Рʹасти нә кö Әʹдьлайе Тинә, ле «Шур»

1, 2. а) Иро кʹижан әʹдьлайа мә һәйә? б) Чьрʹа иро әм нькарьн бь тʹәмами әʹдьлайеда бьжин? (Бьньһерʹә шькле әʹwльн.)

ӘМ ГЬШК жи дьхwазьн бей чәтьнайа у хәма әʹдьлайеда бьжин. Әм гәләк рʹази нә жь Йаһоwа, кö әw «әʹдьлайийа Хwәде» дьдә мә. Әв әʹдьлайи али мә дькә, wәки әм гәләк хәмгин нәбьн у дьлрʹьһʹәт бьн (Фили. 4:6, 7). Хенщи ве йәке, «әʹдьлайийа мә тʹәви Хwәде» һәйә, демәк һәләqәтийа баш тʹәви wи, чьмки мә хwә тʹәсмили wи кьрийә (Рʹом. 5:1).

² Ле ньһа һе әw wәʹдә нәһатийә кö Хwәде бь тʹәмами әʹдьлайе бинә сәр әʹрде. Әм дьжин рʹожед ахьрийеда, демәк wи wәʹдәйи чахе гәләк шәрʹ-дәʹw һәнә у чьqас дьчә мәрьв хьраб дьбьн (2 Тимтʹ. 3:1-4). Һьн жи әм Мәсиһи мьqабьли Шәйтʹан у һинкьрьнед wийә qәлп шәрʹ дькьн (2 Корн. 10:4, 5). Ле йа лапә хьраб әw ә, кö щара әʹдьлайа мә хьраб дьбә тʹәви нәфәред мә у мәрьвед мәйи незик, чьмки әм Шәʹдед Йаһоwа нә. Дьбәкә һьнәк жь wан мә дькʹәньн сәва баwәрийа мә, йан жи мә нәһәq дькьн кö әм малбәте һәв дьqәтиньн, йан жи мә дьтьрсиньн кö һәрге әм баwәрийа хwә нәһельн, әwана wе мә ида qәбул нәкьн. Ле гәло һʹале öсада, әм гәрәке ча хwә бьдьнә кʹьфше? Әм ча дькарьн әʹдьлайе хwәй кьн чахе тьштед öса дьqәwьмьн?

ЧА БЬНЬҺЕРʹЬН СӘР ПӘЙКʹӘТЬНА АЛИЙЕ НӘФӘРАДА

3, 4. а) Ча мәрьв сәр һинкьрьнед Иса дьньһерʹин? б) Чь дәрәщада илаһи чәтьн ә пәй Иса һәрʹьн?

³ Иса фәʹм дькьр кö wе нә һʹәму мәрьв һинкьрьнед wи qәбул кьн. Әwи öса жи заньбу wәки wанрʹа мерхаси лазьм ә, чьмки wе һәбьн мәрьв кö пәй wан кʹәвьн. У әw пәйкʹәтьн wе алийе нәфәрада жи пешда бьһата. Иса гот: «Нәфькьрьн кö әз һатьмә дьне әʹдьлайийе биньм. Әз нәһатьм әʹдьлайийе биньм, ле шур. Чьмки әз һатьм кöрʹ жь баве, qизе жь де у буке жь хwәсийе бьqәтиньм у дьжмьнед мерьв wе жь мала wи бьн» (Мәт. 10:34-36).

⁴ Чахе Иса гот, «Нәфькьрьн кö әз һатьмә дьне әʹдьлайийе биньм», бь ван гьлийа әwи да кʹьфше кö һәрге кәсәк бьбә шагьрте wи, wе рʹасти чәтьнайа бе. Рʹастийа кö Иса бәла дькьр дькарьбу мәрьва жь һәв бьqәтинә, мәсәлә чахе һәвал йан мәрьвед незик рʹастийе qәбул нәкьрана. Ле нета Иса әw нибу кö нәфәра жь һәв бьqәтинә, әwи дьхwәст кö рʹастийа Хwәде бьгьһижә мәрьва (Йуһʹн. 18:37). Ләма шагьртед wи рʹьнд фәʹм дькьрьн кö wе һеса нибә хwә ль һинкьрьнед wи бьгьрьн.

