1925—Сәд Сал Пешда

ҺЕВИЙА КӦ НӘҺАТӘ СЕРИ

Лекʹолинкʹаред Кʹьтеба Пироз һивийе бун кӧ сала 1925-да әʹрд ԝе диса бьбә щьнәт. Гәло чьрʹа? Бьре Алберт Шредер, йе кӧ паше бу әндәме Кʹома Рʹебәрийе, ӧса гот: «Әм дьфькьрин кӧ ԝе дәме, бьжартийед кӧ һе сәр әʹрде нә ԝе һәрʹьнә сәр әʹзмана у бькʹәвьнә Пʹадшатийа Хԝәде, у хьзмәткʹаред Хԝәде йед бәре, мәсәлә Бьраһим, Даԝьд у кәсед дьн, ԝе жь мьрьне бенә рʹакьрьне у ль сәр әʹрде бьбьнә рʹебәред щьмәʹта Хԝәде». Ле гава әв һевийа ԝан нәһатә сери, һьнәк жь ԝан хәмгин бун (Мәтʹәлок 13:12).

Диса жи һʹәчʹи зәʹф жь Лекʹолинкʹаред Кʹьтеба Пироз тʹәрка бәлакьрьна мьзгинийе нәдан, у чьԛас дьчу ԝана фәʹм дькьр кӧ гәрәке дәрһәԛа Йаһоԝа шәʹдәтийе бьдьн. Мәсәлә, ԝәрә әм дина хԝә бьдьне кӧ ԝана чь дькьр, ԝәки рʹастийа Кʹьтеба Пироз һәр дәра бе бәлакьрьне.

МЬЗГИНИ БЬ САЙА РАДИОЙЕ БӘЛА ДЬБӘ

Сала 1924-да радиойа, бь наве WBBR гәләк бәлабуйи бу. Ләма жи Лекʹолинкʹаред Кʹьтеба Пироз незики бажаре Чикагойе, стансийәкә тʹәзә ава кьрьн. Наве ве WORD бу. Ралф Лефлер, инжинерәки кӧ авакьрьна стансийайеда кʹар кьрьбу, ӧса гот: «Шәвед сарә зьвьстанеда, дәнге ве радиойе дьгьһиштә щийед гәләк дур жи». Мәсәлә, малбәтәкә кӧ ль бажаре Пилот Стешьнда (Аласка) дьжит, йәк жь бәрнамед пешьн бьһист. Паше жи ԝана стансийайерʹа нәʹмә ньвиси у бона бәрнама хԝәш рʹази бун, йа кӧ али ԝан кьр һе зедә дәрһәԛа Кʹьтеба Пироз у Хԝәде занәбуне бьстиньн.

Бьрща Ԛәрәԝьлийе, йа 1 Кануна Пешьн, сала 1925 дәрһәԛа ве радиойе ӧса гот: «WORD, йәк жь стансийа һәрә ԛәԝат йед Америкайе йә, йа кӧ бь 5 000 Ԝатт дьхәбьтә. Мәсәлә дәнге ве стансийайе һәла һе дьгьһижә Атлантик у Пасифик, Кубайе у һәремед ль бакӧра Аласкайе. Гәләк кәсед кӧ бәре дәрһәԛа рʹастийе нәбьһистьбун, бь сайа ве радиойе һʹәԝаса ԝан пешда һат».

Ӧса жи Лекʹолинкʹаред Кʹьтеба Пироз хирәт дькьрьн, кӧ бь сайа радиойе мьзгинийе Канадайеда дьһа зедә бәла кьн. Сала 1924-да, стансийа бь наве CHUC ль бажаре Саскатуне (Саскачеван) һатә авакьрьне. Әԝ йәк жь стансийед пешьн бу, йед кӧ Канадайеда бәрнамед религи әʹлам дькьрьн. Сала 1925-да, лазьм бу кӧ щики дьһа мәзьн бона ве стансийайе бьдитана. Ләма жи тʹәшкиләте әв стансийа кʹьрʹи у студийед бәрнаме дәрбази театра кәвьн, йа Саскатуне кьрьн, у әв һәма бона ве нете һатә кʹьрʹине.

Бь сайа ве стансийайе, гәләк кәсед кӧ ль һәремед Саскачеване дьжитьн, щара пешьн дәрһәԛа мьзгинийе бьһистьн. Мәсәлә, ль бажарәки дур, кʹӧлфәтәке, йа кӧ гӧһ дабу бәрнама радиойе, нәʹмәк ньвиси у хԝәст кӧ чәнд әʹдәбйәтед сәр һʹиме Кʹьтеба Пироз жерʹа бьшиньн. Бьре Щорщ Неш ӧса гот: «Ӧса дьһатә кʹьфше, кӧ ча бежи әԝе бь дәнге бьльнд кьрә гази, ‹Мә һин кьн!› Мә жи һʹәму пʹаред Дәрсед Ньвисаред Пироз жерʹа шанд». Гәләк ԝәʹдә дәрбаз нәбу, кӧ әԝе жьньке дәстпекьр мьзгинийе ль щийед дьһа дур бәла кә.

