«Бона Хԝә Бьжберьн Һуне Кʹерʹа Хьзмәт кьн»

1. Сәва кӧ әм бәхтәԝар бьн фәрз ә кӧ әм чь бькьн у чьрʹа? (Ишайа 48:17, 18)

БАВЕ мәйи әʹзмана гәләки мә һʹәз дькә, у әԝ дьхԝазә ԝәки әм һʹәта-һʹәтайе жь әʹмьре хԝә ләзәте бьстиньн (Ԝаиз 3:12, 13). Рʹаст ә әԝи әм бь һьнә фәрәсәтед мәхсус әʹфьрандьнә, ле әԝи әм ӧса нәәʹфьрандьнә ԝәки әм хԝәха рʹебәрийа гавед хԝә бькьн у сафи кьн чь йә рʹасти у чь йә хьраби (Ԝаиз 8:9; Йерәмйа 10:23). Йаһоԝа занә сәва кӧ әм бәхтәԝар бьн, гәләк фәрз ә ԝәки әм ԝирʹа хьзмәт кьн у ль гора ԛанунед ԝи бьжин (Бьхунә Ишайа 48:17, 18).

2. Мире-щьна дьхԝазә чьда мә бьдә баԝәркьрьне, у Йаһоԝа ча избат кьрийә, ԝәки әв фькьр нәрʹаст ә?

² Мире-щьна дьхԝазә мә бьдә баԝәркьрьне, кӧ әм дькарьн бе Йаһоԝа жи бәхтәԝар бьн у хԝәха рʹебәрийа гавед хԝә бькьн (Дәстпебун 3:4, 5). Йаһоԝа, сәва кӧ избат кә ԝәки әв фькьр нәрʹаст ә, изьн да мәрьвед нәгӧһдар хԝәсәрихԝә бьн у сәр ԝәхтәки рʹебәрийа гавед хԝә бькьн. Бәле, иро ахьрийа хьраб йа сәрԝертийа мәрьва әшкәрә йә. Жь алийе дьнва жи, Кʹьтеба Пирозда дәрһәԛа ԝан мәрьва те готьне, йед кӧ гәләк бәхтәԝар бун, чьмки Йаһоԝарʹа хьзмәт дькьрьн. Йәк жь ԝан, Иса Мәсиһ ә. Ԝәрә әм бәри пешьн бьвиньн, кӧ әԝи чьрʹа сафи кьр Йаһоԝарʹа хьзмәт кә. Паше жи әме шеԝьр кьн, кӧ Баве мәйи әʹзмана чьрʹа һежайи йә, ԝәки әм жерʹа хьзмәт кьн. Хьлазийеда әме дина хԝә бьдьнә ве йәке, кӧ чьрʹа мә сафи кьрийә Йаһоԝарʹа хьзмәт кьн.

ИСА ЧЬРʹА САФИ КЬР ЙАҺОԜАРʹА ХЬЗМӘТ КӘ?

3. Мире-щьна готә Иса кӧ чь бькә, у Иса ча щаба ԝи да?

³ Гава Иса сәр әʹрде бу, әԝи гәрәке сафи кьра кʹерʹа хьзмәт кә. Паши ньхӧмандьна Иса, һьнә ԝәхт шунда Мире-щьна жерʹа гот, һәрге әԝ һәма щарәке сәре хԝә бәр ԝи дайнә, әԝе һʹәму пʹадшатийед дьнйайе бьдә ԝи. Ле Иса ӧса щаба ԝи да: «Жь мьн дур кʹәвә, Шәйтʹан! Чьмки ньвисар ә: ‹Гәрәке Хԝәдайе хԝә Йаһоԝа бьһʹәбини у тʹәне ԝирʹа хьзмәтийа пироз бьки›» (Мәтта 4:8-10). Гәло Иса чьрʹа сафикьрьнәкә ӧса кьр? Ԝәрә әм ве йәке шеԝьр кьн.

4-5. Иса чьрʹа сафи кьр Йаһоԝарʹа хьзмәт кә?

