь дькарә бьԛәԝьмә. Сәва мьԛабьлибуна мәрьвед ԝийи нәбаԝәрмәнд, дьбәкә ԝирʹа чәтьн бә, кӧ ль гора принсипед Кʹьтеба Пироз бьжи.
Кʹьтеба Пироз шагьртед Иса Мәсиһрʹа ӧса дьбежә: «Чьԛас жь дәст ԝә те, тʹәви һʹәму мәрьва әʹдьлайийеда бьн» (Рʹомайи 12:18). Ле диса жи, һинкьрьнед Иса дькарьн бона һьнә малбәта ча «шур» бьн. Гава кәсәк сафи дькә, кӧ бьбә шагьрте Иса, мәрьвед ԝи, йед кӧ һинкьрьнед Иса ԛәбул накьн, дькарьн бьбьнә «дьжмьне» ԝи (Мәтта 10:36).
Щарна лазьм ә ԝәки шагьрте Иса сафи кә, һәла дьле мәрьвед хԝәйи нәбаԝәрмәнд ша кә, йан дьле Йаһоԝа у Иса. Мәсәлә, дьбәкә мәрьвед нәбаԝәрмәнд зоре ль ԝи бькьн, кӧ әԝ щәжьнәке тʹәви ԝан дәрбаз кә. Дәрәщәкә ӧсада, гәло әԝе чь бькә? Иса ӧса гот: «Әԝе кӧ баве хԝә йан дийа хԝә жь мьн зәʹфтьр һʹьз бькә, нә һежайи мьн ә» (Мәтта 10:37). Иса һьлбәт нәдьхԝәст бьгота ԝәки сәва кӧ кәсәк һежайи ԝи бә, гәрәке әԝ де у баве хԝә дьһа кем һʹьз бькә. Бь рʹасти, әԝи дьхԝәст бьгота кӧ гәрәке әԝ рʹьнд бьзаньбә, ԝәки чь дьһа фәрз ә. Һәрге мәрьвед мәйә нәбаԝәрмәнд бьхԝазьн рʹийа мә бьгьрьн, ԝәки әм Йаһоԝарʹа хьзмәт нәкьн, әме диса жи ԝана һʹьз бькьн, ле әме бир нәкьн, кӧ һʹьзкьрьна һьндава Йаһоԝа һәри фәрз ә.
Пәйкʹәтьна жь алийе малбәте һьлбәт дькарә бьбә дәрдәки мәзьн. Диса жи, шагьртед Иса ван готьнед ԝи бир накьн: «Әԝе кӧ хаче [стуна, ДТʹ] хԝә һьлнәдә пәй мьн нәйе, әԝ нә һежайи мьн ә» (Мәтта 10:38). Демәк, шагьртед Иса һазьр ьн кӧ һьмбәри пәйкʹәтьна малбәте сәбьр бькьн. Ӧса жи, әԝана һевийа хԝә ӧнда накьн кӧ рʹожәке, рʹабун-рʹуньштьна ԝанә баш, ԝе али мәрьвед ԝан бькьн, кӧ әԝана ньһерʹандьна хԝә бьгӧһезьн у дәстпекьн Кʹьтеба Пироз леколин бькьн (1 Пәтрус 3:1, 2).