Һәртʹьм Пәй Рʹебәрийа Йаһоԝа Һәрʹә

1. Чьма фәрз ә кӧ әм пәй рʹебәрийа Йаһоԝа һәрʹьн? Мәсәле бинә.

БЬДӘ бәр чʹәʹве хԝә кӧ тӧ нав мешәда йи, у тә рʹийа хԝә шаш кьрийә. Дәр-доре тә гәләк тьштед хоф һәнә, мәсәлә һʹьрчʹ, гӧр, мәʹред бь жәʹр у кәндалед бьльнд. Чьԛас ԝе баш буйа һәрге рʹебәрәки щерʹьбанди, йе кӧ занә кʹидәре хоф һәйә, бал тә буйа, у али тә бькьра кӧ нәкʹәтайи ԛәзийе. Иро әв дьнйа мина ви мешәйи йә. Теда гәләк тʹәльк һәнә, илаһи тʹәлькед ӧса кӧ дькарьн достийа мә тʹәви Хԝәде хьраб кьн. Ле щәм мә Рʹебәрәки беԛьсур һәйә: Йаһоԝа. Әԝ мә жь тʹәлька дур дьгьрә у сәр рʹийа кӧ дьчә бәрбь жийина һʹәта-һʹәтайе, рʹебәрийа мә дькә.

2. Йаһоԝа чаԝа рʹебәрийе мә дькә?

² Гәло Йаһоԝа чаԝа рʹебәрийе мә дькә? Йа пешьн, бь сайа Хәбәра хԝә, Кʹьтеба Пироз. Хенщи ве йәке, әԝ ӧса жи бь сайа мәрьвед кӧ әԝ кʹьфш дькә, рʹебәрийе мә дькә. Мәсәлә, әԝ бь сайа «хӧламе амьн у сәрԝахт», хԝарьна рʹӧһʹани дьдә мә, ԝәки әм бькарьбьн сафикьрьнед баш бькьн (Мәтта 24:45). Йаһоԝа бь сайа меред дьнә кʹьфшкьри жи рʹебәрийа мә дькә. Мәсәлә, бәрпьрсийаред мьһале у рʹуспийед щьвате һелане дьдьнә мә у мә һин дькьн, ԝәки әм бькарьбьн ԝәʹде чәтьнайа Йаһоԝарʹа амьн бьминьн. Әм бона рʹебәрийа кӧ ван рʹожед ахьрийеда дьстиньн, гәләк рʹази нә! Бь сайа ве рʹебәрийе, әм дькарьн сәр рʹийа жийине бьминьн у ԛәбулкьрьна Йаһоԝа ӧнда нәкьн.

3. Ве готареда әме чь шеԝьр кьн?

³ Диса жи, дьбәкә щарна мәрʹа чәтьн бә, ԝәки пәй рʹебәрийа Йаһоԝа һәрʹьн, илаһи гава әв рʹебәри пе мәрьвед гӧнәкʹар дьгьһижә мә. Гәло чьрʹа? Дьбәкә ширәтед ԝан нә ль гора дьле мә бьн. Йан жи, әм дьбәкә дьфькьрьн, ԝәки рʹебәрийа кӧ әм дьстиньн нәаԛьлайи йә у жь Йаһоԝа нинә. Һьнге гәрәке әм баԝәр бьн кӧ Йаһоԝа рʹебәрийе щьмәʹта хԝә дькә, у һәрге әм пәй рʹебәрийа ԝи һәрʹьн, әме тʹьме кʹәрәма бьстиньн. Сәва кӧ итʹбарийа мә һьндава рʹебәрийа Йаһоԝа дьһа ԛәԝи бә, әме ве готареда бьвиньн кӧ Йаһоԝа (1) ԝәʹде бәре чаԝа рʹебәри хьзмәткʹаред хԝә дькьр, (2) иро чаԝа рʹебәрийе мә дькә, у (3) әм чь кʹаре дьстиньн гава пәй рʹебәрийа ԝи дьчьн.

