ПЬРСЕД ЩАҺЬЛА
Ча Тʹәрка Әʹмьре Дӧрʹути Бьдьм?
Щарна хьзмәткʹаред Хԝәде дькʹәвьнә шьке, кӧ һежа йә ԝәʹдә у ԛәԝата хԝә хәрщ кьн, сәва кӧ ль гора нормед Хԝәде бьжин (Зәбур 73:2, 3). Әԝана һәла һе дькарьн тьштед ӧса жи бькьн, чь кӧ мьԛабьли ԛанунед Йаһоԝа нә, у дәрәԝа жи бькьн, сәва кьред хԝәйә хьраб вәшерьн.
Әв готар һатийә һазьркьрьне бона ԝан мәрийа, йед кӧ бь әʹмьре дӧрʹути дьжин, ле дьхԝазьн тʹәрка ве йәке бьдьн.
Сәр ве рʹупʹеле
Чь йә әʹмьре дӧрʹути?
Тӧ бь әʹмьре дӧрʹути дьжийи, һәрге тʹәви мәрьвед кӧ гӧрʹа Хԝәде накьн ԝан тьшта дьки, чь кӧ зани нәрʹаст ә; ле тʹәви хушк-бьра, хԝә ӧса дьди кʹьфше, кӧ йанчь дьхԝази бь амьни Йаһоԝарʹа хьзмәт ки. Ӧса тӧ ча бежи бь дӧ щурʹә жийина дьжийи у һәр щар рола хԝә дьгӧһези.
«Чахе тӧ бь әʹмьрәки дӧрʹути дьжийи, тӧ жь һʹәмушка тьштәки вәдьшери, у тʹӧ кәс ньзанә, кӧ бь рʹасти тӧ йәки чаԝа ни. Демәк чахе тӧ бь әʹмьрәки дӧрʹути дьжийи, тӧ һьндава һʹәмуйа нәһʹәлал и» (Ерин).
Ԝә заньбу? Гава һун тʹәне нә у ԝан тьшта дькьн, чь кӧ Йаһоԝа ԛәбул накә, әв жи те һʹәсабе әʹмьре дӧрʹути.
«Чахе әз 14 сали бум, мьн дәстпекьр интернетеда шькьл у видеойед нәщайиз бьньһерʹьм. Бәр мәрьва мьн хԝә ӧса дьда кʹьфше, кӧ йанчь әв тьшт бәр чʹәʹве мьн рʹәш ьн, ле мьн дьле хԝәда заньбу, ԝәки ӧса нинә» (Нолан).
Принсипа Кʹьтеба Пироз: «Тʹӧ кәс нькарә дӧ ахарʹа хӧламтийе бькә, чьмки йан ԝе һʹиле ԝи жь йәки һәрʹә у йе дьне һʹьз бькә, йан жи ԝе ԛәдьре йәки бьгьрә у йе дьне беһӧрмәт кә. Һун нькарьн һьн Хԝәдерʹа, һьн жи һәбукерʹа хӧламтийе бькьн» (Мәтта 6:24).
Һәрге әз бь әʹмьрәки дӧрʹути дьжим, гәло әв те һʹәсабе кӧ әз йәки хьраб ьм?
Дькарьн бежьн на. Һәмьки һьнә мәрьва сафи кьрьнә ԝәки ль гора нормед Кʹьтеба Пироз нәжин. Дәрһәԛа тә жи дькарьн ӧса бежьн? Йан дьԛәԝьмә мәʹнийа тә тьштәки дьн ә, мәсәлә:
Тӧ дьтьрси жь һәвалед хԝә щӧдә би.
Бь тʹәхмина тә, тӧ гәләк алийада мина һәвалед хԝә йи, нә кӧ мина хушк-бьред щьвате.
Тӧ дьфькьри ԝәки жь ԛәԝата тә дәр ә һʹәму тʹәмийед Хԝәде бини сери.
«Әз дьфькьрьм ԝәки һьнә щаһьлед кӧ бь әʹмьрәки дӧрʹути дьжин, ԝан хԝәш те нава ԝан мәрьвада бьн, йед кӧ Йаһоԝарʹа хьзмәт накьн, чьмки әԝана дьхԝазьн мәрьв ԝана ԛәбул кьн. У бона ԝан йәк ә әв мәрьв чь щурʹәйи нә» (Девид).