5. Шагьртед Иса бәр чь тәйах дькьрьн?

⁵ Иса гот кö шагьртед wи wе алийе нәфәред хwәда рʹасти пәйкʹәтьна бен, ләма жи wанрʹа сәбьр лазьм бу сәва бәр ве йәке тәйах кьн (Мәт. 10:38). Сәва кö һежа бьн бьбьнә шагьртед Иса, wана сәбьр дькьр гава нәфәред wан сәр wан дькʹәнийан йан һәла һе жи wана qәбул нәдькьрьн. Ле wана чь жи öнда кьр, һе зедә qазанщ кьрьн. (Бьхунә Марqос 10:29, 30.)

6. Әм чь гәрәке бир нәкьн һәрге мәрьвед мәйи незик сәва рʹастийе пәй мә дькʹәвьн?

⁶ Чахе мәрьвед мәйи незик мьqабьли ве йәке нә кö әм Йаһоwарʹа хьзмәт дькьн, әм диса жи wана һʹьз дькьн. Ле әм гәрәке бир нәкьн, wәки һʹьзкьрьна мә һьндава Хwәде у Мәсиһ гәрәке щийе пешьн бьгьрә (Мәт. 10:37). Әм öса жи гәрәке бира хwәда хwәй кьн, кö Шәйтʹан дькарә һʹьзкьрьна мә һьндава нәфәред мә бьдә хәбате, сәва кö әм Йаһоwарʹа амьн нәминьн. Wәрә әм чәнд дәрәща шеwьр кьн кö малбәтеда дькарьн бьqәwьмьн, у бьвиньн кö әм ча дькарьн чәтьнайада сәбьр кьн у хwә рʹаст бьдьнә кʹьфше.

ЧАХЕ МЕР ЙАН ЖЬН НӘБАWӘР Ә

7. Һәрге жьн йан мере wә нәбаwәр ә, һун гәрәке ча сәр ве дәрәще бьньһерʹьн?

⁷ Кʹьтеба Пирозда пешда һатә ньвисаре, wәки йед зәwьщи wе «рʹасти охьрмед гьран бен» (1 Корн. 7:28). Һәрге кʹöлфәт йан малхе тә нәбаwәр ә, әw йәк зәwаща тәда дькарә стрес у чәтьнайа зедә кә. Ле фәрз ә wәки тö сәр ве дәрәще бьньһерʹи öса ча Йаһоwа дьньһерʹә. Әв йәк кö кʹöлфәт йан жи малхе тә рʹастийе qәбул накә, гәрәке нәбә мәʹни кö һун башqә бьжин йан жи жь һәв бьqәтьн (1 Корн. 7:12-16). Һәрге малхе мале нәбаwәр ә у алийе рʹöһʹанида мьqати малбәте набә, йәкә жьн гәрәке qәдьре wи бьгьрә, чьмки әw сәре малбәте йә. Öса жи һәрге жьн нәбаwәр ә, мер гәрәке һьндава wе бь һʹьзкьрьн бә у ле хwәй кә (Әфәс. 5:22, 23, 28, 29).

8. Һун кʹижан пьрса гәрәке бьдьнә хwә һәрге мер йан жьна wә дьхwазә кö һун кем Хwәдерʹа хьзмәт кьн?

