Мьн Тʹьме Бәрдәԝам Дькьр Һин бьм

Әз сала 1927 бажарәки бьчʹукда һатьмә буйине, незики Чикагойе (Дәԝләтед Америкайа Йәкбуйи). Әм пенщ зарʹ бун, Щета, Дон, әз, Карл у Щой. Хԝәстьна мә гьшка әв бу, кӧ бь дьл у щан Йаһоԝарʹа хьзмәт кьн. Сала 1943 Щета чу кʹома дӧда, йа Мәкʹтәба Гиләде. Дон сала 1944-да дәстпекьр Бәйтʹәла Бруклинеда хьзмәт кә (Нийу Йорк), Карл сала 1947 у Щой жи сала 1951-да дәстпекьрьн Бәйтʹәла Бруклинеда хьзмәт кьн. Һьм хушк-бьред мьн, һьм жи де-баве мьн мьнрʹа бунә мәсәла баш.

МАЛБӘТА МЬН РʹАСТИЙЕ ПЕДЬҺʹӘСӘ

Де-баве мьн Кʹьтеба Пироз дьхԝәндьн у Хԝәде һʹәз дькьрьн. Ԝана али мә дькьр, кӧ әм жи Хԝәде һʹәз бькьн. Ле паши ве йәке, кӧ баве мьн ԝәʹде Шәрʹе Һʹәмдьнйайейә I ль Әԝропайе ча әскәр шәрʹ дькьр, әԝи ида ԛәдьре дере нәдьгьрт. Дийа мьн гәләк жь Хԝәде рʹази бу, кӧ баве мьн сах-сьламәт вәгәрʹийа мале, у әԝе жерʹа гот: «Карл, ԝәрә әм мина бәре диса һәрʹьнә дере». Баве мьн гот: «Әзе тʹәви тә һʹәта дере бем, ле әзе нәкʹәвьмә һӧндӧрʹ». Әԝе пьрси: «Чьрʹа?» Әԝи гот: «Шәрʹда хьзмәткʹаред дере, йед кӧ жь религийәкә бун, һәр кәси алийе хԝәда әскәра у чʹәкед ԝан кʹәрәм дькьрьн, кӧ мьԛабьли һәв шәрʹ бькьн. Гәло Хԝәде пьштгьрийа һәрдӧ алийа дькьр?»

Паше гава дийа мьн дереда бу, дӧ Шәʹдед Йаһоԝа һатьнә мала мә. Ԝана дӧ пʹаред кʹьтеба бь наве Рʹонайи, йед кӧ кʹьтеба Әʹйанти зәлал дькьрьн, пʹешкʹеши баве мьн кьрьн. Әв кʹьтеб дина баве мьн кʹьшандә сәр хԝә у әԝи әв кʹьтеб ԛәбул кьрьн. Гава дийа мьн әв кʹьтеб дитьн, әԝе дәстпекьр ван кʹьтеба бьхунә. Щарәке рʹожнәʹмеда мәрьв тʹәглиф дькьрьн, кӧ бь сайа кʹьтебед Рʹонайи, һинбуна Кʹьтеба Пироз дәстпекьн. Дийа мьн сафи кьр һәрʹә ԝедәре. Жьнькәкә әʹмьрда мәзьн дәри вәкьр. Дийа мьн кʹьтебәк һьлда у пьрси: «Вьра һун ве кʹьтебе лекʹолин дькьн?» Әԝе гот: «Бәле, дәлала мьн, кʹәрәм кә пешда ԝәрә». Һʹәфтийа дьн, дийа мьн, әз у хушк-бьред мьн тʹәви хԝә бьрьн у паши ве йәке, әм тʹьме дьчунә ԝедәре.

Сәр щьватәке, бьре кӧ щьват дәрбаз дькьр готә мьн, ԝәки әз Зәбур 144:15 бьхуньм. Ве рʹезеда те готьне, кӧ хьзмәткʹаред Йаһоԝа бәхтәԝар ьн. Һьм әв рʹез һьм жи дӧ рʹезед дьн гәләк дьле мьн гьртьн, демәк 1 Тимотʹейо 1:11, кʹидәреда те готьне кӧ Йаһоԝа Хԝәдеки бәхтәԝар ә, у Әфәси 5:1, кӧ әм гәрәке «чʹәʹв бьдьнә Хԝәде». Мьн фәʹм кьр, кӧ әз гәрәке жь хьзмәтийе шабуне бьстиньм у бона ве ԛәдьре кӧ мьнрʹа һатийә дайине, жь Әʹфьрандар рʹази бьм. Тʹәмамийа әʹмьре хԝә, мьн һәртʹьм хирәт дькьр, кӧ ван дӧ тьшта бькьм.