⁴ Бәри пешьн, Иса гәләки Баве хԝә һʹәз дькә, ләма жи әԝи сафи кьр Ԝирʹа хьзмәт кә (Йуһʹәнна 14:31). Хенщи ве йәке Иса Йаһоԝарʹа хьзмәт дькә, чьмки әв ә сафикьрьна рʹаст (Йуһʹәнна 8:28, 29; Әʹйанти 4:11). Әԝ занә ԝәки Йаһоԝа Канийа жийине йә у йәки бь итʹбар у дәствәкьри йә (Зәбур 33:4; 36:9; Аԛуб 1:17). Йаһоԝа тʹьме Исарʹа рʹасти дьгот у һәр тьштед ԛәнщ, чь кӧ щәм Иса һәнә, жь Йаһоԝа йә (Йуһʹәнна 1:14). Ле Мире-щьна бь тʹәмами жь Йаһоԝа щӧдә дьбә, әԝи гӧнә у мьрьн анийә сәр әʹрде. Әԝ дәрәԝин ә у ӧса жи йәки тьма у хԝәһʹәз ә (Йуһʹәнна 8:44). Иса рʹьнд һаж кьред Мире-щьна һәбу у тʹӧ щара нәдьхԝаст чʹәʹв бьдә ԝи у мьԛабьли Йаһоԝа дәре (Филипи 2:5-8).

⁵ Иса ӧса жи сафи кьр Йаһоԝарʹа хьзмәт кә, чьмки әԝи заньбу кӧ хьзмәтийа ԝийә амьн, кʹарәкә чьԛас мәзьн дькарә бинә (Ибрани 12:2). Әԝи заньбу кӧ һәрге әԝ амьн бьминә, әԝе наве Баве хԝә пироз кә у ӧса жи гӧнә у мьрьне кʹӧта кә.

ЙАҺОԜА ЧЬРʹА ҺЕЖА ЙӘ, ԜӘКИ ӘМ ЖЕРʹА ХЬЗМӘТ КЬН

6-7. Иро гәләк мәрьв чьрʹа Йаһоԝарʹа хьзмәт накьн, ле чьрʹа әԝ һежа йә ԝәки әм жерʹа хьзмәт кьн?

⁶ Иро гәләк мәрьв Йаһоԝарʹа хьзмәт накьн, чьмки әԝана һе ньзаньн ԝәки әԝ хԝәйе чьԛас һʹӧнӧред баш ә у әԝи бона ԝан чьԛас тьштед ԛәнщ кьрийә. Бьнәлийед Атʹинайе жи Хԝәде нас нәдькьрьн, кʹижанарʹа кӧ Паԝлосе шанди мьзгини бәла дькьр (Кʹаред Шандийа 17:19, 20, 30, 34).

⁷ Паԝлос гӧһдаред хԝәрʹа гот, кӧ Хԝәде «жийине, бинкʹьшандьне у һәр тьшти дьдә һʹәму мәрьва». Ӧса жи әԝи гот: «Бь сайа Хԝәде әм дьжин, дьмәшьн у һәнә». Бәле, Хԝәде Әʹфьрандаре мә йә, йе кӧ «жь мәрьвәки һʹәму мьләт чекьрьн», ләма жи әԝ һежа йә кӧ әм жерʹа хьзмәт кьн (Кʹаред Шандийа 17:25, 26, 28).

8. Йаһоԝа ԝе чь тʹӧ щара нәкә? Шьровәкә.

⁸ Йаһоԝа Әʹфьрандар у Сәрԝере гәрдуне йә, әԝи дькарьбу зоре ль мәрьва бькә ԝәки әԝана ԝирʹа хьзмәт кьн. Ле әԝе тʹӧ щар ӧса нәкә. Дәԝса ве йәке, әԝ мәрʹа избат дькә ԝәки әԝ һәйә, у әԝ мә һәр кәси гәләки һʹәз дькә. Әԝ дьхԝазә ԝәки гәләк мәрьв бьбьнә достед ԝийә һʹәта-һʹәтайе (1 Тимотʹейо 2:3, 4). Ләма жи әԝ мә һин дькә, ԝәки әм кәсед дьнрʹа жи дәрһәԛа ԛьрара ԝи гьли кьн, демәк бежьн кӧ әԝе бона инсанәте чь бькә (Мәтта 10:11-13; 28:19, 20). Ӧса жи Йаһоԝа щьват саз кьрьнә, кʹидәре кӧ әм дькарьн ԝирʹа хьзмәт кьн, у жь рʹуспийед дьлован аликʹарийе бьстиньн (Кʹаред Шандийа 20:28).

