Мьн Ньһерʹандьна Хԝәдейә Дәрһәԛа Хуне Ԛәбул Кьр

Дохдьрәк Гьли Дькә

НӘХԜӘШХАНЕДА сәр кʹомщьвина дохдьра мьн кьн шьровәкьр дәрһәԛа леколинед хԝә паши ԛәльшандьна щьнйаз. Рʹәԛа ԝи мәрьве мьри һәбу. Ахьрийе мьн гот, ԝәки мәʹнийа мьрьна ԝи мәрьви һемолис бу, демәк хьраббуна еритроситед хуне. У ӧса жи кемасийа функсийа гӧрʹчʹька, кʹижан кӧ пешда һатьбу жь ԝе йәке, ԝәки гәләк хун бәрдабуне.

Професорәк ӧса һерс кʹәт, кӧ рʹабу сәр ньга у кьрә ԛарʹини: «Тӧ дьхԝази бежи, ԝәки мә хуна нәлайиԛ бәри ԝи дайә?» Мьн готе: «На әз ве йәке нахԝазьм бежьм». Паше мьн пе шькьл һьнә пʹаред гӧрʹчʹькед ԝи мәрьви нишани ԝан кьр у гот: «Әм дькарьн бьвиньн, гӧрʹчʹькада еритроситед хуне чьԛас хьраб бунә, чь кӧ дьдә кʹьфше, ԝәки һәма әв бу мәʹни, ԝәки кемасийа функсийа гӧрʹчʹька пешда һат».a Сәр кʹомщьвине, дәрәщә ӧса гьран бу, ԝәки гәврийа мьн зьһа бу. Рʹаст ә әз дохдьре щаһьл бум, әԝ професор бу, ле йәкә мьн сафи кьрьбу хԝә кәрʹ нәкьм.

Һьнге әз Шәʹде Йаһоԝа нибум. Әз һатьмә буйине сала 1943 ль бакӧра Жапонйайе, шәһәре Сендайеда. Баве мьн патолож у псикʹиатьр бу. Мьн жи сафи кьр, кӧ бьбьмә дохдьр. Сала 1970 чахе әз университета дохдьртийе курса дӧдада бум, мьн кәчʹькәкә бь наве Масуко станд.

Патоложийеда Кʹур Дьбьм

Һʹәта әз һин дьбум, Масуко дьхәбьти сәва кӧ әʹбура малбәта мә бькә. Әз бь тʹәмами нава дохдьртийеда бум. Әз һʹәйр-һʹӧжмәкʹар бум, кӧ бәдәна мәрьва чьԛас һʹәԝас чекьри йә, ле тʹӧ щар нәдьфькьрим дәрһәԛа ԝе йәке, кӧ Әʹфьрандар һәйә. Мьн тʹьре пе леколинкьрьна дохдьртийе, нета әʹмьре мьн һәбә. Чахе әз бумә дохдьр, мьн сафи кьр патоложийеда кʹур бьм. Әв һәйә леколинкьрьна мәʹнийа нәхԝәшийа, просеса нәхԝәшийа, ахьрийа нәхԝәшийа у әв нәхԝәши ча һʹӧкӧм дьбьн.

Ԛәльшандьн у леколинкьрьна щьнийазед мәрьвед кӧ бь рʹәԛе нәхԝәш бун, щәм мьн дӧдьлибун пешда ани дәрһәԛа кʹара хунбәрдане. Щәм нәхԝәше кӧ кʹансәра ԝи стадийа пашьн ә, жь бо хунчуйине дькарә анемийа пешда бе. Химийотерапийа анемийайе дьһа пешда дьбә, ләма жи гәләк щар дохдьр нәхԝәшарʹа хунбәрдане кʹьфш дькьн. Мьн дәстпекьр бьфькьрьм, ԝәки хунбәрдан, бәдәнеда кʹансәре дьһа бәла дькә. Иро ида әʹйан ә, ԝәки хунбәрдан имунитете сьст дькә, жь бо чь жи кʹансәр диса дькарә пешда бе щәм ԝи мәрьви, йе кӧ жь кʹансәре ԛәнщ буйә. У һәжмара мьрьна ԝан нәхԝәша зедә дьбә.b

