Әм Чь Һин Дьбьн жь Кʹәрәмәта Иса Дәрһәԛа Нан?

1. Ԝәʹде бәре, нан бона мәрьва чьԛас фәрз бу?

ԜӘʹДЕ бәре нан ча хԝарьна һәрә фәрз дьһатә һʹәсабе (Дәстпебун 14:18; Луԛа 4:4). Ләма жи Кʹьтеба Пирозда хәбәра «нан» щарна бона һʹәму хԝарьна те хәбьтандьне (Мәтта 6:11). Дӧ кʹәрәмәтед Иса нанва гьредайи бун (Мәтта 16:9, 10). Кʹьтеба Йуһʹәнна сәре 6 бәʹса йәк жь ван кʹәрәмәта дькә. Ԝәрә әм бьвиньн, кӧ әм жь ве сәрһатийе чь дәрса дькарьн һин бьн.

2. Бь һʹәзара мәрьв чьрʹа һʹәԝще хԝарьне бун?

² Паши кӧ шандийед Иса мьзгини щики бәла кьрьбун, Иса әԝана бь ԛәйике бьрьнә алийе дьнә бәʹра Щәлиле, кӧ ԝедәре һеса бьн (Маркос 6:7, 30-32; Луԛа 9:10). Әԝана чунә щики хәԝлә незики Бәйтсайдайе. Ле һьнә ԝәхт шунда бь һʹәзара мәрьв һатьнә ԝедәре. Гава Иса мәрьв дитьн, әԝ әʹщьз нәбу, ле бь дьловани дәрһәԛа Пʹадшатийа Хԝәде әԝ һин дькьрьн у кәсед нәхԝәш ԛәнщ дькьрьн. Бәри еваре, шанди хәмгин бун кӧ хәлԛ ԝе чь бьхԝә. Щәм һьнә мәрьва дьбәкә һьнә хԝарьн һәбу, ле һʹәчʹи зәʹф жь ԝан гәрәке бьчуна гӧндед дәр-дор, ԝәки хԝәрʹа хԝарьне бькʹьрʹьн (Мәтта 14:15; Йуһʹәнна 6:4, 5). Ле гәло Иса чь кьр?

ИСА КʹӘРӘМӘТӘКЕ ДЬКӘ

3. Иса шандийед хԝәрʹа чь гот? (Бьньһерʹә ӧса жи шькьл.)

³ Иса шандийед хԝәрʹа ӧса гот: «Нәлазьм ә кӧ әԝана һәрʹьн. Һун хԝарьне бьдьнә ԝан» (Мәтта 14:16). Ле ԝана ча дькарьбу әв йәк бькьрана? Ԝедәре ԝәкә 5 000 мер һәбун. Тʹәви жьн у зарʹа, һәжмара мәрьва дьԛәԝьмә ԝәкә 15 000 бу (Мәтта 14:21). Шандийе Иса, Әндраԝьс, ӧса гот: «Вьра гәдәки бьчʹук һәйә, щәм ԝи пенщ нанед щәһ у дӧ мәʹсийед бьчʹук һәнә. Ле ԝе чаԝа тʹера һаԛас мәрьва бькә?» (Йуһʹәнна 6:9). Ԝи чахи, гәләк мәрьва нане щәһ у мәʹсийед зьһакьри дьхԝарьн. Ле һаԛас мәрьв ԝе чаԝа пе нан у мәʹсийед кӧ дәсте ви гәдәйида һәбун, тʹер буна?

4. Әм дькарьн жь Йуһʹәнна 6:11-13 чь дәрса һин бьн? (Бьньһерʹә ӧса жи шькьл.)