9. Чь щурʹәйи Йаһоԝа һʹәзкьрьна хԝә һʹәму мәрьварʹа әʹйан дькә?

⁹ Һʹәзкьрьна Йаһоԝа ӧса мәзьн ә, кӧ әԝ тьштед баш дьдә ԝан мәрьва жи, йед кӧ баԝәр накьн ԝәки әԝ һәйә. Һәла бьфькьрә: Нава тʹәрихийа инсанәтеда бь милйарда мәрьв ль гора дьле хԝә дьжитьн, у ԝана гӧһ нәдьда Йаһоԝа. Ле диса жи Йаһоԝа бь дьловани бона һʹәԝщед ԝан хәм дькьр у мәщал дьда ԝан, ԝәки жь әʹмьре хԝә ләзәте бьстиньн (Мәтта 5:44, 45; Кʹаред Шандийа 14:16, 17). Бь сайа Йаһоԝа, мәрьв дькарьн хԝәрʹа һәвала бьвиньн, бьбьнә хԝәйе малбәте у жь кʹәда хԝә шабуне бьстиньн (Зәбур 127:3; Ԝаиз 2:24). Бәле, әшкәрә йә кӧ Баве мәйи әʹзмана һʹәму мәрьва һʹәз дькә (Дәркʹәтьн 34:6). Ньһа ԝәрә әм биньн бира хԝә, кӧ мә чьрʹа сафи кьрийә Йаһоԝарʹа хьзмәт кьн у ча әԝ ԝан мәрьва кʹәрәм дькә, йед кӧ сафи дькьн жерʹа хьзмәт кьн.

ЧЬРʹА МӘ САФИ КЬРИЙӘ ЙАҺОԜАРʹА ХЬЗМӘТ КЬН

10. (а) Мәʹнийа сәрәкә кӧ әм Йаһоԝарʹа хьзмәт дькьн, чь йә? (Мәтта 22:37) (б) Тә жь сәбьра Йаһоԝа чь кʹар стандийә? (Зәбур 103:13, 14)

¹⁰ Мәʹнийа сәрәкә кӧ әм Йаһоԝарʹа хьзмәт дькьн әв ә, кӧ әм жи мина Иса Ԝи һʹәз дькьн (Бьхунә Мәтта 22:37). Гава әм дәрһәԛа һʹӧнӧред Йаһоԝа педьһʹәсьн, дьле мә сәр ԝи дьһа гәрм дьбә. Мәсәлә, бьфькьрә кӧ Йаһоԝа мәрьва чьԛас сәбьр дькә. Гава щьмәʹта Исраеле гӧһ нәдьда Йаһоԝа, әԝи жь ԝан рʹәща кьр: «Жь рʹийа хԝәйә хьраб вәгәрʹә!» (Йерәмйа 18:11, ИМ). Йаһоԝа бир накә, ԝәки әм мәрьвнә ԛьсурдар ьн у жь халийе нә (Бьхунә Зәбур 103:13, 14). Гава тӧ дәрһәԛа сәбьра Йаһоԝа у һʹӧнӧред ԝийә дьн дьфькьри, гәло тӧ нахԝази һʹәта-һʹәтайе ԝирʹа хьзмәт ки?

11. Диса жь бо кʹижан мәʹнийа мә сафи кьрийә Йаһоԝарʹа хьзмәт кьн?

