Щьватеда Һелана Бьдьнә Һәв

1. Чьма әм щьватеда щаба дьдьн?

ӘМ ЧЬРʹА дьчьн сәр щьвата? Йа әʹԝльн, әм пәсьне Йаһоԝа Хԝәде дьдьн (Зәбур 26:12; 111:1). Ӧса жи, әм дьхԝазьн ван рʹожед чәтьнда һәвдӧ һелан кьн (1 Тʹесалоники 5:11). Бәле, гава әм дәсте хԝә бьльнд дькьн у щабәке дьдьн, әм пәсьне Йаһоԝа дьдьн у һәвдӧ ԛәԝи дькьн.

2. Сәр щьвате, кʹәнге әм дькарьн щаба бьдьн?

² Һәр һʹәфти, мәщала мә һәйә кӧ сәр щьвата щаба хԝә бьдьн. Мәсәлә, Шәми йан Ләʹде ԝәʹде леколина Бьрща Ԛәрәԝьлийе, әм дькарьн щабед хԝә бьдьн. Ӧса жи, сәр щьвина Мина Иса Бьжин у Хьзмәт кьн, ԝәʹде леколина пʹара Хьзна Кʹьтеба Пироз, у ԝәʹде шеԝьркьрьнед дьн, әм дькарьн щабед хԝә бьдьн.

3. Чьма щара мәрʹа чәтьн ә щабед хԝә бьдьн, у гьлийед жь Ибрани 10:24, 25 ча али мә дькьн?

³ Әм гьшки жи дьхԝазьн пәсьне Йаһоԝа бьдьн у хушк-бьра һелан кьн у ԛәԝи кьн. Ле дьԛәԝьмә мәрʹа зор ә щаба хԝә бьдьн, дьбәкә әм дьтьрсьн йан жи шәрм дькьн. Йан жи әм жь дьл дьхԝазьн дьһа зедә щаба бьдьн, ле дьԛәԝьмә бьре кӧ щьвате дәрбаз дькә, гәләк щар жь мә напьрсә. Дәрәщед ӧсада әм дькарьн чь бькьн? Гьлийед кӧ Паԝлосе шанди Ибранийарʹа ньвисибу, дькарьн али мә бькьн. Чахе әԝи бәʹса фәрзбуна щьвина кьр, әԝи гот кӧ гәрәке әм «һелана бьдьнә һәв» (Бьхунә Ибрани 10:24, 25). Һәрге әм фәʹм бькьн, кӧ әм дькарьн бь гьлийед һеса жи баԝәрийа хԝә бьдьнә кʹьфше у һәвдӧ ԛәԝи кьн, ԝе мәрʹа һеса бә щабед хԝә бьдьн. У һәрге бьре кӧ щьвате дәрбаз дькә, һаԛас щар жь мә напьрсә чьԛас әм дьхԝазьн, диса жи әм дькарьн ша бьн, чьмки мәщал дькʹәвә дәсте кәсед дьн, кӧ щаба хԝә бьдьн (1 Пәтрус 3:8).

4. Ве готареда әме кʹижан се тьшта шеԝьр кьн?

⁴ Ве готареда, йа әʹԝльн әме бьвиньн кӧ әм чаԝа дькарьн щьвата бьчʹукда, демәк кʹидәре кӧ мьзгинван һьндьк ьн, пе щабед хԝә һәвдӧ һелан кьн. Паше, әме пебьһʹәсьн, кӧ әм чаԝа дькарьн щьвата мәзьнда, кʹидәре кӧ мьзгинван зәʹф ьн, щабед хԝә бьдьн. У хьлазийеда әме шеԝьр кьн, кӧ әм гәрәке ча щабед хԝә бьдьн, ԝәки һәвдӧ ԛәԝи кьн.

ЩЬВАТА БЬЧʹУКДА ҺӘВДӦ ҺЕЛАН КЬН

5. Һәрге сәр щьвате мьзгинван һьндьк ьн, әм ча дькарьн ԝана һелан кьн?