ЙАҺОԜА ЧАԜА РʹЕБӘРИ ЩЬМӘʹТА ИСРАЕЛЕ ДЬКЬР?

4-5. Йаһоԝа чаԝа нишан кьр кӧ пе Муса рʹебәрийе щьмәʹта Исраеле дькә? (Бьньһерʹә шькьле сәр рʹуйе пешьн.)

⁴ Йаһоԝа хьзмәткʹаре хԝә Муса кʹьфш кьрьбу, ԝәки Исраелийа жь ԝәлате Мьсьре дәрхә. Сәрда жи, Йаһоԝа әшкәрә Исраелийарʹа избат дькьр, кӧ әԝ бь сайа Муса рʹебәрийе ԝан дькә. Мәсәлә, әԝи рʹож пе «стунәкә әʹԝр» у шәв пе «стунәкә агьр» рʹебәри ԝан дькьр (Дәркʹәтьн 13:21). Муса пәй стуне дьчу, кʹижане әԝ у Исраелийа дьбьрьнә бәрбь Бәʹра Сор. Сәр рʹе, гава щьмәʹт ида бәр бәʹре бу у ордийа Мьсьре пәй ԝан кʹәтьбу, әԝана тьрсийан кӧ кʹәтьнә тʹәльке. Әԝана дьфькьрин ԝәки Муса шаш бу, кӧ әԝана анинә бәр Бәʹра Сор. Ле әв йәк шаши нибу! Йаһоԝа бь нет әԝана пе Муса анибу ԝедәре (Дәркʹәтьн 14:2). Паше, Хԝәде әԝана бь кʹәрәмәтәкә мәзьн жь дәсте дьжмьна хьлаз кьрьн (Дәркʹәтьн 14:26-28).

⁵ Паши 40 сала жи, Муса пәй стуна әʹԝр дьчу, ԝәки бәрʹийеда рʹебәрийе щьмәʹта Хԝәде бькәa. Ԝәхтәке, Йаһоԝа стун сәр коне Муса дани, у һәр кәси дькарьбу ԝе бьвинә (Дәркʹәтьн 33:7, 9, 10). Йаһоԝа жь стуне Мусарʹа хәбәр дьда, у әԝи жи гьли у рʹебәрийед Хԝәде щьмәʹтерʹа дьготьн (Зәбур 99:7). Бәле, гәләк избаткьрьн һәбун кӧ Йаһоԝа пе Муса рʹебәри Исраелийа дькьр.

6. Һʹәчʹи зәʹф Исраелийа һьндава рʹебәрийа Йаһоԝа хԝә ча дьданә кʹьфше? (Жьмар 14:2, 10, 11)

⁶ Сәд һʹәйф, кӧ һʹәчʹи зәʹф Исраелийа инкʹар дькьрьн әв избати, йед кӧ әшкәрә дькьрьн, ԝәки Йаһоԝа Муса кʹьфш кьрьбу у пе ԝи ԝанрʹа хәбәр дьда (Бьхунә Жьмар 14:2, 10, 11). Диса у диса, ԝана рʹебәри у рола Муса ԛәбул нәдькьр. Ләма жи ахьрийеда Йаһоԝа изьн нәда ви ньсьли, ԝәки бькʹәвьнә Әʹрде Создайи (Жьмар 14:30).

7. Һьнә кәсед кӧ рʹебәрийа Йаһоԝа ԛәбул дькьрьн, кʹи бун? (Жьмар 14:24) (Бьньһерʹә ӧса жи шькьл.)

⁷ Ле һьнә Исраелийа рʹебәрийа Йаһоԝа ԛәбул дькьрьн. Мәсәлә, Йаһоԝа гот: «Кʹаләб . . . тʹам гӧрʹа мьн кьр» (Бьхунә Жьмар 14:24). Ләма жи Хԝәде әԝ хәлат кьр. Сәрда жи, Хԝәде әʹрде кӧ Кʹаләб ль Кәнанеда хԝәст, да ԝи (Йешу 14:12-14). Зарʹед Исраелийед кӧ бәрʹийеда мьрьбун, ԝана жи рʹебәрийа Йаһоԝа ԛәбул дькьр. Гава Йешу дәԝса Муса бу рʹебәре Исраелийа, ԝана тʹәмамийа әʹмьре ԝида ԛәдьре ԝи дьгьрт (Йешу 4:14). Ахьрийеда, Йаһоԝа әԝ кʹәрәм кьрьн у бьрьн Әʹрде Создайи (Йешу 21:43, 44).