Дәрәща кӧ мьн серида гьли кьр, сала 1975 ԛәԝьми бу. Әв професор дохдьре гемотоложийе бу у әв нәхԝәш һәма патсиенте ԝи бу. Ләма жи әʹщебмайи нинә, кӧ әԝ чьма ӧса һерс кʹәт, чахе мьн гот ԝәки мәʹнийа мьрьна ԝи мәрьве нәхԝәш, хунбәрдан бу! Ле диса жи мьн бәрдәԝам кьр фькьред хԝә шьровәкьм у һеди-һеди професор хԝә кәрʹ кьр.

Нәхԝәши у Мьрьн ԝе Ида Тʹӧнә бә

Ԝи ԝәʹдәйида кʹӧлфәтәкә әʹмьрда мәзьн, кӧ Шәʹде Йаһоԝа бу, һат тʹәви жьна мьн хәбәр да у бәʹса Йаһоԝа кьр. Жьна мьн ле пьрси кӧ «Йаһоԝа» чь те һʹәсабе. Әԝе щаба ԝе да у гот: «Йаһоԝа наве Хԝәдайе рʹаст ә». Жьна мьн Масуко жь бьчʹуктайе Кʹьтеба Пироз дьхԝәнд, ле наве Йаһоԝа теда нәдитьбу. Чьмки ԝе ԝәлгәрʹандьнеда дәԝса наве Йаһоԝа, һатьбу ньвисаре хәбәра «ХӦДАН». Ньһа ида әԝе заньбу, кӧ наве Хԝәде һәйә!

Масуко дәрберʹа һинбуна Кʹьтеба Пироз дәстпекьр бь аликʹарийа ве кʹӧлфәте. Рʹожәке чахе әз шәв сьһʹәта 1:00 һатьмә мал, жьна мьн бь шабун мьнрʹа гот: «Кʹьтеба Пирозда ньвисар ә, ԝәки нәхԝәши у мьрьн ида ԝе тʹӧнә бьн». Мьн щаба ԝе да: «Һәрге ӧса бә, ԝе гәләк баш бә». Әԝе зедә кьр: «Дьнйа тʹәзә гәләк незик ә, ләма жи әз нахԝазьм ԝәки тӧ ԝәʹде хԝә бадиһәԝа хәрщ ки». Әз фькьрим ԝәки жьна мьн дьхԝазә, кӧ әз дохдьртийа хԝә бьһельм, ләма жи әз гәләк һерс кʹәтьм у ортʹа мә һәв кʹәт.

Ле жьна мьн һьндава мьнда һевийа хԝә ӧнда нәкьр. Әԝе Хԝәде Йаһоԝарʹа дӧа дькьр, ԝәки Кʹьтеба Пирозда рʹезәкә ӧса бьвинә, кʹижан кӧ ԝе дьле мьн бьгьрә. Һәма гьлийе жь Ԝаиз 2:22, 23, (ИМ) дьле мьн гьртьн: «Чь фәйда мьров жь һʹәму кʹәда ԝи у хәмхԝарьна ԝи йа ль сәр рʹуйе әʹрде һәйә? . . . Бь шәв жи дьле ԝи рʹьһʹәтийе набинә. Әв жи пʹучʹ ә». Әв гьли һәма дәрһәԛа мьн бун, чьмки мьн бь тʹәмами сәре хԝә кьрьбу нава дохдьртийе. У жь ве йәке мьн ләзәт нәдьдит.

