Кʹьтеба Пироз Чь Дьбежә Дәрһәԛа Хԝәчекьрьне у Хәмьландьне?
Щаба Кʹьтеба Пироз
Рʹаст ә Кʹьтеба Пироз зәʹф дина хԝә надә ве пьрсе, ле әв хԝәчекьрьн у хәмьландьне сущдар накә. Хенщи ԝе йәке Кʹьтеба Пироз һелан дькә, ԝәки бәре пешьн нә кӧ дәрһәԛа хԝәчекьрьне хәм бькьн, ле дәрһәԛа «рʹӧһʹәки мьлук у гьранә бәдәԝәтийа нәбәтал» (1 Пәтрус 3:3, 4).
Хԝәхәмьландьн найе ԛәдәхәкьрьне
Кʹӧлфәтед Хԝәдерʹа амьн, йед кӧ ԝәʹде бәре дьжитьн, хԝә дьхәмьландьн. Рәбәка, йа кӧ бу жьна Исһаԛе кӧрʹе Бьраһим, ԛәрәфьл у базьнед зерʹин, ӧса жи тьштед хәмьландьнейа дьнә бьһа хԝәва дькьр, кʹижан кӧ әԝе жь хәзуре хԝә ча пʹешкʹеш стандьбу (Дәстпебун 24:22, 30, 53). Әстәр жи ԛайил бу, ԝәки «кʹӧлфәт һазьрбунерʹа дәрбаз буйа» кʹижан кӧ тʹәви ԝан ԛиза дәрбаз дькьрьн, йед кӧ ԝе бьбуна жьн-пʹадшайә Импәрийа Фарьси. Дькʹәтә нава ԝе һазьрбуне шуштьн-вәшуштьн, у мәлһʹәмкьрьна бь рʹуне зьмьр у бинхԝәш (Әстәр 2:7, 9, 12).
Жь мәсәлед Кʹьтеба Пироз хәмьландьн ча тьштәки баш хӧйа дьбә. Мәсәлә, мәрьве кӧ ширәтәкә билан дьдә, әԝ «бона йе гӧһдар» бәрамбәри гӧһаре зерʹин дьбә (Мәтʹәлок 25:12). Анәгори ве йәке, Хԝәде хԝәха жи һәстед хԝәйә һьндава щьмәʹта Исраеле, бәрамбәри һәсте ԝи зәʹвайи дькә, йе кӧ дәргистийа хԝә бь базьна, гӧһара у морийа дьхәмьлинә (Һәзәԛел 16:11-13).
Ньһерʹандьна нәрʹаст дәрһәԛа хԝәчекьрьн у хәмьландьне
Ньһерʹандьна нәрʹаст: 1 Пәтрус 3:3-да Кʹьтеба Пироз «гӧливәгьртьне у тʹорʹед зерʹа» сущдар дькә.
Рʹасти: Жь контекста ве рʹезе те кʹьфше, ԝәки Кʹьтеба Пироз һе зедә бәдәԝийа дьл ԛимәт дькә, нә кӧ бәдәԝийа рʹу у хәмьландьне (1 Пәтрус 3:3-6). Дәрһәԛа ве йәке Кʹьтеба Пирозда чәнд щара те готьне (1 Самуйел 16:7; Мәтʹәлок 11:22; 31:30; 1 Тимотʹейо 2:9, 10).
Ньһерʹандьна нәрʹаст: Мәсәла жьн-пʹадшайа зӧлм, наве кʹижане Изабел бу, чʹәʹве хԝә бь рʹәнге рʹәш кьл дькьр. Әв йәк избат дькә, ԝәки нәрʹаст ә хԝә чекьн (2 Пʹадшати 9:30).
Рʹасти: Изабел сербазийева мьжул дьбу у мәрьв дькӧштьн. Әв сәва кьред хԝәйә зӧлм һатьбу щәзакьрьне, нә кӧ сәва хәмьландьна хԝә (2 Пʹадшати 9:7, 22, 36, 37).