⁴ Иса йәки меванһʹәз у дьлован бу, ләма әԝи мәрьварʹа гот, кӧ әԝана кʹом бь кʹом сәр чʹере рʹунен (Маркос 6:39, 40; бьхунә Йуһʹәнна 6:11-13). Кʹьтеба Пироз дьбежә, кӧ Иса бона нан у мәʹсийа шькьри да Баве хԝә. Әв йәк бь рʹасти жи лазьм бу, чьмки хԝарьн дайина Йаһоԝа Хԝәде йә. Фьрԛи тʹӧнә әм тʹәне бьн, йан жи дора мә мәрьв һәбьн, ԝәрә әм жи мина Иса пешийа нанхԝарьне дӧа бькьн. Паше Иса хԝарьн да бәлакьрьне, у һәр кәси тʹер хԝар. Иса гот кӧ хԝарьна бәрмайи тʹоп кьн, дьԛәԝьмә сәва ве йәке, кӧ паше бьһата хԝарьне. Әв йәк бона мә мәсәләкә баш ә. Ԝәрә әм жи чʹәʹв бьдьнә Иса, у чь дәсте мәда һәйә бь билани хәрщ кьн у тʹӧ тьшти пʹучʹ нәкьн. Һәрге зарʹед тә һәнә, ве сәрһатийе ԝанрʹа бьхунә у нишани ԝан кә кӧ чьрʹа фәрз ә, ԝәки әм мина Иса пешийа нанхԝарьне Йаһоԝарʹа дӧа бькьн у һьндава мәрьвада мәрʹд у меванһʹәз бьн.

5. Паши кʹәрәмәте хәлԛе чь хԝәст бькә, ле Иса чь кьр?

⁵ Мәрьв жь һинкьрьна Иса у кʹәрәмәтед ԝи һʹәйр-һʹӧжмәкʹар дьман. Ԝана заньбу кӧ Муса бәреда готьбу, ԝәки Хԝәде ԝе пʹехәмбәрәки мәзьн бьшинә. Ләма жи дьбәкә әԝана дьфькьрин кӧ Иса йә әв пʹехәмбәр (Ԛануна Дӧщари 18:15-18). У дьԛәԝьмә әԝана дьфькьрин, кӧ Иса дькарә бьбә сәрԝерәки баш у нан бьдә тʹәмамийа мьләт. Ләма жи ԝана хԝәст «ԝи бь дәсте зоре бькьнә пʹадша» (Йуһʹәнна 6:14, 15). Һәрге Иса изьн бьда кӧ әԝана ԝи бькьнә пʹадша, әԝе тʹәв политика Щьһуйа бьбуйа йәк, кӧ бьн сәрԝертийа Рʹомеда бун. Ле Иса һьлкʹьшийа чʹийе. Демәк, мәрьва чь жи дькьрьн, йәкә Иса тʹәв политике нәдьбу. Әв йәк дәрсәкә чьԛас баш ә бона мә!

6. Әм ча дькарьн чʹәʹв бьдьнә Иса? (Бьньһерʹә ӧса жи шькьл.)

⁶ Һәмьки тʹӧ кәс ԝе мәрʹа нәбежә, ԝәки әм бь кʹәрәмәти нан бьдьнә мәрьва йан нәхԝәша ԛәнщ кьн, у ӧса жи тʹӧ кәс ԝе мә нәкә пʹадша йан сәроке ԝәлатәки. Ле дьбәкә әԝана бьхԝазьн, кӧ ԝәʹде һьлбьжартьна, әм дәнге хԝә бьдьнә кәсәки, йе кӧ ԝе бь тʹәхмина ԝан бьбә сәрԝерәки баш. Ле Иса тʹӧ щар тʹәви политике нәдьбу. Щарәке әԝи ӧса гот: «Пʹадшатийа мьн нә жь ве дьнйайе йә» (Йуһʹәнна 17:14; 18:36). Ԝәрә әм чʹәʹв бьдьнә фькьр у кьред Иса, у мина ԝи пьштгьрийа Пʹадшатийа Хԝәде бькьн, мьзгинийа ве Пʹадшатийе бәла кьн у дӧа кьн, ԝәки әв Пʹадшати бе (Мәтта 6:10). Ԝәрә ньһа әм бьньһерʹьн һәла әм диса чь дәрса дькарьн һин бьн жь ве кʹәрәмәте, чахе Иса бь нан мәрьв тʹер кьрьн.

«МӘʹНА КʹӘРӘМӘТА ДӘРҺӘԚА НАН»

7. Иса у шандийа чь кьрьн? (Йуһʹәнна 6:16-20)