¹¹ Ӧса жи әм дьхԝазьн Йаһоԝарʹа хьзмәт кьн, чьмки әм заньн ԝәки һәма әв ә сафикьрьна лапә рʹаст (Мәтта 4:10). Хенщи ве йәке, әм заньн кӧ бь сайа амьнийа хԝә, әм наве Йаһоԝа пироз дькьн, избат дькьн кӧ Мире-щьна дәрәԝин ә у дьле Баве хԝәйи әʹзмана ша дькьн. Һәрге әм иро сафи кьн Йаһоԝарʹа хьзмәт кьн, әме бькарьбьн һʹәта-һʹәтайе ԝирʹа хьзмәт кьн! (Йуһʹәнна 17:3)

12-13. Әм жь мәсәла Щейн у Паме чь һин дьбьн?

¹² Гәләк мәрьв жь зарʹотийе һин дьбьн Йаһоԝа һʹәз бькьн, у әв һʹәзкьрьн тʹәмамийа әʹмьре ԝанда гӧрʹ дьминә. Мәсәлә, дина хԝә бьдә сәрһатийа Щейн у Памеa, кӧ хушкед һәв ьн. Гава ԝана һинбуна Кʹьтеба Пироз дәстпекьр, йәк жь ԝан 11 сали бу у йа дьн жи 10 сали. Де-баве ԝан нәдьхԝәстьн Кʹьтеба Пироз лекʹолин бькьн, ле ԝана ԛизед хԝәрʹа гот кӧ һәрге әԝана һәр хьлазийа һʹәфтийе тʹәви малбәте һәрʹьн дере, ԝи чахи әԝана дькарьн тʹәви Шәʹдед Йаһоԝа жи һәвалтийе бькьн. Щейн дьбежә: «Тьштед кӧ Шәʹдед Йаһоԝа жь Кʹьтеба Пироз мьн һин дькьрьн, али мьн дькьр ԝәки әз нәкʹәвьмә бәр байе һәвалед хьраб, наркотика нәдьмә хәбате у бенамусийе нәкьм».

¹³ Чәнд сал шунда һәрд кәчʹьк бунә мьзгинван. Паше ԝана дәстпекьр ча пешәнг хьзмәт кьн. Ӧса жи ԝана бона де-баве хԝәйә әʹмьрда мәзьн хәм дькьрьн. Щейн дьбежә: «Мьн пе чʹәʹве хԝә дит, ԝәки Йаһоԝа достед хԝә дьбә хԝәйи. Ча 2 Тимотʹейо 2:19-да те готьне, ‹Хӧдан йед пʹара хԝә нас дькә›». Бәле, әм дькарьн баԝәр бьн, ԝәки Йаһоԝа бона кәсед кӧ ԝи һʹәз дькьн у ԝирʹа хьзмәт дькьн, хәм дькә.

14. Әм ча дькарьн наве Йаһоԝа бь хәбәрдан у кьред хԝә бьпʹарезьн? (Бьньһерʹә ӧса жи шькьл.)

¹⁴ Әм дькарьн мәрьварʹа бежьн, кӧ тьштед хьраб, йед кӧ ԝана дәрһәԛа Хԝәде бьһистьнә, дәрәԝ ьн. Бьдә бәр чʹәʹве хԝә, кӧ һәваләки тә һәйә, йе кӧ рʹәʹм, дәствәкьри у әʹфукʹар ә. Рʹожәке, кәсәк дьбежә кӧ һәвале тә йәки зӧльм у нәһʹәлал ә. Һәрге тә тьштәки ӧса бьбьһиста, тәйе чь бькьра? Тәйе һәвале хԝә бьпʹараста, ӧса нинә? Мина ве йәке, гава Мире-щьна у кәсед кӧ бьн һʹӧкӧме ԝида ньн, дьхԝазьн наве Йаһоԝа рʹәш кьн, әм рʹастийе дәрһәԛа Ԝи дьбежьн у наве Ԝи бь хирәт дьпʹарезьн (Зәбур 34:1; Ишайа 43:10). Бәле, бь хәбәрдан у кьред хԝә әм нишан дькьн, ԝәки әм дьхԝазьн бь дьл у щан Йаһоԝарʹа хьзмәт кьн.

