Кәчʹькәкә Шәрмокә Дьбә Мисйонер

Әз сала 1951-да бажаре Вийенайеда (Австрйа), малбәта Католикида һатьмә буйине. Әз йәкә шәрмокә бум, у мьн нькарьбу аза тʹәви мәрьва хәбәр да, ле мьн Хԝәде баԝәр дькьр у гәләк щара жерʹа дӧа дькьр. Гава әз 9 сали бум, баве мьн тʹәви Шәʹдед Йаһоԝа һинбуна Кʹьтеба Пироз дәстпекьр, у ԝәʹдәки кьнда, дийа мьн жи һинбун дәстпекьр.

Гәләк ԝәхт дәрбаз нәбу кӧ мә дәстпекьр һәрʹьнә щьвата Дӧблинге, Вийенайеда. Мә малбәтеда тʹәвайи Кʹьтеба Пироз лекʹолин дькьр, әм дьчунә щьвата у мә сәр щьватед мәзьн аликʹари жи дьда. Жь бьчʹуктайа мьн, баве мьн али мьн дькьр ԝәки әз Йаһоԝа һʹәз бькьм. Әԝи тʹьме дӧа дькьр ԝәки әз у хушка мьн, әм бьбьнә пешәнг. Ле һьнге мьн әв нет нәдьда пешийа хԝә.

ДӘСТПЕДЬКЬМ ХЬЗМӘТ КЬМ ЧА ПЕШӘНГА ҺӘРТʹЬМ

Сала 1965-да, гава әз 14 сали бум, әз һатьмә ньхӧмандьне. Ле мьнрʹа чәтьн бу хьзмәтийеда тʹәви мәрьвед нәнас хәбәр дьм. Һьм жи мьн хԝә ньмьз һʹәсаб дькьр у әз гәләк щар дьфькьрим, ԝәки щаһьлед дьн жь мьн четьр ьн у мьн гәләк дьхԝәст ԝәки әз ԝана хԝәш бем. Ләма жи паши ньхӧмандьне, мьн дәстпекьр ԝәʹдә тʹәви ԝан мәрьва дәрбаз кьм, йед кӧ Йаһоԝарʹа хьзмәт нәдькьрьн. Рʹаст ә мьн хԝәш дьһат тʹәви ԝан һәвалтийе бькьм, ле исафа мьн нәрʹьһʹәт бу. Ле ԛәԝата мьн тʹера мьн нәдькьр ԝәки һәвалтийа хԝә тʹәви ԝан бьԛәтиньм.

Ԝи ԝәʹдәйи, кәчʹькәкә 16 сали бь наве Дорати дәрбази щьвата мә бу. Әԝе хьзмәтийа мал бь мал гәләк һʹәз дькьр у хьзмәтийа ви щурʹәйида гәләк хирәт бу, у әве йәке гәләк сәр мьн һʹӧкӧм дькьр. Әз һьнәки жь ԝе мәстьр бум, ле мьн һаԛас хьзмәт нәдькьр чьԛас әԝе. Әз фькьрим: «Де-баве мьн Шәʹдед Йаһоԝа нә, ле нав малбәта Доратида тʹәне әԝ нава рʹастийеда йә. Дийа ԝе нәхԝәш ә, ле диса жи әԝ тʹьме дьчә хьзмәтийе!» Мәсәла ԝе хԝәстьна мьн дьһа ԛәԝи кьр, ԝәки әз Йаһоԝарʹа һе зедә хьзмәт кьм. Гәләк ԝәхт дәрбаз нәбу кӧ әз у Дорати, әм хьзмәтийа пешәнгтийеда бунә һәвалкʹаред һәв. Серида, әм пешәнгед ԝәʹдәлу бун, ле паше әм тʹәвайи бунә пешәнгед һәртʹьм. Хирәта Доратийе бона мьн бу мәсәләкә баш. Әԝе али мьн кьр, ԝәки әз щара пешьн тʹәви кәсәки һинбуна Кʹьтеба Пироз дәстпекьм. Һеди-һеди мьнрʹа ида дьһа һеса дьбу мал бь мал, дәрва у щийед дьнда тʹәви мәрьва хәбәр дьм.

