Бәре Гӧнә сәр Һʹиме Чь Дьһатьнә Бахшандьне?

Гӧнед мә тʹәне сәр һʹиме ԛӧрбана Иса Мәсиһ дькарьн бенә бахьшандьне (Әфәси 1:7). Ле Кʹьтеба Пироз дьбежә, ԝәки Хԝәде «бь сәбьра хԝә гӧһ нәда ԝан гӧнед кӧ пешда һатьбунә кьрьне», демәк пешийа кӧ Иса әʹмьре хԝә ча ԛӧрбан бәрва бьда, Хԝәде ида дьбахшандә мәрьва (Рʹомайи 3:25). Гәло Йаһоԝа Хԝәде, йе кӧ тʹьме һәԛ ә, ча ӧса кьр?

Чахе Йаһоԝа соз да, ԝәки зӧрʹәт ԝе бе у мәрьвед баԝәрмәнд хьлаз кә, Йаһоԝа һʹәсаб дькьр ԝәки ԛӧрбана Иса ча бежи ида һатьбу дайине (Дәстпебун 3:15; 22:18). Хԝәде баԝәр бу ԝәки Кӧрʹе ԝи ԝе ԝәхта кʹьфшкьрида һазьр бә, кӧ әʹмьре хԝә бәрва бьдә (Галати 4:4; Ибрани 10:7-10). Гава Иса ча ԝәкʹиле Хԝәде һатә сәр әʹрде, пешийа кӧ әԝи әʹмьре хԝә бәрва бьда, әԝи ида дькарьбу гӧна бьбахшинә. Әԝи заньбу ԝәки ԛӧрбана кӧ әԝе бьдә, дькарә гӧнед ԝан мәрьва дадә, йед кӧ баԝәрийа хԝә ԝи тиньн (Мәтта 9:2-6).