Мә Гәләк Кʹәрәмед Хwәде Сьтанд

ЧАХЕ баве мьн щаһьл бу, әwи хwәстьбу бьбә хьзмәткʹаре дера Методист, чьмки әw мәрьвәки хwәдехоф бу. Ле чахе әwи әʹдәбйәтәкә Леколинкʹаред Кʹьтеба Пироз хwәндьбу у дәстпекьрьбу тʹәви wан һәвалтийе бькә, әwи нета хwә гöһастьбу. Баве мьн һатьбу ньхöмандьне сала 1914, чахе әw 17 сали бу. Wәʹде Шәрʹе Һʹәмдьнйайе йа Йәке, гази wи кьрьбун кö һәрʹә әскәрийе. Баве мьн нәчубу әскәрийе у ләма wи сәр дәһ мәһа кьрьбунә Кәла Кингстоне, (Онтарйо, Канада). Чахе баве мьн жь кәле дәркʹәтьбу, әw бьбу бәлакьре кʹьтеба, (бәре пешәнг öса нав дькьрьн).

Сала 1926-да баве мьн зәwьщи тʹәви Һазел Wилкенсон. Дийа wе рʹастийе пеһʹәсийа сала 1908-да. Әз һатьмә буйине 24 Нисане, сала 1931, әм чар зарʹ бун у әз йе дöда бум. Хьзмәткьрьн Йаһоwарʹа малбәта мәда щийе пешьн дьгьрт. Баве мьн Кʹьтеба Пироз гәләк qимәт дькьр, у әwе йәке али мә кьр wәки әм жи Хәбәра Хwәде qимәт бькьн. Мә тʹьме тʹәвайи ча малбәт мал бь мал хьзмәт дькьр (Кʹар. Шанд. 20:20).

ЧʹӘʹВ ДЬДЬМӘ БАВЕ ХWӘ КÖ ТʹӘВНӘБУЙИНЕ ХWӘЙ ДЬКЬМ У ДЬБЬМӘ ПЕШӘНГ

Сала 1939 Шәрʹе Һʹәмдьнйайе йа Дöда дәстпебу. Саләк дәрбаз бу у Канадайеда шьхöле Шәʹдед Йаһоwа һатә qәдәхәкьрьне. Мәкʹтәбада жь зарʹа дәʹwа дькьрьн, wәки һʹöрмәте бьдьнә бәйраqе у гимне дәwләте бьстьрен. У гава дәрсханеда гимне дьстран у һöрмәте дьданә бәйраqе, әз тʹәви хушка хwәйә мәзьн Дороти, жь дәрсхане дәрдькʹәтьм. Әз гәләк әʹщебмайи мам чахе дәрсдара мьн сәва wе йәке әз беһʹöрмәт кьрьм у гот wәки әз тьрсонәк ьм. Паши мәкʹтәбе чәнд шагьртед жь дәрсхана мьн, данә пәй мьн у мьн әʹрде хьстьн. Ле әwе qәwьмандьне әз һе qәwи кьрьм, wәки әз гöрʹа Хwәде бькьм нә кö гöрʹа мәрьва (Кʹар. Шанд. 5:29).

Чахе әз 11 сали бум, мәһа Тирмәһе сала 1942-да, әз һәwза фермеда һатьмә ньхöмандьне. Wәʹде мәһед һесабуна мәкʹтәбе, мьн хьзмәт дькьр ча пешәнге тʹатʹили, (ньһа те навкьрьне пешәнге кʹомәкдар). Нава саләкеда мьн тʹәви се бьра хьзмәт дькьр Онтарйойа бакʹуреда, кʹидәре кö дарбьрʹ дьжитьн.

