Кʹьнщ у Хәмьландьн бона Мьн Кәвьре Лькʹӧмандьне Бун
ГЬЛИ КЬР АЙЛИН БРАМБА
ӘЗ МӘЗЬН бумә малбәта Әндәмед Бьратийа Баптистада, кӧ ль гора ԛәйдед кәвьнә Алманйайе дьжитьн. Гәләк тьштада баԝәрийа мә мина баԝәрийа Амиша у Менонита бу. Религийа Баптистед ԛәйдед кәвьн, пешда һатийә сала 1708 Алманйайеда, ча пʹарәкә Пийетизме, демәк һʹьшйарбуна рʹӧһʹани. «Әнсиклопедийа Религида» те готьне, ԝәки Пийетизм бь ве йәке щӧдә дьбә, кӧ ԛәбул дькә, ԝәки инсанәт «һʹәԝще мьзгинийа Мәсиһ ә». Жь бо ве ньһерʹандьне, әв религийа бь сайа кампанийа мисйонера гәләк ԝәлатада бәла бу у пешда чу.
Сала 1719 бь рʹебәрийа Александр Мак кʹомәкә бьчʹук һатә Дәԝләтед Йәкбуйи, Пәнсилванйайе. Паши ԝе йәке щурʹә-щурʹә кʹом чебун у һәр йәки жь ԝана бь щурʹе хԝә һинкьрьнед Александр Мак шьровәдькьрьн. Дера мәйә бьчʹукда ԝәкә 50 әндәм бун. Дере дина мә дьда сәр ԝе йәке, ԝәки Кʹьтеба Пироз бьхуньн у пәй сафикьрьнед әндәмед дере һәрʹьн.
Малбәта мә лапә кем ида рʹькʹьнийата сьсийа бу, кӧ хԝә ль ве баԝәрийе дьгьртьн у ль гора әʹдәтед ве дьжитьн. Чахе әз 13 сали бум, әз ве религийайеда һатьмә ньхӧмандьне у мьн дәстпекьр ль гора әʹдәтед ԝе бьжим. Әз жь бьчʹуктайе дьһатьмә һинкьрьне, ԝәки изьн тʹӧнә әʹрәбе, тракторе, телефоне, радиойе у һащәтед әләктроникә дьн бьдьнә хәбате. Кʹӧлфәтед жь дера мә кʹьнщед ӧса хԝә дькьрьн, кӧ нәкʹәвьнә чʹәʹва, нәжи пʹорʹе хԝә дьбьрʹин у тʹьме сәре хԝә гьредьдан. Ле мера рʹуйе хԝә бәрʹдьдан. Ль гора ньһерʹандьна мә, нә жь ве дьнйайе бьн, дьһатә һʹәсабе, хԝә нәхәмьлиньн, демәк кʹьнщед модерн хԝә нәкьн, хьшьр хԝәва нәкьн у косметике нәдьнә хәбате. Мә тʹьре әв тьшт бабахийе у ԛӧрʹәбуне әʹйан дькә.
Әм һин кьрьбун, ԝәки ԛәдьре Кʹьтеба Пироз бьгьрьн, әв хԝарьна мәйә рʹӧһʹани бу. Һәр шәбәԛ пешийа тәʹште әм отʹахеда тʹәвайи тʹоп дьбун, баве мьн жь Кʹьтеба Пироз сәрик дьхԝәнд у шьровәдькьр. Паше әм гьшк дькʹәтьнә сәр чока у әԝи дӧа дькьр. Ле паши баве мьн, дийа мьн дӧакьрьна Хӧдан бь әзбәри дьԝәкʹьланд. Әз гәләк һивийа ԛӧльхкьрьна шәбәԛе бум, чьмки һьнге малбәта мә тʹәвайи тʹоп дьбу, сәва кӧ тьштед рʹӧһʹани шеԝьр кьн у дӧа бькьн.
Мә фермәкә незики шәһәре Делфида, (Дәԝләтед Йәкбуйи) дьжит. Ԝедәре мә щурʹә-щурʹә пʹьнщар у тьштед дьн бещәр дькьр. Мә әв хӧрәк пе фьрхуна һәспа дьбьрә нава шәһәр у кʹучʹә бь кʹучʹә йан жи мал бь мал дьгәрʹанд у дьфрот. Әм дьфькьрин ԝәки әв хәбат һәйә пʹарәкә һʹәбандьна мәйә Хԝәдерʹа. Мә педа дина хԝә дьда сәр хәбате, хенщи рʹожа Ләʹде, чахе изьн тʹӧнә бу шьхӧле гьран бькьн. Щара малбәта мә ӧса ԛайим шьхӧле фермайева дьһатә гьредане, ԝәки чәтьн бу һʹьш-аԛьле хԝә бьдьнә сәр тьштед рʹӧһʹани.
