Кʹьрʹин «Пʹешкʹеша Кʹамьл» жь Хwәде йә

1. Кʹьрʹин чь кʹәрәма дькарә мәрʹа бинә?

КʹЬРʹИН кö Иса Мәсиһ да, гәләк кʹәрәма тинә. Бь сайа кʹьрʹине һʹәму зарʹед Адәм йед кö рʹастийе һʹьз дькьн, ахьрийеда wе бьбьнә нәфәред малбәта Хwәде у жийина һʹәта-һʹәтайе бьстиньн. Ле хенщи wан кʹәрәма кʹьрʹин һе зедә тьшт дькә. Әw йәк кö Иса мьр у рʹастийа Йаһоwа избат кьр, пьрсәкә гәләк фәрзва гьредайи йә кʹижан бона һʹәмуйа йә, һьн сәр әʹзмана һьн сәр әʹрде (Ибрн. 1:8, 9).

2. а) Иса дöайе хwәда дәрһәqа кʹижан тьштед гәләк фәрз гот? (Бьньһерʹә шькле әʹwльн.) б) Ве готареда әме дәрһәqа чь шеwьр кьн?

² Иса wәкә дö сал пешийа мьрьна хwә, шагьртед хwә һин кьр кö öса дöа бькьн: «Баве мәйи әʹзмана! Наве тә пироз бә, Пʹадшатийа тә бе, әʹмьре тә бә, чаwа ль әʹзмен, öса жи ль сәр әʹрде» (Мәт. 6:9, 10). Сәва кö һе зедә кʹьрʹине бьшекьриньн, wәрә шеwьр кьн кö әw ча наве Хwәде пироз дькә, кʹәрәма тинә бь сайа Пʹадшатийа Хwәде у рʹе вәдькә wәки qьрара Хwәде бе сери.

«НАВЕ ТӘ ПИРОЗ БӘ»

3. Наве Йаһоwа дәрһәqа wи чь әʹйан дькә, у ча Шәйтʹан наве Хwәдейи пироз беһöрмәт кьр?

³ Иса дöайе хwәда пешийе гот wәки наве Хwәде пироз бә. Наве Йаһоwа әʹйан дькә, wәки Әw йәки ча һьмзор у пироз ә. Дöайе хwәйә дьнда, Иса wи нав кьр «Баве Пироз» (Йуһʹн. 17:11). Бәле, Йаһоwа пироз ә у ләма һʹәму принсип у qанунед wи пироз ьн. Ле Шәйтʹан Әдәнеда шәрʹ авитә Хwәде, wәки изьна wи тʹöнә мәрьварʹа qануна дайнә. Әw дәрәwәкә мәзьн бу, у Шәйтʹан бь бöхдан наве Хwәде беһöрмәт кьр (Дәстп. 3:1-5).

4. Иса ча наве Хwәде пироз дькьр?

⁴ Ле Иса бь дьл наве Хwәде һʹьз дькьр (Йуһʹн. 17:25, 26). Әwи һʹәму тьшт дькьр сәва наве Хwәде пироз кә. (Бьхунә Зәбур 40:8-10.) Иса пе жийина хwәйә сәр әʹрде избат кьр, wәки һʹәму qанунед Йаһоwа рʹаст ьн у бона кʹара мә нә. Чахе Шәйтʹан дьхwәст Иса бьшкенә пе мьрьна бь чәрчьрандьне, Иса һәла һе wи чахи жи бь тʹәмами амьн ма Баве хwәйи әʹзманарʹа. Бь амьнийа хwә Иса избат кьр, wәки мәрьве беqьсур дькарә һʹәму тьштида гöрʹа Хwәде бькә.

5. Әм ча дькарьн наве Хwәде пироз кьн?