8. Ԝәʹде пʹадшада, Йаһоԝа чаԝа рʹебәри щьмәʹта хԝә дькьр? (Бьньһерʹә ӧса жи шькьл.)

⁸ Гәләк сал шунда, Йаһоԝа һʹакьм кʹьфш кьрьн, ԝәки рʹебәрийе щьмәʹта ԝи бькьн. Паше, рʹожед пʹадшада, Йаһоԝа пʹехәмбәр кʹьфш кьрьн, ԝәки рʹебәрийе щьмәʹта ԝи бькьн. Пʹадшед амьн гӧһ дьдан ширәтед пʹехәмбәра. Мәсәлә, гава Даԝьд Пʹадша жь алийе Натʹан пʹехәмбәрда һатә ширәткьрьне, әԝи ширәта пʹехәмбәр бь мьлукти ԛәбул кьр (2 Самуйел 12:7, 13; 1 Дирок 17:3, 4). Йәһошәфат Пʹадша хԝә дьспартә рʹебәрийа Йаһазиел пʹехәмбәр, у әԝи щьмәʹта Щьһудайерʹа гот, ԝәки итʹбарийа хԝә пʹехәмбәред Хԝәде биньн (2 Дирок 20:14, 15, 20). Гава Һьзԛийа Пʹадша кʹәтә бәлайе, әԝи жь Ишайа пʹехәмбәр аликʹари хԝәст (Ишайа 37:1-6). Чахе пʹадша пәй рʹебәрийа Йаһоԝа дьчун, ԝана кʹәрәм дьстанд, у щьмәʹт жи хԝәйкьри бу (2 Дирок 20:29, 30; 32:22). Гьшкарʹа әшкәрә бу кӧ Йаһоԝа бь сайа пʹехәмбәред хԝә рʹебәрийе щьмәʹта хԝә дькә. Ле диса жи, һʹәчʹи зәʹф пʹадша у ӧса жи гәләк Исраелийа пʹехәмбәред Йаһоԝа инкʹар дькьрьн (Йерәмйа 35:12-15).

ЙАҺОԜА ЧАԜА РʹЕБӘРИ МӘСИҺИЙЕД ПЕШЬН ДЬКЬР?

9. Ԛьрʹна йәкеда, Йаһоԝа бь сайа кʹе рʹебәри Мәсиһийа дькьр? (Бьньһерʹә ӧса жи шькьл.)

⁹ Ԛьрʹна йәкеда Д.М., Йаһоԝа щьвата Мәсиһийа саз кьр. Гәло әԝи чаԝа рʹебәри ԝан дькьр? Әԝи Иса Мәсиһ ча сәре щьвате кʹьфш кьр (Әфәси 5:23). Ле Иса рʹастә-рʹаст рʹебәри һәр шагьртәки нәдькьр. Дәԝсе, әԝи бь сайа шандийа у рʹуспийед ль Оршәлиме рʹебәрийа ԝан дькьр (Кʹаред Шандийа 15:1, 2). Ӧса жи, рʹуспийед дьн дьһатьнә кʹьфшкьрьне, ԝәки рʹебәрийе щьвата бькьн (1 Тʹесалоники 5:12; Тито 1:5).

10. (а) Ԛьрʹна йәкеда, һʹәчʹи зәʹф Мәсиһийа сәр рʹебәрийа кӧ ԝана дьстанд чаԝа дьньһерʹин? (Кʹаред Шандийа 15:30, 31) (б) Ԝәʹде бәре, һьнәка чьрʹа ԛәдьре кʹьфшкьрийед Йаһоԝа нәдьгьртьн? (Бьньһерʹә чаргошә бь наве «Һьнәк Чьрʹа Избатийед Әшкәрә Инкʹар Дькьн?»)

