«Хәбәре Бьԛәдиньн»

1-2. Чьрʹа хьзмәткʹаред Хԝәде бәхтәԝар ьн? (Аԛуб 1:22-25)

ЙӘҺОԜА у Кӧрʹе ԝи Иса Мәсиһ дьхԝазьн ԝәки әм бәхтәԝар бьн. Кʹьтеба Пирозда те готьне: «Хԝәзи ль йед тʹәмийед Ԝи хԝәй дькьн у бь тʹәмамийа дьле хԝә ль Ԝи дьгәрʹьн» (Зәбур 119:2). Иса жи гот: «Дьһа бәхтәԝар әԝ ьн, йед кӧ хәбәра Хԝәде дьбьһен у пек тиньн!» (Луԛа 11:28)

² Әм хьзмәткʹаред Йаһоԝа нә, ләма жи әм мәрьвнә бәхтәԝар ьн. Гәло чьрʹа? Гәләк мәʹни һәнә, ле йәк жь мәʹнийед фәрз әв ә, кӧ әм һәр рʹож Кʹьтеба Пироз дьхуньн у хирәт дькьн, ԝәки ль гора тьштед кӧ әм һин дьбьн, бьжин (Бьхунә Аԛуб 1:22-25).

3. Чьрʹа бона мә кʹарәкә мәзьн ә ль гора ве йәке бьжин, чь кӧ әм жь Кʹьтеба Пироз һин дьбьн?

³ Бона мә кʹарәкә мәзьн ә «хәбәре бьԛәдиньн». Мәсәлә, гава әм ве йәке дькьн, Йаһоԝа жь мә рʹази йә, у әв йәк дьле мә ша дькә (Ԝаиз 12:13). Ӧса жи гава әм гьлийед жь Кʹьтеба Пироз әʹмьре хԝәда дьдьнә хәбате, малбәта мә бәхтәԝар дьбә у һәләԛәтийа мә тʹәви хушк-бьра дьһа ԛәԝи дьбә. Бәле дьбәкә тә жи әв йәк тʹәхмин кьрийә. Хенщи ве йәке, гәләк тьштед кӧ тен сәре ван мәрьва, йед кӧ гӧһ надьнә Йаһоԝа, найен сәре мә, чьмки әм гӧрʹа Йаһоԝа дькьн. Бе шьк, әм жи мина Даԝьд Пʹадша дьфькьрьн, йе кӧ дәрһәԛа ԛанун у диԝанед Йаһоԝа ӧса гот: «Йе пек тинә, хәлата ԝи пʹьрʹ мәзьн ә» (Зәбур 19:7-11).

4. Чьма щарна нә һеса ә кӧ әм «хәбәре биньн сери»?

⁴ Ле щарна һеса нинә, кӧ әм «хәбәре бьԛәдиньн». Жь бо ве йәке кӧ әм бәтал ниньн, әм гәрәке бона хԝәндьн у лекʹолина Кʹьтеба Пироз ԝәʹдә вәԛәтиньн, ԝәки фәʹм бькьн кӧ Йаһоԝа чь жь мә дәʹԝа дькә. Ләма жи ԝәрә әм дина хԝә бьдьнә чәнд ширәта, йед кӧ ԝе али мә бькьн ԝәки әм һәр рʹож Кʹьтеба Пироз бьхуньн. Ӧса жи, әме бьвиньн ԝәки әм ча дькарьн ль сәр рʹезед кӧ дьхуньн, бьфькьрьн у ль гора тьштед кӧ һин дьбьн, бьжин.

БОНА ХԜӘНДЬНА КʹЬТЕБА ПИРОЗ ԜӘʹДӘ ВӘԚӘТИНӘ

5. Ԝәʹде мә сәр чь те хәрщкьрьне?