⁸ Һәрге жьн йан мере тә дьхwазә кö тö һе кем Хwәдерʹа хьзмәт ки, чь гәрәке бьки? Бәʹса хәбәре, мере хушкәке жерʹа готийә, wәки әw һʹәфтийе тʹәне чәнд рʹожа һәрʹә хьзмәтийе. Һәрге тö жи дәрәща öсада ни, пьрсәкә öса бьдә хwә: «Гәло әw дьхwазә кö әз qә Хwәдерʹа хьзмәт нәкьм? Һәрге на, гәло әз дькарьм ве йәке бькьм чь әw дьхwазә?» Һәрге тö бәрбьһер у сәрwахт и, тöйе öса бьки кö ортʹа wәда кем чәтьнайи һәбьн (Фили. 4:5).

9. Мәсиһи ча гәрәке зарʹед хwә һин кә кö qәдьре де йан баве хwәйи нәбаwәр бьгьрә?

⁹ Һәрге жьн йан мер нәбаwәр ә, һьнге дькарә чәтьн бә зарʹа рʹаст ширәт кьн у һин кьн. Бәʹса хәбәре, һун гәрәке зарʹед хwә һин кьн, кö әве тʹәмийа Кʹьтеба Пироз биньн сери: «Qәдьре де у баве хwә бьгьрә» (Әфәс. 6:1-3). Ле һәрге жьн йан мере wә принсипед Кʹьтеба Пироз найнә сери, йәкә һун гәрәке qәдьре wи (wе) бьгьрьн. Öса һуне зарʹед хwәрʹа мәсәла баш бьһельн. Бьфькьрьн кö кʹижан хәйсәт-һʹöнöред wийи (wейә) баш һәнә, у жерʹа бежьн кö һун wи (wе) qимәт дькьн у дьшекьриньн чь жи әw дькә. Сәр жьн йан мере хwә бәр зарʹа тʹö щар нәкьнә котә-кот. Ле дәwсе зарʹед хwәрʹа шьровәкьн, кö һәр кәс гәрәке хwәха бьжберә Йаһоwарʹа хьзмәт кә йан на. Һәрге рʹабун-рʹуньштьна зарʹа баш ә, әw йәк дькарә де йан баве нәбаwәр бинә сәр рʹийа Хwәде.

10. Де-бав кö Мәсиһи нә ча дькарьн зарʹед хwә рʹастийе һин кьн?

¹⁰ Һьнә мер йан жьнед нәбаwәр, дәʹwа дькьн wәки зарʹед wан һәрʹьнә сәр щәжьнед динед qәлп, йан жи һинкьрьнед динед qәлп һин бьн. Һьнә мер кö нәбаwәр ьн, һәла һе жи изьне надьнә жьнед хwә, wәки зарʹа Кʹьтеба Пироз һин кьн. Ле һьнге жи чь дәсте жьне те гәрәке бькә, сәва зарʹед хwә рʹастийе һин кә (Кʹар. Шанд. 16:1; 2 Тимтʹ. 3:14, 15). Мәсәлә, малхе нәбаwәр дькарә изьне нәдә жьна хwә кö һинбуна Кʹьтеба Пироз дәрбаз кә тʹәви зарʹед хwәйи бьчʹук йан жи наһелә бьвә щьвате. Рʹаст ә жьн qәдьре сафикьрьна мере хwә дьгьрә, ле йәкә әw дькарә тʹәви зарʹед хwә хәбәр дә дәрһәqа баwәрийа хwә чахе мәщалә һәйә. Öса әw зарʹ дькарьн дәрһәqа Йаһоwа у qанун принсипед wи пебьһʹәсьн (Кʹар. Шанд. 4:19, 20). Ле ахьрийеда, ида зарʹ хwәха гәрәке сафи кьн кö wе бьбьнә хьзмәткʹаред Йаһоwа йан на (Qан. Дщр. 30:19, 20).a

ЧАХЕ МӘРЬВЕД НЕЗИК МЬQАБЬЛИ РʹАСТИЙЕ НӘ

11. Чьрʹа ортʹа мә у мәрьвед мәйи незикда дькарьн чәтьнайи пешда бен?