⁷ Паши кӧ Иса мәрьв тʹер кьрьн, әԝи шандийед хԝә бь ԛәйике шандьнә Кәпәрнаһуме, ле хԝәха һьлкʹьшийа сәр чʹийе, сәва кӧ жь ԝан мәрьва дур кʹәвә, йед кӧ дьхԝәстьн ле бькьнә пʹадша (Бьхунә Йуһʹәнна 6:16-20). Гава шанди бәʹреда бун, фьртонә рʹабу у тʹәви хԝә байе ԛәԝи у пʹелед мәзьн ани. Паше Иса сәр аверʹа бәрбь ԛәйика ԝан мәшийа у Пәтрусрʹа гот, кӧ әԝ жи сәр аверʹа бе (Мәтта 14:22-31). Гава Иса кʹәтә ԛәйике, ба сәкьни. Шагьртед ԝи ӧса готьн: «Рʹасти жи тӧ Кӧрʹе Хԝәде йи»a (Мәтта 14:33). Диса жи ԝана фәʹм нәкьр кӧ һәвгьредана ве кʹәрәмәте у кʹәрәмәта нан, чь бу. Кʹьтеба Маркосда ӧса те готьне: «[Шанди] сәр ве йәке зәндәгьрти ман, чьмки әԝана мәʹна кʹәрәмәта дәрһәԛа нан жи һе фәʹм нәкьрьбун. Дьле ԝан бона фәʹмкьрьне һе һазьр нибу» (Маркос 6:50-52). Бәле, ԝана фәʹм нәкьр кӧ бона ԝан кʹәрәмәта Йаһоԝа ԛәԝат дабу Иса. Ләма жи Иса чәндәк шунда диса бәʹса кʹәрәмәта дәрһәԛа нан кьр у дәрсәкә дьн да мә.

8-9. Мәрьва чьрʹа данә пәй Иса? (Йуһʹәнна 6:26, 27)

⁸ Рʹожәк шунда, мәрьва дит кӧ Иса у шандийед ԝи жь ԝедәре чубун. Ләма жи әԝана кʹәтьнә ԛәйика у бәре хԝә данә Кәпәрнаһуме ԝәки Иса бьвиньн (Йуһʹәнна 6:22-24). Гәло нет у хԝәстьна ԝанә сәрәкә әԝ бу кӧ дәрһәԛа Пʹадшатийа Хԝәде һе зедә пебьһʹәсьн? На. Әԝана һе зедә кʹәтьбунә һʹәйра зьке хԝә. Ле әм ве йәке жь кʹӧ заньн?

⁹ Дина хԝә бьдьне, гава мәрьв незики Кәпәрнаһуме Иса дитьн, чь ԛәԝьми. Иса рʹастә-рʹаст гот, кӧ әԝана һәри зедә пәй һʹәԝщед хԝә кʹәтьнә. Әԝи гот кӧ ԝана тʹәне «жь ԝи нани хԝарийә у тʹер бунә . . . кӧ иро һәйә у сьбе тʹӧнә йә». Ләма жи әԝи ԝанрʹа гот, ԝәки дәԝса ве йәке, әԝана гәрәке «бьхәбьтьн бона хԝарьна кӧ тʹӧ щар хьраб набә у жийина һʹәта-һʹәтайе дьдә» (Бьхунә Йуһʹәнна 6:26, 27). Иса гот кӧ Баве ԝи дькарә хԝарьнәкә ӧса бьдә ԝан. Фькьра кӧ хԝарьн дькарә мәрьва бәрбь жийина һʹәта-һʹәтайе бьвә, бе шьк ԝанрʹа әʹщеб һатә хӧйане. Гәло кʹижан хԝарьне дькарьбу тьштәки ӧса бькьра, у гӧһдаред Иса ча дькарьбун әв хԝарьн бьстандана?

10. Сәва кӧ мәрьва жийина һʹәта-һʹәтайе бьстанда, гәрәке ԝана чь бькьра?

¹⁰ Щьһуйа дьхԝәст бьзаньбьн, кӧ әԝана гәрәке чь бькьн сәва кӧ хԝарьнәкә ӧса бьстиньн. Әԝана дьбәкә дьфькьрин кӧ гәрәке ль гора Ԛануна Муса һьнә тьшта бькьн. Ле Иса ԝанрʹа гот: «Хԝәде дьхԝазә ԝәки һун ԝи баԝәр бькьн, йе кӧ әԝи шандийә» (Йуһʹәнна 6:28, 29). Бәле, чаԝа Иса бәре жи готьбу, сәва кӧ кәсәк «жийина һʹәта-һʹәтайе бьстинә», әԝ гәрәке баԝәрийа хԝә кәсе кӧ Хԝәде шандийә, бинә (Йуһʹәнна 3:16-18, 36). Паше Иса һе рʹьнд зәлал кьр, кӧ әм гәрәке чь бькьн, ԝәки жийина һʹәта-һʹәтайе бьстиньн (Йуһʹәнна 17:3).