¹⁰ Ԛьрʹна йәкеда, һʹәчʹи зәʹф Мәсиһийа рʹебәрийа кӧ ԝан дьстанд, бь шабуне ԛәбул дькьрьн. Кʹьтеба Пироз дьбежә, ԝәки әԝана «пʹьрʹ ша бун» бона «дьлдайине» кӧ бьред щабдар дьданә ԝан (Бьхунә Кʹаред Шандийа 15:30, 31). Гәло Йаһоԝа иро чаԝа рʹебәрийа щьмәʹта хԝә дькә?

ЙАҺОԜА ЧАԜА РʹЕБӘРИЙЕ МӘ ДЬКӘ?

11. Йаһоԝа чаԝа һена мәда рʹебәрийе хьзмәткʹаред хԝә дькә? Мәсәле бинә.

¹¹ Йаһоԝа иро бь сайа Кʹьтеба Пироз у сәре щьвате, Кӧрʹе хԝә Иса, рʹебәрийе щьмәʹта хԝә дькә. Гәло избати һәнә кӧ Йаһоԝа иро бона рʹебәрийе щьмәʹта хԝә бькә, ӧса жи мәрьва дьдә хәбате? Бәле. Ԝәрә дина хԝә бьдьне кӧ жь сала 1870 у паше чь ԛәԝьми. Чарлз Теиз Рассел у һәвалед ԝи фәʹм кьрьн, кӧ бона сазкьрьна Пʹадшатийа Хԝәде, сала 1914 ԝе саләкә фәрз у мәхсус бә (Данийел 4:25, 26). Әԝана сәр һʹиме Кʹьтеба Пироз һатьбун сәр ве фькьре. Әшкәрә йә кӧ Йаһоԝа рʹебәри лекʹолина ԝан дькьр, чьмки сала 1914-да, тьштед кӧ дьнйайеда ԛәԝьмин избат кьрьн, ԝәки Пʹадшатийа Хԝәде ида һатийә сазкьрьне у сәрԝертийе дькә. Шәрʹе Һʹәмдьнйайейә I дәстпебу. Паше, нәхԝәши бәла бун, гәләк щийада әʹрдһʹәж у хәлайи дьбун (Луԛа 21:10, 11). Бәле, Йаһоԝа бь сайа ԝан лекʹолинкʹаред Кʹьтеба Пироз, али щьмәʹта хԝә дькьр, ԝәки әԝана Кʹьтеба Пироз фәʹм кьн.

12-13. Ԝәʹде Шәрʹе Һʹәмдьнйайейә II, бона зедәкьрьна бәлакьрьна мьзгинийе чь һатә кьрьне?

¹² Ӧса жи, ԝәрә әм бьдьнә бәр чʹәʹве хԝә, кӧ ԝәʹде Шәрʹе Һʹәмдьнйайейә II чь ԛәԝьми. Бьред щабдар жь офиса сәрәкә готьнед Әʹйанти 17:8 лекʹолин кьрьн. Жь ве лекʹолине, ԝана фәʹм кьр кӧ паши ви шәрʹи, нә кӧ ԝе Һармәгәдон бе, ле сәр ԝәхтәке ԝе әʹдьлайи һәбә у мәщал вәбә, ԝәки мьзгини һе зедә бе бәлакьрьне. Ләма жи чахе шәрʹ һе дьчу, тʹәшкиләта Йаһоԝа Мәкʹтәба Гиләде саз кьр, ԝәки мисйонер бона бәлакьрьна мьзгинийе бенә һинкьрьне у шандьне ль щурʹә-щурʹә ԝәлата. Һәла һе шәрʹ хьлаз нәбьбу жи, мисйонер һатьнә кʹьфшкьрьне. Ӧса жи, «хӧламе амьн» Курса Хьзмәтийа Теократикиb саз кьр, ԝәки һʹәму хушк-бьра бона бәлакьрьна мьзгинийе һин бьн. Бь ван тьшта, хьзмәткʹаред Хԝәде бона шьхӧле кӧ пешийа ԝан бу, дьһатьнә һазьркьрьне.