Һәмьки жь ԝан мәʹнийа ԛә йәк жи ԝан мәрьва рʹаст дәрнахә, кʹижан кӧ бь әʹмьре дӧрʹути дьжин. Ле бь аликʹарийа ԝан мәʹнийа зәлал дьбә, кӧ чьма һәла һе мәрьвед баш жи дькʹәвьнә ве тʹәльке. Тӧ чь дькари бьки, һәрге тӧ жи кʹәти дәрәща ӧса?
Әз чаԝа дькарьм тʹәрка әʹмьре дӧрʹути бьдьм?
1. Бьфькьрә дәрһәԛа щурʹе жийина хԝә. Пьрсе бьдә хԝә: «Әз бь рʹасти дьхԝазьм мәрьвәки ӧса бьм? Һәрге әз ӧса бәрдәԝам кьм, һʹале мьн ԝе чаԝа бә?»
Принсипа Кʹьтеба Пироз: «Йе аԛьл хьрабийе . . . дьбинә . . . , ле йе дьлсах пешда дьчьн у зьраре» дькʹәвьн (Мәтʹәлок 27:12).
2. Һʹәлал бә. Дәрһәԛа һʹале хԝә тʹәви де-баве хԝә йан һәваләки хԝәйи щерʹьбанди хәбәр дә, кʹижан кӧ принсипед Йаһоԝа ԛимәт дькьн. Дьԛәԝьмә әԝана ԝе ша бьн, ԝәки тә аликʹари жь ԝан хԝәст. У һьм жи әԝана ԝе тәрʹа фьрнаԛ бьн, гава бьвиньн ԝәки тӧ дьхԝази тьштед рʹаст бьки!
Һәрге тӧ бькʹәви чʹәла кʹур йа әʹмьре дӧрʹути, аликʹарийе бьхԝазә
«Мьн сафи кьр һәр тьшти гьли кьм у әв йәк әʹмьре мьнда тьштәки лапи чәтьн бу. Ле чахе мьн әв гав авит, те бежи барәки гьран сәр мьн һатә һьлдане» (Нолан).
Принсипа Кʹьтеба Пироз: «Әԝе кӧ нәһәԛийа хԝә вәдьшерә хере набинә, ле йе кӧ хԝә мӧкӧрʹ те у дьһелә, ԝе рʹәʹме бьбинә» (Мәтʹәлок 28:13).
3. Ахьрийа кьред хԝә ԛәбул кә. Бир нәкә, кӧ һәрге тә тьштәк жь де-баве хԝә йан жь щьвате вәшартийә, тә итʹбари һьндава хԝәда ӧнда кьрийә. Ахьрийеда де-бавед тә йан рʹуспийед щьвате дьбәкә һьнә тьштада тәрʹа синора дайньн. Ахьрийа кьред хԝә ԛәбул кә у хԝәрʹа сафи кә, кӧ «һәр тьшти рʹаст» у бь һʹәлали бьки (Ибрани 13:18).
Принсипа Кʹьтеба Пироз: «Гӧһ бьдә ширәте у һинкьрьне ԛәбул кә, ԝәки ахьрийеда тӧ бьби билан» (Мәтʹәлок 19:20, ДТʹ).
4. Баԝәрийа хԝә һьндава һʹәзкьрьна Хԝәдеда ԛәԝи кә. Йаһоԝа тә һʹәз дькә, ләма жи әԝ һаш һәр гавәкә тә һәйә. Чахе тӧ бь әʹмьре дӧрʹути дьжийи, әԝ ве йәке дьвинә у бәр хԝә дькʹәвә. Ле чьмки әԝ бона тә «хәм дькә», һазьр ә али тә бькә, ԝәки тӧ рʹийа хԝә рʹаст ки (1 Пәтрус 5:7).
Принсипа Кʹьтеба Пироз: «Жь бәр кӧ чʹәʹвед Хӧдан, бона кӧ дь охра йед кӧ дьлед ԝан бь ԝирʹа йәк ьн ԝе хԝӧртбуна хԝә нишан бьдә, ль һʹәмуйа рʹуйе әрʹдева фьр дьбә» (2 Дирок 16:9).