Щьвата һәри незик Чикагойеда бу, у ԝәкә 32 километра дури мә бу. Диса жи әм дьчунә ԝедәре у занәбуна мьн дәрһәԛа Кʹьтеба Пироз чьԛас дьчу, һаԛас зедә дьбу. Те бира мьн кӧ щарәке бьре кӧ щьват дәрбаз дькьр, жь Щетайе пьрси у әԝе щаба хԝә да. Гава мьн гӧһ дьда щаба ԝе, мьн хԝәрʹа гот: «Мьн әв щаб заньбу. Мьне жи бькарьбуйа щаба хԝә бьда». Жь ве рʹоже, мьн ида хԝә бона щьвате һазьр дькьр у щаба хԝә дьда. Хенщи ве йәке, әз у хушк-бьред мьн, рʹӧһʹанида пешда дьчун, у сала 1941-да әз һатьмә ньхӧмандьне.

ӘЗ СӘР ЩЬВАТЕД МӘЗЬН ЖЬ ЙАҺОԜА ҺИН ДЬБЬМ

Щьвата мәзьн, йа сала 1942, кӧ ль Кливленде (Оһайо) дәрбаз бу, ԛә бира мьн начә. Дәԝләтед Йәкбуйида жь 50 щийа зедәтьр сәр ве щьвата мәзьн пе телефоне текли бьбун. Әз у малбәта мьн незики щийе щьвата мәзьн чадьрада дьман. Ԝи чахи, Шәрʹе Һʹәмдьнйайейә II дьчу, у мьԛабьлибуна һьндава Шәʹдед Йаһоԝа зедә дьбу. Еваре чәнд бьра әʹрәбед хԝә ӧса данибун, кӧ позе әʹрәба дәрва бун. Һәр әʹрәбәкеда, кәсәки тʹәмамийа шәве нобәдари дькьр. Ԝана гот, кӧ гава тьштәк бьԛәԝьмә, бьра гәрәке шәԝԛа фаред әʹрәбед хԝә вехьн у сигнале хьн, ԝәки кәсед дьн бьһатана һәԝара ԝан. Мьн хԝәрʹа гот, ԝәки ‹хьзмәткʹаред Йаһоԝа бона һәр тьшти һазьр ьн!› Әз бь дьләки рʹьһʹәт хәԝрʹа чум у тʹӧ проблем пешда нәһат.

Гәләк сал шунда, гава әз дәрһәԛа ве щьвата мәзьн дьфькьрим, мьн фәʹм кьр кӧ тьрс дьле дийа мьнда тʹӧнә бу. Әԝе бь тʹәмами хԝә дьспартә Йаһоԝа у тʹәшкиләта ԝи. Әз мәсәла ԝейә баш тʹӧ щар бир накьм.

Һьнә ԝәхт пешийа ԝе щьвата мәзьн, дийа мьн бу пешәнга һәртʹьм. Ләма жи әԝе рʹьнд гӧһ да готаред дәрһәԛа хьзмәтийа һәртʹьм. Гава әм вәдьгәрʹийанә мале, әԝе гот: «Әз дьхԝазьм бәрдәԝам кьм, ча пешәнг хьзмәт кьм, ле әз нькарьм һьм ча пешәнг хьзмәт кьм, һьм жи һʹәму шьхӧлед мале тʹәне бькьм». Әԝе пьрси, һәла әм һазьр ьн али ԝе бькьн, у мә жи гот, бәле. Ләма жи әԝе мәрʹа гот, кӧ һәр шәбәԛ пешийа тәʹште, бьра һәр йәк жь мә одәк, йан дӧ ода тʹәмьз кә. Чахе әм жь мале дәрдькʹәтьн у дьчунә мәкʹтәбе, әԝе дина хԝә дьда һәла мал һәвдайи йә у паше дьчу хьзмәтийе. Шьхӧлед ԝе гәләк бун, ле диса жи әԝ тʹьме мә дьбу хԝәйи. Гава әм нивро дьһатьнә мале сәр нанхԝарьне, у паши мәкʹтәбе жи, әԝе тʹьме ԝәʹдә бона мә вәдьԛәтанд. Щарна әм паши мәкʹтәбе тʹәвайи дьчунә хьзмәтийе. Әв йәк али мә дькьр, ԝәки фәʹм бькьн, кӧ чь те һʹәсабе бьбьнә пешәнг.

ДӘСТПЕКА ХЬЗМӘТИЙА ҺӘРТʹЬМ

Гава әз 16 сали бум, әз бумә пешәнг. Ԝи чахи баве мьн һе Шәʹде Йаһоԝа нибу. Диса жи әԝи дьхԝәст бьзаньбә, кӧ хьзмәтийа мьн ча дьчә. Рʹожәке мьн ԝирʹа гот, кӧ мьн чьԛас хирәт дькьр жи, диса жи мьн нькарьбу кәсәк бьдита, йе кӧ һинбуна Кʹьтеба Пироз бьхԝазә. Паше мьн гот: «Тӧ нахԝази кӧ әз тʹәви тә һинбуна Кʹьтеба Пироз дәрбаз кьм?» Әԝ һьнәк фькьри у гот: «Чьрʹа жи на!» Бәле, хԝәндәкʹаре мьни пешьн, баве мьн бу. Чьԛас ԛәдьрәки мәзьн бу!

