Гәло Иса пе Бәдәна Физики йан Рʹӧһʹани Һатә Сахкьрьне?
Щаба Кʹьтеба Пироз
Кʹьтеба Пирозда те готьне ԝәки Иса «алийе бәдәнида һатә кӧштьне, ле алийе рʹӧһʹанида жийинерʹа һатә вәгәрʹандьне» (1 Пәтрус 3:18; Кʹаред Шандийа 13:34; 1 Корьнтʹи 15:45; 2 Корьнтʹи 5:16).
Хәбәред Иса избат дькьн ԝәки әԝ пе бәдәна физики, демәк бь хун у гошт нәһатә сахкьрьне. Иса гот ԝәки әԝи бәдәна хԝә «бона жийина дьнйайе» да, демәк бона инсанәте бәрва да (Йуһʹәнна 6:51; Мәтта 20:28). Һәгәр Иса пе бәдәна хԝәйә физики бьһата сахкьрьне, ԝи чахи ԛӧрбанбуна ԝи ԝе бош-бәтал буйа. Әв йәк нә дьбу, чьмки Кʹьтеба Пирозда те готьне, ԝәки әԝи «щарәке бона һәр тʹьм», бәдәна хԝәйә хун у гошт кьрә ԛӧрбан (Ибрани 9:11, 12).
Чаԝа шагьртед Иса дькарьбун ԝи бьдитана, һәгәр әԝ пе бәдәна рʹӧһʹани һатә сахкьрьне?
Кәсед рʹӧһʹани дькарьн бькʹәвьн дьлԛе мәрьва. Мәсәлә, бәре мәләка ӧса дькьрьн, у һәла һе тʹәви мәрьва нан-ав жи дьхԝарьн (Дәстпебун 18:1-8; 19:1-3). Ле диса жи әԝана кәсед рʹӧһʹани бун у дькарьбун дьнйа физики бьһиштана бьчуна (Һʹакьмти 13:15-21).
Паши сахкьрьне Иса чаԝа гәләк мәләкед дьн, щарна дькʹәтә дьлԛе мәрьва, ле әԝ диса жи кәсе рʹӧһʹани бу у дькарьбу хԝә әʹйан кьра у ньшкева бәтаԝәбуйа (Луԛа 24:31; Йуһʹәнна 20:19, 26). Иса щурʹә-щурʹә бәдәнед физикида хԝә әʹйан дькьр. У щар-щара һәла һе һәвалед ԝи жи әԝ нас нәдькьрьн, ле тʹәне пе хәбәрдан у кьред ԝи сәрва дьчун ԝәки әԝ Иса йә (Луԛа 24:30, 31, 35; Йуһʹәнна 20:14-16; 21:6, 7).
Иса шагьрте хԝә Тʹумарʹа, пе бәдәна физики, сәр кʹижани кӧ бьрин һәбун, хԝә әʹйан кьр. Иса ӧса кьр ԝәки баԝәрийа Тʹума ԛәԝи кә, чьмки әԝ дӧдьли дьбу, ԝәки Иса жь мьрьне рʹабуйә (Йуһʹәнна 20:24-29).