Гәло Кʹьтеба Пирозда Дәрһәԛа Тату Чь Те Готьне?
Щаба Кʹьтеба Пироз
Кʹьтеба Пирозда тʹәне щарәке дәрһәԛа тату те готьне. Әв йәк Ԛануна Кʹаһинтийе 19:28-да ньвисар ә: «Ньвисаред кʹӧтайи ль хԝә дәрнәхьн». Әв тʹәми Хԝәде дабу Исраелийа, сәва кӧ әԝана щӧдә бьн жь мьләтед дәр-дор йед кӧ ньвисаред кʹӧтайи, йане тату ль сәр бәдәна хԝә нәԛьш дькьрьн. Сәр ԝан тату нав у симболед хӧданед ԝан бун (Ԛануна Дӧщари 14:2). Рʹаст ә иро нәлазьм ә, ԝәки Мәсиһи әве ԛануне биньн сери, ле принсипа кӧ ве ԛанунеда нә, гәләк фәрз ә у гәрәке һьлдьн һʹәсаб.
Гәло изьн һәйә, ԝәки Мәсиһи сәр бәдәна хԝә ньвисаред кʹӧтайи бькьн?
Рʹезед Кʹьтеба Пироз кʹижан кӧ жере тенә дайине, ԝе али ԝә бькьн һе кʹур дәрһәԛа ве пьрсе шеԝьр кьн:
«Бьра кʹӧлфәт бь . . . шәрме у бәрбьһерийе хԝә бьхәмьлиньн» (1 Тимотʹейо 2:9). Әв принсип ӧса жи мера дькʹәвә. Әм гәрәке һәстед мәрьвед дьн һьлдьн һʹәсаб у дина мәрийа бь зедәйи нәкʹьшиньн сәр хԝә.
Һьнә мәрьв бь ви щурʹәйи дьхԝазьн избат кьн, кӧ әԝана хԝә сәри хԝә нә. Һьнәк жи дьхԝазьн нишан кьн, ԝәки әԝана хԝәйе бәдәна хԝә нә, ләма жи чь дьхԝазьн дькьн. Ле Кʹьтеба Пирозда те готьне: «Ԛальбе хԝә тʹәсмили Хԝәде кьн чаԝа ԛӧрбанәкә сах, пироз, ль Хԝәде ԛәбул, йе кӧ һәйә хьзмәткьрьна мәйә пирозә фькьранди» (Рʹомайи 12:1). Кʹур бьфькьрьн кӧ чьрʹа һун дьхԝазьн тату бькьн. Һәрге һун дьхԝазьн ве йәке жь бо моде бькьн, йан жи дьхԝазьн бьдьнә кʹьфше, кӧ һун әндәме кʹомәке нә, бир нәкьн ԝәки әв хԝәстьна ԝә дькарә дәрбаз бә, ле тату ԝе сәр бәдәна ԝә бьминә. Һәрге һун сәр ве йәке кʹур бьфькьрьн, һуне сафикьрьна рʹаст у билан бькьн (Мәтʹәлок 4:7).
«Тʹьвдира мәрьве хирәт әʹсә кʹаре тинә, ле һәр кәсе ләз кʹәти әʹсә зьраре тинә» (Мәтʹәлок 21:5). Гәләк щар мәрьв ләзә-ләз сафи дькә, кӧ тату бькә, ле ахьрийа ве йәке дькарә дьреж сәр мәрьва һʹӧкӧм кә. Мәсәлә, сәр һәләԛәтийа ԝи тʹәви мәрьва у сәр хәбате. Хенщи ԝе йәке, тʹәмьзкьрьна тату гәләк еш ә у бьһа йә. Ӧса жи чаԝа леколин у бизнеса тʹәмьзкьрьна тату нишан дькьн, гәләк мәрьв кʹижан кӧ тату кьрьнә, ԝәʹдә шунда пʹошман дьбьн.