¹¹ Чахе мә дәстпекьр тʹәви Шәʹдед Йаһоwа Кʹьтеба Пироз һин бьн, дьбәкә мә пешийе нәфәред хwәрʹа дәрһәqа ве йәке нәгот. Ле чахе баwәрийа мә һе мәзьн бу, мә ида дәстпекьр дәрһәqа баwәрийа хwә гьшкарʹа гьли кьн (Марq. 8:38). Һәрге бона рʹастийе ортʹа wә у мәрьвед wәйи незикда чәтьнайи пешда тен, wе баш бә гöһ бьдьнә wан чәнд ширәта кʹижана әме шеwьр кьн. Әв ширәт wе али wә бькьн тʹәви wан әʹдьлайе хwәй кьн у Хwәдерʹа амьн бьминьн.

12. Чьрʹа мәрьвед мәйи незик дькарьн мьqабьли мә бьн, ле әм ча дькарьн wана фәʹм кьн?

¹² Хwә дайньн дәwса мәрьвед хwәйи незик у wана фәʹм кьн. Әм бәхтәwар ьн кö рʹастийе заньн. Ле мәрьвед мәйи незик дьбәкә дьфькьрьн, кö әм һатьнә хапандьне йан жи кʹәтьнә сектәке әʹщеб. У чьмки әм тʹәви wана щәжьна у әʹйд-qәйда дәрбаз накьн, дьбәкә әwана дьфькьрьн кö әм wана ида һʹьз накьн. Һәла һе дьбәкә дьтьрсьн жи кö әме ахьрийеда гәләк пʹошман бьн у ахьрийа хьраб бьстиньн. Әм гәрәке wана фәʹм кьн у хwә дайньн дәwса wан. Öса жи чахе әwана мәрʹа дьбежьн кö бона мә бәрхwә дькʹәвьн, әм гәрәке гöһ бьдьнә wан (Мәтʹлк. 20:5). Паwлосе шанди дьхwәст һʹәму щурʹә мәрьва фәʹм кә, сәва кö wанрʹа дәрһәqа мьзгинийе гьли кә. Ве йәкеда әм жи гәрәке чʹәʹв бьдьнә wи (1 Корн. 9:19-23).

13. Тʹәви мәрьвед хwәйи незик кö нәбаwәр ьн, әм ча гәрәке хәбәр дьн?

¹³ Бь нәрми хәбәр дьн. Кʹьтеба Пироз дьбежә wәки «хәбәрдана wә мәʹрифәти» бә (Колс. 4:6). Әв һеса нинә, ләма жи әм гәрәке дöада жь Йаһоwа рʹöһʹе пироз бьхwазьн, сәва мәрьвед хwәйи незикрʹа һʹәйф бьн у нәрм хәбәр дьн. Әм гәрәке бона һинкьрьнед qәлп кö әwана баwәр дькьн тʹәви wан нәкʹәвьнә дәʹwе. Һәрге жи әwана пе гьли йан жи кьред хwә дьле мә дешиньн, һьнге баш ә чʹәʹв бьдьнә шандийа. Паwлос гот: «Гава мә рʹәзил дькьн, әм дöа ль wан дькьн, гава мә дьзериньн, әм сәбьр дькьн, гава наве мәрʹа дьлизьн, әм ль бәр wан дадьхьн» (1 Корн. 4:12, 13).

14. Чь кʹар ә чахе рʹабун-рʹуньштьна мә баш ә?

¹⁴ Рʹабун-рʹуньштьна хwә баш хwәй кьн. Рʹаст ә хәбәрдана нәрм дьле мәрьвед мәйи незик дькарә нәрм кә, ле рʹабун-рʹуньштьна мәйә баш дьһа дькарә qәwи сәр wан һʹöкöм кә. (Бьхунә 1 Пәтрус 3:1, 2, 16.) Мәрьвед хwәйи незикрʹа пе кьред хwә нишан кә, wәки Шәʹдед Йаһоwа дьхwазьн зәwаща wан бәхтәwар бә, мьqати зарʹа бьн, нав-намус у дьлша бьжин. Һәрге жи мәрьвед мәйи незик рʹастийе qәбул нәкьн, йәкә әм дькарьн дьлрʹьһʹәт бьн кö әм дьле Йаһоwа ша дькьн, чьмки жерʹа амьн дьминьн.