⁵ Гәләк хьзмәткʹаред Йаһоԝа мәрьвнә бәтал ниньн. Әм гәләк ԝәʹдә сәр щабдарийед рʹӧһʹани хәрщ дькьн. Хенщи ве йәке, әм дьхәбьтьн, ԝәки әʹбура хԝә у малбәта хԝә бькьн (1 Тимотʹейо 5:8). Гәләк хушк у бьра бона мәрьвед хԝәйә нәхԝәш, йан жи әʹмьрда мәзьн, хәм дькьн. Ӧса жи әм бона сьһʹәт-ԛәԝата хԝә хәм дькьн, чь кӧ гәләк ԝәʹдә жь мә дьстинә. Хенщи ван тьшта, щьватеда жи щабдарийед мә һәнә. Йәк жь щабдарийед мәйә һәрә фәрз әв ә, кӧ әм мьзгинийа хере бь дьл у щан бәла дькьн. Һәрге һаԛас шьхӧл-әʹмәлед мә һәнә, гәло әм ча дькарьн ԝәʹдә бьвиньн, кӧ һәр рʹож Кʹьтеба Пироз бьхуньн, сәр ԝе кʹур бьфькьрьн у әʹмьре хԝәда бьдьнә хәбате?

6. Тӧ ча дькари бона хԝәндьна Кʹьтеба Пироз ԝәʹдә вәԛәтини? (Бьньһерʹә ӧса жи шькьл.)

⁶ Бона мә Мәсиһийа, йәк жь тьштед «һәрә ԛәнщ» әв ә, кӧ Кʹьтеба Пироз бьхуньн, у әв йәк гәрәке әʹмьре мәда сәр щийе пешьн бә (Филипи 1:10). Кʹьтеба Пироз дәрһәԛа мәрьве бәхтәԝар ӧса дьбежә: «Шабуна ԝи һинкьрьна Хӧданда йә, шәв у рʹож сәр ԝе һинкьрьне кʹур дьфькьрә» (Зәбур 1:1, 2). Әшкәрә йә кӧ әм гәрәке бона хԝәндьна Кʹьтеба Пироз ԝәʹдә вәԛәтиньн. Ле гәло бона ве йәке, ԝәʹде һәри баш кʹәнге йә? Дәрәща мә һәр кәси жь һәв щӧдә дьбә. Фьрԛи тʹӧнә кʹәнге әм Кʹьтеба Пироз бьхуньн, фәрз әв ә кӧ әм һәр рʹож ве йәке бькьн. Бьраки бь наве Виктор ӧса дьбежә: «Әз һʹәз дькьм сьбәһ зу Кʹьтеба Пироз бьхуньн. Рʹаст бежьм, мьнрʹа һеса нинә сьбәһ зу рʹабьм, ле диса жи әв ԝәʹдә бона мьн баш ә, чьмки дина мьн начә сәр тьштед дьн, у һʹьше мьн рʹьнд дьхәбьтә». Дьԛәԝьмә дәрәща тә жи ӧса йә. Жь хԝә бьпьрсә: «Бона хԝәндьна Кʹьтеба Пироз, ԝәʹде һәри баш сәва мьн кʹәнге йә?»

СӘР РʹЕЗЕД КӦ ДЬХУНИ, КʹУР БЬФЬКЬРӘ

7-8. Чь дькарә бьбә мәʹни кӧ әм жь хԝәндьна Кʹьтеба Пироз бь тʹәмами кʹаре нәстиньн? Мәсәле бинә.

⁷ Щарна, әм тьштәки дьхуньн, ле паше найе бира мә кӧ мә чь хԝәндийә. Щара ԝәʹде хԝәндьна Кʹьтеба Пироз жи дькарә ӧса бьԛәԝьмә. Дьбәкә мә хԝәрʹа нет данийә, кӧ һәр рʹож чәнд сәрийа жь Кʹьтеба Пироз бьхуньн. Бәле, әв йәк нетәкә баш ә. Әм гәрәке хԝәрʹа нета дайньн у һәр тьшти бькьн кӧ бьгьһижьнә ԝан нета (1 Корьнтʹи 9:26). Ле сәва кӧ әм жь хԝәндьна Кʹьтеба Пироз бь тʹәмами кʹаре бьстиньн, әв йәк бәс нинә.