⁵ Щьват у кʹомед бьчʹукда, һәжмара хушк-бьред кӧ щаба хԝә дьдьн, кем ә. Щарна һʹәта кӧ кәсәк дәсте хԝә бьльнд бькә, бьре кӧ щьвате дәрбаз дькә гәрәке һьнәки бьсәкьнә. Щара ӧса дькарә бе кʹьфше, ԝәки щьват һʹәԝас дәрбаз набә у әм һелане настиньн. Һьнге әм чь дькарьн бькьн? Ԝәрә әм тʹьме һазьр бьн, кӧ гәләк щар дәсте хԝә бьльнд кьн. Һәрге әм ӧса бькьн, әме кәсед дьн һелан кьн, кӧ әԝана жи дьһа зедә щабед хԝә бьдьн.

6-7. Чь дькарә али тә бькә ԝәки тӧ нәтьрси йан жи шәрм нәки щаба хԝә бьди?

⁶ Гәло тӧ дьтьрси йан шәрм дьки кӧ щаба хԝә бьди? Һәрге әре, бәрхԝә нәкʹәвә, нә тʹәне тӧ, ле гәләк кәсед дьн жи хԝә ӧса тʹәхмин дькьн. Бешьк, тӧ дьхԝази пе щабед хԝә хушк-бьра ԛәԝи ки. Гәло чь дькарә али тә бькә, ԝәки тӧ гәләки нәтьрси йан жи шәрм нәки кӧ щаба хԝә бьди?

⁷ Һьнә готаред жь журналед Бьрща Ԛәрәԝьлийе,b йед кӧ пешда һатьбун нәшьркьрьне, дькарьн али тә бькьн. Мәсәлә, тӧ дькари хԝә рʹьнд һазьр ки (Мәтʹәлок 21:5). Тӧ чьԛас баш хԝә һазьр ки, ԝе һаԛас һеса бә ԝәки тӧ щаба хԝә бьди. Ӧса жи, бьра щабед тә кьн бьн (Мәтʹәлок 15:23; 17:27). Щабәкә кьн ԝе али тә бькә, ԝәки тӧ гәләк бәрхԝә нәкʹәви. Щабен кьн, йед кӧ жь щьмләки йан дӧда нә, һеса тенә фәʹмкьрьне. Ле щабед гәләк дьреж, чәтьн тенә фәʹмкьрьне. Һәрге тӧ щабәкә кьн пе гьлийед хԝә бежи, тӧйе нишан ки, ԝәки тә хԝә рʹьнд һазьр кьрийә у готар баш фәʹм кьрийә.

8. Гава әм хирәт ьн, Йаһоԝа ча сәр ве йәке дьньһерʹә?

⁸ Дьԛәԝьмә тә һьнә ширәтед жь ԝан готара дайә хәбате, ле диса жи дьбәкә тәрʹа чәтьн ә щаба хԝә бьди. Тӧ дькари баԝәр би, кӧ Йаһоԝа гәләк хирәта тә ԛимәт дькә (Луԛа 21:1-4). Әԝ тьштәки жь ԛәԝата мә дәр, жь мә дәʹԝа накә (Филипи 4:5). Пешийе бьфькьрә, ԝәки чь тӧ дькари бьки. Хԝәрʹа нетәке дайнә у бона дьлрʹьһʹәтийе дӧа бькә. Мәсәлә, тӧ дькари хԝәрʹа нет дайни, ԝәки ԝәʹде һәр щьвина щаба хԝә бьди.

ЩЬВАТА МӘЗЬНДА ҺӘВДӦ ҺЕЛАН КЬН

9. Щьвата мәзьнда кʹижан чәтьнайи дькарә пешда бе?

