Де-Бав Ча Дькарьн Дәрһәԛа Ичке Тʹәви Зарʹа Хәбәр дьн?

«Ԛиза мә шәш сали бу гава мә щара пешийе тʹәви ԝе дәрһәԛа ичке хәбәр да. Ле әм әʹщебмайи ман кӧ әԝе дәрһәԛа ичке ида гәләк тьшт заньбу»—Александьр.

• Һун гәрәке чь бьзаньбьн?

• Һун чь дькарьн бькьн?

• Кʹьтеба Пироз дәрһәԛа ичкәвәхԝарьне чь дьбежә?

Һун гәрәке чь бьзаньбьн?

Гәләк фәрз ә тʹәви зарʹед хԝә дәрһәԛа ичке хәбәр дьн. Һивийе нибьн кӧ кʹәнге зарʹа ԝә мәзьн бә. Бавәк жь Русйайе бь наве Һамәт ӧса дьбежә: «Йазьх ԝәки мә тʹәви кӧрʹе хԝә дәрһәԛа ичкәвәхԝарьне хәбәр нәдьда, чахе әв һе бьчʹук бу. Әз пʹошман бум ле дәрәнг ә, чьмки кӧрʹе мьн 13 салийа хԝәда ида ичкева һатьбу гьредане».

Чьрʹа һун гәрәке бәр хԝә кʹәвьн?

• Һәвалдәрсхан, ԝәʹдәдәрбазкьрьн у телевизийа дькарьн сәр ньһерʹандьна зарʹа ԝә дәрһәԛа ичке һʹӧкӧм кьн.

• Ль гора һьнә лекʹолина, Дәԝләтед Йәкбуйида 11 сәләф ичкә зарʹ у щаһьл вәдьхԝьн (U.S. Centers for Disease Control and Prevention).

Ләма жи әʹщебмайи нинә кӧ дохдьр тʹәми дьдьнә де-бава, ԝәки һәла һе жь бьчʹуктайе зарʹед хԝәрʹа шьровәкьн, кӧ ичкә чь зийане дькарә бинә. Һун ча дькарьн ве йәке бькьн?

Һун чь дькарьн бькьн?

Һазьр бьн кӧ щаба пьрсед зарʹа хԝә бьдьн. Зарʹед бьчʹук һʹәз дькьн гәләк пьрса бьдьн у тьшта пебьһʹәсьн, ле зарʹед һьнәк мәзьн дьһа зедә тьшта дьхԝазьн пебьһʹәсьн. Ләма жи ԝе баш бә пешда хԝә бона пьрсед ԝан һазьр кьн. Мәсәлә:

• Чахе зарʹа ԝә дьпьрсә кӧ тәʹма ичке чь щурʹәйи йә, һун дькарьн бежьн ԝәки тәʹма шәраве мина ава емишайә тьрʹш ә, ле тәʹма бирәйе гәләк тәʹл ә.

• Һәрге зарʹа ԝә дьхԝазә ичке тәʹм кә, һун дькарьн бежьн ԝәки ичкә зийане дьдә сьһʹәт-ԛәԝата зарʹа. Шьровәкьн кӧ ичкә чь щурʹәйи сәр мәрьва һʹӧкӧм дькә: Ичкә мәрийа сьст дькә, ле һәрге һьнәки зедә вәхԝьн, сәре мәрьв дькарә геж бә у әԝе дәстпекә тьштед нәбаш бькә, ԛал-бал хәбәр дә, жь бо чь жи паше дькарә пʹошман бә (Мәтʹәлок 23:29-35).

Һаж тьшта һәбьн. Кʹьтеба Пирозда те готьне: «Кәсе аԛьл бь заньстийе дькә» (Мәтʹәлок 13:16). Пьрса дәрһәԛа ичкәвәхԝарьне лекʹолин кьн у пебьһʹәсьн кӧ ԝәлате ԝәда дәрһәԛа ичке кʹижан ԛанун у чь синор һатьнә дайине. Ԝи чахи һуне бькарьбьн ча лазьм ә али зарʹа хԝә бькьн.

Хԝәха хәбәрдане дәстпекьн. Бавәки жь Британйайе бь наве Марк ӧса дьбежә: «Зарʹ дькарьн шәрм бькьн дәрһәԛа ичке хәбәр дьн. Мьн жь кӧрʹе хԝәйи һʹәйшт сали пьрси һәла әԝ чь дьфькьрә, баш ә кӧ ичке вәхԝьн йан на. Мә аза тʹәвайи хәбәр да у әв йәк али ԝи кьр дьле хԝә мьнрʹа вәкә».

Зарʹ ԝе дьһа баш пьрсед ичкева гьредайи фәʹм бькьн, һәрге һун щар-щара дәрһәԛа ве йәке тʹәви ԝан хәбәр дьн. Тʹәви зарʹа хԝә ль гора салед әʹмьре ԝи, хенщи тʹема ичке, дәрһәԛа пьрсед дьн жи хәбәр дьн, мәсәлә дәрһәԛа бехофийа сәр рʹе-дьрба у дәрһәԛа сексе.

Бьбьнә мәсәлә. Зарʹ мина луфьке һәр тьшти һьлдьчʹиньн хԝә. У чаԝа һьнә лекʹолин избат дькьн, һʹәчʹи зәʹф мәсәла де-бава сәр ԝан һʹӧкӧм дькә. Һәрге һун ичке вәдьхԝьн, сәва кӧ стреса хԝә кем кьн, зарʹа ԝә ԝе бьфькьрә, ԝәки ичкә һеса дькарә жь һʹәму стрес у проблема аза кә. Ләма жи ве пьрседа бона ԝан бьбьнә мәсәләкә баш у бь сәрԝахти ичке бьдьнә хәбате.