⁵ Ле әм ча дькарьн нишан кьн, wәки наве Хwәде һʹьз дькьн? Пе кьред хwә. Йаһоwа жь мә дәʹwа дькә кö әм пироз бьн. (Бьхунә 1 Пәтрус 1:15, 16.) Әw те һʹәсабе, wәки әм гәрәке тʹәне Йаһоwа бьһʹәбиньн у бь тʹәмамийа дьле хwә гöрʹа wи бькьн. Һәла һе wәʹде пәйкʹәтьна жи, әм гәрәке һʹәму тьшти бькьн сәва qанун у принсипед wи биньн сери. Чахе әм кьред рʹаст дькьн, әм наве Йаһоwа рʹумәт дькьн (Мәт. 5:14-16). Чаwа щьмәʹта пироз, әм пе жийина хwә избат дькьн wәки qанунед Йаһоwа рʹаст у баш ьн, ле готьнед Шәйтʹан дәрәw ьн. Әм гьшк гöнәкʹар ьн у ләма жи шашийа дькьн. Ле әм бь дьл гöнед хwә тиньн рʹуйе хwә у пьшта хwә дьдьнә wан кьра, кʹижан кö наве Хwәде беһöрмәт дькьн (Зәб. 79:9).

6. Рʹаст ә әм гöнәкʹар ьн, ле чьрʹа Йаһоwа дькарә мә рʹаст һʹәсаб бькә?

⁶ Һәрге әм баwәрийа хwә qöрбана Иса тиньн, Йаһоwа гöнед мә дьбахшинә. Йед кö хwә тʹәсмили Йаһоwа дькьн, әw wана qәбул дькә ча хьзмәткʹаред хwә. Йаһоwа Мәсиһийед бьжарти рʹаст һʹәсаб дькә ча кöрʹед хwә у йед кö жь «пәзед дьн» ьн һʹәсаб дькә ча достед хwәйи рʹаст (Йуһʹн. 10:16; Рʹом. 5:1, 2; Аqуб 2:21-25). Демәк, һәла һе ньһа жи кʹьрʹин мәщале дьдә мә, wәки әм бәр чʹәʹве Баве хwә Йаһоwа рʹаст бенә һʹәсабе у наве wи пироз кьн.

«ПʹАДШАТИЙА ТӘ БЕ»

7. Пʹадшатийа Хwәде wе бь сайа кʹьрʹине кʹижан кʹәрәма бинә?

⁷ Паше Иса дöайе хwәда жь Хwәде һиви кьр: «Пʹадшатийа тә бе». Ле гәло ча кʹьрʹин гьредайи йә тʹәви Пʹадшатийа Хwәде? Бь сайа кʹьрʹине рʹе вәбу, wәки 144 000 йед бьжарти, сәр әʹзмана тʹәви Иса ча пʹадша у кʹаһин сәрwертийе бькьн (Әʹйан. 5:9, 10; 14:1). Иса wе тʹәви йед бьжарти һʹәзар сали сәрwертийе әʹрде бькә, у wе инсанәтерʹа кʹаре биньн. Әʹрд wе диса бьбә щьнәт, у һʹәму мәрьвед амьн wе бьбьнә бекемаси. Хьзмәткʹаред Йаһоwа йед сәр әʹзмана у йед сәр әʹрде, wе ахьрийеда бьбьнә малбәтәк (Әʹйан. 5:13; 20:6). Иса wе сәре мәʹр бьһʹьнщьрʹинә у wе бь тʹәмами бьдә һьлдане wан кöл-дәрда кʹижан кö жь wи тен (Дәстп. 3:15).

8. а) Иса ча шагьртед хwәрʹа нишан кьр wәки Пʹадшатийа Хwәде гәләк фәрз ә? б) Әм ча дькарьн нишан кьн wәки әм пьштгьрийа Пʹадшатийе дькьн?