Зәԝащ у Малбәт
Сала 1963-да чахе әз бумә 17 сали, мьн әндәмәки дера мә Щеймс станд. Малбәта ԝана ида чәнд рʹькʹьнийат бу, кӧ әндәмед дера Баптистед ԛәйдед кәвьн бун. Әм һәр дӧ жи ԛайим һʹьзрәт бун, ԝәки Хԝәдерʹа ԛӧльх кьн у мә баԝәр дькьр, ԝәки тʹәне религийа мә рʹаст ә.
Сала 1975 ида шәш зарʹед мә һәбун. Ле сала 1983 зарʹа һʹәфта мәрʹа бу. Тʹәне зарʹа дӧда ԛиз бу, Ребека. Әм гәләк дьхәбьтин. Мә чьԛас дькарьбу пʹәрә һьндьк хәрщ дькьр. Мә һәр тьшт дькьр, кӧ ԝан принсипа зарʹед хԝә һин кьн, йед кӧ де-бавед мә у ӧса жи әндәмед дере әм һин кьрьбун.
Религийа Баптиста йа бәре, зәʹф дина хԝә дьда сәр ве йәке, кӧ мәрьв рʹува ча бьн. Мәсәлә, чь щурʹәйи кʹьнща хԝә кьн. Әм дьфькьрин ԝәки мәрьв нькарьн дьле мәрьва бьвиньн, ле кʹьнщхԝәкьрьн дьдә кʹьфше, кӧ дьле мәрьвада чь йә, ләма жи изьн тʹӧнә бу кʹӧлфәтед религийа мә пʹорʹе хԝә зәʹф сәр хԝәда бәрʹдана, чьмки әве йәке ԛӧрʹәбун дьда кʹьфше. Һәрге нәхшед сәр кʹьнща мәзьн у бәрбь чʹәʹв буна, әв йәк жи нишана ԛӧрʹәбуне бу. Щарна һʹьш-аԛьле хԝә ӧса дьданә сәр тьштед һур, кӧ Кʹьтеба Пироз дьданә алики.
Кәледа
Хьлазийа салед 1960, тʹийе мьни бьчʹук Щеси кьрьнә кәле, чьмки әԝи жь бо баԝәрийа хԝә инкʹар кьр һәрʹә әскәрийе. Әԝ жи ча Баптист һатьбу мәзьнкьрьне. Кәледа әԝ рʹасти Шәʹдед Йаһоԝа һат, кʹижан кӧ мина ԝи һатьбун гьртьне. Әԝана нәдьчунә әскәрийе, чьмки ԝана фәʹм дькьр ԝәки ԛӧльхкьрьна әскәрийеда мьԛабьли принсипед Кʹьтеба Пироз ә (Ишайа 2:4; Мәтта 26:52). Щеси гәләк щар тʹәви Шәʹдед Йаһоԝа тʹемед Кʹьтеба Пироз шеԝьр дькьр у дит әԝана чь мәрьв ьн. Паши гәләк леколина у һинбуна Кʹьтеба Пироз әԝ һатә ньхӧмандьне у бу Шәʹде Йаһоԝа. Ле әв йәк мә ԛә хԝәш нәһат.
Щеси чь кӧ һин дьбу мере мьнрʹа гьли дькьр. Әԝи ӧса жи хәм кьр, ԝәки Щеймс һәртʹьм журналед «Бьрща Ԛәрәԝьлийе» у «Һʹьшйар Бьн!» бьстинә. Хԝәндьна ԝан журнала һʹәԝаса Щеймс пешда ани һьндава Кʹьтеба Пирозда. Әԝи тʹьме дьхԝәст Хԝәдерʹа хьзмәт кә, ле тʹәхмин дькьр, ԝәки жь ԝи дур ә. Ләма жи һʹәму тьшт жерʹа һʹәԝас бу, чь кӧ ԝе али ԝи бькьра незики Хԝәде буйа.
