Йаһоԝа Гӧһ Да Дӧайед Мьн

СӘРЛЕДАНА КӦ ӘʹМЬРЕ МЬН ГӦҺАСТ

Әз 22 Кануна Пешьн, сала 1929, гӧндәки бь наве Новеледа һатьмә буйине, незики бажаре Бастоне, нав чʹийайед Арденед Белжике. Те бира мьн гава әз бьчʹук бум, әм тʹәви де-баве хԝә фермәкеда дьман. Һәр рʹож, әз у бьре мьни бьчʹук, Раймонд, мә чʹеләкед хԝә дьдотьн, у ль ԝәʹде дьруне мә али мәзьна дькьр. Гӧнде мәда һәр кәси али һәв дькьр.

Дийа мьн Елис у баве мьн Емил Католик бун. Ләʹда әԝана дьчунә дере. Ле незики сала 1939, пешәнгед жь Инглистане һатьнә гӧнде мә у готьнә баве мьн, кӧ әв дькарә тʹьме журнала Бәрдьли бьстинә (йа кӧ ньһа те навкьрьне Һʹьшйар Бьн!). Баве мьн дәрберʹа фәʹм кьр, кӧ әԝи рʹасти дитийә у дәстпекьр Кʹьтеба Пироз бьхунә. Паше әԝи тʹәрка дере да. Ле щинаред мә гәләк һерс кʹәтьн у дәстпекьрьн пәй баве мьн кʹәвьн у зоре ле бькьн, ԝәки әԝ жь дине Католики дәрнәйе.

Дьле мьн дешийа, кӧ щинаред мә ӧса баве мьн әʹщьз дькьрьн. Ләма жи, чаԝа кӧ мьн дәстпека готареда гот, мьн дӧада жь Хԝәде аликʹари хԝәст. Ԝәʹдә шунда, әԝана ида пәй баве мьн нәдькʹәтьн. Әз гәләк ша бум у мьн фәʹм кьр, ԝәки Йаһоԝа бь рʹасти жи дӧа дьбьһе.

ЖИЙИНА ԜӘʹДЕ ШӘРʹ

Сала 1940, 10 Гӧлане Натсиста Алманйайе кʹәтьнә Белжике, ләма жи гәләк мәрьв жь ԝедәре рʹәвийан. Әм жи рʹәвийан у чунә Франсайа башуре. Сәр рʹе әм кʹәтьнә нава шәрʹе ортʹа Алман у Франсайе.

Гава әм вәгәрʹийанә ферма хԝә, мә дит кӧ һʹәчʹи зәʹф һур-муред мә тʹалан кьрьбун. Тʹәне кучʹьке мә Боббйе һе ԝедәре бу. Әз бәр хԝә дькʹәтьм, кӧ чьрʹа һаԛас кӧл-дәрд һәнә.

Ԝан сала, бьраки амьн бь наве Емил Шранс, йе кӧ ча пешәнг у рʹуспи хьзмәт дькьр, сәрледана мә дькьр. Әԝи жь Кʹьтеба Пироз нишани мә кьр, ԝәки чьрʹа кӧл-дәрд һәнә, у щаба пьрсед мьн дьда дәрһәԛа жийине. Һеди-һеди әз дьһа незики Йаһоԝа дьбум, у мьн фәʹм кьр, кӧ әԝ бь рʹасти жи Хԝәдеки дьлован ә.

Гава шәрʹ һе бәрдәԝам дьбу, гәләк мәщалед мә һәбун, кӧ әм тʹәви Шәʹдед Йаһоԝа ԝәʹдә дәрбаз кьн. Мәһа Тʹәбахе, сала 1943-да, бьре Жозе-Нищколас Минет пе готарәке һатә ферма мә. Әԝи пьрси: «Кʹе дьхԝазә бе ньхӧмандьне?» Әз у баве мьн, мә дәсте хԝә һьлбьрʹи. Незики ферма мә чʹәмәкә бьчʹук һәбу, у әм ԝедәре һатьнә ньхӧмандьне.

Мәһа Кануна Пешьн, сала 1944-да, ордийа Алмани щара пашьн һʹьщуми сәр рʹоавайа Әԝропайе кьр. Әв һʹьщумкьрьн те навкьрьне «Һʹьщумкьрьна Ардена». Жь бәр кӧ әв һʹьщумкьрьн гәләк незики мә бу, әм ԝәкә мәһәки бьне мала хԝәда дьман. Рʹожәке, гава әз чумә жоре кӧ хԝарьне бьдьмә һʹәйԝана, алийе ферма мәда гӧлә кьрьн у банийе әʹмбаре мә һьлшийа. Әскәрәки Америкайи, йе кӧ гомеда незики мьн сәкьнибу, кьрә ԛужини: «Хԝә бавежә әʹрде!» Әз рʹәвийамә бал ԝи у мьн хԝә авит әʹрде, әԝи жи кʹӧмзьрьһʹе хԝә кьрә сәре мьн, кӧ мьн бьпʹарезә.