Сала пешьн, чахе әз бумә пешәнга һәртʹьм, бьраки Австрйайи бь наве Хаинтс һатә щьвата мә. Әԝи рʹастийа Кʹьтеба Пироз Канадайеда жь бьре хԝә бьһистьбу, йе кӧ Шәʹде Йаһоԝа бу. Хаинтс ча пешәнге мәхсус щьвата мәда һатьбу кʹьфшкьрьне. Серида әԝ мьн хԝәш һат. Ле әԝи дьхԝәст бьбә мисйонер, ле мьн ԛәт нәдьхԝәст бьбьм мисйонер. Ләма жи мьн пешийе жь ԝи вәдьшарт кӧ дьле мьн кʹәтийә ԝи. Ле паше мә дәстпекьр һәвалтийе бькьн, ԝәхт шунда әм зәԝьщин, у мә тʹәвайи Австрйайеда ча пешәнг хьзмәт дькьр.

ХԜӘСТЬНА КӦ БЬБЬМӘ МИСЙОНЕР ДЬКʹӘВӘ ДЬЛЕ МЬН

Хаинтс гәләк щара мьнрʹа дьгот, кӧ әԝ дьхԝазә бьбә мисйонер. Әԝи тʹӧ щара зоре мьн нәдькьр, ле һьнә пьрс дьда мьн, мәсәлә: «Зарʹед мә тʹӧнә нә, гәло әм нькарьн Йаһоԝарʹа һе зедә хьзмәт кьн?» Ле әз йәкә шәрмокә бум, ләма жи дьтьрсийам бьбьмә мисйонер. Рʹаст ә мьн ча пешәнг хьзмәт дькьр, ле әз дьфькьрим кӧ хьзмәтийа мисйонерти һе чәтьн ә. Диса жи Хаинтс сәбьр дькьр у тʹәрка ве нете нәдьда. Ӧса жи әԝи мьнрʹа дьгот, кӧ әз дьһа зедә дина хԝә бьдьмә нә кӧ хԝә, ле һʹәԝщед мәрьва. Ширәта ԝи бь рʹасти жи керһати бу.

Һеди-һеди, хԝәстьна мьн зедә бу кӧ әз бьбьмә мисйонер, ләма мә бона Мәкʹтәба Гиләде бланк тʹьжә кьр. Ле хьзмәткʹарәки Бәйтʹәле мьнрʹа гот, кӧ пешийе әз гәрәке зьмане Инглизи дьһа баш һин бьм, у мьн ӧса жи кьр. Паши се сала, әм һатьнә шандьне щьватәкә Йугослави йа кӧ Залтсбургеда бу (Австрйа). Мә һʹәфт сала дәшта сәр зьмане Сербо-Хорвати хьзмәт дькьр. Мере мьн бу бәрпьрсийаре мьһале, у мә саләке тʹәсәлийа щьватед сәр ви зьмани дькьр. Рʹаст ә зьмане Сербо-Хорвати һеса нибу, ле мә гәләк һинбунед Кʹьтеба Пироз дәрбаз дькьр.

Сала 1979-да мәрʹа готьн, ԝәки әм бона «һесабуне» һәрʹьнә Булгарьстане. Ԝедәре бәлакьрьна мьзгинийе ԛәдәхә бу. Ләма жи мә ԝедәре мьзгини бәла нәдькьр. Ле мә дьзикава әʹдәбйәт бьрьн бал пенщ хушкед мә, кʹижан кӧ бажаре Софйайеда дьжитьн. Әз гәләк дьтьрсийам, ле Йаһоԝа али мьн кьр ԝәки әз ве щабдарийе биньм сери. Полис дькарьбун әв хушк ньшкева бьгьртана у бькьрана кәле, ле диса жи ԝана бь шабун у мерхаси Йаһоԝарʹа хьзмәт дькьр. Мәсәла ԝан хушка мерхасийа мьн зедә кьр, ԝәки һʹәму шьхӧлед кӧ тʹәшкиләта Йаһоԝа бьдә мьн, биньм сери.

