Тӧ Һазьр и Әʹрде Ԝар би?

ӘВ СОЗЕ Иса бь рʹасти жи дьле мә гәрм дькә: «Хԝәзи ль шкәстийа, чьмки дьнйайе пʹара ԝан бә» (Мәтта 5:5). Бона кәсед бь рʹӧһʹ кʹьфшкьри, әԝ гьли тенә һʹәсабе кӧ әԝана ԝе ль әʹзмана тʹәви Иса Мәсиһ, ча пʹадша ль сәр әʹрде сәрԝертийе бькьн (Әʹйанти 5:10; 20:6). Бона һʹәчʹи зәʹф Мәсиһийа, әԝ гьли тенә һʹәсабе кӧ әԝана ԝе сәр рʹуйе әʹрде, беԛьсур, сах-сьламәт, бәхтәԝар у һәр у һәр бьжин. Ԝе дәме, ԝе лазьм бә кӧ әԝана чәнд щабдарийа биньн сери. Мәсәлә, ԝе лазьм бә кӧ әԝана әʹрде бькьнә щьнәт у кәсед кӧ жь мьрьне рʹабьн, щиԝар кьн у һин кьн. Дина хԝә бьде кӧ тӧ чаԝа дькари ньһада нишан ки, кӧ тӧ дьхԝази ван тьшта бьки.

ҺАЗЬР БӘ КӦ ӘʹРДЕ БЬКИ ЩЬНӘТ

Чахе Йаһоԝа әʹмьр да мәрьвед пешьн, ԝәки әԝана әʹрде тʹьжә бькьн у хԝәй кьн, әԝи гот кӧ рʹожәке, тʹәмамийа әʹрде ԝе бьбә щьнәт (Дәстпебун 1:28). Кәсед кӧ әʹрде ԝар бьн, ԝе әве тʹәмийа Хԝәде биньн сери. Жь бәр кӧ бахче Едене ида тʹӧнә йә, ԝе лазьм бә кӧ әԝана әʹрд тʹәзәда бькьнә щьнәт. Серида, ԝе лазьм бә кӧ әԝана әʹрде паԛьж бькьн. Бәле, ԝе лазьм бә кӧ шьхӧләки мәзьн бе кьрьне!

Әв йәк тинә бира мә, кӧ гава Исраели жь дилтийа Бабилоне вәгәрʹийанә ԝәлате хԝә, чьԛас шьхӧлед ԝан һәбу. Ԝәлат 70 сал бекәс у хьки-хԝәли мабу. Ле Ишайа пʹехәмбәр пешда готьбу кӧ бь сайа кʹәрәма Йаһоԝа, әԝана ԝе бькарьбьн ԝәлате хԝә тʹәзәда ава бькьн: «[Хԝәде] ԝе бәрʹийа ԝе бькә ԝәк Еден, ԝе бәри у дәштед ԝе бькә ԝәкә Бахче Хӧдан» (Ишайа 51:3, ИМ). Йаһоԝа али Исраелийа кьр, ԝәки әԝана ԝәлате хԝә бькьнә щики хԝәш. Мина ве йәке, бь сайа аликʹарийа Йаһоԝа, кәсед кӧ әʹрде ԝар бьн, ԝе бькарьбьн тʹәмамийа әʹрде бькьн щьнәт. Тӧ дькари ньһада нишан ки, ԝәки тӧ бона ви шьхӧли һазьр и!

Мәсәлә, һәрге тʹаха кӧ тӧ теда дьжи нә һаԛас паԛьж бә жи, тӧ дькари хирәт бьки кӧ мала тә у дәр-дора мале һәр тʹьм паԛьж у щиԝар бә. Ӧса жи, тӧ дькари Ода щьвате у одед щьвата мәзьн тʹәви хушк-бьра тʹәмьз ки у хԝәй ки. Һәрге жь дәсте тә те, тӧ дькари ԝәʹде тʹәшԛәла аликʹарийе бьди. Әв йәк ԝе нишан кә, ԝәки тӧ һазьр и али хушк-бьра бьки. Һәла жь хԝә бьпьрсә: «Һәрге әз әʹрде ԝар бьм, гәло кʹижан һʹӧнӧр у фәрәсәт ԝе мьнрʹа лазьм бьн?»

Чәнд хушк у бьра Ода щьвате паԛьж дькьн у чедькьн.

ҺАЗЬР БӘ АЛИ ԜАН БЬКИ, ЙЕД КӦ ԜЕ ЖЬ МЬРЬНЕ РʹАБЬН

Паши кӧ Иса Мәсиһ ԛиза Йайиро жь мьрьне рʹакьрьбу, әԝи гот кӧ хԝарьне бьдьнә ԝе (Марԛос 5:42, 43). Һәмьки, чәтьн нинә кӧ мәрьв кәчʹькәкә 12 сали тʹер кә. Ле ԝәрә бьфькьрә кӧ гава әв созе Иса бе сери, чьԛас хәбат ԝе һәбә: «Һʹәмуйед тʹьрбада ԝе дәнге ԝи бьбьһен» (Йуһʹәнна 5:28, 29). Рʹаст ә, Кʹьтеба Пироз һәр тьшти мәрʹа набежә, ле әм тедәрдьхьн ԝәки кәсед кӧ жь мьрьне рʹабьн ԝе һʹәԝще хԝарьн, щи-сьтʹар у кʹьнща бьн. Гәло тӧ чаԝа дькари ньһада нишан ки, ԝәки тӧ һазьр и аликʹарийе бьди? Дина хԝә бьдә ван мәсәла.