Рʹуспийед мә әм һелан дькьрьн, ԝәки журналед Амиша, Менонита у йед Баптистед кӧ хԝә ԛәйдед кәвьн дьгьртьн, бьхуньн. Ле диса жи мә әв религийа ча пʹара ве дьнйайе һʹәсаб дькьрьн. Баве мьн зәʹф мьԛабьли Шәʹдед Йаһоԝа бу. Әԝ дьфькьри, ԝәки әм гәрәке тʹӧ щар журналед «Бьрща Ԛәрәԝьлийе» у «Һʹьшйар Бьн!» нәхуньн. Ләма жи чахе мьн дьдит ча Щеймс ԝан әʹдәбйәта дьхунә, әз бәрхԝә дькʹәтьм. Әз дьтьрсийам ԝәки әԝ бькʹәвә тʹәлька һинкьрьнед ԛәлп.
Ида гәләк ԝәʹдә бу, кӧ Щеймс дӧдьли дьбу һинкьрьнед дера Баптистед ԛәйдед кәвьнда, мәсәлә әв һинкьрьн кӧ рʹожа Ләʹде «тʹӧ шьхӧл» гәрәке нәйе кьрьне. Әм һин дькьрьн ԝәки рʹожа Ләʹде изьн ә аве бьдьнә һʹәйԝана, ле әʹрдбещәркьрьн изьн тʹӧнә. Рʹуспийед дере нькарьбун сәр һʹиме Кʹьтеба Пироз әв ԛанун Щеймсрʹа избат кьрана. Ахьрийеда бал мьн жи дӧдьлибун пешда һат һьндава ԝан һинкьрьнада.
Мәрʹа гәләк чәтьн бу, ԝәки дера хԝә бьһельн, чьмки әм тʹьме дьфькьрин ԝәки тʹәне религийа мә рʹаст ә. У мә дьда бәр чʹәʹве хԝә кӧ ԝе чьԛас чәтьн бә, һәрге әм жь дере һәрʹьн. Ле исафа мә нәдьһишт ԝәки әм религийәкә ӧсада бьминьн, кʹижан кӧ мә дьдит ԝәки пәй Кʹьтеба Пироз начә. Ләма жи сала 1983-да мә нәʹмәк ньвиси, кʹижанеда кʹьфш кьр мәʹна чуйина хԝә у мә һиви кьр, ԝәки бәр һʹәмушка бьхуньн. Әм жь дере дәрхьстьн.
Религийа Рʹаст Дьгәрʹьн
Мә ида дәстпекьр религийа рʹаст бьгәрʹьн. Бона мә фәрз бу ԝәки әндәмед ве религийайе ча һин дькьн, ӧса бьжин. Бәри әʹԝльн мә инкʹар кьр әԝ һʹәму религийа, әндәме кʹижана дьчунә шерʹ. Диса мә тʹьре ԝәки религийа рʹаст гәрәке «садә» бә, чьмки әм диса дьфькьрин, ԝәки кʹьнщхԝәкьрьн у щурʹе жийине әшкәрә нишан дькьн, ԝәки әв религийа пʹара ве дьнйайе йә йан на. Сала 1983-1985 мә тʹәмамийа ԝәлетда рʹеԝити дькьр, щурʹә-щурʹә религийа леколин дькьр, мәсәлә йа менонита, квакера у йед майинә «садә».
Ԝи ԝәʹдәйи Шәʹдед Йаһоԝа һатьнә ферма мә бәр шәһәре Канден, Дәԝләтед Йәкбуйи. Мә жь ԝан һиви кьр, ԝәки Кʹьтеба Пироз тʹәне ԝәлгәрʹандьна Щеймс Кинг бьдьн хәбате. У мә рʹьнд гӧһе хԝә дьда сәр ԝан. Мьн ԛәдьре Шәʹдед Йаһоԝа дьгьрт, сәва ԝе йәке, кӧ әԝана тʹәви шәрʹа нәдьбун. Ле кʹьнщхԝәкьрьна ԝана мьнрʹа дьбу кәвьре лькʹӧмандьне, чьмки әз дьфькьрим кӧ һәрге әԝана пе кʹьнщхԝәкьрьна хԝә жь ве дьнйайе щӧдә набьн, религийа ԝан нькарә рʹаст бе һʹәсабе. Әз баԝәр бум ԝәки мәрьвед кӧ кʹьнщед садә хԝә накьн, ԛӧрʹә нә. Әз дьфькьрим ԝәки һәбук у тьштед материйали мәрьва ԛӧрʹә дькьн.