Ԝәʹдә шунда, мә диса бланка Мәкʹтәба Гиләде тʹьжә кьр, у ве щаре әм һатьнә ԛәбулкьрьне. Әм дьфькьрин кӧ әме һәрʹьнә Америкайе у мәкʹтәбе сәр зьмане Инглизи дәрбаз бьн, ле ӧса нәбу. Мьждаре, сала 1981-да, тʹәшкиләта мә Алманйайеда жи Мәкʹтәба Гиләде вәкьр. Ләма жи әм Мәкʹтәба Гиләде бажаре Ԝисбаденеда сәр зьмане Алмани дәрбаз бун, кʹижан кӧ мьн рʹьнд фәʹм дькьр. Паши мәкʹтәбе әм кʹӧда һатьнә шандьне?

ХЬЗМӘТИЙА ԜӘЛАТӘКИ ХОФДА

Әм шандьнә Кәнйайе! Ле Бәйтʹәла Кәнйайе жь мә пьрси һәла әм дькарьн Угандайеда хьзмәт кьн. Зедәтьри 10 сал пешда, Генерал Иди Амин һʹӧкӧмәтийа Угандайе кьрә бьн дәсте хԝә. Бьн сәрԝертийа ԝида бь һʹәзара кәс мьрьн у әʹмьре бь милйона мәрьва тʹәвльһәв бу. Паше, сала 1979-да һʹӧкӧмәтийа Угандайе диса жь тʹәхт һатә авитьне. Рʹаст бежьм, әз дьтьрсийам кӧ әм һәрʹьнә ԝәлатәки һаԛас хоф. Ле Мәкʹтәба Гиләде әм һазьр кьрьбун, ԝәки әм баԝәрийа хԝә Йаһоԝа биньн, ләма жи әм ԛайил бун һәрʹьн.

Һʹале Угандайе гәләк хьраб бу. Дәԝләте нькарьбу бона аве, токе у тьштед дьнә кӧ бона әʹмьр лазьм ьн, хәм бькә. Тʹел нәдьхәбьтин. Мәрьва һәвдӧ гӧлә дькьрьн у дьшеландьн, илаһи шәв. Ләма жи чахе тәʹри дькʹәтә әʹрде, тʹӧ кәс жь мал дәрнәдькʹәт у дӧа дькьрьн ԝәки кәсәк нәйе мала ԝан нәшелинә у ԝана нәкӧжә. Бәле, һʹале ԝәлет гәләк хьраб бу, ле диса жи баԝәрийа хушк-бьра ԛәԝи бу.

Сала 1982-да, әз у Хаинтс, әм гьһиштьнә Кампалайе, пʹайтʹәхта Угандайе. Пенщ мәһед пешьн әм мала Сам у Кристина Ԝаисԝада ман. Пенщ зарʹед ԝан һәбун, у чар мәрьвед ԝан жи тʹәви ԝан дьжитьн. Гәләк щара ԝана рʹоже тʹәне щарәке хԝарьн дьхԝар. Диса жи әԝана һазьр бун, ԝәки чь кӧ дәсте ԝанда һәбу, тʹәви мә пʹарәвәкьн. Гава әм щәм ԝан дьман, әм гәләк тьшт һин бун, чь кӧ бона хьзмәтийа мә керһати бу. Мәсәлә, әм һин бун кӧ тʹәне бь чәнд литьр ав сәре хԝә бьшон у ве аве паше бона дәставе бьдьнә хәбате. Сала 1983-да, мә Кампалайеда щики ӧсада кӧ гәләк хоф нибу, хԝәрʹа маләк дит.

Мә жь хьзмәтийа хԝә шабунәкә мәзьн дьстанд. Нава мәһәкеда мә зедәтьри 4 000 журнал бәла кьр! Ле дьһа зедә мә хԝәш дьһат әԝ йәк, кӧ мәрьва ча ԛәдьре Хԝәде дьгьртьн у һʹәз дькьрьн дәрһәԛа Кʹьтеба Пироз хәбәр дьн. Мьн у Хаинтс, мә һәр йәки тʹьме тʹәви 10-15 мәрьва һинбуна Кʹьтеба Пироз дәрбаз дькьр. Әм жь хԝәндәкʹаред хԝә гәләк тьшт һин дьбун. Мәсәлә, әԝана гәрәке һәр һʹәфтийе ньга бьчуна щьвина, ле ԝана нәдькьрә кӧтә-кӧт, дәԝсе бәшәра ԝан тʹьме хԝәш бу.

Салед 1985 у 1986-да Угандайеда диса дӧ щара шәрʹ дәстпебу. Мә әскәред кӧ бь чʹәка сәр рʹе бона контроле сәкьни бун дьдитьн, у гәләк щар әԝ әскәр зарʹ бун у чʹәкед мәзьн дәсте ԝанда бун. Мә дӧа дькьр ԝәки ԝи ԝәʹде чәтьн әм бь билани хьзмәт кьн у рʹьһʹәтийа дьл хԝәй кьн. Йаһоԝа щаба дӧайед мә дьда. Гава кәсәки гӧһ дьда мьзгинийе, мә ида тьрс бир дькьр.

Ӧса жи мә шәʹдәти дьда кәсед хәриб. Мәсәлә, әм тʹәви жьн-мерәки, Дилбар у Мурат Ибатуллин, жь Татарстане (Русйайа Навин), бунә нас у мә һинбуна Кʹьтеба Пироз тʹәви ԝан дәстпекьр. Мурат доктор бу. Әԝ жьн-мер бунә Шәʹдед Йаһоԝа, у жь ԝи чахи әԝана бь амьни Йаһоԝарʹа хьзмәт дькьн. Паше, әз тʹәви кʹӧлфәтәкә жь Украинайе бь наве Татийана Вилейска бумә нас, йа кӧ һьндьк мабу хԝә бькӧшта. Паши кӧ Татийана һатә ньхӧмандьне, әԝ вәгәрʹийа Украинайе у һьнә ԝәʹдә шунда ча ԝәлгәрʹа әʹдәбйәтед мә хьзмәт дькьр.a

КʹЬФШКЬРЬНӘКӘ ТʹӘЗӘ

Сала 1991-да, гава әм бона һесабуне чубунә Австрйайе, Бәйтʹәле мәрʹа гот ԝәки әм һатьнә шандьне Булгарьстане. Паши ве йәке ча комунизм ль Әԝропайа Рʹоһьлате һьлшийа, изьн һатә дайине ԝәки Шәʹдед Йаһоԝа ԝедәре хьзмәт кьн. Чаԝа кӧ мьн жоре готьбу, гава шьхӧле тʹәшкиләта мә ль Булгарьстане ԛәдәхә бу, мә дьзикава әʹдәбйәт дәрбази ԝедәре кьрьн. Ле ньһа әм һатьнә шандьне, ԝәки ԝедәре мьзгинийе бәла кьн.

Мәрʹа готьн ԝәки әм вәнәгәрʹьн Угандайе. Ләма жи әм вәнәгәрʹийанә ԝедәре мала бона мисйонера, сәва кӧ һур-муред хԝә тʹоп кьн у хатьре хԝә жь һәвалед хԝә бьхԝазьн. Дәԝсе, әм чунә Бәйтʹәла Алманйайе, мә хԝәрʹа әʹрәбәк дәстхьст у әм чунә Булгарьстане. Мә Софйайеда, ль кʹомәкә жь ԝәкә 20 мьзгинвана, дәстпекьр хьзмәт кьн.

Булгарьстанеда әм рʹасти чәнд чәтьнайед тʹәзә һатьн. Йа пешийе, мә зьмане Булгари ньзаньбу. Ӧса жи, сәр зьмане Булгари тʹәне дӧ әʹдәбйәт һәбун, кʹьтеба Рʹастийа кӧ Дьбә бәрбь Жийина Һʹәта-Һʹәтайе у кʹьтеба Сәрһатийед Кʹьтеба Пироз. Мәрʹа чәтьн бу тʹәви мәрьва һинбуна Кʹьтеба Пироз дәстпекьн. Диса жи, кʹома мәйә бьчʹук бь хирәт мьзгини бәла дькьр. Гава Дера Ортодокс әв йәк дит, проблемед мәйә мәзьн дәстпебун.