11. Әм жь кʹӧ заньн кӧ дина Щьһуйа дьһа зедә сәр хԝарьне бу? (Зәбур 78:24, 25)

¹¹ Ван Щьһуйа ԛәбул нәдькьр, кӧ әԝана гәрәке баԝәрийа хԝә Иса биньн. Ԝана жь ԝи пьрси: «Ижа тӧйе кʹижан кʹәрәмәте бьки, ԝәки әм бьвиньн у тә баԝәр бькьн?» (Йуһʹәнна 6:30). Ԝана гот кӧ кал-бавед ԝан рʹожед Мусада мана стандьбун, йа кӧ бона ԝан ча нан бу (Нәһәмийа 9:15; бьхунә Зәбур 78:24, 25). Те кʹьфше кӧ һʹьше ԝан һе сәр хԝарьне бу. Хенщи ве йәке, чахе Иса дәрһәԛа «нане рʹаст жь әʹзмен», кӧ «жийине дьдә», хәбәр дьда, ԝана жь ԝи нәпьрси кӧ мәʹна ве готьне чь йә (Йуһʹәнна 6:32). Ԝана һаԛас дина хԝә дьда һʹәԝщед хԝәйә физики, ԝәки гӧһ нәдьданә гьлийед Иса кӧ чаԝа жийина һʹәта-һʹәтайе бьстиньн. Әм дькарьн жь ве сәрһатийе чь һин бьн?

ДИНА МӘ ГӘРӘКЕ ҺӘРИ ЗЕДӘ СӘР ЧЬ БӘ?

12. Чаԝа кӧ Иса готьбу, чь йә лапә фәрз?

¹² Кʹьтеба Йуһʹәнна сәре 6-да дәрсәкә фәрз һәйә. Дина мә гәрәке дьһа зедә сәр достийа мә тʹәви Хԝәде бә. Гава Иса жь алийе Мире-щьнада һатә щерʹьбандьне, һьнге жи әԝи фәрзбуна ве йәке да кʹьфше (Мәтта 4:3, 4). Ԝәʹде Готара сәр Чʹийе жи әԝи готьбу, кӧ гәрәке әм фәʹм бькьн, ԝәки әм «һʹәԝще Хԝәде нә» (Мәтта 5:3). Ләма жи ԝәрә әм жь хԝә бьпьрсьн: «Гәло жийина мьн нишан дькә кӧ әз һе зедә достийа хԝә тʹәви Йаһоԝа ԛимәт дькьм, нә кӧ хԝәстьнед хԝәйә физики?»

13. (а) Чьрʹа тьштәки хьраб ве йәкеда тʹӧнә, кӧ әм жь хԝарьн-вәхԝарьне ләзәте бьстиньн? (б) Әм гәрәке гӧһ бьдьнә кʹижан ширәта Паԝлосе шанди? (1 Корьнтʹи 10:6, 7, 11)

¹³ Һәмьки лазьм ә ԝәки әм бона һʹәԝщед хԝә дӧа бькьн у жь тьштед физики ләзәте бьстиньн (Луԛа 11:3). Ль гора Кʹьтеба Пироз, хԝарьн у вәхԝарьн у ӧса жи әв йәк кӧ әм жь кʹәда хԝә ләзәте дьстиньн, шабуне тинә у «жь Хԝәде йә» (Ԝаиз 2:24, ИМ; 8:15; Аԛуб 1:17). Ле әм гәрәке изьне нәдьн, ԝәки жийина мәда мал у мьлкʹ бьбьнә тьштед лапи фәрз. Паԝлосе шанди дина Мәсиһийа кʹьшандә сәр мәсәла хьраб йа Исраелийед бәре. Әԝи ԝанрʹа гот, кӧ дьле ԝан гәрәке сәр «тьштед хьраб» нибә, чаԝа кӧ дьле Исраелийа чубу сәр тьштед хьраб (Бьхунә 1 Корьнтʹи 10:6, 7, 11). Исраелийа жь бо чʹәʹвбьрʹчибуне тьштед кӧ Йаһоԝа бь кʹәрәмәти дабунә ԝан, һʹәсаб кьрьн ча «тьштед хьраб» (Жьмар 11:4-6, 31-34). Ӧса жи гава Исраелийа дәстпекьрьн голька зерʹин бьһʹәбиньн, ԝана нишан кьр кӧ һʹьше ԝан дьһа зедә сәр хԝарьн, вәхԝарьн у кʹефкьрьне йә, нә кӧ сәр һʹәбандьна Йаһоԝа (Дәркʹәтьн 32:4-6). Лазьм бу кӧ Мәсиһи, йед кӧ һьнге дьжитьн, жь тьштед кӧ һатьбунә сәре Исраелийа дәрсе һин бьн, чьмки чәнд сал шунда, сала 70 Д.М.-да, Оршәлим у пʹарьстгәһ һатьнә ԝеранкьрьне. Ньһа әм хьлазийа ве дьнйа хьрабда дьжин, ләма ширәта Паԝлос бона мә жи фәрз ә.