Щеймс дәстпекьр һәрʹә щьватед Шәʹдед Йаһоԝа у тʹәви хԝә чәнд кӧрʹед мә жи дьбьр. Рʹаст бежьм әз сәва ве йәке гәләк бәрхԝә дькʹәтьм. Мере мьн әз һелан дькьрьм, ԝәки әз тʹәви ԝана һәрʹьмә щьвате, ле әз нәдьчум. Паше рʹожәке әԝи гот: «Һәрге тӧ тʹәви һинкьрьнед ԝан нәрʹази йи жи, һәма щарәке ԝәрә у пе чʹәʹве хԝә бьвинә кӧ әԝана һьндава һәвда чь щурʹәйи нә». Әве йәке гәләк дьле ԝи гьртьбу.
Ахьрийеда мьн сафи кьр, ԝәки һәрʹьмә щьвате, ле гәләк фәсал бьм. Мьн бь мьлукти кʹьнще садә хԝә кьр у сәре хԝә жи гьреда у чумә Ода Щьвате. Һьнә кӧрʹед мә пʹехас бун у кʹьнщед ԝан жи садә бун. Ле диса жи Шәʹдед Йаһоԝа бь һʹьзкьрьн әм ԛәбул кьрьн. Һьнге әз фькьрим: «Рʹаст ә әм жь ԝан щӧдә дьбьн, ле диса жи әԝана һʹьзкьрьне дьдьнә кʹьфше һьндава мәда».
Һʹьзкьрьна ԝан у дьлованийа ԝан гәләк дьле мьн гьрт. Ле мьн сафи кьрьбу тʹәне дина хԝә бьдьмә ԝан. Ԝәʹде кʹьлама әз рʹанәдьбум сәр пʹийа у тʹәви ԝан нәдьстьра. Паши щьвате мьн беһʹәсаб пьрс дьда ԝан. Мьн дәрһәԛа ԝан тьшта дьпьрси, чь кӧ бь тʹәхмин мьн әԝана рʹаст накьн. Мьн ӧса жи һиви дькьр, ԝәки һьнә рʹезед Кʹьтеба Пироз мьнрʹа шьровәкьн. Рʹаст ә мьн ӧса бь ԛәдьр хәбәр нәдьда, ле диса жи әԝана һьндава мьнда гәләк нәрм бун. У әве йәке сәр мьн гәләк һʹӧкӧм кьр, кӧ мьн пьрсәк дьда щурʹә-щурʹә хушк-бьра, ле щабед ԝан мина һәв бу. Жь ԝана һьнәка щаб сәр кʹахаз дьньвисин дьданә мьнда. Әве йәке гәләк али мьн кьр, чьмки паше мьн карьбу хԝәха леколин бькьм.
Һавине сала 1985 әм малева чунә Мемфисе штата Тенеси сәр щьвата мәзьн йа Шәʹдед Йаһоԝа. Әм тʹәне сәва ве йәке чун, кӧ дина хԝә бьдьнә ԝан. Һьнге рʹуйе Щеймс бәрʹдайи бу у кʹьнщед мә жи садә бун, ле диса жи ԝәʹде һесабуне әм дәԛәке тʹәне нәдьман. Хушк-бьра незики мә дьбун у тʹәви мә хәбәр дьдан. Һʹьзкьрьн у дьлованийа ԝана гәләк дьле мә гьрт. Ӧса жи йәктийа ԝан гәләк сәр мә һʹӧкӧм дьбу, чьмки әм дьчунә кʹидәре жи, һинкьрьнед ԝан йәк бун.
Жь бо һʹьзкьрьн у дьлованийа Шәʹдед Йаһоԝа, Щеймс һелан бу, кӧ һинбуна Кʹьтеба Пироз дәстпекә. Әԝи һәр пьрсәк, чь кӧ ԝи һин дькьрьн, һур бь һур леколин дькьр, ԝәки избат бә кӧ ԝи рʹаст һин дькьн (Кʹаред Шандийа 17:11; 1 Тʹесалоники 5:21). Ԝәʹдә шунда малхе мьн фәʹм кьр, ԝәки религийа рʹаст дитийә, ле әз һе дӧдьли дьбум. Мьн жи дьхԝәст ве йәке бькьм, чь кӧ рʹаст ә, ле әз дьтьрсийам бьбьмә йәкә «модерн» у бьбьм «пʹара ве дьнйайе». Чахе әз щара әʹԝльн тʹәви ԝан сәр һинбуна Кʹьтеба Пироз рʹуньштьм, сәр чокәкә мьн Кʹьтеба Пирозә ԝәлгәрʹандьна Щеймс Кинг бу, сәр чока дьн жи Ԝәлгәрʹандьна Дьнйа Тʹәзә бу. Мьн һәр дӧ ԝәлгәрʹандьнада рʹез бәрамбәри һәв дькьрьн, сәва кӧ баԝәр бьм, ԝәки әԝана мьн нахапиньн.