⁸ Чахе Иса сәр әʹрде бу, әwи шагьртед хwәрʹа нишан кьр wәки Пʹадшатийа Хwәде чьqас фәрз ә. Һәма дәрберʹа паши ньхöмандьна хwә, Иса һʹәму щийа «мьзгинийа Пʹадшатийа Хwәде» бәла дькьр (Луqа 4:43). Иса пешийа кö бьчуйа әʹзмана, тʹәми да шагьртед хwә wәки «һʹәта сәре дьне» дәрһәqа wи шәʹдәтийе бьдьн (Кʹар. Шанд. 1:6-8). Бь сайа бәлакьрьна мьзгинийа Пʹадшатийе, мәрьв дькарьн пебьһʹәсьн дәрһәqа кʹьрʹине у öса жи бькарьбьн бьжин бьн сәрwертийа Пʹадшатийа Хwәдеда. Иро әм али бьжартийа дькьн йед кö әʹрде нә. Чь щурʹәйи? Әм нав тʹәмамийа дьнйайе мьзгинийа дәрһәqа Пʹадшатийе бәла дькьн. Öса әм нишан дькьн wәки әм пьштгьрийа Пʹадшатийа Хwәде дькьн (Мәт. 24:14; 25:40).

«ӘʹМЬРЕ ТӘ БӘ»

9. Чьрʹа әм гәрәке дöдьли нәбьн кö Йаһоwа wе qьрара хwә һьндава мәрьва бинә сери?

⁹ Паше Иса дöайе хwәда гьлийед öса гот: «Әʹмьре тә бә». Гәло бь wан гьлийа Иса чь дьхwәст бьгота? Йаһоwа һәйә Әʹфьрандар у чахе әw тьштәки qьрар дькә, wе әʹсә бе сери (Иша.55:11). Йаһоwа wе тʹö щар изьне нәдә Шәйтʹан, wәки рʹе wи бьгьрә кö qьрара Хwә һьндава инсанәте бинә сери. Дәстпекеда qьрара Йаһоwа әw бу, wәки Адәм у Һеwайерʹа зарʹед беqьсур бьбьн у бь wан әʹрд тʹьжә бә (Дәстп. 1:28). Һәрге Адәм у Һеwа безöрʹәт бьмьрана, әw qьрара Хwәде wе нәһата сери. Ле Хwәде мәщале дьдә әwед кö баwәрийа хwә qöрбана Иса тиньн, wәки бьбьнә бекемаси у һʹәта-һʹәтайе бьжин. Йаһоwа мәрьва һʹьз дькә у дьхwазә мәрьвед гöһдар öса бьжин, ча әwи сәре-серида qьрар кьр.

10. Бь сайа кʹьрʹине чь чʹарә һәйә бона мәрьвед кö мьрьнә?

¹⁰ Гәло чь чʹарә һәйә бона wан мәрьва йед кö мьрьнә ле Йаһоwа нас нәкьрьбун у жерʹа хьзмәт нәкьрьбун? Бь сайа кʹьрʹине, әwана дькарьн жь мьрьне рʹабьн. Баве мәйи һʹьзкьри wе wана вәгәрʹинә жийине, сәва кö әwана дәрһәqа qьрара wи пебьһʹәсьн у бькарьбьн жийина һʹәта-һʹәтайе бьстиньн (Кʹар. Шанд. 24:15). Йаһоwа мьрьна тʹö кәси нахwазә. Чахе мьри жь мьрьне рʹабьн, Йаһоwа wе бьбә Баве wан, чьмки әw Канийа жийине йә, демәк әw жийине дьдә (Зәб. 36:9). Ләма жи Иса һин дькьр öса дöа бькьн: «Баве мәйи әʹзмана» (Мәт. 6:9). Йаһоwа шьхöләки фәрз да Иса, демәк мьрийа жь мьрьне рʹакә (Йуһʹн. 6:40, 44). Иса wе щьнәтеда әве йәке бькә. Ләма әwи гот wәки әw «рʹабун у жийин» ә (Йуһʹн. 11:25).