Гәло тӧ чаԝа дькари нишан ки, ԝәки тӧ һазьр и әʹрде ԝар би?

Аеропортеда, хушк-бьра бь шабуне дьчьн пешийа меванед кӧ һатьнә сәр щьвата мәзьнә һʹәмдьнйайе Париседа.

Гава тӧ дьбьһейи ԝәки бәрпьрсийаре мьһале ԝе тʹәсәлийа щьвата тә бькә, тӧ дькари ԝи бона хԝарьне тʹәглифи мала хԝә ки. Йан жи, гава хьзмәтийа Бәйтʹәлванәки йан бәрпьрсийарәки мьһале ида хьлаз дьбә у тʹәшкиләт ԝи дьшинә дәште, дьбәкә тӧ дькари али ви кәси бьки, ԝәки әԝ хԝәрʹа маләке бьвинә. Ӧса жи, гава һәрема тәда щьвата мәзьнә серʹожи йан щьвата мәзьнә мәхсус дәрбаз дьбә, дьԛәԝьмә тӧ дькари пешийа йан паши щьвата мәзьн кʹомәке бьди йан һәрʹи пешийа мевана.

ҺАЗЬР БӘ ԜӘКИ КӘСЕД КӦ ЖЬ МЬРЬНЕ РʹАБЬН, ҺИН КИ

Ль гора Кʹаред Шандийа 24:15, әм һивийа ве йәке нә, кӧ бь милйарда мәрьв ԝе жь мьрьне рʹабьн. Пʹьрʹанийа ԝан әԝ ьн, йед кӧ Йаһоԝа бәре нас нәдькьрьн. Паши кӧ әԝана жь мьрьне рʹабьн, мәщала ԝан ԝе һәбә кӧ Йаһоԝа рʹьнд нас бькьн.a Хьзмәткʹаред Хԝәде ԝе ԝана һин кьн (Ишайа 11:9). Хушкәкә мә бь наве Шарлот, йа кӧ Әԝропа, Америкайа Башур у Африкайеда хьзмәт кьрьбу, һʹьзрәта ԝе рʹоже йә. Әԝ дьбежә: «Әз гәләк дьхԝазьм кәсед кӧ жь мьрьне рʹабьн, һин кьм. Гава әз дәрһәԛа кәсәки кӧ ԝәʹде бәре дьжит дьхуньм, әз хԝәрʹа дьбежьм: ‹Хԝазьл әԝи Йаһоԝа нас кьра. Жийина ԝи ԝе бь тʹәмами щӧдә буйа›. Әз һивийа ԝе рʹоже мә ԝәки ԝан мәрьварʹа, йед кӧ ԝе жь мьрьне рʹабьн, бежьм, кӧ әԝана чь кʹәрәма дькарьн бьстиньн».

Ӧса жи, ԝе лазьм бә кӧ хьзмәткʹаред Йаһоԝа, йед кӧ пешийа һатьна Иса дьжитьн, гәләк тьштед тʹәзә пебьһʹәсьн. Мәсәлә, ԝе ԛәдьрәки чьԛас мәзьн бә, кӧ әм Данийелрʹа бәʹса пекһатьна пʹехәмбәртийед ԝи бькьн, йед кӧ әԝи ньвисибу, ле фәʹм нәкьрьбу (Данийел 12:8). Йан жи, бьдә бәр чʹәʹве хԝә кӧ гава Рʹутʹ у Наһоми бьбьһен ԝәки Иса жь рʹькʹьнийата ԝан бу, әԝана ԝе чьԛас ша бьн. Әме бькарьбьн тʹәмамийа ԝәʹде хԝә бона бәрнама һинкьрьне хәрщ кьн, бе кӧл у дәрдед иройин!

Щийе кӧ кʹьнщ тенә шуштьне, хушкәк бәлавокәке дьдә жьнькәке.

Гәло тӧ чаԝа дькари ирода нишан ки, ԝәки тӧ һазьр и аликʹарийе бьди ве бәрнама һинкьрьне? Мәсәлә, ԝе баш бә ԝәки тӧ фәрәсәтед хԝәйә һинкьрьне пеш хи у бьби дәрсдарәки баш. Ӧса жи, хирәт бькә ԝәки тӧ һәртʹьм мьзгинийе бәла ки (Мәтта 24:14). Һәрге тӧ ида әʹмьрда мәзьн и, йан жь бо сәбәбед дьн нькари зедә хьзмәт ки, тӧ дькари бь хирәта хԝә нишан ки, ԝәки тӧ бона шьхӧле һинкьрьна кәсед кӧ жь мьрьне рʹабьн, һазьр и.

Гәло тӧ бь рʹасти һивийа ԝе рʹоже йи кӧ әʹрде ԝар би? Гәло тӧ һивийа ԝи ԝәʹдәйи нини, кӧ әʹрде бьки щьнәт, али кәсед кӧ ԝе жь мьрьне рʹабьн бьки у ԝана һин ки? Ида ирода бь дьл у щан шьхӧле Пʹадшатийе бинә сери, йа кӧ мина ви шьхӧли йә, кʹижан тӧйе дьнйа тʹәзәда бьки.

a Готара бь наве «Йед кӧ Гәләка Дьгьһиньн Рʹастийе» бьньһерʹә, жь «Бьрща Ԛәрәԝьлийе», мәһа Илоне, сала 2022.