Мә тʹәвайи кʹьтеба «Рʹасти Ԝе Ԝә Аза кә» лекʹолин дькьр. Баве мьн али мьн кьр, ԝәки әз Кʹьтеба Пироз дьһа баш лекʹолин кьм у мәрьва һин кьм. Мәсәлә, еварәке чахе мә абзасәк хԝәнд, әԝи гот: «Әз фәʹм дькьм кӧ ве кʹьтебеда чь те готьне, ле тӧ жь кʹӧ зани ԝәки гьлийед жь ве кʹьтебе рʹаст ьн?» Мьн нькарьбу щаба ԝи бьда, ләма жи мьн гот: «Ньһа әз нькарьм щаба тә бьдьм, әзе лекʹолин кьм у бежьм». Мьн ӧса жи кьр. Мьн һьнә рʹез дитьн, йед кӧ ван фькьра шьровәдькьрьн, кʹижан кӧ мә лекʹолин дькьр, у мьн хԝә бона һинбуне дьһа баш һазьр дькьр. Бь сайа ве йәке, һьм әз һьм баве мьн, рʹӧһʹанида пешда чун. Баве мьн ль гора ван тьшта дьжит, чь кӧ әԝ педьһʹәсийа, у сала 1952-да әԝ һатә ньхӧмандьне.

ҺИНБУНА МЬН БӘЙТʹӘЛЕДА БӘРДӘԜАМ БУ

Гава әз 17 сали бум, әз жь мале чум. Щетаa бу мисйонер, Дон жи чу Бәйтʹәле. Һәрда жи хьзмәтийа хԝә һʹәз дькьр, у әв йәк дьле мьн жи ԛәԝи дькьр. Ләма жи мьн бланка һьм бона хьзмәтийа Бәйтʹәле, һьм жи бона Мәкʹтәба Гиләде тʹьжи кьр, у әв сафикьрьн да дәсте Йаһоԝа. Ахьри чь бу? Сала 1946 мьн тʹәглифи Бәйтʹәле кьрьн.

Гәләк сал мьн Бәйтʹәледа щурʹә-щурʹә шьхӧл дькьр, у әз гәләк тьштед тʹәзә һин дьбум. Нава 75 салед кӧ мьн Бәйтʹәледа дәрбаз кьрьнә, әз тьштед ӧса һин бум, ча чекьрьна кʹьтеба, һʹәсабдари у ӧса жи шьхӧле кʹьрʹин-фьротане. Ле йа һәрә фәрз әв ә, кӧ Бәйтʹәледа ԝәʹде шеԝьркьрьна Кʹьтеба Пирозә шәбәԛе у ԝәʹде готара, әз бәрдәԝам дькьм занәбуна кʹур сәр һʹиме Кʹьтеба Пироз бьстиньм.

Ӧса жи әз жь бьре хԝәйи бьчʹук Карл, йе кӧ сала 1947-да һатә Бәйтʹәле, һин дьбум. Әԝи Кʹьтеба Пироз гәләк баш лекʹолин дькьр у һин дькьр. Щарәке мьн готар һазьр дькьр у жь Карл аликʹари хԝәст. Мьн ԝирʹа гот, кӧ мьн гәләк информасийа тʹоп кьрийә, ле ньзаньм чаԝа бьдьмә хәбате. Әԝи гот: «Щоел, тʹема тә дәрһәԛа чь йә?» Мьн фәʹм кьр, кӧ әԝи чь дьхԝәст бьгота. Мьн гәрәке тʹәне әв информасийа бьда хәбате, йа кӧ тʹемева гьредайи бу. Әз ве дәрсе тʹӧ щар бир накьм.

Сәва кӧ әм Бәйтʹәледа шабуна хԝә ӧнда нәкьн, әм гәрәке мьзгинийе жи бь хирәт бәла кьн. Щарна хьзмәтийеда ԛәԝьмандьнед һʹәԝас дьԛәԝьмьн. Те бира мьн кӧ рʹожәке мә бәри еваре ль Бронксе (Нийу Йорк) хьзмәт дькьр. Әз у бьрак чунә бал жьнькәке, йа кӧ бәре журналед мә дьхԝәнд. Чахе мә насийа хԝә да һәвдӧ, мә гот: «Иро әм мәрьварʹа дәрһәԛа гьлийед һʹәԝас жь Кʹьтеба Пироз дьбежьн». Әԝе гот: «Һәрге һун дьхԝазьн дәрһәԛа Кʹьтеба Пироз хәбәр дьн, кʹәрәм кьн, пешда ԝәрен». Мә дәрһәԛа Пʹадшатийа Хԝәде у дьнйа тʹәзә чәнд рʹез хԝәндьн у шьровәкьрьн. Әв йәк ԝе хԝәш һат у һʹәфтек шунда, әԝе гази чәнд һәвалед хԝә жи кьр. Ԝәʹдә шунда әԝ у мере ԝе бунә Шәʹдед Йаһоԝа.

