Йаһоԝа Рʹийа Мьн Рʹаст Кьр

ДЕ У БАВЕ МЬН РʹИЙА РʹАСТ НИШАНИ МЬН КЬРЬН

Де у баве мьн салед 1920-да пешийа кӧ бьзәԝьщьн рʹастийа дәрһәԛа Йаһоԝа нас кьрьн. Әз дәстпека сала 1939-да һатьмә буйине. Гава әз щаһьл бум, әм ль Инглистане дьжитьн у әз тʹәви де у баве хԝә дьчум щьвинед Шәʹдед Йаһоԝа, у Мәкʹтәба Даннасинкьрьне гәләк мьн хԝәш дьһат. Ԛәт бира мьн начә кӧ әз чаԝа бона готара пешьн рʹабум сәр сьндоԛәке ԝәки һәр кәс бькарьбә мьн бьвинә. Һьнге әз шәш сали бум у гава мьн ль кәсед мәзьн ньһерʹи, бу тәрпәтәрпа дьле мьн.

Баве мьн мьнрʹа пешанинәкә һеса сәр кʹахазе ньвиси. Һʹәйшт салийа хԝәда, әз щара пешьн тʹәне чум бәр дәрики. Әз гәләк ша бум гава хԝәйе мале ньвисара мьн хԝәнд у кʹьтеба «Хԝәде Рʹаст ә» һьлда. Әз рʹәвә-рʹәв чум щәм баве хԝә у мьн һәр тьшт жерʹа гьли кьр. Хьзмәт у щьват дьле мьн ша дькьрьн у хԝәстьна мьн зедә дькьрьн кӧ әз хьзмәта һәртʹьм дәстпекьм.

Гава баве мьн «Бьрща Ԛәрәԝьлийе» башԛә бона мьн жи һьлдьда, рʹастийа Кʹьтеба Пироз һе зедә дьле мьн гьрт. Мьн бь чарчʹәʹва һәр журнала кӧ бь пʹостайе дьһат, дьхԝәнд. Баԝәрийа мьн һьндава Йаһоԝа дьһа ԛәԝи дьбу у мьн жийина хԝә да дәсте ԝи.

Әз у де-баве мьн, әм сала 1950-да чун щьвина мәзьн йа бь наве «Зедәбуна Теократийе», Нийу Йоркеда. Наве тʹема рʹожа Пеншәме йа 3 Тʹәбахе ӧса бу: «Рʹожа Мисйонера». Ве рʹоже бьре Керй Барбер, йе кӧ паше бу әндәмәки Кʹома Рʹебәрийе, готара ньхӧмандьне хԝәнд. Паши кӧ әԝи хьлазийа готаре жь кәсед кӧ дьхԝазтьн бенә ньхӧмандьне дӧ пьрс пьрси, әз рʹабум у мьн гот: «Әре!» Рʹаст ә әз 11 сали бум, ле мьн заньбу кӧ әз гавәкә фәрз давежьм. Диса жи хоф кʹәтә дьле мьн кӧ бькʹәвьм аве, чьмки мьн һе ньзаньбу кӧ ча хԝә аве хьм. Апе мьн дьле мьн рʹьһʹәт кьр у тʹәви мьн һат һʹәта һʹәԝза ньхӧмандьне. Ньхӧмандьн һаԛас зу дәрбаз бу кӧ ньгед мьн ԛәт бьне һʹәԝзе жи нәкʹәт. Бьраки дәсте мьн гьрт у әз дамә йе дьн; йәки әз ньхӧмандьм у йе дьн жи әз рʹакьрьм у жь һʹәԝзе дәрхьстьм. Дәстпека жь ԝе рʹожа фәрз, Йаһоԝа рʹийа мьн бәрдәԝам дькә рʹаст бькә.

МЬН ИТʹБАРИЙА ХԜӘ ЙАҺОԜА АНИ

Паши мәкʹтәбе, мьн дьхԝәст кӧ әз бьбьм пешәнг, ле дәрсдаред мьн мьнрʹа дьготьн кӧ гәрәке әз һәрʹьм занингәһе. Йазьх кӧ мьн гӧрʹа ԝан кьр у әз чум занингәһе. Ле мьн зу фәʹм кьр кӧ әз нькарьм рʹастийеда ԛәԝи бьминьм у һьм жи дина хԝә бьдьм сәр хԝәндьна занингәһе, ләма мьн сафи кьр кӧ жь занингәһе дәркʹәвьм. Мьн бона ве йәке Йаһоԝарʹа дӧа кьр. Паше, мьн дәрсдаред хԝәрʹа нәʹмәкә бь ԛәдьр ньвиси, кӧ әзе дь хьлазийа сала пешьнда, һәрʹьм. Мьн бь тʹәмамийа дьле хԝә итʹбарийа хԝә Йаһоԝа ани, у әз зу бумә пешәнг.

Тирмәһеда сала 1957-да, мьн ль бажаре Ԝеллингборогһе хьзмәта һәртʹьм дәстпекьр. Мьн жь бьред ль Бәйтʹәла Лондоне пьрс кьр кʹа әз дькарьм тʹәви бьраки щерʹьбанди хьзмәте бькьм. Бьре Берт Ваисей, йе кӧ йәки жир у сәрхԝә бу, бу дәрсдаре мьн, у әԝи гәләк али мьн кьр кӧ әз ль гора планәкә баш хьзмәте бькьм. Дь щьвата мәда тʹәне әз, бьре Ваисей у шәш хушкед әʹмьрда мәзьн һәбун. Гава мьн хԝә бона щьвина бь хирәт һазьр дькьр, гәләк мәщал дькʹәтьн дәсте мьн кӧ әз итʹбарийа хԝә һьндава Йаһоԝа дьһа ԛәԝи бькьм у баԝәрийа хԝә әʹйан кьм.

Жь бо инкʹаркьрьна хьзмәта әскәри, әз сәр ԝәхтәкә кьн кʹәтьбум кәле. Паше, мьн Барбара, йа кӧ пешәнга мәхсус бу, нас кьр. Әм сала 1959-да зәԝьщин, у әм һазьр бун кӧ бона хьзмәте һәрʹьн һәр дәра. Пешийе, әм ль бакӧра рʹоавайе Инглистане ль Ланкашире бун. Паше, әз дь мәһа Чьләйе йа сала 1961-да бона Мәкʹтәба Хьзмәтийе йа йәкмәһи ль Бәйтʹәла Лондоне һатьбум тʹәглифкьрьн. Әз шаш мам кӧ әз хьлазийа ве мәкʹтәбе бона хьзмәта рʹеԝитийе һатьм кʹьфшкьрьн. Әз дӧ һʹәфтийа жь алийе бәрпьрсийарәки мьһале йе щерʹьбанди ль бажаре Бирмингһаме һатьм һинкьрьн, у жь Барбарайерʹа изьн һат дайин кӧ тʹәви мьн бе. Паше әм вәгәрʹийан кʹьфшкьрьна хԝә йа ль Ланкашир у Чешире.

МӘ ИТʹБАРИЙА ХԜӘ ЙАҺОԜА АНИ У ԚӘТ ПʹОШМАН НӘБУНӘ

Гава әм мәһа Тʹәбахе сала 1962-да ль татиле бун, мә нәʹмәк жь Бәйтʹәле станд. Дь нәʹмеда бланка бона Мәкʹтәба Гиләде һәбун! Паши кӧ мә бона ве йәке дӧа кьр, мьн у Барбарайе бланк тʹьжә кьрьн у чаԝа кӧ жь мә һатьбу хԝәстьн, мә әԝ зу шандьн Бәйтʹәле. Пенщ мәһ шунда, әм чун Бруклине (Нийу Йорк) ԝәки Мәкʹтәба Гиләде дәрбаз бьн, у ль ԝьр мә дәһ мәһа һинбуна теократик станд.

Ль Мәкʹтәба Гиләде, әм нә тʹәне дәрһәԛа Хәбәра Хԝәде у тʹәшкиләта ԝи, ле дәрһәԛа бьратийа мәйә һʹәмдьнйайе жи гәләк тьшт һин бун. Гава әм жь шагьртед дь кʹома хԝәда гәләк тьшт һин бун, әм ԝәкә 25 сали бун. Бона мьн һәвкʹарийа тʹәви бьре Фред Раск, йе кӧ йәк жь дәрсдаред мә бу, ԛәдьрәки гәләк мәзьн бу. Дәрсәкә гәләк фәрз йа кӧ әԝи да мә әԝ бу кӧ гәрәке әм һазьр бьн кӧ һәртʹьм сәр һʹиме Кʹьтеба Пироз ширәта бьдьн. Бьред щерʹьбанди мина Нейтан Нор, Фредерик Франс у Карл Клеин дәрс дьданә мә. У әм жь дәрсед бьре мәйи мьлук Артур Макмиллан һин бун кӧ Йаһоԝа чаԝа ԝәʹде щерʹьбандьна, демәк жь сала 1914 һʹәта дәстпека сала 1919 рʹебәрийа хьзмәткʹаред хԝә кьрьбу.