⁹ Һәрге щьвата тәда гәләк мьзгинван һәнә, ԝи чахи чәтьнайикә дьн дькарә пешда бе. Дьԛәԝьмә һаԛас кәс дәсте хԝә һьлбьрʹьн, кӧ дәсте тә нәйе дитьне. Ԝәрә әм дина хԝә бьдьнә мәсәла хушка мә бь наве Даниела.c Әԝ һʹьз дькә щьватеда щаба хԝә бьдә. Әԝ ве йәке һʹәсаб дькә ча пʹара һʹәбандьне у ча мәщал, ԝәки хушк-бьра һелан кә у рʹастийед Кʹьтеба Пироз һʹьше хԝәда хԝәйи кә. Ле гава әԝ дәрбази щьватәкә мәзьн бу, бьре кӧ щьват дәрбаз дькьр, һьнә щар жь ԝе дьпьрси, щара жи ԛә нә дьһатә стандьне кӧ әԝ щаба хԝә бьдә. Әԝ дьбежә: «Әз гәләки дьлтәнг дьбум. Мьн хԝә ӧса тʹәхмин дькьр, те бежи тьштәк жь мьн кем дьбу. Һәр щара чахе ӧса дьбу, мьн дьгот ԝәки әв бьре кӧ щьвате дәрбаз дькә, ԛәста мьн напьрсә».

10. Сәва кӧ мәщал бькʹәвә дәсте тә, ԝәки щабәке бьди, тӧ дькари чь бьки?

¹⁰ Гәло тӧ жи щарна хԝә мина Даниелайе тʹәхмин дьки? Һәрге әре, дьбәкә тӧ бьфькьри ԝәки дьһа баш ә тʹәне гӧһ бьди у ида дәсте хԝә һьлнәбьрʹи. Ле дьлтәнг нәбә, бәрдәԝам кә дәсте хԝә һьлбьрʹә. Тӧ дькари бона һәр щьвинәке, чәнд щаба һазьр ки. Һәрге тә дәстпека щьватеда щаб нәда, диса жи ве мәщала тә һәбә кӧ щаба хԝә бьди. Чахе тӧ хԝә бона леколина Бьрща Ԛәрәԝьлийе һазьр дьки, бьфькьрә кӧ һәр абзасәк чаԝа тʹема сәрәкәва гьредайи йә. Һәрге тӧ ӧса бьки, тӧйе бькарьби щьватеда щабед баш бьди. Ӧса жи, тӧ дькари щабед дәрһәԛа ԝан һинкьрьнед Кʹьтеба Пироз һазьр ки, шьровәкьрьна кʹижана һеса нинә (1 Корьнтʹи 2:10). Гәло чьрʹа? Чьмки гәләк кәс бона абзасед ӧса дәсте хԝә бьльнд накьн. Ле һәрге тӧ һәр тьшти ӧса дьки, чаԝа кӧ ширәт һатьнә дайине у диса жи сәр чәнд щьвата мәщал накʹәвә дәсте тә, кӧ щаба хԝә бьди, тӧ чь дькари бьки? Пешийа щьвате, тӧ дькари һәрʹи щәм бьре кӧ щьвате дәрбаз дькә у жерʹа бежи ԝәки тӧ дьхԝази щаба кʹижан пьрсе бьди.

11. Филипи 2:4 чьда мә һелан дькә?

¹¹ Бьхунә Филипи 2:4. Жь бина бәр Хԝәде, Паԝлосе шанди хушк-бьра һелан дькьр, ԝәки әԝана дьһа зедә бькʹәвьнә һʹәйра мәрьвед дьн. Әм ча дькарьн ве ширәте щьватеда бьдьнә хәбате? Әм гәрәке бир нәкьн, ԝәки кәсед дьн жи дьхԝазьн щаба хԝә бьдьн.

12. Әм чаԝа дькарьн щьватеда һәвдӧ һелан кьн? (Бьньһерʹә ӧса жи шькьл.)