15. Чахе Паԝлос әʹмьре хԝәда һьнә тьшт гӧһаст, әԝи чь кʹар станд? (Филипи 3:7, 8)

¹⁵ Сәва кӧ Йаһоԝа дьһа зедә жь мә рʹази бә, йан жи сәва кӧ әм һе зедә ԝирʹа хьзмәт кьн, әм һазьр ьн нетед хԝә бьгӧһезьн. Мәсәлә, Паԝлосе шанди нав Щьһуйада йәки нав у дәнг бу, ле әԝ һазьр бу тʹәрка кьред хԝәйә бәре бьдә, ԝәки пәй Иса һәрʹә у Йаһоԝарʹа хьзмәт кә (Галати 1:14). Ахьрийеда, әԝи жь хьзмәтийе шабунәкә мәзьн дьстанд, у мәщал кʹәтә дәсте ԝи, ԝәки тʹәви Иса сәр әʹзмана сәрԝертийе бькә. Әԝ бона сафикьрьна хԝә ԛә пʹошман нәбу, у әме жи жь сафикьрьна хԝә кӧ Йаһоԝарʹа хьзмәт кьн, тʹӧ щар пʹошман нәбьн (Бьхунә Филипи 3:7, 8).

16. Жь сәрһатийа Щулйайе әм чь һин дьбьн? (Бьньһерʹә ӧса жи шькьл.)

¹⁶ Һәрге әм әʹмьре хԝәда һәри зедә дина хԝә бьдьнә хьзмәтийе, әʹмьре мә ԝе гәләк хԝәш бә һьм ньһа, һьм жи ахьрийеда. Ԝәрә әм дина хԝә бьдьнә сәрһатийа хушкәкә мә бь наве Щулйа. Пешийа кӧ әԝ бу Шәʹда Йаһоԝа, әԝе жь бьчʹуктайе дереда тʹәви кʹоме кʹьлам дьстьра. Странбежәки һостә дина хԝә да фәрәсәта ԝе у дәстпекьр ле һин кә. Гәләк ԝәхт дәрбаз нәбу, кӧ Щулйа бу странбежәкә гәләк пешдачуйи. Ле гава әԝ дьчу мәкʹтәба музике, һәвалдәрсханәки ԝе жерʹа бәʹса Хԝәде кьр у гот, кӧ наве Хԝәде, Йаһоԝа йә. Щулйа һʹәфтийеда дӧ щара һинбуна Кʹьтеба Пироз дәрбаз дьбу. Хьлазийеда әԝе сафи кьр дина хԝә бь тʹәмами бьдә хьзмәтийе, нә кӧ бьбә странбежәкә һостә. Әв сафикьрьнәкә һеса нибу. Әԝ дьбежә: «Гәләк мәрьва мьнрʹа дьгот, кӧ әз фәрәсәтед хԝә давежьмә аве, ле мьн дьхԝәст әʹмьре хԝәда һәри зедә Йаһоԝарʹа хьзмәт кьм». Гәло Щулйа иро, паши 30 сала, ча сәр сафикьрьна хԝә дьньһерʹә? Әԝ ӧса дьбежә: «Дьле мьн рʹьһʹәт ә у әз баԝәр ьм, кӧ ахьрийеда Йаһоԝа ԝе һʹәму хԝәстьнед мьн бинә сери» (Зәбур 145:16).

ТʹӘРКА ХЬЗМӘТИЙЕ НӘДӘ

17. Әв йәк кӧ хьлазийа дьнйайе незик ә, сәр мәрьва ча һʹӧкӧм дькә?

