Ча Хәбәра Хԝәде Бьгьһиньн Дьле Мәрьвед Хԝәйә Нәбаԝәр

ИСА мәрьвәкирʹа, йе кӧ дьхԝәст бьбуйа шагьрте ԝи, ӧса гот: «Вәгәрʹә мала хԝә у нәфәред мала хԝәрʹа бежә, кӧ Хӧдан бона тә чь кьр у чаԝа ль тә һатә рʹәʹме». Жь ԝан гьлийед Иса те кʹьфше, ԝәки әԝи фәʹм дькьр, кӧ мәрьв һʹьз дькьн дәрһәԛа тьштед фәрз у һʹәԝас мәрьвед хԝәйә незикрʹа гьли кьн (Марԛос 5:19).

Һьнә мьләтада, бәрамбәри мьләтед дьн, әв хәйсәт дьһа әшкәрә йә у рʹожед мәда жи гәләк бәлабуйи йә. Ләма жи чахе мәрьв дәстпедькә Йаһоԝарʹа хьзмәт кә, щәм ԝи жи хԝәстьн пешда те дәрһәԛа баԝәрийа хԝәйә тʹәзә мәрьвед хԝәйә незикрʹа гьли кә. Ле ча рʹаст ве йәке бькьн? Ча әм дькарьн рʹастийе бьгьһиньн дьле мәрьвед хԝәйә незик, йед кӧ хԝә ль дине хԝә у ль әʹйд-ԛәйдед хԝә дьгьрьн, йан жи ԛә Хԝәде баԝәр накьн? Кʹьтеба Пироз ширәтед керһати дьдә кӧ чаԝа ԝе йәке бькьн.

«МӘ МӘСИҺ ДИТ»

Ԛьрʹна йәкеда Әндраԝьс йәк жь мәрьвед пешьн бу, йе кӧ фәʹм кьр ԝәки Иса әԝ һәйә Мәсиһ. Гәло кʹерʹа әԝи дәрберʹа дәрһәԛа ԝе йәке гьли кьр? «Әԝи [Әндраԝьс] перʹа-перʹа бьре хԝә Шьмһʹун дит у жерʹа гот: ‹Мә Мәсиһ дит›, кӧ те фәʹмкьрьне: ‹Йе Кʹьфшкьри›». Әндраԝьс бьре хԝә, Пәтрус, бьрә щәм Иса у бь ԝе йәке мәщал да Пәтрус, ԝәки әԝ бьбә шагьрте Иса (Йуһʹәнна 1:35-42).

Ԝәкә шәш сал шунда, гава Пәтрус Йафайеда бу, ԝи тʹәглифи мала сәрсәдәки бь наве Корʹнелйо кьрьн, кʹижан кӧ Ԛәйсәрйайеда дьжит. Гәло гава Пәтрус гьһиштә щи, ԝедәре кʹе һивийа ԝи бу? «Корʹнелйо жи гази хԝәхати у достед хԝә кьрьбу у һивийа [Пәтрус у мәрьвед тʹәви ԝи] бу». Демәк, Корʹнелйо мәщал да мәрьватийа хԝә, ԝәки гӧһ бьдьнә Пәтрус у сәр һʹиме ԝе йәке хԝәха сафикьрьне бькьн (Кʹаред Шандийа 10:22-33).

Жь мәсәла Әндраԝьс у Корʹнелйо әм чь дәрс һин дьбьн дәрһәԛа ԝе йәке, кӧ ча хԝә бьдьнә кʹьфше һьндава мәрьватийа хԝә?

Нә Әндраԝьс у нә жи Корʹнелйо мәщал жь дәсте хԝә бәрнәдьдан. Әндраԝьс насийа Пәтрус да Иса. Корʹнелйо жи хәм кьр, ԝәки һʹәму бьра-пьсмамед ԝи готара Пәтрус бьбьһен. Әндраԝьс у Корʹнелйо нә бь дәсте зоре, нә жи бь фелбази ӧса дькьрьн, ԝәки нәфәред ԝан бьбьнә шагьртед Иса. Жь мәсәла ԝан әм дькарьн чь дәрс хԝәрʹа һьлдьн? Әм гәрәке чʹәʹв бьдьнә ԝан. Әм дькарьн һьнә фькьра бьра-пьсмамед хԝәрʹа гьли кьн йан жи мәщала чекьн, ԝәки әԝана рʹастийа жь Хәбәра Хԝәде пебьһʹәсьн у тʹәви хушк-бьред мәйә рʹӧһʹани бьбьнә нас. Ле әм ԛәдьре азайа бьжартьна ԝан дьгьрьн у нахԝазьн зоре ԝан бькьн рʹастийе ԛәбул кьн. Жь мәсәла жьн-мерәки жь Алманийайе, бь наве Йурген у Петра, әм дькарьн бьвиньн, ԝәки ча али мәрьватийа хԝә бькьн рʹастийе ԛәбул кьн.