¹² Ԝәрә әм дәрһәԛа ве мәсәле бьфькьрьн. Бәʹса хәбәре тӧ тʹәви һәваләки хԝә хәбәр дьди. Гәло тʹәне тӧйе хәбәр ди у ԛә мәщале нәди ԝи кӧ әԝ жи хәбәр дә? Бешьк тӧйе бьхԝази кӧ әԝ жи фькьред хԝә бежә. Һәма бь ви щурʹәйи, щьватеда жи, әм дьхԝазьн мәщале бьдьнә кәсед дьн жи кӧ щабед хԝә бьдьн. Гәло мәщала һәрә баш кʹижан ә кӧ әм щьватеда һәвдӧ һелан кьн? Әм дькарьн мәщале бьдьн хушк-бьра, кӧ әԝана пе щабед хԝә баԝәрийа хԝә әʹйан кьн (1 Корьнтʹи 10:24). Ԝәрә әм бьньһерʹьн, кӧ әм чаԝа дькарьн ве йәке бькьн.

13. Әм ча дькарьн мәщале бьдьн кәсед дьн жи кӧ щаба хԝә бьдьн?

¹³ Бьра щабед мә кьн бьн. Ӧса ԝе дьһа зедә ԝәʹдә бьминә ԝәки кәсед дьн жи щаба хԝә бьдьн. Рʹуспи у мьзгинванед щерʹьбанди дькарьн ве йәкеда бьбьнә мәсәләкә баш. Гава әм щабәкә кьн дьдьн, ԝәрә әм гәләк фькьра нәбежьн. Һәрге әм һʹәму фькьред абзаседа бежьн, бона кәсед дьн ԝе мәщал нәминә кӧ щаба хԝә бьдьн. Мәсәлә, абзасәкеда дӧ фькьр һәнә, ԝи чахи бьра щабед мә кьн бьн у әм һʹәму фькьра нәбежьн. Һәрге тӧ бона ве абзасе щаба пешьн бьди, фәсал бә ԝәки фькьра дӧда нәбежи.

14. Чь дькарә али мә бькә, ԝәки әм сафи кьн һәла чәнд щара дәсте хԝә бьльнд кьн? (Бьньһерʹә ӧса жи шькьл.)

¹⁴ Гава тӧ сафи дьки, ԝәки чәнд щаба бьди, һьнәки хԝәгьрти бә. Һәрге әм дәсте хԝә гәләк щар бьльнд кьн, бьре кӧ щьвате дәрбаз дькә, дькарә мәщбур бә кӧ жь мә бьпьрсә у жь бо ве йәке дьԛәԝьмә мәщал нәкʹәвә дәсте кәсед дьн, ԝәки щаба хԝә бьдьн. Әв йәк дькарә бьбә мәʹни кӧ кәсед дьн дәсте хԝә бьльнд нәкьн (Ԝаиз 3:7).

15. (а) Һәрге бьре кӧ щьвате дәрбаз дькә жь мә пьрс нәкә, чьрʹа әм гәрәке нәхәйидьн? (б) Сәва кӧ һәр кәс щаба хԝә бьдә, бьре кӧ щьвате дәрбаз дькә, гәрәке чь бькә? (Бьньһерʹә чаргошә «Һәрге Тӧ Щьвине Дәрбаз Дьки».)

¹⁵ Гава ԝәʹде леколине гәләк хушк-бьра дәсте хԝә бьльнд бькьн, дьбәкә әм нькарьбьн һаԛас щар щаба хԝә бьдьн чьԛас дьхԝазьн. Щарна жи, дьбәкә бьре кӧ щьвате дәрбаз дькә, ԛә нькарьбә һәма щарәке мә пьрискә. Ԝи чахи дьбәкә әм бьхәйидьн, ле әм гәрәке сәр хԝә бьхәбьтьн, ԝәки хәйде жь дьле хԝә дәрхьн (Ԝаиз 7:9).

16. Әм чаԝа дькарьн хушк-бьред кӧ щаба хԝә дьдьн, ԛәԝи кьн?

