1 | Дӧа «Һʹәму Хәмед Хԝә Бавежьнә сәр Ԝи»

КʹЬТЕБА ПИРОЗ ДЬБЕЖӘ: «Һʹәму хәмед хԝә бавежьнә сәр [Хԝәде], чьмки әԝ бона ԝә хәм дькә» (1 ПӘТРУС 5:7).

Әв Чь Те Һʹәсабе

Йаһоԝа Хԝәде мә һелан дькә, кӧ әм ԝирʹа дәрһәԛа һʹәму хәмед хԝә гьли кьн (Зәбур 55:22). Фьрԛи тʹӧнә проблема мә мәзьн ә йан бьчʹук ә, әм диса жи дькарьн Йаһоԝарʹа дӧа бькьн. Йаһоԝа бетʹалаш нинә һьндава һәстед мә у әԝ бона мә хәм дькә. Чахе әм ԝирʹа дӧа дькьн, әм әʹдьлайа дьл дьстиньн (Филипи 4:6, 7).

Әв Йәк Ча Дькарә Аликʹарийе Бьдә

Чахе әм жь бо нәхԝәшийа емосийали дьчәрчьрьн, әм дькарьн тʹәнебун сәр хԝә тʹәхмин кьн. Мәрьвед дьн нә һәртʹьм дькарьн тедәрхьн әм чь еше дькʹьшиньн (Мәтʹәлок 14:10). Ле чахе әм бь дьл у щан Хԝәдерʹа дӧада дәрһәԛа һәстед хԝә гьли дькьн, әԝ бь дьл гӧһ дьдә мә у мә фәʹм дькә. Ләма жи Йаһоԝа дьхԝазә, кӧ әм ԝирʹа дәрһәԛа һәр хәмед хԝә гьли кьн, чьмки әԝ һаш еша мә һәйә (2 Дирок 6:29, 30).

Чахе әм дӧада тʹәви Йаһоԝа хәбәр дьдьн, әв йәк баԝәрийа мә һьндава ве йәке ԛәԝи дькә, кӧ әԝ бона мә хәм дькә. Әм мина зәбурбеж хԝә тʹәхмин дькьн, йе кӧ ӧса дӧа кьр: «Сәр мәʹрьмийа мьнда Тә ньһерʹи у тәʹли-тәнгийа мьн пе һʹәсийайи» (Зәбур 31:7). Занәбуна ве йәке кӧ Йаһоԝа рʹьнд занә әм чь еше дькʹьшиньн, али мә дькә чәтьнайада сьст нәбьн. Әԝ нә кӧ тʹәне еша мә дьвинә, ле али мә дькә, кӧ әм бәрдьлийе у һелане Кʹьтеба Пирозда бьвиньн.

Кʹьтеба Пироз Чаԝа Аликʹарийе Дьдә Щулиан

Чаԝа Бәрхԝәкʹәтьн сәр Мьн Һʹӧкӧм Дькә

«Әз һьмбәри бәрхԝәкʹәтьне у нәхԝәшийа психики шәрʹ дькьм, йа кӧ нервава гьредайи йә. Бәрхԝәкʹәтьна мьн дькарә ньшкева дәстпебә. Әз дькарьм хԝә баш тʹәхмин кьм у ньшкева бе мәʹни дәстпекьм бәрхԝә кʹәвьм. Әз дьһа зедә дькʹәвьмә стресе гава тʹәви мәрьва мә, чьмки әз бәрхԝә дькʹәвьм сәва ве йәке, кӧ әԝана дәрһәԛа мьн чь дьфькьрьн.

«Мәрьвед кӧ дәрһәԛа нәхԝәшийа мьн заньн, гәләк али мьн дькьн. Ле щарна әԝана тьштед ӧса дьбежьн, чь кӧ мьне нәхԝәста бьбьһиста. Диса жи әз жь ԝана рʹази мә, кӧ әԝана дьхԝазьн али мьн бькьн.

«Щарна, жь бо нәхԝәшийа мьн мьнрʹа чәтьн ә дӧа бькьм. Әз ԛәԝате дьдьмә хәбате, кӧ дьл у һʹьше хԝә һазьр кьм, ԝәки бькарьбьм дӧада тʹәви Йаһоԝа хәбәр дьм. Щурʹә-щурʹә фькьр дькʹәвьнә һʹьше мьн у әз тʹәвльһәв дьбьм. Чахе әз нькарьм фькьред хԝә контрол кьм, мьнрʹа чәтьн ә Йаһоԝарʹа гьли кьм, дәрһәԛа чь әз дьфькьрьм у чь тʹәхмин дькьм».

Кʹьтеба Пироз Чаԝа Али Мьн Дькә

«Әз жь һинбуна Кʹьтеба Пироз пеһʹәсийам, кӧ әʹсәйи нинә дӧайед мьн дьреж у бь хәбәред хԝәш бьн, сәва кӧ Хԝәде гӧһ бьдә мьн. Чахе әз нькарьм хәбәра тʹопи сәр һәв кьм, әз тʹәне ӧса дьбежьм: ‹Йаһоԝа, лава дькьм али мьн бькә›. Һәла һе ԝи чахи жи әз тʹәхмин дькьм ча Йаһоԝа мьн фәʹм дькә у щаба дӧайе мьн дьдә. Хенщи дӧакьрьне, мьн ӧса жи аликʹари жь медисинайе станд. Әз гәләк ша мә, кӧ бь сайа ԝан һәрдӧ тьшта һʹале мьн дьһа баш буйә. Рʹаст ә мьнрʹа ԛәԝат лазьм бу кӧ аликʹарийе жь Йаһоԝа бьхԝазьм, ле әԝ йәк һежайи ве йәке бу, кӧ һʹьзкьрьн у аликʹарийа Баве хԝәйи әʹзмана сәр хԝә тʹәхмин кьм».