КʹЬФШКЬРЬНА НУ

Хьлазийа һинбуна ве мәкʹтәбеда, бьре Нор мьн у Барбарайерʹа гот кӧ әме бен шандьн Бурундийе (Африка). Әм бь ләз чун кʹьтебханәйа Бәйтʹәле ԝәки әм дь кʹьтеба «Һәрсалида» бьвиньн кӧ ль Бурундийе чәнд мьзгинван һәнә. Әм әʹщебмайи ман кӧ мә ль сәр ԝи ԝәлати тʹӧ һәжмаред мьзгинвана нәдитьн. Бәле, әме бьчуна дәштәкә ну йа кӧ мә тʹәне һьнәки нас дькьр. Һәй ԝах, дьле мә кьрә тәрпәтәрп! Ле дӧайед жь дьл әм рʹьһʹәт кьрьн.

Ль Бурундийе һәр тьшт, демәк һәԝа, култур у зьман бона мә хәриб у әʹщеб бу. Лазьм бу кӧ әм зьмане Франси һин бьн. У бона мә зәʹмәт бу кӧ әм хԝәрʹа маләке бьвиньн. Дӧ рʹож паши һатьна мә, йәк жь һәвалдәрсед мәйи Гиләде, бьре Һаррй Арнотт, йе кӧ вәдьгәрʹийа кʹьфшкьрьна хԝә йа ль Замбийайе, һат щәм мә. Әԝи али мә кьр кӧ әм хԝәрʹа маләке бьвиньн. Әԝ мал бу мала мә йа пешьн ча мисйонер. Ле паши дәмәкә кьн, мәрьвед дәԝләте, йед кӧ Шәʹдед Йаһоԝа нас нәдькьрьн, ль һьмбәри мә рʹабун. Ԝәхта кӧ мә шабун жь хьзмәта хԝә дьстанд, ԝана мәрʹа гот кӧ әм нькарьн бе дәстурнәʹмайә шьхӧл, ль ԝьр бьминьн. Йазьх, әм мәщбур бун жь ԝәлати дәркʹәвьн, у әм чунә ԝәлате Угандайе.

Әм дьтьрсийан кӧ бе визәйе һәрʹьн Угандайе, ле мә итʹбарийа хԝә Йаһоԝа ани. Бьраки Канадайи, йе кӧ бона хьзмәте һатьбу Угандайе, офисере емигрантарʹа дәрһәԛа һʹале мә гьли кьр. У паше мәрʹа чәнд мәһ һатьн дайине кӧ әм изьна житьне дәстхьн. Мә жь ве дәрәще фәʹм кьр кӧ Йаһоԝа тʹәви мә йә.

Һʹале ль Угандайе жь һʹале ль Бурундийе гәләк щӧдә бу. Рʹаст ә ль тʹәмамийа Угандайе тʹәне 28 мьзгинван һәбун, ле диса жи ише бәлакьрьна мьзгине пешда дьчу. Ль ве дәште, гәләк мәрьва бь зьмане Инглизи хәбәр дьда. Ле әм зу пеһʹәсийан кӧ гәрәке әм бона пешдачуйина мәрьвед кӧ Кʹьтеба Пироз һин дьбьн, һәри кем зьманәки һәреме жи һин бьн. Пешийе мә ль һәрема Кампалайе мьзгин бәла дькьр. Ль ԝедәре һәри зедә сәр зьмане Лугандайи хәбәр дьдан. Мәрʹа чәнд сал лазьм бун кӧ әм сәр ви зьмани рʹьнд хәбәр бьдьн, у әв йәк бона хьзмәта мә керһати бу. Ижар мә һʹәԝщәдарийед рʹӧһʹани йед хԝәндәкʹаред хԝә дьһа баш фәʹм дькьр. Ләма ԝана дьле хԝә мәрʹа вәдькьр у һәстед хԝә бона тьштед кӧ һин дьбун жи дьготьн.