Сала 1975, мәһа Тирмәһе, рʹожәкә Ләʹде, чахе жьна мьн чу щьвата Шәʹдед Йаһоԝа, мьн сафи кьр кӧ әз жи һәрʹьм. Әԝ гәләк әʹщебмайи ма, чахе дит кӧ әз жи ԝедәре мә. Ԝедәре Шәʹдед Йаһоԝа бь дьл у щан әз ԛәбул кьрьм. Жь ви чахи һәр Ләʹд әз дьчумә щьвате. Ԝәкә мәһәк шунда бьраки дәстпекьр һинбуна Кʹьтеба Пироз тʹәви мьн дәрбаз кә. Се мәһ паши ԝе йәке, чахе щара әʹԝльн жьна мьнрʹа шәʹдәти дан, әԝ һатә ньхӧмандьне.

Ньһерʹандьна Хԝәдейә Дәрһәԛа Хуне Ԛәбул Дькьм

Зутьрәке әз пеһʹәсийам, ԝәки ль гора Кʹьтеба Пироз, Мәсиһи гәрәке хԝә жь хуне дур бьгьрьн (Дәстпебун 9:4, Кʹаред Шандийа 15:28, 29). Мьнрʹа чәтьн нибу ньһерʹандьна Хԝәдейә сәр хуне ԛәбул кьм, чьмки әз ида дӧдьли дьбум, кӧ кʹара хунбәрдане һәйә.c Әз дьфькьрим: «Һәрге Әʹфьрандар һәйә у Әԝи әв тʹәми дайә, демәк ӧса рʹаст ә».

Әз ӧса жи пеһʹәсийам, ԝәки гӧне Адәм буйә мәʹнийа нәхԝәшийа у мьрьне (Рʹомайи 5:12). Ԝи ԝәʹдәйи мьн нәхԝәшийа атеросклероз леколин дькьр. Чьԛас әм мәзьн дьбьн, тамаред мә һʹьшк дьбьн у тәнг дьбьн, чь кӧ дьбә мәʹнийа нәхԝәшийа дьльк, тамаред мәжу у гӧрʹчʹька. Ньһа мьнрʹа фәʹмдари бу, ԝәки мәʹнийа нәхԝәшийа у мьрьне нәкʹамьлбуна мә йә, кʹижан кӧ жь Адәм гьһиштә мә. Паши ԝе йәке хирәта мьнә һьндава дохдьртийе ӧнда бу. Тʹәне Йаһоԝа Хԝәде дькарә нәхԝәшийа у мьрьне бьдә һьлдане!

Сала 1976, мәһа Адаре, демәк һʹәфт мәһ паши ԝе йәке чахе мьн һинбуна Кʹьтеба Пироз дәстпекьр, мьн ида тʹәрка леколинкьрьна хԝәйә дохдьртийе да. Әз дьтьрсийам кӧ әзе ида тʹӧ щар нькарьбьм ча дохдьр бьхәбьтьм. Ле мьн нәхԝәшханәкә дьнда хԝәрʹа хәбат дит. Сала 1976, мәһа Гӧлане әз һатьмә ньхӧмандьне. Әз дьфькьрим, ԝәки сафикьрьна лапә баш әԝ ә, ԝәки әз хьзмәт кьм ча пешәнге һәртʹьм. У сала 1977, мәһа Тирмәһе, мьн пешәнгти дәстпекьр.

Пьштгьрийа Ньһерʹандьна Хԝәде Дькьм Дәрһәԛа Хуне

Сала 1979, мәһа Мьждаре мьн тʹәви Масуко сафи кьр ԝәки дәрбази щьватәкә һәрема Тибайе бьм, кʹидәре кӧ һʹәԝщәтийа мьзгинвана һәбу. Ԝедәре нәхԝәшханәкеда мьн хәбата ниврʹожи хԝәрʹа дит. Сәр хәбате һәма рʹожа пешьн, чәнд дохдьра дора мьн гьртьн. Ԝана жь мьн дьпьрсин: «Ча Шәʹде Йаһоԝа, те чь бьки һәрге нәхԝәшәкирʹа лазьм бә, кӧ хуне бәрʹдьне?».

