Наве Йаһоԝа бона Иса Чьԛас Фәрз ә?

1-2. а) Евара пешийа мьрьна хԝә, Иса чь кьр? б) Ве готареда әме щаба кʹижан пьрса шеԝьр кьн?

ЕВАРА 14-е Нисане, сала 33 Д.М.-да Иса тʹәви шандийед хԝәйә амьн шива хԝәйә пашьн дьхԝар. Әԝи заньбу кӧ ԝе нәмамийа ԝи бькьн, ԝи бьзериньн у бькӧжьн. Ләма жи әԝи дьле шандийед хԝәйә амьн ԛәԝи кьр. Пешийа кӧ шив хьлазкьрана, Иса Хԝәдерʹа дӧа кьр. Әв дӧайе фәрз кʹьтеба Йуһʹәнна сәре 17-да һатийә ньвисаре.

² Ве готареда әме шеԝьр кьн һьнә фькьред фәрз жь дӧайе Иса. Пешийа мьрьне һʹьш-аԛьле ԝи сәр чь бу? Гава Иса сәр әʹрде хьзмәт дькьр, гәло бона ԝи чь фәрз бу? Ԝәрә әм щабед ԝан пьрса шеԝьр кьн.

«МЬН НАВЕ ТӘ ԜАН МӘРЬВАРʹА ӘʹЙАН КЬРИЙӘ»

3. Иса дәрһәԛа наве Йаһоԝа чь гот, у әԝи бь ве йәке чь дьхԝәст бьда кʹьфше? (Йуһʹәнна 17:6, 26)

³ Дӧайе хԝәда Иса гот: «Мьн наве тә ԝан мәрьварʹа әʹйан кьрийә». Әшкәрә йә кӧ әв йәк бона ԝи фәрз бу, чьмки әԝи әв фькьр дӧайе хԝәда дӧ щара ԝәкʹьланд (Бьхунә Йуһʹәнна 17:6, 26). Әԝи бь ве йәке чь дьхԝәст бьда кʹьфше? Гәло Иса шагьртед хԝәрʹа дәрһәԛа наве Хԝәде гот чьмки ԝана наве ԝи ньзаньбу? Шагьртед Иса Щьһу бун, ләма жи һәмьки ԝана заньбу кӧ наве Хԝәде Йаһоԝа йә. Ньвисаред Ибранида әв нав бь һʹәзара щара те хәбьтандьне. Ләма жи ча те кʹьфше, Иса ԝанрʹа нәгот кӧ наве Хԝәде чь йә, ле гот ԝәки Йаһоԝа йәки чаԝа йә, демәк нет, кьред ԝи у һʹӧнӧред ԝи чь щурʹәйи нә. Тʹәне Иса дькарьбу бь щурʹе лапи баш дәрһәԛа Йаһоԝа ԝан тьшта әʹйан кьра.

4-5. а) Гәло наве кәсәки ча дькарә бона мә бьбә навәки ԛимәт? Мәсәле бинә. б) Шандийед Иса ча дьһа баш Йаһоԝа нас кьрьн?

⁴ Бьдә бәр чʹәʹве хԝә, кӧ рʹуспики жь щьвата тә бь наве Кʹәрәм, һʹәким ә. Ида гәләк сал ә тӧ ԝи нас дьки. Ле рʹожәке, тӧ гьран нәхԝәш дькʹәви у тә дьбьнә ве нәхԝәшхане, кʹидәре кӧ әԝ дьхәбьтә. Бь сайа ве йәке кӧ әԝ шьхӧле хԝәда һостә йә, әԝ әʹмьре тә хьлаз дькә. Ньһа тӧ ԝи дьһа зедә һʹәз дьки, у һәр щар гава тӧ наве ԝи дьбьһейи, ԛәнщийа ԝи дькʹәвә бира тә. Хенщи ве йәке кӧ Кʹәрәм рʹуспийе щьвата тә йә, әԝ бона тә буйә һʹәкиме кӧ әʹмьре тә хьлаз кьрийә.