Шьк жь Дьле Мьн Дәрте
Ԝәʹде һинбуна тʹәви Шәʹдед Йаһоԝа әм пеһʹәсийан, ԝәки Баве мәйи әʹзмана Хԝәде йәк ә, нә кӧ сьсе йәкеда у ԝәки нәфса мәйә нәмьри тʹӧнә, әм хԝәха нәфс ьн (Дәстпебун 2:7; Ԛануна Дӧщари 6:4; Һәзәԛел 18:4; 1 Корьнтʹи 8:5, 6). Әм ӧса жи пеһʹәсийан ԝәки щәʹньм нә кӧ щийе агьре пʹәрʹьтандьне йә, кʹидәре кӧ мәрьв дьчәрчьрьн, ле щийе һʹәму мьрийа йә, демәк мәзәл (Ибо 14:13; Зәбур 16:10; Ԝаиз 9:5, 10; Кʹаред Шандийа 2:31). Чахе әм пеһʹәсийан рʹастийа дәрһәԛа щәʹньме, әм зәндәгьрти ман, чьмки дера Баптистед бәреда дәрһәԛа ве йәке лаптә щурʹәки дьн һин дькьрьн.
Ле диса жи әз әʹщебмайи дьмам, ԝәки религийа Шәʹдед Йаһоԝа ча дькарә йа рʹаст бә, чьмки ль гора ньһерʹандьна мьн әԝана һәла һе пʹарәкә ве дьнйайе бун. Ԝана бь әʹмьре «садә» нәдьжитьн, чь кӧ бона мьн гәләк фәрз бу. Ле һьм жи мьн фәʹм дькьр, ԝәки Шәʹдед Йаһоԝа тʹәмийа Иса тиньн сери, чьмки һʹәму мәрьварʹа мьзгинийа Пʹадшатийе гьли дькьн. Мьн ньзаньбу чь бькьра, әз кʹәтьбумә ортʹа дӧ кәвьра (Мәтта 24:14; 28:19, 20).
Ԝе дәме һʹьзкьрьна Шәʹдед Йаһоԝа али мьн кьр, ԝәки бәрдәԝам кьм щабед пьрсед хԝә бьгәрʹьм. Тʹәмамийа щьвате зәʹф дьлован бу һьндава малбәта мәда. Щурʹә-щурʹә хушк-бьред щьвата мә дьһатьн тʹәсәлийа мә дькьрьн. Щарна ԝана әв йәк дькьрә мәʹни кӧ һатьнә шир у һека бькʹьрʹьн. Әве йәке али мә кьр бьвиньн, ԝәки Шәʹдед Йаһоԝа мәрьвед чьԛас баш ьн. Рʹаст ә Шәʹдәки Йаһоԝа тʹәви мә һинбуна Кʹьтеба Пироз дәрбаз дькьр, ле әве йәке рʹийа хушк-бьред дьн нәдьгьрт кӧ бенә мала мә. Һәр щар чахе жь щьвате кәсәк бәр мала мәрʹа дәрбаз дьбу, әʹсәйи дьһат тʹәсәлийа мә дькьр. Әв йәк бона мьн мәщал бу, ԝәки Шәʹдед Йаһоԝа дьһа рʹьнд нас кьм, чь кӧ әм зәʹф һʹәԝщә бун. Һеди-һеди мә гәләк ԛимәт кьр һʹьзкьрьна ԝан у дьлованийа ԝан.
Нә кӧ тʹәне хушк-бьред жь щьвата мә бона мә хәм дькьрьн, ле ӧса жи йед жь щьватед дьн. Хушкәкә жь щьватәкә дьн, Кей Бритс кʹижан кӧ кʹьнщед садә хԝә дькьр у косметика нәдьда хәбате, заньбу ԝәки пьрса кʹьнщхԝәкьрьн у хәмьландьнева гьредайи, мьн дьчәрчьринә. Әԝ һатә мала мә. Мьн тʹәви ԝе хԝә рʹьһʹәт тʹәхмин дькьр у аза жерʹа дькʹәтьмә хәбәрдане. Щарәке жи бьраки мә Луис Флор һатә мала мә. Әԝ жи мина мьн жь бьчʹуктайеда религийәкә ӧсада һатьбу мәзьнкьрьне, кʹижане кӧ һин дькьр, ԝәки «садә» бьжин. