Пьрсед Хԝәндәвана
Бәлакьрьна мьзгинийе ԝе кʹәнге хьлаз бә?
Иса готьбу: «Әв мьзгинийа Пʹадшатийе ԝе сәр тʹәмамийа дьнйайе бе бәлакьрьне, кӧ һʹәму мьләтарʹа бьбә шәʹдәти, у һьнге хьлази ԝе бе» (Мәтта 24:14). Хәбәра Йунани, йа кӧ ве рʹезеда у рʹезед 6 у 13-да ча «хьлази» һатийә ԝәлгәрʹандьне, дәрһәԛа Һармәгәдоне дьбежә, демәк хьлазийа дьнйа Мире-щьна (Әʹйанти 16:14, 16). Ләма жи әм фәʹм дькьн, кӧ әме мьзгинийе һʹәта дәмәкә кьн пешийа Һармәгәдоне бәла кьн.
Бәре әм дьфькьрин кӧ гава Бабилона мәзьн бе ԝеранкьрьне у бь ве йәке тәнгасийа мәзьн дәстпебә, ԝи чахи әме ида шьхӧле бәлакьрьна мьзгинийе бьдьнә сәкьнандьне (Әʹйанти 17:3, 5, 15, 16). Мә дьгот кӧ әв ԛәԝьмандьн ԝе бе һʹәсабе кӧ «сала рʹазибуна Хӧдан» ида хьлаз буйә (Ишайа 61:2, ИМ). Ӧса жи, әм дьфькьрин ԝәки тʹәне кәсед кӧ пешийа тәнгасийа мәзьн Йаһоԝарʹа амьн бьминьн, ԝе хьлаз бьн. Мә әԝана бәрамбәри Щьһуйа дькьр, йед кӧ сах ман гава сала 607-да Б.Д.М. бажаре Оршәлиме һатә ԝеранкьрьне. Жь бо ве йәке кӧ ԝана Йаһоԝа дьһʹәбанд у хьраби нәфрʹәт дькьрьн, сәр әʹнийа ԝан нишанәк дьһатә данине, сәва кӧ әԝана сах бьминьн (Һәзәԛел 5:11; 9:4). Ле әв фькьр тʹәви гьлийед жь Мәтта 24:14 һәв нагьрә, чьмки әв рʹез әшкәрә дькә кӧ һʹәта ԝәхтәкә кьн пешийа Һармәгәдоне, мәщала мәрьва ԝе һәбә кӧ мьзгинийе ԛәбул кьн.
Сәр һʹиме фәʹмкьрьна мәйә тʹәзә дәрһәԛа Мәтта 24:14, әм ида бь щурʹәки дьн фәʹм дькьн хәбәред жь Әʹйанти 16:21 дәрһәԛа әʹламәтийа кӧ мина тәйрока гьр ә. Бь сайа лекʹолине мә тедәрхьст, кӧ әв дӧ рʹез һәвва гьредайи нә. Гәло ча? Чаԝа кӧ Паԝлосе шанди ньвисибу, бона «кәсед кӧ ԝе хьлаз бьн», әв әʹламәти, демәк мьзгинийа дәрһәԛа Пʹадшатийе, мина «бина жийине йә». Ле бона дьжмьнед Хԝәде, әв мьзгини мина «бина мьрьне йә» (2 Корьнтʹи 2:15, 16). Әԝана мьзгинийа дәрһәԛа Пʹадшатийа Хԝәде нәфрʹәт дькьн, чьмки әв мьзгини нишан дькә кӧ әв дьнйа бь рʹасти чь щурʹәйи йә, ԝәки әв хьраб ә, сәрԝере ве Мире-щьна йә у ԝәки әв дьнйа ԝе бе кʹӧтакьрьне (Йуһʹәнна 7:7; 1 Йуһʹәнна 2:17; 5:19).
Дина хԝә бьде, кӧ ль гора Кʹьтеба Пироз, тәйрок ԝе гәләк мәзьн бьн. Дьбәкә әв те һʹәсабе, кӧ ԝәʹде тәнгасийа мәзьн, мьзгини ԝе дьһа зедә бе бәлакьрьне у дәрһәԛа наве Йаһоԝа ԝе һе зедә бе әʹламкьрьне (Һәзәԛел 39:7). Ԝи ԝәʹдәйи, демәк паши кʹӧтакьрьна Бабилона мәзьн, гәло мьзгини ԝе мина бина хԝәш һьнә мәрьва бькʹьшинә бәрбь хԝә? Дьбәкә жи. Дьԛәԝьмә әԝ мәрьв ԝе биньн бира хԝә, йан жи бьбьһен кӧ бь гәләк сала, Шәʹдед Йаһоԝа дәрһәԛа кʹӧтакьрьна религийед ԛәлп әʹлам дькьрьн.
Бинә бира хԝә кӧ ԝәʹде бәре Мьсьреда, паши Дәһ Бәла чь ԛәԝьми. Чахе Йаһоԝа «диԝана һʹәму хԝәдейед Мьсьре» кьр, гәләк кәсед кӧ Исраели нибун тʹәви хьзмәткʹаред Хԝәде чун (Дәркʹәтьн 12:12, 37, 38). Дьбәкә гава ԝан хәриба дьдит, кӧ гьлийед Муса дәрһәԛа Дәһ Бәла ча һатьнә сери, ԝана сафи кьр Йаһоԝарʹа хьзмәт кьн.
Мәрьвед кӧ паши кʹӧтакьрьна Бабилона мәзьн сафи кьн Йаһоԝарʹа хьзмәт кьн, мәщала ԝан ԝе һәбә пьштгьрийа бьред Мәсиһ бькьн, йед кӧ ԝе һәла һе сәр әʹрде бьн (Мәтта 25:34-36, 40). Һәмьки, һәма пешийа Һармәгәдоне, чахе Мәсиһийед бь рʹӧһʹе пироз бьжарти һәрʹьнә сәр әʹзмана, ԝе ида мәщала мәрьва тʹӧнә бә кӧ ча ми бенә һʹәсабе.
Әв фәʹмкьрьна тʹәзә дина мә дькʹьшинә сәр дьлрʹәʹми у һʹәзкьрьна Йаһоԝайә мәзьн, йе кӧ «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн» (2 Пәтрус 3:9).