ПЕШДАЧУЙИНА РʹӦҺʹАНИ

Паши шәрʹ, әм тʹәви щьвата бажаре Лйеже текли бун, йа кӧ ԝәкә 90 километра дури мә бу. Ԝәхт шунда, мә ль бажаре Бастоне кʹомәкә бьчʹук саз кьр. Мьн хԝәрʹа хәбатәк дит, кӧ хәрщава гьредайи бу, у мәщал кʹәтә дәсте мьн ԝәки ԛануна лекʹолин кьм. Паше әз бунә секретаре нотарйусе. Сала 1951-да, мә ль бажаре Бастоне щьвата мәзьн дәрбаз кьр. Ԝәкә 100 мәрьв һатьн у нав ԝанда хушкәкә хирәт бь наве Елли Реутер һәбу, йа кӧ пешәнг бу. Сәва кӧ әԝ бьһата сәр щьвата мәзьн, әԝ 50 километр пе бисиклете рʹе һатьбу. Һьнә ԝәхт шунда, дьле мә кʹәтә һәв у мә соз да һәв. Ле Елли тʹәглифнәʹмәк станд, кӧ һәрә Мәкʹтәба Гиләде. Ләма жи, әԝе офиса сәрәкәрʹа нәʹмә ньвиси у зәлал кьр, кӧ әԝ чьрʹа нькарә һәрʹә мәкʹтәбе. Бьре Нейтан Нор, йе кӧ ԝе дәме рʹебәрийа хьзмәткʹаред Хԝәде дькьр, бь дьловани щаб да, ԝәки рʹожәке дьбәкә әԝ бькарьбә тʹәви мере хԝә һәрʹә Мәкʹтәба Гиләде. Сала 1953-да, мәһа Сьбате әм зәԝьщин.

Ԝе сале, әз у Елли, әм чунә сәр щьвата мәзьн бь наве Щьмәʹта Дьнйа Тʹәзә, йа кӧ Нийу Йоркеда сәр Стадийона Йанки һатә дәрбазкьрьне. Ԝедәре, бьраки хәбатәкә баш мьнрʹа дит у хԝәст кӧ әз дәрбази Америкайе бьм. Паши кӧ мә бона ве йәке Йаһоԝарʹа дӧа кьр, мә сафи кьн, ԝәки ве йәке ԛәбул нәкьн, ле вәгәрʹьн Белжике, ԝәки али кʹома бьчʹук бькьн, йа кӧ ль Бастоне бу, кʹидәре кӧ тʹәне ԝәкә 10 мьзгинван һәбун. Саләк шунда, кӧрʹе мә Серж һатә буйине. Ле һʹәфт мәһ шунда, Серж нәхԝәш кʹәт у мьр. Мә Йаһоԝарʹа бәʹса еша дьле хԝә кьр у Әԝи бь сайа һевийа рʹабуна мьрийа дьле мә рʹьһʹәт кьр.

ХЬЗМӘТИЙА ҺӘРТʹЬМ

Сала 1961, мәһа Щотмәһе, мьн хԝәрʹа хәбатәкә ниврʹожи дит, йа кӧ мәщал да мьн, кӧ әз бьбьмә пешәнг. Ле ԝе рʹоже хьзмәткʹаре Бәйтʹәла Белжике мьнрʹа тʹеле хьст у пьрси кӧ әз дькарьм бьбьм хьзмәткʹаре мьһале (ньһа дьбежьн «бәрпьрсийаре мьһале»). Мьн гот: «Пешийа кӧ әм ве щабдарийе ԛәбул кьн, әм дькарьн һьнә ԝәхт ча пешәнг хьзмәт кьн?» Хԝәстьна мьн һатә ԛәбулкьрьне. Паши кӧ мә 8 мәһа ча пешәнг хьзмәт кьр, мә сала 1962, мәһа Илонеда, шьхӧле бәрпьрсийартийе дәстпекьр.

Дӧ сал шунда, Бәйтʹәла Бруселе гази мә кьр. Мәһа Щотмәһе, сала 1964-да, әм дәрбази ԝедәре бун. Бь сайа ве кʹьфшкьрьна тʹәзә, мә гәләк кʹәрәм стандьн. Дәмәкә кьнда, чахе бьре Нор сала 1965-да һатә Бәйтʹәла мә, әз әʹщебмайи мам, кӧ мьн ча щабдаре Бәйтʹәле кʹьфш кьрьн. Паше, әз у Елли, әм һатьнә тʹәглифкьрьне кӧ һәрʹьн кʹома 41, йа Мәкʹтәба Гиләде. Чь кӧ Нор 13 сал пешда мәрʹа готьбу, һатә сери! Паши мәкʹтәбе, әм вәгәрʹийан Бәйтʹәле Белжике.