14. Кʹьтеба Пироз дәрһәԛа дьнйа тʹәзә чь дьбежә?

¹⁴ Гава Иса бәʹса «нане мәйи иро» кьр, әԝи гот кӧ рʹожәке, ԛьрара Хԝәде ԝе ӧса жи «сәр рʹуйе әʹрде бе сери» (Мәтта 6:9-11). Һьнге дьнйа ԝе чаԝа бә? Кʹьтеба Пироз нишан дькә кӧ хԝәстьна Хԝәде әв ә, ԝәки сәр әʹрде тʹер-тʹьжә хԝарьн һәбә. Ль гора Ишайа 25:6-8, әме бьн Пʹадшатийа Йаһоԝада, жь щурʹә-щурʹә хԝарьнед хԝәш ләзәте бьвиньн. Зәбур 72:16 ӧса дьбежә: «Гәньме ԝәлет бьбә бьрʹ-бәʹр». Һәла бьдьнә бәр чʹәʹве хԝә, кӧ һуне жь ви гәньми нане чьԛас хԝәш бьпежьн! Ӧса жи һуне дьбәкә тьрийед жь рʹәзед хԝә бьхԝьн (Ишайа 65:21, 22). Һʹәму мәрьвед сәр тʹәмамийа дьнйайе ԝе жь тьштед ӧса ләзәте бьвиньн.

15. Кәсед кӧ ԝе жь мьрьне бенә рʹакьрьне, ԝе чь һин бьн? (Йуһʹәнна 6:35)

¹⁵ Бьхунә Йуһʹәнна 6:35. Гәло чь һивийа ԝан мәрьва йә, йед кӧ нан у мәʹсийед кӧ Иса бь кʹәрәмәти бәла кьрьбун, хԝарьбун? Гәләк жь ԝан дьԛәԝьмә баԝәрийа хԝә Иса нәанин, ле диса жи дьбәкә әԝана жь мьрьне бенә рʹакьрьне у һуне тʹәви ԝан бьбьнә нас (Йуһʹәнна 5:28, 29). Ԝе лазьм бә ԝәки әԝана мәʹна ван готьнед Иса пебьһʹәсьн: «Әз ьм нане жийине. Һәр кәсе кӧ те бал мьн, әԝе ԛә бьрʹчи нәбә». Әԝана гәрәке баԝәрийа хԝә ԛӧрбана Иса биньн у ԛәбул кьн, кӧ әԝи әʹмьре хԝә бона ԝан дайә. Һьнге кәсед кӧ жь мьрьне бенә рʹакьрьне у зарʹед кӧ ԝедәре бенә буйине, ԝе дәрһәԛа Йаһоԝа у ԛьрара ԝи бенә һинкьрьне. Мәщала тә жи ԝе һәбә, кӧ ԝан мәрьва һин ки, у әв йәк ԝе жь хԝарьна хԝәш зедәтьр тәрʹа шабуне бинә.

16. Готара дьнда әме чь һин бьн?

¹⁶ Ве готареда әм жь кʹьтеба Йуһʹәнна сәре 6 чәнд дәрс һин бун. Ле Иса дәрһәԛа «жийина һʹәта-һʹәтайе» тьштед дьн жи готьн. Лазьм бу ԝәки мәрьвед кӧ һьнге дьжитьн, дина хԝә бьдана ван гьлийа, у әм жи гәрәке ӧса бькьн. Готара дьнда әме жь кʹьтеба Йуһʹәнна сәре 6 һьнә дәрсед дьн жи һин бьн.