Сала 1994-да, тʹәшкиләта Шәʹдед Йаһоԝа бь ԛануни һатә ԛәдәхәкьрьне, у әм һʹәсаб дькьрьн ча сектәкә ԛәдәхәкьри. Һьнә хушк-бьра һатьнә гьртьне. Телевизийа у рʹожнәʹма тьштед гәләк хьраб дәрһәԛа мә дьготьн. Мәсәлә, ԝана дьгот ԝәки жь бо ве йәке кӧ Шәʹдед Йаһоԝа хуне бәри хԝә надьн, әԝана дьбьнә сәбәбе мьрьна зарʹед хԝә, у ԝәки әԝана Шәʹдед дьнрʹа дьбежьн кӧ хԝә бькӧжьн. Мәрʹа чәтьн бу мьзгинийе бәла кьн. Әм гәләк щара рʹасти мәрьвед һерс дьһатьн, йед кӧ сәр мә дькьрьнә ԛарʹини, гази полис дькьрьн у һәла һе жи тьшт кәвки мә дькьрьн. Мә нькарьбу әʹдәбйәта биньн ԝәлет, у гәләк чәтьн бу бона щьвина щи кʹьре бьгьрьн. Полис щарәке щьвата мәйә мәзьн жи һәв бәла кьр. Әз у Хаинтс, әм тʹӧ щара рʹасти нәфрʹәтикә һаԛас мәзьн нәһатьбун. Мәрьвед ль Угандайе ӧса нибун. Әԝана һʹәйф бун у ԝана һʹәз дькьр гӧһ бьдьнә мьзгинийе. Ле чь али мә дькьр кӧ мә ԝан чәтьнайада тәйах дькьр?

Мә жь һәвалтийа тʹәви хушк-бьра шабун дьстанд. Әԝана ша дьбун ве йәкерʹа кӧ ԝана Йаһоԝа нас кьр, у әԝана шекьрдар бун бона аликʹарийа мә. Әм гьшк незики һәв дьман у мә али һәвдӧ дькьр. Жь ԝан сәрһатийа әм һин бун кӧ һәрге әм һе зедә нә кӧ дина хԝә бьдьнә проблемед хԝә, ле һʹәԝщед мәрьва, әме бькарьбьн һʹәму кʹьфшкьрьнада шабуне бьвиньн.

Ԝәʹдә шунда һʹале мә дьһа баш бу. Сала 1998-да тʹәшкиләта мә диса бь ԛануни һатә ԛәбулкьрьне, у паши һьнә ԝәʹдә гәләк әʹдәбйәтед мә сәр зьмане Булгари һатьнә ԝәлгәрʹандьне. Сала 2004-да, Бәйтʹәла тʹәзә һатә вәкьрьне. Иро ль Булгарьстане 57 щьват у 2 953 мьзгинван һәнә. Сала хьзмәтийейә пар, 6 475 кәс һатьнә сәр Биранине. Бәре бажаре Софйайеда тʹәне пенщ хушк һәбун, ле ньһа нәһ щьватед мә һәнә. Мә бь рʹасти жи дитийә кӧ «малбәта бьчʹук» бу «һʹәзар кәс» (Ишайа 60:22, ИМ).

ЧӘТЬНАЙЕД ШӘХСИ

Әʹмьре хԝәда әз гәләк щара нәхԝәш кʹәтьм. Бь сала бәдәна мьнда чәнд щара гьре дәрдькʹәтьн. Щарәке сәре мьнда гьрек дәркʹәт. Мьн метода ԛәнщкьрьнейә бь сайа радиасийайе дәрбаз кьр, у ль Һьндьстане операсийа кьр кӧ 12 сьһʹәта кʹьшанд, ԝәки гьре жь сәре мьн дәрхьн. Паши операсийайе әм Бәйтʹәла Һьндьстанеда ман, һʹәта кӧ әз пʹак бум у паше әм вәгәрʹийанә Булгарьстане.