¹⁶ Һәрге найе стандьне ԝәки тӧ гәләк щар щаба хԝә бьди, рʹьнд гӧһ бьдә щабед кәсед дьн у паши щьвине пәсьне ԝан бьдә. Чаԝа кӧ щабед тә дькарьн хушк-бьра ԛәԝи кьн, ӧса жи гава тӧ пʹайе ԝан бьди, тӧйе дьле ԝан ша ки у ԝана ԛәԝи ки (Мәтʹәлок 10:21). Гава әм пʹайе кәсед дьн дьдьн, әв йәк һелане дьдә ԝан.

МӘЩАЛЕД ДЬН КӦ ЧАԜА ҺӘВДӦ ҺЕЛАН КЬН

17. (а) Де-бав чаԝа дькарьн али зарʹед хԝә бькьн, ԝәки сәр щьвате щаба хԝә бьдьн? (б) Ль гора видеойе, чар гавед кӧ дькарьн али зарʹед ԝә бькьн, чь нә? (Ӧса жи бьньһерʹә спартьн.)

¹⁷ Мәщалед дьн жи һәнә кӧ әм щьватеда һәвдӧ ԛәԝи кьн. Мәсәлә, де-бав дькарьн али зарʹед хԝә бькьн, кӧ әԝана ль гора салед хԝә, щабед хԝә һазьр бькьн (Мәтта 21:16). Щарна тʹемед гәләк фәрз сәр щьвате тенә леколинкьрьне, мәсәлә проблемед зәԝащеда йан пьрсед нав-намусийева гьредайи. Ле диса жи зарʹа ԝә дькарә сәр һьнә пьрса щаба хԝә бьдә. Ӧса жи зарʹед хԝәрʹа шьровәкьн, кӧ гава әԝана дәстед хԝә бьльнд бькьн, дьбәкә бьра щара жь ԝан пьрс нәкә. Әв йәк ԝе али ԝан бькә, кӧ нәхәйидьн (1 Тимотʹейо 6:18).d

18. Гава әм щабәке дьдьн, әм чаԝа дькарьн дина мәрьва нәкʹьшиньн сәр хԝә? (Мәтʹәлок 27:2)

¹⁸ Әм гьшк дькарьн щабед кӧ рʹумәте дьдьн Йаһоԝа у дьле хушк-бьра ԛәԝи дькьн, һазьр бькьн (Мәтʹәлок 25:11). Щарна әм дькарьн бәʹса дәрәща хԝә бькьн, ле гәрәке әм гәләки дина мәрьва нәкʹьшиньн сәр хԝә (Бьхунә Мәтʹәлок 27:2; 2 Корьнтʹи 10:18). Дәԝса ве йәке, әм гәрәке дина мәрьва бькʹьшиньн сәр Йаһоԝа, Хәбәра ԝи у щьмәʹта ԝи (Әʹйанти 4:11). Ле һәрге пьрса абзасе пьрсәкә шәхси бә, әм дькарьн бь мьлукти щаба хԝә бьдьн. Мәсәлә, ԝәрә әм дина хԝә бьдьнә абзаса пашьн.

19. (а) Һәрге әм бькʹәвьн һʹәйра кәсед дьн, әв йәк ԝе чь кʹаре бинә? (Рʹомайи 1:11, 12) (б) Тӧ чьрʹа һʹьз дьки сәр щьвата щаба хԝә бьди?

¹⁹ Бона ве йәке кӧ әм чаԝа дькарьн щабед хԝә бьдьн, ԛәйдә нәһатьнә дайине. Ле гәрәке әм пе щабед хԝә һәвдӧ ԛәԝи кьн. Бона ве йәке, әм дькарьн дьһа зедә щаба бьдьн. Ӧса жи әм гәләк рʹази нә, кӧ мәрʹа мәщал те дайине, ԝәки щаба хԝә бьдьн. Әв йәк те һʹәсабе кӧ гава мәщал дькʹәвә дәсте кәсед дьн ԝәки щаба хԝә бьдьн, әм ша дьбьн. Гава щьватеда әм дькʹәвьн һʹәйра кәсед дьн нә кӧ һʹәйра хԝә, ӧса әм хушк-бьра һелан дькьн у ԛәԝи дькьн (Бьхунә Рʹомайи 1:11, 12).