РʹАСТИЙА ФӘРЗ

Журнала Бьрща Ԛәрәԝьлийе, йа 1 Адаре, сала 1925-да готарәк бь наве «Буйина Мьләт» дәркʹәт. Гәло әв готар чьрʹа һаԛас фәрз бу? Лекʹолинкʹаред Кʹьтеба Пироз ида заньбун, кӧ тʹәшкиләта Мире-щьна һәйә. Әв тʹәшкиләт жь щьна, жь системед религи, комерси у политики нә. Ле бь сайа ве готаре, «хӧламе амьн у сәрԝахт» нишани хушк-бьра кьр, ԝәки тʹәшкиләта Йаһоԝа жи һәйә. Әв тʹәшкиләт бь тʹәмами жь тʹәшкиләта Мире-щьна щӧдә дьбә у мьԛабьли ԝе йә (Мәтта 24:45). Ӧса жи хӧламе амьн зәлал кьр, кӧ Пʹадшатийа Хԝәде сала 1914-да дәстпекьр сәрԝертийе бькә, у жь бо шәрʹе кӧ ԝе сале сәр әʹзмана пешда һат, Мире-щьна у щьнед ԝи жь әʹзмен һатьбун хԝаре (Әʹйанти 12:7-9).

Ле һьнә мәрьварʹа чәтьн бу, ԝәки әв фәʹмкьрьна тʹәзә ԛәбул кьн. Ләма жи готареда ӧса һатә готьне: «Һәрге һьнә хԝәндәванед Бьрща Ԛәрәԝьлийе ве йәкерʹа ԛайил ниньн, бьра әԝ бь сәбьр у бь дьләки рʹьһʹәт һивийа Хӧдане мә бьн».

Пешәнгәки жь Британйайе, бь наве Том Айр гот, кӧ гава әв готар дәркʹәт, реаксийа һʹәчʹи зәʹф Лекʹолинкʹаред Кʹьтеба Пироз чаԝа бу: «Гава ԝана бьһист кӧ нета кʹьтеба Әʹйанти сәре 12 чь йә, әԝана гәләк ша бун. Мә фәʹм кьр кӧ Пʹадшатийа Хԝәдейә сәр әʹзмана ида сәрԝертийе дькә, у мә хԝәст ве мьзгинийе бьгьһиньнә мәрьва. Ләма жи мә дьһа зедә хьзмәт дькьр, у мә фәʹм кьр кӧ зутьрәке Йаһоԝа ԝе тьштед дьһа мәзьн бькә».

ДӘРҺӘԚА ЙАҺОԜА ШӘʹДӘТИЙЕ ДЬДЬН

Иро, Шәʹдед Йаһоԝа әв гьлийед жь Кʹьтеба Пироз рʹьнд заньн, гава Йаһоԝа дьбежә, кӧ «һун шәʹдед мьн ьн, хӧламе мьни бьжарти һун ьн» (Ишайа 43:10, ИМ). Пешийа сала 1925, әʹдәбйәтед мәда дәрһәԛа ве рʹезе гәләк тьшт нәдьһатә готьне. Ле сала 1925-да, 11 журналед Бьрща Ԛәрәԝьлийеда дәрһәԛа Ишайа 43:10, 12 һатьбу готьне.

Хьлазийа мәһа Тʹәбахе, сала 1925, Лекʹолинкʹаред Кʹьтеба Пироз бона щьвата мәзьн ль бажаре Индианаполисе (Индиана) тʹәвайи тʹоп бун. Сәр бәрнама щьвата мәзьн, әв гьлийед Щозеф Рутерфорд ньвисар бун: «Әм һатьнә сәр ве щьвата мәзьн, ԝәки . . . жь Хԝәде ԛәԝате бьстиньн, кӧ ча шәʹдед ԝи мьзгинийе бәла кьн». Сәр ве щьвата мәзьнә һʹәйштрʹожи, гӧһдарван һатьнә һеланкьрьне, ԝәки һʹәму мәщала бьдьнә хәбате, кӧ дәрһәԛа Йаһоԝа шәʹдәтийе бьдьн.

Рʹожа Шәмийе, 29 Тʹәбахе, бьре Рутерфорд готарәкә хԝәда зәлал кьр, кӧ бәлакьрьна мьзгинийе чьԛас фәрз ә: «Йаһоԝа хьзмәткʹаред хԝәрʹа дьбежә . . . ‹Һун шәʹдед мьн ьн кӧ әз Хԝәде мә›. Паше жи әв тʹәми ԝанрʹа һатә дайине кӧ шәʹдәтийе бьдьнә мьләта. Сәр рʹуйе әʹрде хенщи хьзмәткʹаред ԝи, сәр кʹижана кӧ рʹӧһʹе Хԝәде йә, кәс тʹӧнә кӧ мьләтарʹа шәʹдәтийе бьдә. Ләма жи, әԝана шәʹдед ԝи нә» (Ишайа 43:12; 62:10, ИМ).