Йәке Гöлане, сала 1949-да, әз бумә пешәнг. Wи wәʹдәйи филиале шьхöле авакьрьне дькьр, у әз тʹәглиф кьрьм сәва аликʹарийе бьдьм авакьрьнеда у паше 1 Кануна Пешьн әз бумә әндәме Бәйтʹәла Канадайе. Әз һатьмә кʹьфшкьрьне идара нәшьркьрьнеда у wедәре әз һин бум кö ча мәкʹина нәшьркьрьне бьдьмә хәбате. Щарәке öса qәwьми кö чәнд һʹәфтийа тʹәмамийа шәве мьн нәшьр дькьр бәлавока дәрһәqа пәйкʹәтьна Шәʹдед Йаһоwа Канадайеда.

Wәʹдә шунда, әз ида Идара Хьзмәтийеда дьхәбьтим. Щарәке мьн жь пешәнга интервийу һьлда, йед кö дәрбази Кwебеке дьбун, кʹидәре кö пәйкʹәтьнед qайим һәбун. Йәк жь wана Мери Зазула бу, йа кö жь Едмонтоне бу, (Алберта). Де-баве wе әндәмед дера Мәсиһийа бун. Ләма чахе Мерийе тʹәви бьре хwә Що, готә де-баве хwә кö әwана wе бәрдәwам кьн Кʹьтеба Пироз һин бьн, де-бав бәри wан дан у жь мале дәрхьстьн. Мәһа Һʹәзиране сала 1951, Мери у Щон һатьнә ньхöмандьне, у шәш мәһа паши ньхöмандьне, wана дәстпекьр ча пешәнг хьзмәт кьн. Wәʹде интервийу, әз әʹщебмайи мам кö Мери ча Хwәде һʹьз дькә. Мьн дьле хwәда гот wәки әw һәма әw qизьк ә кʹе жи әз дьхwазьм бьстиньм. Ахьрийеда паши нәһ мәһа, 30 Чьләйе, сала 1954-да мә һәв станд. Һʹәфтек дәрбаз бу у әм тʹәглиф кьрьн wәки шьхöле бәрпьрсийартийе һин бьн. Паши дö сала, мә дәстпекьр Онтарйойа бакʹуреда шьхöле бәрпьрсийартийе бькьн.

Шьхöле бәлакьрьна мьзгинийе нав тʹәмамийа дьнйайе гәләк пешда дьчу у гәләк мисйонер лазьм бун. Әм дьфькьрин кö һәрге мә Канадайеда зьвьстане бәр сöрʹ-сәрме у һавинеда бәр мьхмьхка тәйах кьр, мә кʹö жи кʹьфш кьн, әме бькарьбьн һәр дәрәщада тәйах кьн. Мәһа Тирмәһе сала 1956-да, мә Мәкʹтәба Гиләд хьлаз кьр у әм һатьнә кʹьфшкьрьне Бразилйайеда.

ХЬЗМӘТИЙА МИСЙОНЕРТИ БРАЗИЛЙАЙЕДА

Чахе әм һатьнә филиала Бразилйайеда, мә дәстпекьр зьмане Португали һин бьн. Пешийе әм һин бун кö ча хәбәрдане дәстпекьн, паше жи әм пешанина кьн йа журнале бь әзбәри һин бун у ида мә дәстпекьр һәрʹьнә хьзмәтийе. Мә сафи кьр кö һәрге хwәйе малерʹа һʹәwас бә, әме жерʹа рʹеза дәрһәqа жийина бьн Пʹадшатийа Хwәдеда бьхуньн. Чахе әм щара пешьн дәркʹәтьн хьзмәтийе, жьнькәке рʹьнд гöһе хwә да мә. Чахе мьн жерʹа Әʹйанти 21:3, 4 хwәнд, паше ньшкева әз хәрьqим, чьмки әз һини һәwа шьл у гәрме нәбьбум.