⁸ Ԝәрә әм ве мәсәле бьдьн бәр чʹәʹве хԝә: Баран тьштәки баш у лазьм ә. Ле һәрге дәмәкә кьнда гәләк баран бьбарә, дьбәкә әʹрд ида нькарьбә аве һьлчʹинә хԝә. Дәрәщәкә ӧсада кʹара баране ԝе тʹӧнә бә. Бь рʹасти ԝәʹдә лазьм ә, ԝәки әʹрд ава баране һьлчʹинә у тьшт шин бьн. Мина ве йәке, һәрге әм Кʹьтеба Пироз ләз-бәз бьхуньн, әме нькарьбьн сәр ԝе бьфькьрьн у тьштед кӧ мә хԝәндьнә бира хԝәда хԝәй кьн у биньн сери (Аԛуб 1:24).

9. Һәрге мә хԝәрʹа кьрийә хәйсәт ԝәки зу-зу Кʹьтеба Пироз бьхуньн, әм гәрәке чь бькьн?

⁹ Гәло тӧ щарна зу-зу Кʹьтеба Пироз дьхуни? Һәрге әре, тӧ чь дькари бьки? Дәстпекә һеди-һеди бьхунә, у ԝәʹде хԝәндьне йан жи паши хԝәндьне кʹур бьфькьрә. Әв йәк чәтьн нинә. Сәва кӧ мәщала тә һәбә кʹур бьфькьри, дьбәкә тӧ дькари бона лекʹолине дьһа зедә ԝәʹдә вәԛәтини. Йан жи, тӧ дькари дьһа кем рʹеза бьхуни у әв ԝәʹде кӧ бәр дьминә бьди хәбате, ԝәки кʹур сәр бьфькьри. Виктор ӧса дьбежә: «Әз һьндьк дьхуньм, щарна тʹәне сәрики. Әз сьбәһе зу дьхуньм, ләма жи һʹәта еваре мәщала мьн һәйә, кӧ дәрһәԛа ве сәре кӧ мьн хԝәндийә, бьфькьрьм». Тӧ чь методе жи бьди хәбате, ләз нәхунә, ԝәки жь хԝәндьне кʹаре бьстини (Зәбур 119:97; бьньһерʹә чаргошә бь наве «Жь Хԝә Бьпьрсә»).

10. Тӧ ван тьшта чь кӧ һин дьби, ча дькари әʹмьре хԝәда бьди хәбате? (1 Тʹесалоники 5:17, 18)

¹⁰ Фьрԛи тʹӧнә тӧ Кʹьтеба Пироз кʹәнге дьхуни у бона ве йәке чьԛас ԝәʹдә вәдьԛәтини, йа фәрз әв ә дина хԝә бьдейи, ԝәки тӧ ча дькари әʹламәтийа кӧ тә хԝәндийә, әʹмьре хԝәда бьди хәбате. Чахе тӧ Ньвисаред Пироз дьхуни, жь хԝә бьпьрсә: «Гәло әз ча дькарьм әве информасийайе ньһа йан дәмәкә незикда әʹмьре хԝәда бьдьмә хәбате?» Мәсәлә, бьдә бәр чʹәʹве хԝә кӧ тә 1 Тʹесалоники 5:17, 18 хԝәндийә (Бьхунә). Паши хԝәндьна ван дӧ рʹеза, бьсәкьнә у бьфькьрә кӧ тӧ нава рʹожеда чәнд щара у чьԛас кʹур дӧа дьки. Ӧса жи, сәр ван тьшта бьфькьрә бона чь тӧ шекьрдар и. Дьԛәԝьмә тӧ сафи ки бона се тьшта рʹазибуна хԝә Йаһоԝарʹа бьди кʹьфше. Һәрге тӧ һәма чәнд дәԛа жи сәр рʹезед Кʹьтеба Пироз кʹур бьфькьри, әв йәк ԝе али тә бькә Хәбәра Хԝәде фәʹм бьки у әʹмьре хԝәда бьди хәбате. Бьдә бәр чʹәʹве хԝә, һәрге тӧ һәр рʹож ве йәке бьки, тӧйе кʹарәкә чьԛас мәзьн бьстини! Ле тӧ гәрәке чь бьки һәрге тедәрдьхи, ԝәки тәрʹа лазьм ә гәләк алийава бейи гӧһастьне?

