Гәло Ԝе Бе Әв Рʹож кӧ Тероризм Ида Тʹӧнә бә?
Чахе дәрһәԛа тероризме дьбьһейи, дьбә пьрс бал тә пешда тен: «Гәло хәма Хԝәде нинә, кӧ чь дьԛәԝьмә? Чьма әԝ тьшт дьԛәԝьмьн? Гәло тероризмa ԝе бе һьлдане? Мәрьв ча дькарә бьн ве тьрседа бьжи? Кʹьтеба Пироз зәлал щаба ԝан пьрса дьдә.
Хԝәде ча дьньһерʹә сәр тероризме?
Хԝәде зорбәтийе у тероризме нәфрʹәт дькә (Зәбур 11:5; Мәтʹәлок 6:16, 17). Ԝәкʹиле Хԝәде, Иса жи щарәке шагьртед хԝә һьлат, чахе ԝана хԝә мина зорбәта данә кʹьфше (Мәтта 26:50-52). Һьнәк мәрьв дьбежьн кӧ әԝана бь наве Хԝәде зорбәтийе дькьн, ле Хԝәде изьн нәдайә ԝан кӧ ве йәке бькьн. Бь рʹасти Хԝәде нә жи дӧайед мәрьвед ӧса дьбьһе (Ишайа 1:15).
Хԝәде хәм дькә бона ԝан мәрийа, йед кӧ дьчәрчьрьн у ӧса жи йед кӧ жь бо тероризме зьраре кʹәтьнә (Зәбур 31:7; 1 Пәтрус 5:7). Кʹьтеба Пирозда ӧса жи те готьне, ԝәки Әԝ ԝе зорбәтийе кʹӧта кә (Ишайа 60:18).
Сәбәбе тероризме
Кʹьтеба Пироз сәбәбе тероризме әʹйан дькә. Әԝ дьбежә ԝәки сәрԝертийа мәрьва зийане тинә (Ԝаиз 8:9). Нава тʹәрихийа инсанәтеда, мәрьвед хԝәйиһʹӧкӧм пе тероризме зорбәти мәрьва кьрьнә. Мәрьвед зийанкʹәти жи сәва кӧ һʹәйфе һьлдьн, пе тероризме зорбәти кьрьнә (Ԝаиз 7:7).
Кʹӧтакьрьна тероризме
Хԝәде соз дьдә, кӧ ԝе зорбәтийе у тьрсе бьдә һьлдане, у дәԝсе әʹдьлайе бинә сәр тʹәмамийа әʹрде (Ишайа 32:18; Миха 4:3, 4). Хԝәде ԝе:
Сәбәбе тероризме бьдә һьлдане. Әԝ ԝе дәԝса сәрԝертийа мәрьва, сәрԝертийа хԝә сәр тʹәмамийа дьнйайерʹа кʹьфш кә. Сәрԝере ве сәрԝертийе Иса Мәсиһ, ԝе һьндава һʹәмуйада һәԛ бә у зорбәтийе бьдә һьлдане (Зәбур 72:2, 14). Һьнге ԝе тʹӧ кәс тероризме нәкә. Мәрьв «хер-хԝәшийева ԝе хьне бьн у ша бьн» (Зәбур 37:10, 11).
Һʹәму зийане жь тероризме бьдә һьлдане. Хԝәде ԝе мәрийа жь зийана тероризме аза кә, һьм алийе физикида, һьм жи емосийалида (Ишайа 65:17; Әʹйанти 21:3, 4). Әԝ ӧса жи соз дьдә, кӧ ԝе мьрийа пашда вәгәрʹинә жийине,у әԝана ԝе әʹдьлайеда сәр әʹрде бьжин (Йуһʹәнна 5:28, 29).
Кʹьтеба Пирозда һәнә избатийед ве йәке, кӧ Хԝәде зутьрәке ԝе дәстпекә һәрәкʹәт бькә. Дьбә кӧ пьрс щәм ԝә пешда те: «Чьма Хԝәде һʹәта ньһа тероризм кʹӧта нәкьрийә?» Сәва кӧ щаба ве пьрсе бьстиньн, бьньһерʹьн видео «Чьма Хԝәде Дьһелә Ԝәки Әм Бьчәрчьрьн?»
a «Тероризм» әԝ ә кӧ зорбәтийе дькьн, илаһи һьндава бьнәлийа, сәва кӧ ԝана бьдьнә тьрсандьне у гӧһастьнед политики, религи у сосйали бькьн. Дьбә кӧ һьнә мәрьв һәврʹа ԛайил нибьн ԝе йәкеда, ԝәки кьред чь щурʹәйи дькарьн һʹәсаб кьн ча йед тероризми.