Петра тʹәви Шәʹдед Йаһоԝа һинбуна Кʹьтеба Пироз дәрбаз бу у паше һатә ньхӧмандьне. Мере ԝе Йурген офисере ордийа әскәра бу. Серида Йургенрʹа хԝәш нәдьһат бьжартьна жьна ԝи. Ле ԝәʹдә шунда әԝи фәʹм кьр, ԝәки Шәʹдед Йаһоԝа рʹастийа жь Кʹьтеба Пироз һин дькьн. Әԝи жи әʹмьре хԝә тʹәсмили Йаһоԝа кьр у ньһа рʹуспийе щьвате йә. Чь ширәт әԝ дьдә ԝан, кʹе дьхԝазә ԝәки рʹастийа жь Кʹьтеба Пироз дьле мәрьватийа ԝан бьгьрә?

Йурген дьбежә: «Нәлазьм ә зоре ԝан бькьн рʹастийе ԛәбул кьн у пе хәбәрдана хԝә дәрһәԛа тьштед рʹӧһʹани зәйле ԝан бьвьн, чьмки әв йәк дькарә бьбә сәбәб ԝәки һʹәԝаса ԝан һьндава рʹастийе ӧнда бә. Дьһа баш ә щар-щара һьнә фькьред һʹәԝас ԝанарʹа гьли кьн. Ӧса жи әм дькарьн насийа ԝан бьдьнә хушк-бьред мәйә рʹӧһʹани, йед кӧ ԛаси ԝан ьн, тʹәви кʹижана кӧ әԝана тьштәкида мина һәв ьн. Әв йәк дькарә кʹарәкә мәзьн бинә».

Пәтрусе шанди у мәрьватийа Корʹнелийо, зу рʹастийе ԛәбул кьрьн. Ле һьнә мәрьвед дьнрʹа ԛьрʹна йәкеда дьһа зедә ԝәʹдә лазьм бу сәва кӧ рʹастийе ԛәбул кьн.

ЧЬ ӘМ ДЬКАРЬН БЕЖЬН ДӘРҺӘԚА БЬРЕД ИСА?

Чахе Иса сәр әʹрде хьзмәт дькьр, һьнә мәрьвед ԝи баԝәрийа хԝә ԝи анин. Мәсәлә, Аԛуб у Йуһʹәнна шанди, йед кӧ ча те кʹьфше кӧрʹхатийед Иса бун у дийа ԝан Сәлома, хатийа Иса бу. Сәлома дьԛәԝьмә нава ԝан жьнада бу, йед кӧ бь һәбука хԝәва ԝанрʹа, демәк Иса у шандийарʹа бәрдәсти дькьрьн (Луԛа 8:1-3).

Ле нәфәред Иса йед дьн дәрберʹа баԝәрийа хԝә ԝи нәанин. Чахе саләк дәрбаз бу паши ньхӧмандьна Иса, маләкида гәләк мәрьв тʹоп бун, ԝәки гӧһ бьдьнә ԝи. «Гава йед жь хун у ԛьнета ԝи бьһистьн, дәркʹәтьн ԝи бьгьрьн, чьмки ԝана дьгот: ‹Әԝи һʹьше хԝә ӧнда кьрийә!›» Ԝәʹдә шунда, чахе бьред ԝи хԝәстьн дәрһәԛа нетед ԝи пебьһʹәсьн, Иса рʹастә-рʹаст щаба ԝан нәда. Ле чьрʹа? Чьмки бьред ԝи баԝәрийа хԝә же нәдьанин (Марԛос 3:21; Йуһʹәнна 7:5).