⁵ Мина ве йәке, шагьртед Иса ида заньбун кӧ наве Хԝәде, Йаһоԝа йә. Ле бь сайа хьзмәтийа Иса, наве Хԝәде бона ԝан дьһа ԛимәт бьбу. Гәло чьма? Чьмки Иса хәбәрдан у кьред хԝәда бь тʹәмами чʹәʹв дьда Баве хԝә. Ләма жи гава шандийа гӧһ дьданә гьлийед Иса у дьдитьн кӧ әԝ һьндава мәрьвада чаԝа йә, ԝана Йаһоԝа дьһа баш нас дькьр (Йуһʹәнна 14:9; 17:3).

«НАВЕ ТӘ, КӦ ТӘ ДА СӘР МЬН»

6. Чь те һʹәсабе кӧ Йаһоԝа наве хԝә дабу сәр Иса? (Йуһʹәнна 17:11, 12)

⁶ Дӧайе хԝәда, Иса бона шагьртед хԝә ӧса гот: «Жь бо хатьре наве хԝә, кӧ тә дайә сәр мьн, ԝан бьбә хԝәйи» (Бьхунә Йуһʹәнна 17:11, 12). Гәло әв гьли тенә һʹәсабе кӧ наве Иса ида буйә «Йаһоԝа»? Һәмьки на. Чахе Иса бәʹса наве Йаһоԝа кьр, әԝи гот «наве тә». Әв йәк дьдә кʹьфше, ԝәки наве Йаһоԝа нәбу наве Исайә шәхси. Ле гәло нета ван гьлийа чь йә? Йа пешьн, Йаһоԝа Иса шандә сәр әʹрде, ԝәки дәԝса Ԝи хәбәр дә. Әԝ бь наве Баве хԝә һат, у бь наве Ԝи гәләк кʹәрәмәтед мәзьн дькьр (Йуһʹәнна 5:43; 10:25). Ӧса жи наве «Иса» те һʹәсабе «Йаһоԝа хьлаз дькә». Бәле, наве Исада наве Хԝәде һәйә.

7. Иса чьрʹа дькарьбу бь наве Йаһоԝа хәбәр дә? Мәсәле бинә.

⁷ Ве мәсәле бьдә бәр чʹәʹве хԝә: Ԝәлатәки хәрибда ԝәкʹил дәԝса сәрԝере ԝәлате хԝә хәбәр дьдә. Ләма жи гьлийед ԝәкʹил ча гьлийед сәрԝер тенә һʹәсабе. Мина ве йәке, Иса жи ча бежи ԝәкʹиле Йаһоԝа бу сәр әʹрде у бь наве Йаһоԝа тʹәви мәрьва хәбәр дьда (Мәтта 21:9; Луԛа 13:35).

8. Пешийа кӧ Иса һатә сәр әʹрде, наве Йаһоԝа чь щурʹәйи сәр ԝи бу? (Дәркʹәтьн 23:20, 21)

⁸ Иса ча «Хәбәр» те навкьрьне, демәк әԝ дәԝса Йаһоԝа хәбәр дьдә у ӧса жи әʹламәти у рʹебәрийа Хԝәде дьгьһинә мәләк у мәрьва (Йуһʹәнна 1:1-3). Ча те кʹьфше, гава мьләте Исраел жь ԝәлате Мьсьре дәркʹәт, мәләке кӧ Йаһоԝа шанд ԝәки бона ԝан хәм бькә, Иса бу. Йаһоԝа щьмәʹта хԝәрʹа гот ԝәки әԝана гӧһ бьдьнә ԝи мәләки. Гәло чьрʹа? Йаһоԝа зәлал кьр, кӧ наве Ԝи сәр Иса йә у «әԝ бь наве» Ԝи һәр тьшти дькәa (Бьхунә Дәркʹәтьн 23:20, 21). Йаһоԝа әв йәк гот чьмки Иса кәсе сәрәкә йә, кӧ пьштгьрийа наве Йаһоԝа дькә, ԝи пироз дькә у дәԝса ԝи хәбәр дьдә.

«БАВО, НАВЕ ХԜӘ РʹУМӘТ КӘ»

9. Наве Йаһоԝа бона Иса чьԛас фәрз бу? Шьровәкә.