Әм ча мисйонер шәһәре Кампоседа һатьнә кʹьфшкьрьне, кʹидәре кö ньһа 15 щьват һәнә. Чахе әм һатьнә wи шәһәри, wи чахи тʹәне кʹомәки һәбу у öса жи мала мисйонера, кʹидәре кö чар хушка дьжит: Естер Трейси, Рамона Бауер, Луиза Швартс у Лоран Брукс (ньһа бь фамила Wолен). Wе маледа шьхöле мьн әw бу, wәки аликʹарийе бьдьм щийе кʹьнщшуштьнеда у öса жи дара биньм wәки бькарьбьн хwарьне чекьн. Щарәке, Дöшәме паши һинбуна «Бьрща Qәрәwьлийе», мьн у кʹöлфәта хwә һәврʹа хәбәр дьда кö ча рʹож дәрбаз бу. Жьна мьн вәләзийа бу сәр диване у чахе әwе сәре хwә сәр бәʹлги һьлда, ньшкева бьн бәлги мәʹр дәркʹәт. Әм зьравqәтанди бун, һʹәта мьн әw мәʹр кöшт.

Чахе саләк дәрбаз бу кö әм зьмане Португали һин дьбун, әз һатьмә кʹьфшкьрьне ча бәрпьрсийаре мьһале. Мә бь әʹмьре һеса дьжит. Мә щийе жь шәһәр дәр дьжит, кʹидәре кö лус тʹöнә бу, әм сәр халиче рʹадьзан, у әм пе һәсп у фьрхуне дьчун-дьһатьн. Чахе әм дьчунә щийе дур wәʹде кампанийа хьзмәтийе, әм пе трене һʹәта шәһәр чун у мә ль wедәре маләкә мәзьнда отʹахәк кʹьре һьлда. Филиале мәрʹа 800 журнал шанд сәва кö әм хьзмәтийеда бәла кьн. Мәрʹа лазьм бу гәләк щар һәрʹьнә пʹосте бен, wәки wан qöтʹийа бь журнала бьвьн wи щийи кʹидәре әм дьман.

Сала 1962, нав тʹәмамийа Бразилйайеда, бона бьра у хушкед мисйонер Мәкʹтәба Хьзмәтийе дәрбаз бу. Әз шәш мәһа бей Мери дьчумә щурʹә-щурʹә щийа, сәва әве мәкʹтәбе дәрбаз кьм. Мәсәлә, Манауседа, Белемеда, Фортәлазайеда, Ресифеда, у Салвадореда. Мьн Манауседа саз кьр щьвата мәзьн йа се рʹожи, кö ода операйа нав у дәнгда дәрбаз бу. Жь бо баранед qайим ава бона вәхwарьне qьреж бу у һьн жи щийе нанхwарьне жи тʹöнә бу wәки wәʹде һесабуне хwарьне бьхwьн. (Wи wәʹдәйи, сәр щьватед мәзьн хwарьн дьһатә дайине.) Ләма әз чум щәм офисере әскәрийе у мьн жерʹа дәрһәqа чәтьнайа мә гьли кьр. Әwи бь дьл һаqас ав да мә, кö һʹәта хьлазийа щьвата мәзьн тʹера мә кьр. Хенщи ве йәке, әwи әскәр шандьн, wана дö чадьред мәзьн мәрʹа анин у гьредан сәва әм теда хwарьне чекьн у нан бьхwьн.

Һʹәта кö әз дур бум, Мерийе щийе арш-верша Португали шәʹдәти дьда. Һʹьш-аqьле wан мәрьвада тʹәне әw бу кö пʹәра чекьн. Ләма жи Мерийе нькарьбу wанрʹа шәʹдәти бьда, чьмки wана гöһе хwә нәдьданә wе. Әw дьлтәнг бу у ләма готә һәвалед хwәйә Бәйтʹәледа кö wе нәхwаста Португаледа бьжита. Ле һьнә wәʹдә шунда, Мери гәләк әʹщебмайи ма, чьмки мә тʹәглифкьрьн станд кö Португаледа хьзмәт кьн. Wи wәʹдәйи Португаледа шьхöле бәлакьрьна мьзгинийе qәдәхәкьри бу, ле йәкә әм рʹази бун wәки һәрʹьн.