11. Qьрара Хwәде һьндава «әʹлаләтәкә мәзьн» чь йә?

¹¹ Йаһоwа һәр кәси тʹәглиф дькә, wәки бьбьнә нәфәред малбәта wи. Ләма Иса гот: «Һәр кәсе кö хwәстьна Хwәде бинә сери, әw ә бьре мьн, хушка мьн у дийа мьн» (Марq. 3:35). Хwәде дьхwазә wәки «әʹлаләтәкә мәзьн» жь һʹәму мьләта, бәрәка у зьмана бьбьнә хьзмәткʹаред wи. У һәрге әwана баwәрийа хwә qöрбана Иса биньн у qьрара Хwәде биньн сери, әwана жи wе бькʹәвьнә нава wан йед кö рʹумәте дьдьнә Хwәде у дьбежьн: «Хьлазбун жь дәсте Хwәдейе мә йә, Йе кö ль сәр тʹәхт рʹуньшти йә у жь дәсте wи Бәрхи йә» (Әʹйан. 7:9, 10).

12. Ча дöайе Иса әʹйан дькә qьрара Йаһоwа һьндава инсанәте?

¹² Әw дöайе Иса әʹйан дькә qьрара Йаһоwа һьндава инсанәтейә гöһдар. Ль гора wи дöайи, әм гәрәке алийе хwәда һʹәму тьшти бькьн сәва наве Йаһоwа рʹумәт у пироз кьн (Иша. 8:13). Наве Иса те һʹәсабе «Йаһоwа Хьлазкʹар ә». Рʹасти жи хьлазкьрьна мәйә бь сайа кʹьрʹине, наве Йаһоwа рʹумәт у һʹöрмәт дькә. Пʹадшатийа Хwәде wе бь сайа кʹьрʹине инсанәтерʹа кʹәрәма бинә. Бәле, әw дöа мә дьдә баwәркьрьне wәки тʹö тьшт нькарә рʹе Хwәде бьгьрә wәки qьрара хwә бинә сери (Зәб. 135:6; Иша. 46:9, 10).

РʹАЗИБУНА ХWӘ БЬДЬНӘ КʹЬФШЕ БОНА КʹЬРʹИНЕ

13. Чахе әм тенә ньхöмандьне, бь ве йәке әм чь нишан дькьн?

¹³ Чахе әм хwә тʹәсмили Йаһоwа дькьн у тенә ньхöмандьне, әм нишан дькьн wәки әм баwәрийа хwә кʹьрʹине тиньн у qимәт дькьн. Һьн жи, ньхöмандьна мә дьдә кʹьфше кö әм «пʹара Хöдан ьн» (Рʹом. 14:8). Хенщи ве йәке, ньхöмандьн дьдә кʹьфше wәки әм дьхwазьн кö Хwәде исафа тʹәмьз бьдә мә (1 Пәт. 3:21). У Йаһоwа бь хуна Иса исафа мә тʹәмьз дькә. Әм qайим баwәр дькьн wәки Хwәде чь кö соз дьдә, wе һʹәму тьшти бьдә мә (Рʹом. 8:32).

14. Чьрʹа Хwәде жь мә дәʹwа дькә wәки әм мәрьва һʹьз бькьн?

¹⁴ Диса ча әм дькарьн нишан кьн wәки әм рʹази нә бона кʹьрʹине? Йаһоwа һʹәму тьшти жь һʹьзкьрьне дькә, у әw дьхwазә wәки һʹәму хьзмәткʹаред wи ве йәкеда чʹәʹв бьдьнә wи (1 Йуһʹн. 4:8-11). У әм әʹйан дькьн wәки әм дьхwазьн «бьбьнә зарʹед Баве [хwәйи] әʹзмана», чахе әм мәрьва һʹьз дькьн (Мәт. 5:43-48). Мәрьва һʹьз кьн тʹәмийа дöда йә, ле йа пешийе әw ә кö Хwәде һʹьз бькьн (Мәт. 22:37-40). Чахе әм мьзгинийа Пʹадшатийе бәла дькьн, öса әм һʹьзкьрьна хwә һьндава мәрьва дьдьнә кʹьфше у рʹумәта Хwәде әʹйан дькьн. Бь ве йәке һʹьзкьрьна мә һьндава Хwәде дьһа мәзьн дьбә, илаһи чахе әм хушк-бьред хwә һʹьз дькьн (1 Йуһʹн. 4:12, 20).