ЖЬ ҺӘВАЛЗӘԜАЩА ХԜӘ ҺИН ДЬБЬМ

Мьн ԝәкә 10 сала хԝәрʹа һәвалзәԝащ дьгәрʹийа, пешийа кӧ әз тʹәви ве хушке бумә нас, кʹижан кӧ бу кʹӧлфәта мьн. Чь али мьн кьр жьнәкә лайиԛ хԝәрʹа бьжберьм? Мьн Йаһоԝарʹа дӧа дькьр у әз дьфькьрим, кӧ әзе паши зәԝаще чь бькьм.

Сала 1953 паши щьвата мәзьн, йа кӧ сәр Стадийона Йанки дәрбаз бу, әз рʹасти хушкәке һатьм, бь наве Марийа Аниол. Әԝ у хушка мьн Щета, Мәкʹтәба Гиләдеда кʹома дӧда тʹәвайи дәрбаз бун у тʹәвайи ча мисйонер хьзмәт дькьрьн. Марийайе бь дьл у щан мьнрʹа дәрһәԛа хьзмәтийа хԝәйә сәр гьравед Карибе у һинбунед Кʹьтеба Пироз гьли дькьр. Чьԛас мә һәвдӧ нас дькьр, һаԛас мә фәʹм дькьр кӧ нетед мә мина һәв ьн. Мә һәвдӧ һʹәз кьр, у мәһа Нисане, сала 1955-да, әм зәԝьщин. Марийа бона мьн пʹешкʹеша жь Йаһоԝа бу, у әԝ мьнрʹа бу мәсәләкә баш. Әԝ бона һәр щабдарикә кӧ жерʹа дьһатә дайине, гәләк рʹази бу. Әԝ йәкә хирәт у сәр хԝә бу, жь дьл дькʹәтә һʹәйра кәсед дьн у жь һәр тьшти зедәтьр, дина хԝә дьда шьхӧле Пʹадшатийа Йаһоԝа (Мәтта 6:33). Мә се сала шьхӧле бәрпьрсийартийеда кʹар дькьр, у паши ве йәке, сала 1958-да мә тʹәглифи Бәйтʹәле кьрьн.

Әз жь Марийайе гәләк тьшт һин бум. Мәсәлә, гава әм тʹәзә зәԝьщи бун, мә сафи кьр ԝәки Кʹьтеба Пироз тʹәвайи бьхуньн у һәр щар ԝәкә 15 рʹеза бьхуньн. Һәр кәс жь мә чәнд рʹез дьхԝәнд у шьровәдькьр. Ӧса жи мә шеԝьр дькьр ча ван рʹеза жийина хԝәда бьдьнә хәбате у жь ве йәке кʹаре бьстиньн. Марийайе гәләк щар дәрһәԛа ве йәке гьли дькьр, чь кӧ әԝ ԝәʹде Мәкʹтәба Гиләде, йан жи ԝәʹде хьзмәтийа мисйонерти һин бьбу. Бь сайа ве йәке әз һин бум, кӧ ча хушка һелан кьм у дьһа баш готара бьхуньм (Мәтʹәлок 25:11).

Кʹӧлфәта мьнә дәлал, Марийа, сала 2013-да мьр. Әз гәләк бира ԝе дькьм у һʹьзрәта ԝе рʹоже мә, кӧ дьнйа тʹәзәда диса ле бьвиньм. Һʹәта һьнге, әз дьхԝазьм бәрдәԝам кьм һин бьм у бь тʹәмамийа дьл хԝә бьсперьм Йаһоԝа (Мәтʹәлок 3:5, 6). Гава әз дьдьмә бәр чʹәʹве хԝә, кӧ дьнйа тʹәзәда хьзмәткʹаред Йаһоԝа ԝе чь бькьн, әз ша дьбьм у дьле мьн рʹьһʹәт дьбә. Һьнге әме жь Мамостәйе Мәзьн, Йаһоԝа, гәләк тьштед тʹәзә һин бьн. Әԝ бона ве йәке жь ԝи рʹази мә, кӧ әԝ һʹәта ньһа гәләк тьшт әз һин кьрьмә у ԛәнщийа хԝәйә мәзьн мьнрʹа дьдә кʹьфше!