ХЬЗМӘТИЙА МӘ ПОРТУГАЛЕДА

Сала 1964-да, әм дәрбази Лисбоне (Португал) бун. Wи чахи полисйа (PIDЕ) Португале дьзива пәй бьред мә дькʹәтьн. Ләма чахе әм һатьнә wедәре, әм рʹасти бьра нәһатьн сәва кö wана нәкьнә qәзийе. Мә отʹах кʹьре һьлда у wедәре дьман. Әм һивийа визе бун у чахе мә виза хwә станд, мә мал кʹьре һьлда. Пенщ мәһ дәрбаз бу у мәһа Чьләйе, сала 1965-да, мә ида дькарьбу тʹәви бьред филиале хәбәр да. Әм гәләк шабун чахе щара пешьн әм чунә щьвате!

Әм пеһʹәсийан кö һәр рʹож полис дькʹәтьнә малед бьред мә. Одед Щьвата дадайи бун, у ләма щьват дьзикава малада дәрбаз дьбун. Бь сәда хушк у бьра дьбьрьнә полисе, сәва wана бьщерʹьбиньн у гьлийа жь wана дәрхьн. Полис һьндава wанда гәләк сәрт бун у зоре wана дькьрьн, wәки наве бьра бежьн йед кö щьват дәрбаз дькьрьн. Бона ве йәке, бьра ида бей фәмил наве һәв һьлдьдан, мәсәлә Хосе йан жи Пауло. У мә жи öса дькьр.

Бона мә лапә фәрз әw бу, wәки щәм хушк-бьра хwарьна рʹöһʹани һәбә. Мери щабдар бу wәки «Бьрща Qәрәwьлийе» у әʹдәбйәтед дьн бьньвисә сәр кʹахазед öса, кʹижан кö паше дькарьбун пе мимеографе копи бькьрана.

БӘР ДИWАНЕ ШӘʹДӘТИЙЕ ДЬДЬН

Мәһа Һʹәзиране сала 1966-да, диwана мәзьн дәрбаз бу Лисбонеда. Тʹәмамийа Щьвата Фәжу кö жь 49 хушк-бьра бу, бьрьнә диwане чьмки wана дьзикава маләкеда щьват дәрбаз дькьрьн. Мьн әw хушк-бьра бона диwане һазьр кьрьн. Мьн тʹәмашә чекьр wәки йанчь әз прокурор ьм у диwанеда бьра нәһәq дькьм. Мә заньбу әме бьдьнә дәр, ле мә фәʹм дькьр wәки әме шәʹдәтийа мәзьн бьдьн. Адвокате мә чахе әм бәр диwане хwәй дькьрьн, бь мерхаси гьлийед Гамалйел гот кö Кʹьтеба Пирозда ньвисар ьн (Кʹар. Шанд. 5:33-39). Сәд һʹәйф, ле әw 49 хушк-бьра кьрьнә кәле сәр wәкә 45 рʹожа һʹәта 5 мәһ у нива. Паше нучеда дәрһәqа ве диwане әʹлам кьрьн. Ле мә шабунәкә мәзьн станд чахе адвокате мә дәстпекьр Кʹьтеба Пироз һин бә у бе сәр щьвате.

Мәһа Кануна Пешьн сала 1966, әз ча бәрпьрсийаре филиале һатьмә кʹьфшкьрьне. Мьн бона пьрсед qанунева гьредайи гәләк wәʹдә хәрщ дькьр. Мә һʹәму тьшт кьр сәва кö Шәʹдед Йаһоwа бь qануни изьне бьстиньн кö аза хьзмәт кьн (Фили. 1:7). Ахьрийеда, 18 Кануна Пешьн, сала 1974 мә изьн станд. Жь офиса сәрәкә Нейтан Нор у Фредерик Франс һатьн Португале, wәки сәр щьвина гәләк мәхсус тʹәви мә ша бьн. Әw щьвин дәрбаз бу шәһәре Опорто у Либсонеда, кʹидәре кö 46 870 хушк-бьра һатьбун.