РʹЕԜИТИЙЕД МӘХСУС

Гава мә али кәсед мьлук дькьр кӧ әԝана рʹастийе нас бькьн, әм дьлша дьбун. У ԝәхта кӧ мә ль тʹәмамийа ԝәлет хьзмәта рʹеԝитийе дәстпекьр, әм һе дьһа зедә ша бун. Бьн рʹебәрийа филиала Кәнйайе, әм ль щийед лайиԛ дьгәрʹийан кӧ пешәнгед мәхсус ль ԝедәре дәштәкә ну ава бькьн. Гәләк щара кәсед кӧ ԛәт һаш жь Шәʹдед Йаһоԝа тʹӧнә бун, меванһʹьзикә мәзьн мәрʹа нишан дькьрьн. Ԝана әм бь дьлгәрми тʹәглифи мала хԝә дькьрьн у мәрʹа хԝарьн чедькьрьн.

Паше әз чум рʹеԝитикә дьн йа мәхсус. Жь Кампалайе, әз дӧ рʹожа бь трене чум гәмигәһа Кәнйайе йа ль Момбасайе. У паше әз бь гәмийе чум Сәйшәле, йа кӧ кʹомәкә гьрава йа ль Окйануса Һьнде йә. Паше жь сала 1965 һʹәта сала 1972, әз у Барбара, әм тʹәвайи дьчунә Сәйшәле. Дь ԝе ԝәхтеда, пешийа жь дӧ мьзгинвана кʹомәк чебу, у паше щьватәкә хԝәш. Дь рʹеԝитийед дьнда жи, әз чум щәм хушк у бьред ль Әритрейа, Әтийопйа у Судане.

Ль Угандайе, паши кӧ ордикә әскәра дәԝләт һьлданә бьн дәсте хԝә, һʹале ԝәлаттда зу хьраб бу. Дь ԝан салед хофда, мьн рʹьнд фәʹм кьр кӧ чьԛас бь билани ә кӧ әз ль гора ве тʹәмийа Кʹьтеба Пироз бькьм, демәк ‹йед Ԛәйсәр ьн бьдьмә Ԛәйсәр› (Марԛос 12:17). Щарәке, жь һʹәму бьнәлийед дәԝләтед дьн һат хԝәстьн кӧ һәрʹьн бӧройа полисе у хԝә бьньвисьн. Мә дәрберʹа ӧса кьр. Чәнд рʹож шунда, гава әз у мисйонерәки ль Кампалайе дьгәрʹийан, полисед ньшкева әм данә сәкьнандьне. Дьле мә тәвьзи! Ԝана әм ча щәʹсус сущдар кьрьн у бьрьн полисхане. Ль ԝедәре мә ԝанрʹа зәлал кьр кӧ әм мисйонеред әʹдьлайиһʹьз ьн. Ԝана готьнед мә кӧ мә хԝә пешда ида хԝә полисрʹа данә ньвисаре, авитьн пьшт гӧһе хԝә. Бьн контрола нобәдаре чʹәккьрида, әм бьрьн полисханәйа незики мала мисйонера. Гава офисере полисе әм нас кьрьн, дьле мә пʹьрʹ рʹьһʹәт бу. Әԝи заньбу кӧ мә хԝә ида пешда ньвисийә, у готә нобәдар кӧ мә бәрʹдә!

Ԝан рʹожада, гава әм гәләк щара рʹасти барикатед әскәри дьһатьн, у илаһи ԝәхта кӧ әскәред гәләк сәрхԝәш әм дьсәкьнандьн, бина мә пʹьрʹ тәнг дьбу. Ижар һәр щара кӧ мә дӧа дькьр, дьле мә рʹьһʹәт дьбу у әм бь хер у сьламәт дәрбаз дьбун. Йазьх, һʹәму мисйонеред жь ԝәлатед дьн дь сала 1973-да жь Угандайе һатьн дәрхьстьн.

Диса жи әм һатьнә шандьне щики дьн, ве щаре әм чун Кот Девуаре (Африкайа Рʹоавайе). Әв йәк бона мә гӧһастьнәкә пʹьрʹ мәзьн бу! Лазьм бу кӧ әм културәкә ну һин бьн, тʹәне сәр зьмане Франси хәбәр дьн у тʹәви мисйонеред жь ԝәлатед дьн, бьжин. Гава кӧ инсанед мьлук у дьлпʹак йед ль дәшта мә мьзгина хере зу ԛәбул дькьрьн, мә фәʹм дькьр кӧ Йаһоԝа рʹебәрийа мә дькә. Мьн у Барбарайе дит кӧ итʹбарийа мә һьндава Йаһоԝа чаԝа рʹийа мә рʹаст дькьр.

