ПЬРСЕД ЩАҺЬЛА
Ча Һин бьм кӧ Ԝәʹде Хԝә Рʹаст Хәрщ кьм?
Чьрʹа фәрз ә ԝәʹде хԝә рʹаст хәрщ ки?
Ԝәхт мина пʹәрә йә. Һәгәр тӧ пʹәре хԝә сәр тьштед пʹучʹ хәрщ дьки, кʹәнге тә лазьм бе, ԝе ида щева тә вала бә. Алики дьнва жи, һәрге тӧ ԝәʹде хԝә бадиһәԝа хәрщ нәки, ԝе епʹещә ԝәʹде тә һәбә кӧ ԝан тьштава мьжул би, йед кӧ тә хԝәш тен!
Принсипа Кʹьтеба Пироз: «Нәфса хԝәрʹанәдити дьхԝазә, ле тьштәки ԝи тʹӧнә, ле нәфса мәрьве хирәт тʹер-тʹьжи дьбә» (Мәтʹәлок 13:4).
Фькьра сәрәкә: Гава тӧ ԝәʹде хԝә рʹаст пʹарәвәдьки, тӧ нә кӧ тьштәки жь хԝә кем дьки, ле һе зедә аза дьби.
Һәрге тӧ һин би ԝәʹде хԝә рʹаст пʹарәвәки, әԝ йәк ԝе ахьрийеда жи кери тә бе. Кʹе занә, дьбәкә щарәке һәма әԝ йәк ԝе али тә бькә кӧ хәбата хԝә ӧнда нәки. Бьфькьрә, һәгәр тӧ мәзьне хәбате буйайи, тәйе кʹижан мәрьви сәр хәбате бьһишта, йед кӧ дәрәнги дькʹәвә, йан йе кӧ тʹьме ԝәʹдәда хәбата хԝә дәстпедькә?
Принсипа Кʹьтеба Пироз: «Әԝе кӧ нава тьштед һьндькида амьн ә, нава тьштед гәләкида жи амьн ә» (Луԛа 16:10).
Фькьра сәрәкә: Бь ве йәке кӧ тӧ ча ԝәʹде хԝә хәрщ дьки, әʹйан дькә кӧ тӧ мәрьвәки чь щурʹә йи.
Фәʹмдари йә һеса нинә кӧ мәрьв пе графике бьжи. Дина хԝә бьдә ԝан һьнә тьшта, жь бо чь жи тәрʹа ԝе чәтьн бә ԝәʹде хԝә рʹаст пʹарәвәки.
Чәтьнайа 1: Дост
«Чахе һәвалед мьн гази мьн дькьн, әз тʹьме ԛайил дьбьм ԝәʹде хԝә тʹәви ԝан дәрбаз кьм, һәла һе ԝи чахи жи гава ԝәʹде мьн тʹӧнә у шьхӧле мьн гәләк ә. Әз хԝәха хԝә дьхапиньм у хԝәрʹа дьбежьм: ‘Тьшт набә, әз ча һәрʹьм мал әзе зускава һʹәму шьхӧлед хԝә бькьм’. Ле тʹьме ӧса найе стандьне. Ахьрийеда һәр тьшт сәр һәвда тʹоп дьбә» (Синтйа).
Чәтьнайа 2: Мьжулбун
«Телевизор мина дьз ә. Әԝ пе шоу у филма ԝәʹде тә дьдьзә, у тӧ нькари ида ԝәʹде хԝә вәгәрʹини» (Айви).
«Мьнрʹа чәтьн ә жь планшета хԝә бьԛәтьм. Әз шәрм дькьм ве йәке бежьм, ле тʹәне ԝи чахе әз дькарьм жь ве бьԛәтьм, гава батарейа рʹудьне» (Мари).
Чәтьнайа 3: Пашхьстьна шьхӧла
«Әз тʹьме дәрсед хԝәйи мәкʹтәбе у шьхӧлед дьн, паш дьхьм. Әз ԝәʹде хԝә бадиһәԝа хәрщ дькьм, у һьнге дәстпедькьм хԝә бьльпьтиньм, гава ида дәрәнг ә. Әз нькарьм ԝәʹде хԝә рʹаст хәрщ кьм» (Бет).