Мьн бь ԛәдьр ԝанарʹа шьровәкьр, ԝәки әзе хԝә ль тʹәмийа Хԝәдейә дәрһәԛа хуне бьгьрьм. Мьн гот, ԝәки һәнә методед ԛәнщкьрьнейә ӧса жи, кӧ хун найе хәбьтандьне у әзе һәр тьшти бькьм, ԝәки мәрьве нәхԝәш ԛәнщ кьм. Паши хәбәрдана мәйә ԝәкә сьһʹәтәке, дохдьре сәрәкә мьнрʹа гот: «Баш мьн тә фәʹм кьр. Ле һәрге нәхԝәшәки ӧса биньн, ԝәки хун гәләк ӧнда кьрийә, һьнге әме хԝәха пе метода хԝә ԝи ԛәнщ кьн». Гьшкарʹа әʹйан бу ԝәки хәйсәте ԝи дохдьре мәзьн гьран ә. Ле паши ве хәбәрдане мә зьман һәврʹа дит, у ида әԝи тʹьме ԛәдьре баԝәрийа мьн дьгьрт.

Дькʹәвьмә Нава Щерʹьбандьна

Чахе мә һәрема Тибайеда хьзмәт дькьр, шәһәре Әбинеда авакьрьна филиала Шәʹдед Йаһоԝа дәстпебу. Әз тʹәви жьна хԝә һәр һʹәфти дьчумә ԝедәре, сәва кӧ аликʹарийа дохдьртийе бьдьмә Шәʹдед Йаһоԝа, кӧ бь рʹәзәдьли ԝе дәре дьхәбьтин. Чәнд мәһ шунда мьн у жьна мьнрʹа тʹәглиф шандьн, кӧ Бәйтʹәла Әбинайеда хьзмәт кьн. Сала 1981, мәһа Адаре, әм дәрбази авайики ԝәʹдәлу бун. Ԝе дәре 500 зедәтьр хьзмәткʹаред рʹәзәдьли дьжитьн. Шәбәԛа мьн мәйдана авакьрьнеда щийе сәршуштьне у дәстав тʹәмьз дькьрьн. Ле паши нивро, хушк-бьра дьһатьнә бал мьн у мьн бона сьһʹәт-ԛәԝата ԝана хәм дькьр.

Ԝедәре патсиентәкә мьн, хушка мә Илма Излоб бьбу, кʹижан кӧ сала 1949 жь Австралйайе һатьбу Жапонйайе ча мисйонер. Әԝ жь нәхԝәшийа лейкемйайе дьчәрчьри. Дохдьра готьбун, ԝәки әԝе тʹәне чәнд мәһа бьжи. У ӧса жи готьбун, ԝәки хунбәрдан ԝе әʹмьре Илмайе һьнәки дьреж кә. Ле әԝ рʹази нәбьбу у сафи кьрьбу, ԝәки рʹожед хԝәйә пашьн Бәйтʹәледа дәрбаз кә. Ԝан чаха дәрманәки ӧса ча еритропоетин тʹӧнә бу, кʹижан кӧ хунеда еритросита зедә дькә. Һемоглобина Илмайе щарна бәржер дьбу һʹәта 3, 4 грама! Ле норма һемоглобине 12-15 грам ә. Мьн алийе хԝәда һʹәму тьшт дькьр, кӧ али ԝе бькьм. Илмайе һʹәта хьлазийа әʹмьре хԝә баԝәрийа ԛәԝи да кʹьфше һьндава Хәбәра Хԝәде. Әʹмьре ԝе ԝәкә һʹәфт сала дьреж бу. Әԝ сала 1988, мәһа Чьләйе мьр. Әԝе һʹәта хьлазийе амьнийа хԝә хԝәй кьр!