Паше Барбара ньшкева бь нәхԝәшийа кансере кʹәт. Бона ԛәнщкьрьна ԝе, әм гәләк щара дьчун ԝәлатед дьн. Дь сала 1983-да, мә фәʹм кьр кӧ әм ида нькарьн ль Африкайе бьминьн. Бь ве йәке дьле мә гәләк ешийа!

ҺʹАЛЕ МӘ ҺАТ ГӦҺАСТЬН

Гава мә ль Бәйтʹәла Лондоне хьзмәт дькьр, сьһʹәта Барбарайе дьһа хьраб дьбу у паше ԝе йәке әԝ мьр. Малбәта Бәйтʹәле кʹеләка мьн бу у али мьн дькьрьн. Илаһи щотәки зәԝьщи али мьн кьр кӧ әз һʹале хԝәйи гьран сьвьк дәрбаз кьм у бәрдәԝам кьм итʹбарийа хԝә Йаһоԝа биньм. Паше, мьн хушкәкә кӧ жь дәрва дьһат ль Бәйтʹәле дьхәбьти, нас кьр. Әԝ бәре пешәнга мәхсус бу, әԝе Йаһоԝа у тьштед рʹӧһʹани гәләк һʹьз дькьр. Дь сала 1989-да, әз у Анн һәврʹа зәԝьщин у жь ԝи ԝәʹдәйи әм ль Бәйтʹәле хьзмәте дькьн.

Жь сала 1995 һʹәта сала 2018, мьнрʹа ԛәдьрәки ӧса һатә дайине кӧ әз бумә ԝәкʹиле Кʹома Рʹебәрийе, у мьн сәрледана незики 60 ԝәлата дькьр. Ль һәр ԝәлатәки, мьн избат дитьн кӧ Йаһоԝа дь һәр һʹалида хер у бәрәкʹәта хԝә сәр сәре хьзмәткʹаред хԝә кем накә.

Дь сала 2017-да, әм бона сәрледане диса вәгәрʹийан Африкайе. Чь дьлхԝәшийәкә мәзьн бу кӧ мьн щара пешьн Анн тʹәви хԝә бьр Бурундийе у әм әʹщебмайи ман кӧ ль ԝедәре хьзмәта ль дәште чьԛас пешда чубу. Ль сәр ве кʹуче кӧ мьн сала 1964-да хьзмәта мал бь мал кьрьбу, ньһа Бәйтʹәләкә хԝәшьк, йа кӧ бона 15 500 мьзгинвана щабдар ә, һатийә авакьрьн.

Әз гәләк ша бум гава мьн плана ԝәлатед кӧ әзе дь сала 2018-да сәрледана бькьм, станд. Йәк жь ԝан ԝәлата Кот Девуар. Чахе әм гьһиштьн бажаре мәзьн Абисане, мьн хԝә ԝәк ль мале тʹәхмин дькьр. Ԝәхта кӧ мьн ль кʹахаза тәләфонед хушк у бьред ль Бәйтʹәле ньһерʹи, мьн дит кӧ бьре Соссоу щинаре мьн ә. Әв нав бона мьн нә хәриб бу. Һат бира мьн кӧ бьре Соссоу ԝәк нобәдаре бажер хьзмәт кьрьбу. Ль ԝе дәме әз ль Абисане бум. Ле әз шаш мам! Әԝ Соссоу йәки дьн бу, демәк кӧрʹе ԝи бу.

Йаһоԝа һәртʹьм хԝәйе соза хԝә йә. Әз жь һʹәму тәнгасийед жийина хԝә һин бум кӧ һәгәр әм итʹбарийа хԝә Йаһоԝа биньн, әԝе рʹийа мә рʹаст кә. Һьзрәта дьле мә әԝ ә кӧ әм жь рʹийа жийина һәрһәйи, йа кӧ ԝе дьнйа тʹәзәда һе зедә шәԝԛ бьдә, ԛәт дәрнәкʹәвьн (Мәтʹәлок 4:18).