Гава графика тә һәйә, тӧ нә кӧ азайе жь хԝә кем дьки, ле дьһа аза дьби
Тӧ чь дькари бьки
Бьньвисә чь шьхӧлед фәрз гәрәке бьки. Бьньвисә кӧ нава һʹәфтийеда чь шьхӧлед тә һәнә, мәсәлә, шьхӧлед мале у дәрсед мәкʹтәбе. Ӧса жи бьньвисә кӧ чьԛас ԝәʹдә тәрʹа лазьм ә ԝәки ԝан шьхӧла бини сери.
Принсипа Кʹьтеба Пироз: «Кʹижан һәрә ԛәнщ ә, һун ԝе бьбьжерьн» (Филипи 1:10).
Хԝәрʹа бьньвисә, кӧ тӧ чь дьхԝази бьки гава бәтал би. Мәсәлә, дәрһәԛа малпәред сосйал у ньһерʹандьна телевизйоне бьньвисә у кӧ чьԛас ԝәʹдә нава һʹәфтийеда тӧ сәр ԝан тьшта хәрщ дьки.
Принсипа Кʹьтеба Пироз: «Һьндава нәбаԝәрада сәрԝахт бьн у дәст бьдьнә бәр ԝәхт» (Колоси 4:5).
Хԝәрʹа плане бьньвисә. Дина хԝә бьдә ԝан дӧ плана йа кӧ тә ида ньвисийә у сәр ԝан бьфькьрә. Гәло тӧйе перʹа бьгьһини тьштед фәрз бьки? Дьбәкә тәрʹа лазьм бә һьнә ԝәʹдәдәрбазкьрьна жь хԝә кем ки, бона кӧ дьһа тьштед керһати бьки?
Ширәт: Хԝәрʹа плана рʹоже бьньвисә, у кʹьфш кә чь шьхӧл тә ида кьрийә.
Принсипа Кʹьтеба Пироз: «Тʹьвдира мәрьве хирәт әʹсә кʹаре тинә» (Мәтʹәлок 21:5).
Хԝә ль плана хԝә бьгьрә. Щарна, гава һәвалед тә гази тә кьн тʹәви ԝан ԝәʹдә дәрбаз ки, дьбәкә лазьм бе кӧ тӧ бежи на. У тӧйе бьвини кӧ чьԛас ԝәʹде тә дьминә бона тьштед кӧ бь рʹасти тә ша дькьн.
Принсипа Кʹьтеба Пироз: «Хирәтеда хԝәрʹанәдити нибьн» (Рʹомайи 12:11).
Пешийе бьхәбьтә бь зәʹмәт, паше һеса бә бь хер у сьламәт. Кәчʹькәк бь наве Тара дьбежә: «Щара әз һьнә шьхӧле хԝә дькьм кӧ мьн хԝәрʹа башԛә ньвисинә, у паше хԝәрʹа дьфькьрьм: ‘Дә ԝәрә әз 15 дәԛә телевизийоне бьньһерʹьм, у паше диса вәгәрʹьм сәр шьхӧле хԝәʹ. Ле ӧса набә, 15 дәԛә дьбә нив сьһʹәт, нив сьһʹәт дьбә сьһʹәтәк ... , ахьрийеда фәʹм дькьм ԝәки 2 сьһʹәтед мьн бадиһәԝа ӧнда бун».
Ле тӧ чь дькари бьки? Ԝәʹдәдәрбазкьрьн һʹәсаб кә ча хәлата хьлазкьрьна шьхӧлед хԝә, ле нә ча тьштәки кӧ һәр рʹож бьки.
Принсипа Кʹьтеба Пироз: «Жь бо мьрова ... шакьрьна щани йа бь кʹәде четьр тьштәк тʹӧнә» (Ԝаиз 2:24).