Ԝи ԝәʹдәйи бал Хаинтс нәхԝәшийа гьран бь наве Һантингтон пешда һат. Жь бо ве нәхԝәшийа генетики, ԝирʹа чәтьн бу рʹе һәрʹә, хәбәр дә у кьред хԝә контрол кә. Чьԛас һʹале ԝи хьраб дьбу, һаԛас әԝ дьһа һʹәԝще аликʹарийа мьн дьбу. Баре мьн щарна гәләк гьран бу, у әз дьфькьрим һәла әзе ча бькарьбьм бәрдәԝам кьм мьԛати ԝи бьм. Ле бьраки щаһьл бь наве Боби тʹьме Хаинтс тʹәглиф дькьр кӧ тʹәвайи дәркʹәвьнә хьзмәтийе. Боби жь бо хәбәрдана Хаинтс йан кьред ԝийи бе контрол шәрм нәдькьр. Гава мьн нькарьбу али Хаинтс бькьра, Боби һәртʹьм һазьр бу али мә бькә. Әз у Хаинтс, мә сафи кьрьбу кӧ ве дьнйайеда зарʹа нәйньн, ле Боби пʹешкʹешәкә жь Йаһоԝа бу. Әԝ бона мә бу ча кӧрʹ (Маркос 10:29, 30).

Сәрда, Хаинтс бь кʹансәре жи нәхԝәш кʹәт. Йазьх кӧ сала 2015-да малхе мьни дәлал мьр. Паши мьрьна Хаинтс мьн ньзаньбу чь бькьм. Мьн нькарьбу баԝәр кьра кӧ әԝ ида тʹӧнә йә. Әԝ тʹьме һʹьше мьнда йә, те бежи әԝ һе сах ә (Луԛа 20:38). Әз гьлийед ԝийи ԛәнщ у ширәтед ԝийи баш һәр рʹож тиньм бира хԝә. Әз бона салед кӧ мә тʹәвайи хьзмәт кьр, гәләк шекьрдар ьм.

ӘЗ БОНА АЛИКʹАРИЙА ЙАҺОԜА ШЕКЬРДАР ЬМ

Һʹәму тәнгасийед мьнда, Йаһоԝа али мьн дькьр. Рʹаст ә әз йәкә гәләк шәрмокә бум, ле әԝи али мьн кьр, ԝәки әз бьбьмә мисйонер (2 Тимотʹейо 1:7). Шькьр жь Йаһоԝарʹа, әз у хушка мьнә бьчʹук, әм һәрдӧ жи хьзмәтийа һәртʹьмда ньн. Ньһа әԝ тʹәви мере хԝә, йе кӧ бәрпьрсийаре мьһале йә, дьчә щьватед сәр зьмане Серби, йед кӧ Әԝропайеда ньн. Бәле, Йаһоԝа щаба дӧайед баве мьн дайә кӧ әԝи гәләк сал пешда дӧа кьрьбу.

Лекʹолина Кʹьтеба Пироз шабуне дькә дьле мьн. Әз һин бумә кӧ ԝәʹде чәтьнда мина Иса «һе бь дьле кʹәл» дӧа бькьм (Луԛа 22:44). Йаһоԝа бь рʹасти жи щаба дӧайед мьн дайә. Мәсәлә, хушк-бьред жь щьвата мьнә Софйайеда һьндава мьн гәләк һʹәйф у дьлован ьн. Әԝана мьн тʹәглифи мала хԝә дькьн у гәләк щара дьбежьн, кӧ чьԛас мьн ԛимәт дькьн. Әв йәк дьле мьн гәләк ша дькә.

Әз гәләк щара дьдьмә бәр чʹәʹве хԝә кӧ сахкьрьна мьрийа ԝе чь щурʹәйи бә: Де-баве мьн бәр мала мә сәкьни нә у диса щаһьл ьн, чаԝа кӧ рʹожа дәʹԝата хԝә. Хушка мьн хԝарьне һазьр дькә. Хаинтс бәр һәспе хԝә сәкьни йә. Фькьрандьна кʹур дәрһәԛа ахьрийе али мьн дькә бь зедәйи хәмгин нәбьм, ле Йаһоԝарʹа шекьрдар бьм.

Гава әз дәрһәԛа әʹмьре хԝә дьфькьрьм у бь гӧмане сәр ахьрийе дьньһерʹьм, әз тʹәви ван гьлийед Даԝьд Пʹадша ԛайил ьм: «Әз баԝәр ьм, әʹрде зендийада ԛәнщийа Хӧдан әзе бьбиньм. Хӧданда гӧман бә! Сәрхԝә у дьлтәйах бә! Хӧданда гӧман бә!» (Зәбур 27:13, 14).