Әм жь мәсәла Иса, кӧ әԝ һьндава мәрьвед хԝәда чаԝа бу, чь һин дьбьн? Әԝ нәхәйиди гава нәфәред ԝи дәрһәԛа ԝи дьготьн, ԝәки әԝи һʹьше хԝә ӧнда кьрийә. Ле һәла һе паше сахкьрьне жи Иса ԝәʹдә бона бьре хԝә Аԛуб вәԛәтанд у хԝә нишани ԝи кьр. Ча те кʹьфше, әв йәк нә кӧ тʹәне али Аԛуб кьр, ле ӧса жи али бьред ԝанә дьн кьр, у ԝана баԝәр кьр, ԝәки әԝ бь рʹасти Мәсиһ йә. Ләма жи гава шандийа у шагьрта ль маләке Оршәлимеда ода мәзьнда, сәр ԛате жорьн тʹоп бун, бьред Иса жи ԝедәре бун у ԝана жи рʹӧһʹе пироз стандьн. Ԝәʹдә шунда Аԛуб у ӧса жи бьре Иса йе дьн, Щьһуда жи, щабдарийед мәзьн стандьн (Кʹаред Шандийа 1:12-14; 2:1-4; 1 Корьнтʹи 15:7).

ҺЬНӘКАРʹА ГӘЛӘК ԜӘʹДӘ ЛАЗЬМ Ә

Чаԝа кӧ ԛьрʹна йәкеда, иро жи һьнә мәрьварʹа гәләк ԝәхт лазьм ә сәва кӧ бенә сәр рʹийа рʹастийе. Дина хԝә бьдьнә ве сәрһатийе, Росԝита Католикәкә хирәт бу, чахе сала 1978 мере ԝе бу Шәʹде Йаһоԝа. Серида әԝе һʹәсаб дькьр, ԝәки баԝәрийа ԝе рʹаст ә у мьԛабьли мере хԝә дәрдькʹәт. Ле гәләк сал шунда, дьле ԝе нәрм бу у әԝ избат бу, ԝәки Шәʹдед Йаһоԝа рʹастийе һин дькьн. Сала 2003 әԝ һатә ньхӧмандьне. Ле гәло чь дьле ԝе нәрм кьр? Мәсәлә, чахе әԝ сәр мере хԝә һерс дькʹәт, мере ԝе нәдьхәйиди, ле мәщале дьда ԝе, ԝәки әԝ фькьре хԝә бьгӧһезә. Росԝита чь ширәте дьдә? «Сәва кӧ һун бькарьбьн дьле мәрьвед хԝә нәрм кьн, сәбьр кьн, сәбьр кьн у диса жи сәбьр кьн».

Моника һатә ньхӧмандьне сала 1974, у ԝәкә дәһә сал шунда дӧ кӧрʹед ԝе жи бунә Шәʹдед Йаһоԝа. Рʹаст ә мере ԝе, Ханс, мьԛабьли баԝәрийа ԝан нибу, ле әԝ һьнәки дәрәнг һатә рʹастийе, у сала 2006 һатә ньхӧмандьне. Сәр һʹиме дәрәщед хԝә, әԝ малбәт чь ширәте дьдә? Әԝана дьбежьн: «Йаһоԝарʹа амьн бьминьн у баԝәрийеда сьст нәбьн». Моника у кӧрʹед ԝе тʹьме һʹьзкьрьна хԝә Хансрʹа дьданә кʹьфше у әԝ йәк жи али ԝи кьр, ԝәки бе сәр рʹийа рʹастийе. Ԝана тʹӧ щар гӧмана хԝә ӧнда нәдькьр, ԝәки рʹожәке әԝ жи ԝе бе нава рʹастийе.

АВА РʹАСТИЙЕ ГӘШ ДЬКӘ

Щарәке Иса рʹастийе бәрамбәри аве кьр, йа кӧ жийина һʹәта-һʹәтайе дьдә (Йуһʹәнна 4:13, 14). Әм дьхԝазьн, ԝәки мәрьвед мә жь ава рʹастийе гәш бьбьн. Һәмьки әм нахԝазьн, ԝәки ава рʹастийе бәр ԝанда бьминә, бь ԝе йәке кӧ әм зоре ԝана бькьн ава рʹастийе гәләки вәхԝьн. Әԝана жь рʹастийе гәш бьн йане на, ве йәкева гьредайи йә, һәла әме чь щурʹәйи дәрһәԛа баԝәрийа хԝә ԝанарʹа гьли кьн. Кʹьтеба Пирозда те готьне, ԝәки «дьле йе рʹаст ль сәр щабдайине дьфькьрә» у «мәрьве дьлда сәрԝахт сәрԝахтийе дьдә зьмен у занәбуне ль заре ԝи зедә дькә». Чаԝа әм дькарьн ԝан ширәта бьдьнә хәбате? (Мәтʹәлок 15:28; 16:23)