¹⁷ Хьлазийа ве дьнйа хьраб ида гәләк незик ә. Паԝлосе шанди ӧса ньвисибу: «Пәй ԝәхтәки кьнрʹа, әԝе кӧ ԝе бе, ԝе бе у дәрәнги нәбә» (Ибрани 10:37). Гәло нета ван гьлийа чь йә? Бона кәсед кӧ һе сафи нәкьрьнә Йаһоԝарʹа хьзмәт кьн, нета ван гьлийа әв ә кӧ ԝәхт һьндьк майә у әԝана гәрәке ве сафикьрьне зу бькьн (1 Корьнтʹи 7:29). Ле бона кәсед кӧ ида сафи кьрьнә Хԝәдерʹа хьзмәт кьн, нета ван гьлийа әв ә, кӧ һәрге чәтьнайед ԝан һәбьн жи, әԝана ԝе дәмәкә незикда жь ԝан кӧл-дәрда хьлаз бьн.

18. Иса у Йаһоԝа дьхԝазьн кӧ әм чь бькьн?

¹⁸ Иса шагьртед хԝәрʹа гот, кӧ әԝана гәрәке нә тʹәне дәстпекьн пәй ԝи һәрʹьн, ле гәрәке ве йәке бәрдәԝам кьн (Мәтта 16:24). Ләма жи һәрге әм ида гәләк сал Йаһоԝарʹа хьзмәт дькьн, ԝәрә әм тʹәрка хьзмәтийа хԝә нәдьн. Сәва кӧ әм нәԝәстьн, әм гәрәке гәләк хирәт бьн. Щарна дьбәкә һеса нибә, ле һәрге әм ль гора сафикьрьна хԝә бьжин, әме һьм иро һьм жи ахьрийеда гәләк кʹәрәма бьстиньн у гәләк бәхтәԝар бьн (Зәбур 35:27).

19. Жь сәрһатийа Щен әм чь һин дьбьн?

¹⁹ Һьнә мәрьв дьфькьрьн кӧ һәрге әԝана Йаһоԝарʹа хьзмәт кьн, ԝе шабуне жь әʹмьре хԝә нәстиньн. Һәрге тӧ щаһьл и, гәло тӧ дьфькьри ԝәки Йаһоԝарʹа хьзмәт ки, тӧйе һьнә мәщала ӧнда ки? Бьраки щаһьл бь наве Щен, ӧса дьбежә: «Әз дьфькьрим кӧ нькарьм ԝәʹде хԝә ӧса дәрбаз кьм ча дьле мьн дьхԝазә, чьмки әз Шәʹде Йаһоԝа мә. Ӧса дьһатә кʹьфше, те бежи зарʹед дьн шабун дьстандьн жь ԝәʹдәдәрбазкьрьна нәщайиз, һәләԛәтийа романтик у листькед компӧтәрейә бь зӧлмийе, ле әз мәщбур бум һәрʹьм хьзмәтийе у сәр щьвата». Гәло ньһерʹандьна ӧса ча сәр Щен һʹӧкӧм кьр? Әԝ дьбежә: «Мьн дәстпекьр бь әʹмьрәки дӧрʹу бьжим у ԝәхтәки жийина ви щурʹәйи мьнрʹа шабун дьани. Ле бь рʹасти әʹмьрәки ӧса мьн бәхтәԝар нәдькьр. Ләма жи мьн дина хԝә да гьлийед жь Кʹьтеба Пироз, йед кӧ мьн ԝәʹдәки пьшт гӧһе хԝәва авитьбу у мьн сафи кьр, ԝәки бь дьл у щан Йаһоԝарʹа хьзмәт кьм. Һьнгева әз тʹәхмин дькьм кӧ Йаһоԝа щаба һәр дӧайе мьн дьдә».

20. Сафикьрьна мә гәрәке чь бә?

²⁰ Зәбурбежәки ӧса Йаһоԝарʹа стьра: «Хԝәзи ль ԝи кӧ Тӧ дьбьжери у незики Хԝә дьки, кӧ әԝ һʹәԝшед Тәда бьминә» (Зәбур 65:4). Бьра сафикьрьна мә әв бә, кӧ әм тʹьме Йаһоԝарʹа хьзмәт кьн. Мина Йешу, ԝәрә әм жи ӧса бежьн: «Әз у малийед хԝә, әме хӧламтийа Хӧдан бькьн» (Йешу 24:15, ИМ).