Йаһоwа дәри вәкьр wәки гьравед дьнда жи кö сәр зьмане Португали хәбәр дьдьн, мьзгинийе пебьһʹәсьн. Мәсәлә гьравед Азорес, Щапе Верде, Мадера у Сао Тому у Принсип. У чьмки шьхöле бәлакьрьна мьзгинийе пешда дьчу, мәрʹа лазьм бу филиала һе мәзьн. Чахе филиал ава бу, мәһа 23 Нисане сала 1988-да, Милтон Һеншел готара тʹәсмилкьрьна филиале хwәнд, кʹидәре кö 45 522 хушк у бьра һатьбун. Әм гәләк ша бун wәки 20 хушк-бьред кö бәре Португаледа ча мисйонер хьзмәт кьрьбун, бона ве щьвина мәхсус вәгәрʹийабунә Португале.

ӘМ ЖЬ ХЬЗМӘТКʹАРЕД АМЬН ГӘЛӘК ТЬШТ ҺИН БУНӘ

Нава салада, әм жь бьред амьн гәләк тьшт һин дьбун. Мәсәлә, әз дәрсәкә qимәт һин бумә жь Теодор Йарач, чахе аликʹарчийе wи бум wәʹде тʹәсәликьрьна филиала. Мә тʹәсәлийа филиаләке кьр, кʹидәре кö чәтьнайикә мәзьн һәбу. Сәва ве чәтьнайе сафи кьн, чь дәсте Комитейа Филиале дьһат, wана кьр. У Йарач сәва wан бьра дьлгәрм кә, готә wан: «Ньһа ида бьһельн бьра рʹöһʹе пироз йа хwә бькә». Бь дәһа сал пешда, чахе әм чубунә Бруклине, әз у жьна мьн Мери, тʹәви Франс бьра у йед дьн, еварәке тʹоп бун wәки тʹәвайи wәʹдә дәрбаз кьн. Хьлазийеда мә wирʹа гот wәки мәрʹа гьлики бежә дәрһәqа гәләк салед хьзмәтийа хwә Йаһоwарʹа у ширәте бьдә мә. Әwи мәрʹа гот: «Ширәта мьн әw ә: Хwәшийада жи, чәтьнайада жи тʹәшкиләта Йаһоwада бьминьн. Тʹәне әw тʹәшкиләт wи шьхöли дькә, кʹижан кö Иса тʹәми да шагьртед хwә кö бькьн, демәк бәлакьрьна мьзгинийа Пʹадшатийа Хwәде!»

Әз у жьна мьн һәма öса жи дькьн у әм бәхтәwар ьн. Öса жи, әм бь шабун тиньн бира хwә wи wәʹдәйи чахе мә тʹәсәлийа филиала дькьрьн. Мә бь сайа wан тʹәсәликьрьна, хушк-бьред щаһьл у әʹмьрда мәзьн дьлгәрм дькьр, wәки хьзмәтийа wанә бь амьни гәләк те qимәткьрьне. Мә әwана һелан дькьрьн, wәки бәрдәwам кьн Йаһоwарʹа хьзмәт кьн.

Әм ньһа 80 сали зедәтьр ьн. Гәләк нәхwәшийед Мери һәнә (2 Корн. 12:9). Әм öса жи рʹасти чәтьнайед дьн жи дьһатьн. Ле wан чәтьнайада баwәрийа мә дьһа qәwи бу у нета мә әв бу wәки һʹәта хьлазийе Хwәдерʹа амьн бьминьн. Чахе әм дьфькьрьн сәр әʹмьре хwә, әм фәʹм дькьн wәки Йаһоwа чьqас гәләк мә кʹәрәм дькә.a