НЕТЕД РЕАЛИ ДАЙНӘ ПЕШИЙА ХԜӘ

11. Щарна тӧ чьрʹа дькари дьлтәнг би? Мәсәле бинә.

¹¹ Гава тӧ Кʹьтеба Пироз дьхуни, дьбәкә тӧ тедәрдьхи, ԝәки гәләк алийада гәрәке бейи гӧһастьне, у дьбәкә щара жь бо ве йәке тӧ дьлтәнг дьби. Бьдә бәр чʹәʹве хԝә тӧ иро Кʹьтеба Пироз дьхуни у педьһʹәси кӧ әм гәрәке фьрԛийе нәкьнә ортʹа мәрьва (Аԛуб 2:1-8). Тӧ фәʹм дьки, ԝәки ви алида гәрәке сәр хԝә бьхәбьти. Рʹожәк шунда, рʹезед кӧ тӧ дьхуни нишан дькьн, ԝәки әм гәрәке хәбәрдана хԝә контрол кьн (Аԛуб 3:1-12). У тӧ тедәрдьхи, кӧ щарна хәбәрдана тә һьнәки негатив ә. Ләма жи тӧ сафи дьки, ԝәки тӧйе тʹәви кәсед дьн ида бь позитив хәбәр ди. Рʹожа дьн, рʹезед кӧ тӧ дьхуни дьбежьн, ԝәки әм гәрәке тʹәви ԝе дьне һәвалтийе нәкьн (Аԛуб 4:4-12). Тӧ фәʹм дьки, ԝәки тӧ гәрәке дьһа зедә мьԛати хԝә би, һәла тӧ чь дьхуни йан чь тʹәмашә дьки. Рʹожа чара, тӧ ида бәр хԝә дькʹәви кӧ ча тӧйе һьмбәри һаԛас кемасийед хԝә шәрʹ бьки.

12. Һәрге тӧ бь сайа хԝәндьна Кʹьтеба Пироз тедәрхи кӧ гәрәке һьнә алийада сәр хԝә бьхәбьти, чьрʹа нәлазьм ә бона ве йәке дьлтәнг би? (Ӧса жи бьньһерʹә спартьн.)

¹² Һәрге тӧ бьвини кӧ тӧ гәрәке һьнә алийава хԝә рʹаст ки, дьлтәнг нәбә. Бь рʹасти, әв йәк дьдә кʹьфше ԝәки тӧ мьлук и у нетед тә рʹаст ьн. Гава мәрьве мьлук, йе кӧ ль һьмбәри хԝә һʹәлал ә, Кʹьтеба Пироз дьхунә, әԝ дина хԝә дьде кӧ әԝ гәрәке хԝә кʹижан алийава рʹаст кә.a Ӧса жи бир нәкә, кӧ ԝәʹдә лазьм ә, ԝәки мәрьв хԝә «ну» бькә, әв йәк дәрбәкерʹа набә (Колоси 3:10). Гәло чь дькарә али тә бькә, ԝәки тӧ бәрдәԝам ки Хәбәра Хԝәде бини сери?

13. Тӧ ча дькари нетед реали дайни пешийа хԝә? (Бьньһерʹә ӧса жи шькьл.)

¹³ Дәԝса һәр тьштед кӧ дьхуни дәрберʹа бини сери, нетед реали дайнә пешийа хԝә (Мәтʹәлок 11:2). Мәсәлә, ве методе бьдә хәбате: Хԝәрʹа сәр кʹахаз бьньвисә, кӧ кʹижан алийада тӧ дьхԝази хԝә рʹаст ки у сафи кә пешийе тӧйе сәр чь бьхәбьти. Паше нет дайнә ԝәки һеди-һеди һʹәму алийада хԝә рʹаст ки. Ле тӧ гәрәке жь чь дәстпеки?