Мәсәлә, жьн дьхԝазә дәрһәԛа баԝәрийа хԝә мере хԝәрʹа гьли кә. Һәгәр пешийа тьштәки бежә, жьн бьфькьрә чь бежә, ԝи чахи әԝе хәбәрданеда ләз нәкʹәвә. Әԝ гәрәке пе занәбуна хԝә, хԝә ԛӧрʹә нәкә у хԝә сәр мере хԝәрʹа нәгьрә. Хәбәрдана ԝейә билан у бь мәʹрифәти дькарә әʹдьлайе бинә. Әԝ гәрәке бьфькьрә: Кʹәнге бәшәра мере ԝе хԝәш ә? Чь ԝи хԝәш те бьхунә йан жи дәрһәԛа чь хәбәр дә? Зандари, политика йан жи спорт ԝи хԝәш те? Ча һʹәԝаса ԝи һьндава Кʹьтеба Пироз пешда бинә? Ле ӧса жи бир нәкә ԛәдьре ньһерʹандьн у һәстед ԝи бьгьри. Һәгәр жьн сәр ԝе йәке бьфькьрә, әԝ йәк ԝе али ԝе бькә, ԝәки пе хәбәрдан у кьред хԝә бьдә кʹьфше кӧ дькʹәвә һʹәйра мере хԝә.

Сәва кӧ Хәбәра Хԝәде бьгьһижә дьле мәрьвед мә, бәс нинә тʹәне дәрһәԛа рʹастийе ԝанрʹа гьли кьн. Дьһа фәрз ә кӧ кьред мә анәгори гьлийед мә бьн.

РʹАБУН-РʹУНЬШТЬНЕДА МӘСӘЛӘ БЬН

Йурген ӧса дьбежә: «Әʹмьре хԝәйи һәррʹожида принсипед Кʹьтеба Пироз бьдьнә хәбате. Дьԛәԝьмә мәрьвед ԝә дәрһәԛа ԝе йәке ԝәрʹа нәбежьн, ле әԝ йәк ԝе һʹәԝаса ԝан һьндава рʹастийе пешда бинә». Ханс, йе кӧ 30 сал шунда паши жьна хԝә һатә ньхӧмандьне, тʹәви ԝан хәбәра ԛайил ә. Әԝ ӧса дьбежә: «Рʹабун-рʹуньштьна баш гәләк фәрз ә. Бь сайа ԝе йәке нәфәред ԝә дькарьн бьвиньн, ԝәки рʹастийа Хәбәра Хԝәде сәр әʹмьре ԝә һʹӧкӧм дькә». Мәрьвед мә гәрәке тедәрхьн, ԝәки баԝәри у кьред мәйә баш жь мәрьвед ве дьнйайе мә щӧдә дькьн.

Ԝан кʹӧлфәтарʹа, меред кʹижана нәбаԝәрмәнд ьн, Пәтрусе шанди ширәтәкә ӧса да: «Ӧса жи кʹӧлфәтно, гӧрʹа мере хԝәда бьн, ԝәки жь ԝан һьнәк жи, һәгәр гӧһдарийа хәбәре накьн, бь пʹәргалийа жьнед хԝә, бе готьн жи бенә сәр баԝәрийе гава пʹәргалийа ԝәйә хофә у навә-намус бьбиньн. Бьра хәмьла ԝә дәрвава бь гӧливәгьртьне у тʹорʹед зерʹа, йан жи бь кʹьнща нибә, ле йа мәрьве һьндӧрʹе дьлда, рʹӧһʹәки мьлук у гьранә бәдәԝәтийа нәбәтал ә, кӧ ль бәр Хԝәде пʹьрʹ бь ԛимәт ә» (1 Пәтрус 3:1-4).