ЙАҺОWА БЬ САЙА КʹЬРʹИНЕ КʹӘРӘМА ДЬДӘ МӘ

15. а) Кʹижан кʹәрәма әм ньһа жь Йаһоwа дьстиньн? б) Кʹижан кʹәрәма әме ахьрийеда бьстиньн?

¹⁵ Сәва бь тʹәмами гöнед мә бенә бахшандьне, әм гәрәке баwәрийа хwә кʹьрʹине биньн. Хәбәра Хwәде мә дьдә баwәркьрьне, wәки гöнед мә дькарьн «бенә рʹәситкьрьне». (Бьхунә Кʹаред Шандийа 3:19-21.) Чаwа мә ида шеwьр кьр, Йаһоwа бь сайа кʹьрʹине, Мәсиһийед бь рʹöһʹе пироз кʹьфшкьри дькә зарʹед хwә (Рʹом. 8:15-17). У Йаһоwа соз дьдә «пәзед дьн» жи кö wана бькә малбәта хwә. Чахе әwана бьбьнә беqьсур у амьн бьминьн wәʹде щерʹьбандьна хьлазийе, Йаһоwа wе wана жи бькә зарʹед хwә (Рʹом. 8:20, 21; Әʹйан. 20:7-9). Һʹьзкьрьна Йаһоwа һьндава зарʹед wи, wе һʹәта-һʹәтайе бә у кʹьрʹин жи wе мәрʹа кʹәрәмед һʹәта-һʹәтайе бинә (Ибрн. 9:12). Әw пʹешкʹеша Хwәде wе тʹö щар qимәта хwә öнда нәкә у нә жи тʹö кәс дькарә әwе пʹешкʹеше жь мә бьстинә.

16. Кʹьрʹин мә жь чь аза дькә?

¹⁶ Һәрге әм бь дьле сах гöнед хwә тиньн рʹуйе хwә, Шәйтʹан нькарә мә бьдә сәкьнандьне, wәки әм ахьрийеда бьбьнә нәфәред малбәта Йаһоwа. Иса һатә сәр әʹрде у мьр «щарәке бона һәр тʹьм». Ләма жи qәwата кʹьрʹине тʹö щар кʹöта набә (Ибрн. 9:24-26). Кʹьрʹин бь тʹәмами мә хьлаз дькә жь гöнә у мьрьне кö жь Адәм дәрбази сәр мә буйә. Хенщи ве йәке, бь сайа qöрбана Иса әм аза нә жь һʹöкöме дьнйа Шәйтʹан у әм ида мьрьне натьрсьн (Ибрн. 2:14, 15).

17. Һʹьзкьрьна Хwәде тә бәрбь чь һелан дькә?

¹⁷ Созед Хwәде wе әʹсә бенә сери. Чаwа кö Йаһоwа qанунед тʹәбийәте öса дани wәки әwана найенә гöһастьне, öса жи хwәха Йаһоwа тʹö щар найе гöһастьне. Әw wе тʹö щар мә нәһелә (Малх. 3:6). Йаһоwа мәрʹа нә кö тʹәне жийине дьдә, әw öса жи мә гәләк һʹьз дькә. «Әм wе һʹьзкьрьна Хwәдейә һьндава хwәда нас дькьн у баwәр дькьн. Хwәде һʹьзкьрьн ә» (1 Йуһʹн. 4:16). Ахьрийеда әʹрд wе бьбә щьнәта бәдәw у хwәш, у сәр әʹрде һәр кәс wе чʹәʹв бьдә һʹьзкьрьна Хwәде. Wи wәʹдәйи һʹәму хьзмәткʹаред Хwәде, һьн сәр әʹрде һьн сәр әʹзмана wе бежьн: «Пәсьн, рʹумәт, сәрwахти, шькьри, һöрмәт, qәwат у зорайи бьра һʹәта-һʹәтайе Хwәдейе мәрʹа бә. Амин» (Әʹйан. 7:12).