Ԝәʹде хьзмәткьрьна мәйә Бәйтʹәледа һьнә Бәйтʹәлванарʹа лазьм бу операсийа бькьн. Әм гәләк рʹази нә жь ԝан дохдьра, йед кӧ нәхԝәшханәкә незики Бәйтʹәледа дьхәбьтин, чьмки ԝана аликʹари дьда мә у операсийа бей хунбәрдан дькьрьн. Гәләк щар ԝана әз тʹәглифи сәр операсийайе дькьрьм, ԝәки бьвиньм кӧ операсийа ча дәрбаз дьбә, щарна жи ԝәки али ԝан бькьм. Әз гәләк рʹази мә жь ԝан дохдьра, йед кӧ ԛәдьре ньһерʹандьна Шәʹдед Йаһоԝайә һьндава хуне дьгьрьн. Ԝәʹде шьхӧлкʹарийа тʹәви ԝан, гәләк мәщал мьнрʹа вәдьбун, ԝәки дәрһәԛа баԝәрийа хԝә ԝанарʹа гьли кьм. Ԝан пашԝәхтийа жь ԝан дохдьра йәк һатә ньхӧмандьне у бу Шәʹде Йаһоԝа.

Һʹәԝас ә бежьм, ԝәки медисина аликива пешда чу бь сайа ԝан дохдьра, кʹижана кӧ ԛәԝат хәрщ дькьрьн, ԝәки Шәʹдед Йаһоԝа бей хунбәрдан ԛәнщ кьн. Операсийед бей хун әшкәрә нишан кьрьн, ԝәки метода ԛәнщкьрьнейә бей хун чьԛас керһати йә. Ль гора леколинкьрьна, дәрәщед ӧсада йед нәхԝәш дьһа зу ԛәнщ дьбьн у чәтьнайед паши операсийайе кем дьбьн.

Бәрдәԝам Дькьм жь Дохдьре Һәри Мәзьн Һин бьм

Әз хирәт дькьм кӧ пебьһʹәсьм, ԝәки медисинайеда чь гӧһастьн у пешдачуйин дьбьн. Йа фәрз әԝ ә, ԝәки әз бәрдәԝам дькьм жь Йаһоԝа, Дохдьре Һәри Мәзьн һин бьм. Йаһоԝа нә кӧ тʹәне ве йәке дьвинә, чь кӧ те кʹьфше, ле һе зедә. Әԝ тʹәмамийа һәйитийа мәрьва дьвинә (1 Самуйел 16:7). Әз чаԝа дохдьр чахе нәхԝәш ԛәнщ дькьм, дьхәбьтьм кӧ һʹьш-аԛьле хԝә нә кӧ тʹәне бьдьм сәр нәхԝәшийе, ле бь тʹәмами сәр ԝи кәси. Әв йәк али мьн дькә, ԝәки әз бькарьбьм метода һәрә баш бьжберьм сәва кӧ ԝана ԛәнщ кьм.

Әз бәрдәԝам дькьм Бәйтʹәледа хьзмәт кьм у шабуна мәзьн дьстиньм жь ԝе йәке, кӧ мәрьварʹа гьли дькьм дәрһәԛа Йаһоԝа у ньһерʹандьна ԝийә сәр хуне. Әз дӧа дькьм ԝәки Һʹәкиме Һәри Мәзьн, Йаһоԝа Хԝәде, һʹәму нәхԝәшийа у мьрьне бьдә һьлдане. Гьли кьр Йасуси Айзау.

[Ньвисар]

«Мьн гот, ԝәки һәнә методед ԛәнщкьрьнейә ӧса жи, кӧ хун найе хәбьтандьне у әзе һәр тьшти бькьм ԝәки мәрьве нәхԝәш ԛәнщ кьм»

[Ньвисар]

«Операсийед бей хун әшкәрә нишан кьрьн, ԝәки метода ԛәнщкьрьнейә бей хун чьԛас керһати йә»

[Шькьл]

Жоре: Дәрдькʹәвьм бь готара сәр һʹиме Кʹьтеба Пироз

Алийе рʹасте: Ньһа тʹәви жьна хԝә Масуко