⁹ Ча әм ида пеһʹәсийан, һәла һе пешийа кӧ Иса бьһата сәр әʹрде, наве Йаһоԝа бона ԝи гәләк фәрз бу. Ләма жи һәр тьште кӧ Иса сәр әʹрде кьр, наве Йаһоԝава гьредайи бу! Незики хьлазийа хьзмәтийа хԝә, Иса Йаһоԝарʹа ӧса гот: «Баво, наве хԝә рʹумәт кә». Баве ԝи жи бь дәнгәки бьльнд жь әʹзмен ӧса гот: «Мьн рʹумәт кьрийә, у әзе диса рʹумәт кьм» (Йуһʹәнна 12:28).

10-11. а) Иса наве Йаһоԝа ча рʹумәт дькьр? (Бьньһерʹә ӧса жи шькьл.) б) Чьма гәрәке бьһата избаткьрьне, ԝәки наве Йаһоԝа пироз ә у һʹәму кьред ԝи рʹаст ьн?

¹⁰ Иса жи наве Баве хԝә рʹумәт дькьр. Гәло ча? Әԝи кәсед дьнрʹа бәʹса һʹӧнӧр у кьред Баве хԝә дькьр. Хенщи ве йәке, әԝи избат дькьр кӧ наве Йаһоԝа пироз ә у һʹәму кьред ԝи рʹаст ьн. Ләма жи гава әԝи шагьртед хԝә һин дькьр, кӧ әԝана ча гәрәке дӧа бькьн, әԝи гот: «Баве мәйи әʹзмана, бьра наве тә пироз бә» (Мәтта 6:9).

¹¹ Чьма лазьм бу ԝәки бе избаткьрьне кӧ наве Йаһоԝа пироз ә у һʹәму кьред ԝи рʹаст ьн? Чьмки бахче Еденеда, Мире-щьна наве Хԝәде рʹәш кьрьбу. Жь гьлийед ԝи ӧса дәркʹәт, те бежи Йаһоԝа дәрәԝин ә у тьштед баш жь Адәм у Һәԝайе вәдьшерә (Дәстпебун 3:1-5). Бь ве йәке, Мире-щьна хԝәст бьда кʹьфше, йан чь кьред Йаһоԝа нәрʹаст ьн. Дәрәԝед Мире-щьна ләкʹә ани сәр наве Йаһоԝа. Паше, рʹожед Ибо пʹехәмбәрда, Мире-щьна гот ԝәки мәрьв тʹәне бона кʹара хԝә Йаһоԝарʹа хьзмәт дькьн. Әԝи гот кӧ һәрге мәрьв бенә щерʹьбандьне, әԝана ԝе тʹәрка хьзмәтийа Йаһоԝа бьдьн, чьмки жь дьл ԝи һʹәз накьн (Ибо 1:9-11; 2:4). Ԝәхт лазьм бу ԝәки бе избаткьрьне кӧ дәрәԝин бь рʹасти кʹе йә, Йаһоԝа йан Мире-щьна йә.

«ӘЗ ӘʹМЬРЕ ХԜӘ ДЬДЬМ»

12. Жь бо ве йәке кӧ Иса наве Йаһоԝа һʹәз дькьр, әԝ һазьр бу чь бькә?

¹² Иса гәләк Йаһоԝа һʹәз дькьр, ләма жи әԝи дьхԝәст чь жь дәсте ԝи те бькә, ԝәки наве Йаһоԝа пироз кә у избат кә, кӧ һʹәму кьред ԝи рʹаст ьн. Иса гот: «Әз әʹмьре хԝә дьдьм» (Йуһʹәнна 10:17, 18). Бәле, әԝ һазьр бу бона Йаһоԝа әʹмьре хԝә жи бьдә.b Дӧ мәрьвед пешьн Адәм у Һеԝа кʹамьл бун, ле дәԝса кӧ гӧһ бьдьнә Йаһоԝа, ԝана алийе Мире-щьна гьрт. Иса йәки мина ԝан нибу. Әԝ һазьр бу бе сәр әʹрде у избат кә, кӧ әԝ чьԛас Йаһоԝа һʹәз дькә. Гава Иса сәр әʹрде бу, әԝи һәр тьштида гӧһ дьда Хԝәде (Ибрани 4:15; 5:7-10). Һʹәта мьрьна хԝәйә сәр стуна щәфе жи, әԝ Йаһоԝарʹа амьн ма (Ибрани 12:2). Бь ви щурʹәйи, әԝи избат кьр кӧ Йаһоԝа у наве ԝи жь дьл һʹәз дькә.