ПʹАРАСТЬНА МАФЕД ШӘʹДЕД ЙАҺОԜА

Бь сала, гәләк мәщал дькʹәтьнә дәсте мьн, кӧ занәбуна хԝәйә дәрһәԛа ԛанунзанийе бона шьхӧле Шәʹдед Йаһоԝа бьдьмә хәбате, ԝәки әԝана бь азайи ль Әԝропайе у щийед дьн хьзмәт кьн (Филипи 1:7). Бь сайа ви шьхӧли, әз тʹәви 55 ԝәкʹила зедәтьр текли дьбум, жь щурʹә-щурʹә ԝәлата, кʹидәре кӧ шьхӧле мә нивида йан жи бь тʹәмами ԛәдәхәкьри бу. Дәԝса кӧ мьн дина ԝан бькʹьшанда сәр пʹешед хԝә, мьн дьгот кӧ әз «хьзмәткʹарәки Хԝәде» мә. Мьн һәртʹьм жь Йаһоԝа рʹебәри дьхԝәст, чьмки чаԝа Кʹьтеба Пироз дьбежә, «дьле пʹадше [йан жи һʹакьма] дәсте Хӧданда мина щәԝед ава нә, кʹийалида кӧ дьхԝазә, Ԝи алийида дадьгәрʹинә» (Мәтʹәлок 21:1).

Щарәки тьштәки ӧса һатә сәре мьн, кӧ һʹәта иро бира мьн начә. Мьн чәнд щара әндәмәки Парламента Әԝропайерʹа готьбу, кӧ дьхԝазьм тʹәви ԝи хәбәр дьм у ахьрийеда әԝ ԛайил бу. Ле әԝи гот: «Тʹәне пенщ дәԛед тә һәнә, дәԛәки жи зедә набә». Мьн сәре хԝә дахьст у дӧа кьр. Әԝ мәрьв әʹщебмайи ма у жь мьн пьрси, кӧ әз чь дькьм. Мьн ле ньһерʹи у гот: «Мьн Хԝәдерʹа рʹазибуна хԝә да кʹьфше, кӧ һун хьзмәткʹарәки ԝи нә». Әԝи гот: «Чь? Мьн фәʹм нәкьр». Мьн Рʹомайи 13:4 нишани ԝи кьр. Әԝ Протестант бу, ләма жи әве рʹезе дина ԝи кʹьшанд. Ахьри чь бу? Әԝи нив сьһʹәт да мьн, у һәвдитьна мә гәләк баш дәрбаз бу. Әԝи һәла һе гот, кӧ ԛәдьре шьхӧле мә дьгьрә.

Бь сала, Шәʹдед Йаһоԝа Әԝропайеда гәләк щар шьхӧлед диԝанкьрьнеда сәрдькʹәтьн, мәсәлә алийе тʹәвнәбуйине, хәрщ у тьштед дьнда. Гәләк щар әз жи дькʹәтьмә ван шьхӧла у мьн бь чʹәʹве хԝә дитийә, кӧ Йаһоԝа ча али мә дькә. Шәʹдед Йаһоԝа бәр Диԝана Әԝропайе йа Мафе Мәрьва, зедәтьри 140 шьхӧлада сәркʹәтьнә!

БӘЛАКЬРЬНА МЬЗГИНИЙЕ КУБАЙЕДА ПЕШДА ДЬЧӘ

Салед 1990-да, мьн тʹәви бьре Филип Брумлей, йе кӧ офиса сәрәкәда хьзмәт дькьр, у бьре Валтер Фарнети, йе кӧ жь Италийайе бу, һәвкʹари дькьр, ԝәки хушк-бьред Кубайеда дьһа зедә азайи ԛазанщ кьн, чьмки бәлакьрьна мьзгинийе ԝедәре ԛәдәхәкьри бу. Мьн нәʹмә ньвиси консулхана Кубайерʹа ль Белжике, у паше рʹасти мәрьвәки щабдар дьһатьм, йе кӧ шьхӧле мә лекʹолин дькьр. Ле ԝәʹде һәвдитьнед мәйә пешьн, мә нькарьбу ван проблема сафи кьн, жь бо чь жи шьхӧле мә һатьбунә ԛәдәхәкьрьне.

Паши кӧ мә Йаһоԝарʹа дӧа кьр, мә изьн хԝәст кӧ 5 000 Кʹьтебед Пироз бьшиньн Кубайе, у ԝана изьн да мә. Кʹьтебед Пироз гьһиштьнә ԝедәре у хушк-бьрарʹа бәлакьрьн. Мә фәʹм кьр, ԝәки Йаһоԝа щәфе мә кʹәрәм дькә. Паше мә изьн хԝәст кӧ 27 500 Кʹьтебед Пироз бьшиньн Кубайе, у диса мәрʹа изьн һатә дайине. Әз гәләк ша бум, кӧ Кʹьтеба Пироз кʹәтә дәсте хушк-бьред Кубайе.