Паши ве готаре, гӧһдарвана бь дәнгәки, резолусийа бь наве «Әʹламәтийа Һевийе» ԛәбул кьрьн. Теда һатә готьне кӧ тʹәне Пʹадшатийа Хԝәде дькарә «әʹдьлайи, хԝәши, сьһʹәт-ԛәԝат, жийин, азайи у шабуна һʹәта-һʹәтайе» бинә. Паше әв резолусийа сәр чәнд зьмана һатә ԝәлгәрʹандьне, мина бәлавоке һатә нәшьркьрьне, у 40 милйон копийед ве бәлавоке һатьнә бәлакьрьне.

Диса чәнд сал дәрбаз бун һʹәта кӧ Лекʹолинкʹаред Кʹьтеба Пироз хԝә нав кьрьн Шәʹдед Йаһоԝа. Ле чьԛас дьчу ԝана дьһа баш фәʹм дькьр, кӧ гәрәке дәрһәԛа Хԝәде шәʹдәтийе бьдьн.

СӘРЛЕДАНЕД ДӦБАРӘ

Чахе һәжмара Лекʹолинкʹаред Кʹьтеба Пироз ль тʹәмамийа дьнйайе зедә дьбу, әԝана дьһатьнә һеланкьрьне ԝәки сәрледана ԝан мәрьва бькьн, йед кӧ бәре гӧһ дьданә мьзгинийе. Паши кампанийа бона бәлакьрьна бәлавока Әʹламәтийа Һевийе, бәрнама Бийулетенедаa әв рʹебәри дәркʹәт: «Лазьм ә кӧ мьзгинван диса һәрʹьн бал ԝан мәрьва, йед кӧ әʹдәбйәтед мә ԛәбул нәкьрьнә, ле бәлавока Әʹламәтийа Һевийе һьлданә».

Бәрнама Бийулетенеда йа мәһа Чьләйе, сала 1925, дьһатә готьне дәрһәԛа һʹәсабе Лекʹолинкʹарәки Кʹьтеба Пироз жь Планойе (Техас): «Әм әʹщебмайи ман гава мә сәрледана ԝан мьһала дькьр, кʹидәре кӧ мьзгини чәнд щара һатьбу бәлакьрьне, мәрьва дьһа баш мьзгини ԛәбул дькьрьн, нә кӧ ԝан мьһалада кʹидәре кӧ әм щара пешьн дьчун, ԝәки шәʹдәтийе бьдьн. Ль һәрема мәда, бажарәки бьчʹук һәйә, кʹидәре кӧ мьзгини нава 10 салед дәрбазбуйида, пенщ щара һатә бәлакьрьне. . . . Ван пашԝәхтийа хушка Һендрикс у дийа мьн, диса чунә ԝедәре у гәләк кʹьтеб бәла кьрьн».

Ӧса жи пешәнгәки жь Панамайе ньвиси: «Гәләк мәрьвед кӧ щара пешьн бәри мьн дабун, щара дӧда йан сьсийа ида дьһа баш гӧһ дьданә мьн. Исал әз һе зедә дина хԝә дьдьмә ԝан мәрьва, йед кӧ бәре әз дьчумә бал ԝан, у әԝ сәрледана щарна гәләк баш дәрбаз дьбьн».

ДИНА ХԜӘ ДЬДЬНӘ АХЬРИЙЕ

Нәʹма хԝәйә һәрсалида, бьре Рутерфорд һʹәму пешәнгарʹа бәʹса шьхӧлед сале кьр, у дина ԝан кʹьшандә сәр шьхӧле кӧ пешийа ԝан бу. Әԝи гот: «Сала пар, ԝә дьлбини да гәләк кәсед хәмгин. Бь сайа ве йәке, ԝә жи шабунәкә мәзьн станд. . . . Исал, мәщала ԝә ԝе һәбә кӧ һун дәрһәԛа Хԝәде у сәрԝертийа ԝи шәʹдәтийе бьдьн. . . . Ԝәрен әм тʹәвайи дәнге хԝә бьльнд кьн у кʹьлама пәсьндайине Хԝәде у Пʹадше хԝәрʹа бьстьрен».

Гава хьлазийа сала 1925 ида незик бу, бьра нет данинә пешийа хԝә, кӧ Бәйтʹәла Бруклине дьһа мәзьн кьн. Сала 1926-да проекта авакьрьнейә һәрә мәзьн тʹәшкиләтеда дәстпебу.