13. Сәва кӧ бе избаткьрьне ԝәки Мире-щьна дәрәԝин ә, Иса чьма кәсе һәри лайиԛ бу? (Бьньһерʹә ӧса жи шькьл.)

¹³ Һʹәму кьред Иса избат дькьрьн, ԝәки Йаһоԝа рʹаст ә, ле Мире-щьна дәрәԝин ә (Йуһʹәнна 8:44). Тʹӧ кәси Йаһоԝа ӧса баш нас нәдькьр ча Иса. Һәрге һәма тьштәк жи кӧ Мире-щьна мьԛабьли Йаһоԝа готьбу, рʹаст буйа, Иса ԝе әв йәк бьзаньбуйа. Ле бӧхданед Мире-щьна бь тʹәмами дәрәԝ бун, ләма жи Иса наве Йаһоԝа һʹәта хьлазийе пʹараст. Гава ӧса һатә кʹьфше те бежи Йаһоԝа Иса тʹәне һишт, Иса һьнге жи һазьр бу әʹмьре хԝә ӧнда кә, нә кӧ нәмамийа Баве хԝәйи дәлал бькә (Мәтта 27:46).c

«МЬН ӘВ ШЬХӦЛЕ КӦ ТӘ ДАЙӘ МЬН АНИ СЕРИ»

14. Йаһоԝа амьнийа Иса ча хәлат кьр?

¹⁴ Евара пешийа кӧ Иса бьһата кӧштьне, әԝи дӧайе хԝәда гот, ԝәки әԝ шьхӧле кӧ Хԝәде дабу ԝи, ани сери, у әԝ баԝәр бу ԝәки Йаһоԝа ԝе амьнийа ԝи хәлат кә (Йуһʹәнна 17:4, 5). Бь рʹасти жи гӧмана Иса пʹучʹ дәрнәкʹәт, у Йаһоԝа әԝ тʹьрбеда нәһишт (Кʹаред Шандийа 2:23, 24). Әԝи Иса жь мьрьне рʹакьр у сәр әʹзмана щабдари у ԛәдьрәки мәзьн да ԝи (Филипи 2:8, 9). Ԝәхт шунда, Иса бу Пʹадше Пʹадшатийа Хԝәде. Гәло әв Пʹадшати ԝе чь бинә сери? Иса щаба ве пьрсе да, чахе шагьртед хԝә һин дькьр кӧ чаԝа дӧа бькьн: «Бьра Пʹадшатийа тә бе. Бьра ԛьрара тә [йа Йаһоԝа] чаԝа ль әʹзмен, ӧса жи ль сәр рʹуйе әʹрде бе сери» (Мәтта 6:10).

15. Гәло Иса ԝе чь бинә сери?

¹⁵ Ԝәхтәкә незикда, Иса ԝе шәрʹе Һармәгәдонеда һьмбәри дьжмьнед Хԝәде шәрʹ бькә у ԛьрʹа мәрьвед зӧлм бинә (Әʹйанти 16:14, 16; 19:11-16). Паши ве йәке, әԝе Мире-щьна бавежә «гәлийе һәй-ԝайе», кʹидәре кӧ әԝе гьрти бьминә у нькарьбә тьштәки бькә (Әʹйанти 20:1-3). Ԝәʹде Пʹадшатийа хԝәйә Һʹәзарсали, Иса ԝе әʹдьлайе бинә сәр дьнйайе у мәрьва бьгьһинә беԛьсуртийе. Ӧса жи, әԝе мьрийа рʹакә у тʹәмамийа дьнйайе бькә щьнәт. Бәле, нета Йаһоԝа ԝе бе сери (Әʹйанти 21:1-4).

16. Хьлазийа Сәрԝертийа Һʹәзарсали һʹале дьнйайе ԝе чаԝа бә?