15. Әм чь дькарьн бькьн wәки тʹәви мәрьвед хwәйи незик кем бькʹәвьнә дәʹw-доза?

¹⁵ Пешда бьфькьрьн. Әм гәрәке пешда бьфькьрьн, кö чь дькарә бьбә мәʹни, wәки шәрʹ-дәʹw пешда бен, у чаwа wан чәтьнайа сафи кьн (Мәтʹлк. 12:16, 23). Хушкәкә мә жь Австралйайе гьли дькә: «Хәзуре мьн гәләк мьqабьли рʹастийе бу. Мьн тʹәви мере хwә пешийа кö жерʹа тʹелехьста у бьпьрсийа әw ча нә, Йаһоwарʹа дöа дькьр сәва али мә бькә, кö әм бь нәрми щаба wи бьдьн чахе әw һерс дькʹәвә. Мә хwә һазьр дькьр кö дәрһәqа чь хәбәр дьн, сәва хәбәрдана мә баш дәрбаз бә. Һьн жи сәва хәбәрдана мә дьреж нәкʹьшинә у дәрһәqа баwәрийе кем дәʹw-доз пешда бен, мә сафи кьр кем тʹәви wи хәбәрдьн».

16. Әм ча дькарьн дьлрʹьһʹәтийе бьстиньн һәрге әм хwә нәһәq дькьн ве йәкеда кö дьле мәрьвед хwәйи незик дешиньн?

¹⁶ Бәле, әм нькарьн öса бькьн wәки qә дәʹw-доз ортʹа мә у мәрьвед мәйи незикда пешда нәйен. Дьбәкә щара һун хwә нәһәq дькьн чахе дәʹw-доз пешда тен, чьмки һун wана һʹьз дькьн у нахwазьн дьле wан бешиньн. Һьнге һәр тьшти бькьн кö амьнийа wә һьндава Йаһоwа щийе пешьн бьгьрә, нә кö һʹьзкьрьн һьндава малбәта wә. Öса әwана wе фәʹм кьн кö гәләк фәрз ә Йаһоwарʹа хьзмәт кьн у кö әʹмьре мәрьва ве йәкева гьредайи йә. Чь жи һәбә, бир нәкьн кö һун нькарьн зоре wан бькьн wәки рʹастийе qәбул кьн. Алийе хwәда һун wанрʹа нишан кьн кö чьqас кʹар ә чахе мәрьв рʹийа Йаһоwада дьчә. Хwәдейе бь һʹьзкьрьн ча мәрʹа öса жи wанрʹа мәщале дьдә, сәва бьжберьн хьзмәт кьн жерʹа йан на (Иша. 48:17, 18).

ҺӘРГЕ НӘФӘРӘКИ WӘ ЙАҺОWА ДЬҺЕЛӘ

17, 18. Чь дькарә али wә бькә, кö һун тәйах кьн чахе нәфәрәки wә Йаһоwа дьһелә?

¹⁷ Чахе нәфәрәки wә жь щьвате һатә дәрхьстьне, йан жи хwә жь щьвате дур дьгьрә, әw йәк дькарә бона wә öса бә ча шур дьле wә хьн. Ле һун ча дькарьн бәр ве еша мәзьн тәйах кьн?