Әз бона сафикьрьна һьнә мафед Шәʹдед Йаһоԝа, гәләк щар дьчумә Кубайе, у мьн тʹәви гәләк мәрьвед дәԝләте һәвкʹари дькьр.

АЛИКʹАРИЙА БОНА ХУШК-БЬРЕД РԜАНДАЙЕ

Сала 1994, зедәтьри 1 000 000 мәрьв жь геносида Рԝандайеда мьԛабьли Тутси һатьнә кӧштьне. Сәд һʹәйф кӧ һьнә хушк у бьред мә жи һатьнә кӧштьне. Бона ве йәке, чәнд бьра һатьнә кʹьфшкьрьне, кӧ тьшта бона аликʹарийа хушк-бьред Рԝандайеда бьшиньн.

Гава әм гьһиштьнә бажаре Кигале, пʹайтәхта Рԝандайе, мә дит кӧ офиса ԝәлгәрʹандьне у әʹмбаре әʹдәбйәта һатьнә гӧләкьрьне. Мә бьһист кӧ чәнд хушк-бьра пе шур һатьбунә кӧштьне. Ле мә ӧса жи сәрһатийед баш бьһист, йед кӧ һʹәзкьрьна ортʹа хушк у бьрада дьда кʹьфше. Мәсәлә, әм тʹәви бьраки Тутси бунә нас, йе кӧ 28 рʹож жь алийе малбәтәкә Һутува чʹәʹләкә бьне әʹрдеда һатьбу вәшартьне. Сәр щьватәкә Кигаледа, мә сәр һʹиме Кʹьтеба Пироз бәрдьли да зедәтьри 900 хушк у бьра.

Паше әм синор дәрбаз бун у чунә ԝәлате Зайире (ньһа те навкьрьне «Кʹомара Конгойа Демократик»), ԝәки ԝан хушк-бьра бьгәрʹьн, йед кӧ рʹәвийабунә зомед незики бажаре Гомайе. Мә нькарьбу ԝана бьвиньн, ләма жи мә Йаһоԝарʹа дӧа кьр у рʹебәри жь ԝи хԝәст. Ԝәхт шунда кәсәк бәр бь мә һат, у мә ле пьрси кӧ Шәʹдед Йаһоԝа кʹидәре нә. Әԝи гот: «Әз Шәʹде Йаһоԝа мә. Ԝәрә, әз ԝә бьвьмә бал комитейа аликʹарийе». Паши кӧ мә тʹәви комитейа аликʹарийе щьвинәкә һʹәԝас дәрбаз кьр, мә һелани у бәрдьли да ԝәкә 1 600 хушк-бьред, кӧ зомада дьман. Ӧса жи, мә нәʹмәкә жь Кʹома Рʹебәрийе ԝанрʹа хԝәнд. Хушк-бьра бона ван гьлийед жь нәʹме гәләк ша бун, кʹидәреда кӧ ньвиси бу: «Әм тʹьме бона ԝә дӧа дькьн. Әм заньн, ԝәки Йаһоԝа ԝе ԝә тʹәне нәһелә». Бь рʹасти жи ӧса бу. Иро Рԝандайеда зедәтьри 30 000 Шәʹдед Йаһоԝа һәнә!

МЬН САФИ КЬРИЙӘ АМЬН БЬМИНЬМ

Паши кӧ әм ԝәкә 58 сал зәԝьщи бун, жьна мьнә дәлал Елли сала 2011-да мьр. Мьн Хԝәдерʹа бәʹса еша дьле хԝә кьр, у Әԝи бәрдьли да мьн. Ӧса жи, мьн жь шьхӧле бәлакьрьна мьзгинийе жи бәрдьли дьстанд.

Әз ида 90 сали зедәтьр ьм. Ле диса жи, әз һәр һʹәфте дьчьмә хьзмәтийе. Ӧса жи, әз аликʹарийе дьдьмә Идара Ԛанунзанийе йа Белжике, кәсед дьнрʹа бәʹса сәрһатийа хԝә дькьм у бәрдьлийе дьдьмә Бәйтʹәлванед щаһьл.

Ԝәкә 84 сал пешда, мьн щара пешьн Йаһоԝарʹа дӧа кьр. Әʹмьре мьн гәләк хԝәш бу, чьмки чьԛас дьчу, әз незики Йаһоԝа дьбум. Әʹмьре хԝәда мьн дит, кӧ Йаһоԝа бь рʹасти жи гӧһ дьдә дӧайед мьн (Зәбур 66:19).a