¹⁶ Гәло хьлазийа Сәрԝертийа Һʹәзарсали һʹале дьнйайе ԝе ча бә? Гӧнә ԝе ида тʹӧнә бә. Ида ԝе нәлазьм бә ԝәки әм сәр һʹиме кʹьрʹине бона гӧнед хԝә бахшандьне бьхԝазьн. Сәва кӧ һәләԛәтийа мә тʹәви Йаһоԝа һәбә, әме ида һʹәԝще Иса ча Кʹаһине Мәзьн нибьн, у нә жи һʹәԝще бьред Иса бьн, йед бь рʹӧһʹе пироз кʹьфшкьри. Ӧса жи «дьжмьне пашьн, демәк мьрьн, ԝе кʹокева бе рʹакьрьне». Мәзәл ԝе вала бьн, чьмки кәсед мьри ԝе ида сах бьн. Һәр кәсе кӧ сәр әʹрде дьжи ԝе беԛьсур бә (1 Корьнтʹи 15:25, 26).

17-18. а) Хьлазийа Сәрԝертийа Һʹәзарсали чь ԝе бьԛәԝьмә? б) Гава ԝәʹде сәрԝертийа Иса хьлаз бә, әԝе чь бькә? (1 Корьнтʹи 15:24, 28) (Бьньһерʹә ӧса жи шькьл.)

¹⁷ Хьлазийа Сәрԝертийа Һʹәзарсали диса чь ԝе бьԛәԝьмә? Ԝи ԝәʹдәйи тьштәки гәләк фәрз ԝе бьԛәԝьмә. Ида тʹӧ кәс тʹӧ щара ԝе дӧдьли нәбә, кӧ тʹәне Йаһоԝа йә Хԝәдайе пироз. Гәло чьрʹа? Бахче Еденеда Мире-щьна бӧхдан авитьбу Йаһоԝа, кӧ әԝ дәрәԝин ә у бе һʹәзкьрьн сәр мәрьварʹа сәрԝертийе дькә. Жь ԝи ԝәʹдәйи дәстпебуйи, кәсед кӧ рʹумәте дьдьнә Йаһоԝа у ԛәдьре ԝи дьгьрьн, наве ԝи тʹьме пироз дькьн. Ләма жи хьлазийа Сәрԝертийа Һʹәзарсали, наве ԝи ԝе ида бь тʹәмами жь бӧхдана тʹәмьз бә. Әԝе әшкәрә избат кә, ԝәки әԝ бь рʹасти жи Бавәки бь һʹәзкьрьне йә.

¹⁸ Ԝи ԝәʹдәйи һәр кәс ԝе бьзаньбә, ԝәки тьштед кӧ Мире-щьна дәрһәԛа Йаһоԝа готьбу, дәрәԝ ьн. Гава ԝәʹде сәрԝертийа Иса хьлаз бә, гәло әԝе чь бькә? Гәло әԝе мина Мире-щьна мьԛабьли Йаһоԝа дәре? Һәмьки на! (Бьхунә 1 Корьнтʹи 15:24, 28) Иса ԝе һʹӧкӧмәтийе вәгәрʹинә Баве хԝә у хԝәха жи тʹәсмили сәрԝертийа Йаһоԝа бә. Бәле, Иса мина Мире-щьна нинә. Әԝ Йаһоԝа һʹәз дькә, ләма жи һазьр ә сәрԝертийа хԝә бьдә дәсте Ԝи.

19. Гәло наве Йаһоԝа бона Иса чьԛас фәрз ә?

¹⁹ Әм әʹщебмайи наминьн кӧ Йаһоԝа һазьр бу наве Хԝә бьдә Иса. Иса бь щурʹе беԛьсур, ча ԝәкʹил, бь наве Баве хԝә хәбәр дьда. Әʹйан ә, кӧ бона Иса наве Йаһоԝа жь һәр тьшти фәрзтьр ә. Әԝ һазьр бу бона ви нави әʹмьре хԝә бьдә, у әԝ һазьр ә кӧ хьлазийа Сәрԝертийа Һʹәзарсали һәр тьшти бьдә дәсте Йаһоԝа. Гәло әм ча дькарьн чʹәʹв бьдьнә Иса? Готара дьнда, әме щаба ве пьрсе бьстиньн.