14. Пешийе тӧ дькари кʹижан нета бьди пешийа хԝә?

¹⁴ Мәсәлә, серида тӧ дькари нетәкә һеса дайни пешийа хԝә. Йан жи, бьфькьрә кӧ бәри пешьн тӧ дьхԝази кʹижан алида хԝә рʹаст ки. Гава тӧ ида сафи ки, кӧ нета тә чь йә, тӧ дькари әʹдәбйәтед мә лекʹолин ки, мәсәлә бь аликʹарийа Индекса Ә′дәбйәта Бьрща Ԛәрәԝьлийе йан жи Рʹебәрийа Лекʹолинкьрьне бона Шәʹдед Йаһоԝа. Дәрһәԛа нета хԝә дӧа бькә у жь Йаһоԝа рʹәща кә, ԝәки хԝәстьн у ԛәԝата тә зедә кә (Филипи 2:13). Паше ль гора тьштед кӧ тӧ һин буйи, һәрәкʹәт бькә. Чьԛас тӧ незики нета хԝәйә пешьн би, һаԛас хԝәстьна тә ԝе зедә бә, кӧ бьгьһижи нетәкә дьн жи. Бь рʹасти, гава тӧ сәр хԝә дьхәбьти у хәйсәтәки баш нав хԝәда пешда тини, тәрʹа дьһа һеса дьбә тьштед дьнда жи бейи гӧһастьне.

БЬРА ХӘБӘРА ХԜӘДЕ СӘР ТӘ ҺʹӦКӦМ КӘ

15. Хьзмәткʹаред Йаһоԝа чьда жь мәрьвед дьн щӧдә дьбьн? (1 Тʹесалоники 2:13)

¹⁵ Һьнә кәс дьбежьн кӧ ԝана Кʹьтеба Пироз гәләк щар хԝәндийә. Ле гәло әԝана бь рʹасти баԝәрийа хԝә Кʹьтеба Пироз тиньн? Гәло әԝана ль гора Кʹьтеба Пироз дьжин? Сәд һʹәйф, кӧ гәләк мәрьв ве йәке накьн. Ле әм ӧса ниньн! Ча Мәсиһийед ԛьрʹна йәке, әм Кʹьтеба Пироз «чаԝа хәбәра Хԝәде» ԛәбул дькьн у изьне дьдьн ԝәки әԝ сәр мә һʹӧкӧм кә (Бьхунә 1 Тʹесалоники 2:13).

16. Чь дькарә али мә бькә, кӧ «хәбәре бьԛәдиньн»?

¹⁶ Щарна һеса нинә, кӧ әм Кʹьтеба Пироз бьхуньн у әʹмьре хԝәда бьдьнә хәбате. Мәсәлә, дьбәкә мәрʹа чәтьн бә бона хԝәндьне ԝәʹдә бьвиньн. Йан жи, дьбәкә әм зу-зу дьхуньн у сәр ве йәке кʹур нафькьрьн. Чәтьнайикә дьн жи дьбәкә әв ә, кӧ гәләк кемасийед мә һәнә, кʹижан кӧ әм гәрәке рʹаст кьн. Ле һʹале тә чь бә жи, дьлтәнг нәбә. Бь аликʹарийа Йаһоԝа тӧ дькари сәркʹәви. Ԝәрә әм аликʹарийа ԝи ԛәбул кьн у нәбьнә мина ԝан мәрьва, йед кӧ хәбәре тʹәне дьбьһен у паше бир дькьн, ле һәр тьшти бькьн, ԝәки хәбәре биньн сери. Чьԛас әм Кʹьтеба Пироз бьхуньн у ль гора ве бьжин, һаԛас әме бәхтәԝар бьн (Аԛуб 1:25).