¹⁸ Хирәт бьн шьхöлед рʹöһʹанида. Тʹьме Кʹьтеба Пироз бьхуньн, хwә бона щьвате һазьр кьн, һәрʹьн хьзмәтийе, у дöа бькьн Хwәдерʹа сәва qәwате бьдә wә, wәки һун сәбьр кьн. Öса баwәрийа wә wе һе qәwи бә (Щьһуд. 20, 21). Ле һәрге һун тʹәхмин дькьн кö дьле wә диса гәләк дешә, у нькарьн дьлрʹьһʹәт бьн, сьст нәбьн у qәwи бьн! Wәʹдә дәрбаз бә, һуне ида хwә бьгьрьн у фькьред нәбаш жь һʹьше хwә дәрхьн. Дина хwә бьдьнә ньвискʹаре Зәбур 73. Wәʹдәки öса һәбу чахе ньһерʹандьна wи нәрʹаст бу у әw әʹщьз бьбу. Ле чахе әw кʹәтә пирозгәһа Хwәде кö wи бьһʹәбинә, әwи ньһерʹандьна хwә гöһаст (Зәб. 73:16, 17). Һәрге һун жи бь хирәт Хwәдерʹа хьзмәт кьн, һуне жи ньһерʹандьна хwә рʹаст хwәй кьн.

19. Әм ча дькарьн бьдьн кʹьфше кö qәдьре сафикьрьна Йаһоwа дьгьрьн?

¹⁹ Qәдьре ширәткьрьна Йаһоwа бьгьрьн. Чахе Йаһоwа ширәт дькә у щәза дькә, әw йәк һʹәмуйарʹа кʹаре тинә, демәк wи мәрьвирʹа жи йе кö жь щьвате һатийә дәрхьстьне. Рʹаст ә бона wи чәтьн ә, ле әw щәзакьрьн дькарә али wи бькә диса вәгәрʹә бал Хwәде. (Бьхунә Ибрани 12:11.) Мәсәлә, Йаһоwа мәрʹа дьбежә кö йе гöне хwә тʹобә накә «тʹәви wи нәбьн», демәк жерʹа хәбәр нәдьн (1 Корн. 5:11-13). Рʹаст ә дьле мә сәр wи дьшәwьтә, ле бей мәʹнийа фәрз әм гәрәке тʹәви wи хәбәр нәдьн нә пе тʹеле, нә пе нәʹме, йан емаиле у нә жи малпәрада.

20. Чьда әм гәрәке баwәрийа хwә öнда нәкьн?

²⁰ Баwәрийа хwә öнда нәкьн. Һʹьзкьрьн «һәр гав баwәр дькә», ләма әм баwәрийа хwә öнда накьн wәки әwед кö Йаһоwа һиштьнә, диса вәгәрʹьнә бал wи (1 Корн. 13:7). Һәрге һун дьвиньн кö әw мәрьве wә те гöһастьне у ньһерʹандьна хwә дьгöһезә, һун дькарьн бона wи дöа бькьн, wәки әw жь Кʹьтеба Пироз qәwате бьстинә у qәбул кә ве тʹәглифкьрьна Йаһоwа: «Вәгәрʹә [бал] мьн» (Иша. 44:22).

21. Һун чь гәрәке бькьн һәрге нәфәред wә бона рʹастийе пәй wә дькʹәвьн?

²¹ Иса гот кö һәрге әм мәрьва һе зедә һʹьз кьн нә кö wи, әм нькарьн бьбьнә шагьртед wи. Ле әw баwәр бу кö шагьртед wи wе мерхас бьн у амьн бьминьн, чахе нәфәред wан бона рʹастийе пәй wан кʹәвьн. Һәрге рʹастийе «шур» анийә мала wә, итʹбарийа хwә Йаһоwа биньн кö әwе али wә бькә һун сәбьр кьн у qәwи бьминьн (Иша. 41:10, 13). Шабуна хwә öнда нәкьн, чьмки һун заньн кö Йаһоwа у Иса wә qәбул дькьн, у wе бона амьнийа wә әʹсә wә кʹәрәм кьн.