Пәтрус ньвиси, ԝәки мер бь сайа кьред баш йед жьнед хԝә, дькарьн бьбьн баԝәрмәнд. Хушка мә Кристина, йа кӧ сала 1972-да һатә ньхӧмандьне, әв ширәта Пәтрус һьлда һʹәсаб у пе кьред хԝәйә баш дьле мере хԝә кʹьрʹи. Ԝәʹдәки мере ԝе Кʹьтеба Пироз һин дьбу, ле әԝ һәла һе нәбу Шәʹде Йаһоԝа. Әԝ дьчу сәр һьнә щьватед мә у һәләԛәтийа ԝи тʹәви хушк-бьред жь щьвате, баш бу. Хушк-бьра ԛәдьре азайа бьжартьна ԝи дьгьрьн. Ле чь щурʹәйи Кристина пе кьред хԝәйә баш дьле мере хԝә дькʹьрʹә?

Әԝ ӧса дьбежә: «Мьн сафи кьрийә ԛайим хԝә ль рʹийа рʹастийе бьгьрьм, у ӧса бьжим ча Йаһоԝа ԛәбул дькә. Ле ӧса жи әз һәр тьшт дькьм, ԝәки нә кӧ тʹәне пе хәбәред хԝә, ле ӧса жи пе кьред хԝә дьле мере хԝә бькʹьрʹьм. Һәгәр принсипед Кʹьтеба Пироз найен тʹәрʹьбандьне, ԝи чахи әз һәр тьшти дькьм, ԝәки гӧрʹа ԝи бькьм. У һәмьки, әз ԛәдьре бьжартьна ԝи дьгьрьм у һәр тьшти дьдьмә дәсте Йаһоԝа».

Мәсәла Кристинайе дьдә кʹьфше, ԝәки чьԛас фәрз ә ньһерʹандьна мәрьвед хԝә һьлдьн һʹәсаб. Графика ԝейә шьхӧлед рʹӧһʹани һәйә, йа кӧ али ԝе дькә рʹӧһʹанида ԛәԝи бьминә. Мәсәлә, әԝ тʹьме дьчә щьвина у хьзмәтийе. Хенщи ԝе йәке әԝ фәʹм дькә, ԝәки мере ԝе һʹәԝще һʹьзкьрьна ԝе йә, у әԝ гәрәке дина хԝә бьдә ԝи у ԝәʹдә бона ԝи вәԛәтинә. Хушк-бьра, мәрьвед кʹижана нәбаԝәрмәнд ьн, гәрәке ԝан һʹәму тьшта һьлдьн һʹәсаб. Кʹьтеба Пирозда те готьне, ԝәки «дәма һәр тьшти . . . һәйә». Әв йәк дәрһәԛа ԝәʹдә жи те готьне, йа кӧ әм тʹәви мәрьвед хԝәйә нәбаԝәрмәнд дәрбаз дькьн. Илаһи тʹәви жьн йан мере хԝәйә нәбаԝәрмәнд. Чахе әм ԝәʹдә тʹәви мәрьвед хԝә дәрбаз дькьн, әв йәк һәләԛәтийа мә ортʹа һәвда ԛәԝи дькә. У бь сайа ԝе йәке мәрьвед мә, хԝә ида тʹәне тʹәхмин накьн у кʹӧмрʹәшийе мә накьн (Ԝаиз 3:1).

ҺЕВИЙА ХԜӘ ӦНДА НӘКЬН

Холгер, баве кʹижани кӧ 20 сал шунда паши малбәта хԝә һатә ньхӧмандьне, ӧса дьбежә: «Гәләк фәрз ә мәрьве хԝәйә нәбаԝәрмәндрʹа бьди кʹьфше, ԝәки тӧ ԝи һʹьз дьки у бона ԝи дӧа дьки». Кристина ӧса бәрдәԝам дькә: «Әз тʹӧ щар һевийа хԝә ӧнда накьм, ԝәки рʹожәке мере мьн ԝе рʹастийе ԛәбул бькә у бе щәм Йаһоԝа». Әм гәрәке тʹӧ щар мәрьвед хԝәйә нәбаԝәрмәндда дӧдьли нәбьн у һевийа хԝә ӧнда нәкьн, ԝәки рʹожәке әԝана ԝе бенә щәм Йаһоԝа.

Нета мә әв ә, ԝәки һәләԛәтийа баш тʹәви мәрьвед хԝә хԝәй кьн, мәщале бьдьнә ԝан дәрһәԛа рʹастийе пебьһʹәсьн, у һәр тьшти бькьн ԝәки рʹастийа Кʹьтеба Пироз бьгьһижә дьле ԝан. У чь кӧ әм дькьн, әм гәрәке бь ԛәдьр, мәʹрифәти у мьлуктийе бькьн (1 Пәтрус 3:15).