¹³ Әшкәрә йә кӧ ԝан рʹожед чәтьнда, Йаһоԝа рʹебәри щьмәʹта хԝә дькьр. Жь хьлазийа Шәрʹе Һʹәмдьнйайейә II у паше, Шәʹдед Йаһоԝа аза мьзгини гәләк ԝәлатада бәла дькьрьн. Ахьрийеда, шьхӧле бәлакьрьна мьзгинийе пешда чу, у гәләк мәрьв Йаһоԝа нас дькьн.

14. Әм чьма дькарьн итʹбарийа хԝә рʹебәрийа тʹәшкиләта Йаһоԝа у рʹуспийед кʹьфшкьри биньн? (Әʹйанти 2:1) (Бьньһерʹә ӧса жи шькьл.)

¹⁴ Иро әндәмед Кʹома Рʹебәрийе хԝә дьсперьн рʹебәрийа Иса Мәсиһ. Әԝана хирәт дькьн ԝәки әв рʹебәрийед кӧ әԝана дьдьнә хушк-бьра, ль гора хԝәстьна Хԝәде бьн. Бь сайа бәрпьрсийаред мьһале у рʹуспийа, әԝана рʹебәрийе щьвата дькьнc. Рʹуспийед бь рʹӧһʹ кʹьфшкьри, дәсте Исайи рʹастеда ньн (Бьхунә Әʹйанти 2:1). Әв рʹуспи һәмьки гӧнәкʹар ьн у щарна шашийа дькьн. Муса, Йешу у шандийед Иса жи щарна шаши дькьрьн (Жьмар 20:12; Йешу 9:14, 15; Рʹомайи 3:23). Ле әʹйан ә кӧ Иса ньһа рʹебәрийе «хӧламе амьн» у рʹуспийед кʹьфшкьри дькә, у әԝ ԝе «һәр рʹож, һʹәта рʹожед хьлазийейә ве дьнйайе» ӧса бькә (Мәтта 28:20). Ләма жи мәʹнийед баш һәнә кӧ әм итʹбарийа хԝә ве рʹебәрийе биньн, кӧ Иса бь сайа бьред кʹьфшкьри дьдә мә.

ӘМ КʹАРЕ ДЬСТИНЬН ГАВА ПӘЙ РʹЕБӘРИЙА ЙАҺОԜА ДЬЧЬН

15-16. Тӧ жь сәрһатийед ԝан хушк-бьред кӧ гӧһ данә рʹебәрийа Йаһоԝа, чь һин дьби?

¹⁵ Гава әм пәй рʹебәрийа Йаһоԝа дьчьн, әв йәк ирода мәрʹа кʹәрәма тинә. Мәсәлә, «хӧламе амьн» мәрʹа дьбежә, ԝәки әм бь жийинәкә сьвьк бьжин (Ибрани 13:5). Чахе бьре мә Енди у жьна ԝи Робине гӧһ данә ве ширәте, һьнге ԝана ида дькарьбу сәр проектед авакьрьнейә тʹәшкиләте бьхәбьтьн. Робин дьбежә: «Әм малед гәләк бьчʹукда дьман. Һьнә малада, йед кӧ әм теда дьман, щийе чекьрьна хԝарьне жи тʹӧнә бу. Сәрда жи әз мәщбур бум, ԝәки гәләк камера у линзед бона фотокʹьшандьне, йед кӧ мьн дьда хәбате, бьфьрошьм. Гава мьн әԝ дьфьротьн, чʹәʹвед мьн тʹьжә һесьр дьбун, чьмки әз фотокʹьшандьне гәләк һʹәз дькьм. Ле мина Сәраһе, мьн дьхԝәст, нә кӧ пьшт хԝә бьньһерʹьм, ле пешийа хԝә» (Ибрани 11:15). Гәло әв жьн-мер жь бо ве сафикьрьна хԝә чь кʹар стандьн? Робин дьбежә: «Әм гәләк бәхтәԝар ьн, чьмки әм заньн ԝәки дәсте мәда чь һәйә жи, әм һәр тьшти дьдьнә Йаһоԝа. Гава әм сәр проектед тʹәшкиләте дьхәбьтьн, әм дьдьн бәр чʹәʹве хԝә кӧ жийина дьнйа тʹәзәда ԝе ча бә». Енди дьбежә: «Әм ша нә, чьмки әм һʹәму ԝәхт у ԛәԝата хԝә бона шьхӧле Йаһоԝа хәрщ дькьн».

¹⁶ Әм диса чь кʹаре дьстиньн, гава пәй рʹебәрийа Йаһоԝа дьчьн? Дина хԝә бьдьнә сәрһатийа хушкәкә бь наве Марсйа. Паши хьлазкьрьна мәкʹтәбе, Марсйайе ль гора ширәта кӧ әԝе стандьбу, дьхԝәст бьбә пешәнг (Мәтта 6:33; Рʹомайи 12:11). Әԝ дьбежә: «Университетәке әз тʹәглиф кьрьм, ԝәки чар сала бепʹәрә һин бьм. Ле мьн дьхԝәст Йаһоԝарʹа дьһа зедә хьзмәт кьм. Ләма жи мьн сафи кьр пʹешәки һин бьм, ԝәки хԝәрʹа хәбатәкә ӧса бьвиньм, кӧ бькарьбьн ча пешәнг хьзмәт кьм. Әв йәк бь рʹасти жи сафикьрьнәкә гәләк баш бу. Ньһа әз пешәнга һәртʹьм ьм, у хәбата мьн мәщале дьдә мьн, ԝәки аликʹарийе бьдьмә Бәйтʹәле, у әз гәләк кʹәрәмед дьн жи дьстиньм».

17. Һәрге әм гӧһ бьдьн рʹебәрийа Йаһоԝа, әме диса чь кʹаре бьстиньн? (Ишайа 48:17, 18)

¹⁷ Щарна мәрʹа ширәт те дайине, ԝәки әм нәкʹәвьнә пәй пʹәра, у һаш жь хԝә һәбьн кӧ ԛанунед Хԝәде нәтʹәрʹьбиньн. Ви алида жи, рʹебәрийа Йаһоԝа кʹаре дьдә мә. Гава әм гӧһ дьдьнә рʹебәрийа ԝи, исафа мә тʹәмьз дьминә у әм хԝә жь проблема хԝәй дькьн (1 Тимотʹейо 6:9, 10). Бь ви щурʹәйи, әм дькарьн бь дьл у щан Йаһоԝа бьһʹәбиньн, у әԝ йәк мәрʹа шабун, әʹдьлайийе у дьлрʹьһʹәтийе тинә (Бьхунә Ишайа 48:17, 18).

18. Тӧ чьма дьхԝази һәртʹьм пәй рʹебәрийа Йаһоԝа һәрʹи?

¹⁸ Ԝәʹде тәнгасийа мәзьн у ԝәʹде Һʹәзарсалийа Пʹадшатийе жи, Йаһоԝа ԝе бе шьк бь сайа мәрьва рʹебәрийе мә бькә (Зәбур 45:16). Һәрге рʹебәри нә ль гора дьле мә бә, гәло әме диса жи гӧһ бьдьне? Щаба ве пьрсе ве йәкева гьредайи йә, һәла иро әм ча пәй рʹебәрийа Йаһоԝа дьчьн. Ләма жи ԝәрә әм һәр гав пәй рʹебәрийа Йаһоԝа һәрʹьн у гӧһ бьдьнә кәсед кӧ һатьнә кʹьфшкьрьне, ԝәки мьԛати мә бьн (Ишайа 32:1, 2; Ибрани 13:17). Ԝәрә әм һәртʹьм итʹбарийа хԝә Рʹебәре хԝә Йаһоԝа биньн. Әԝ мә жь һәр тьште кӧ дькарә достийа мә тʹәви ԝи хьраб кә, дур дьгьрә, у мә бәрбь жийина һʹәта-һʹәтайе дьбә.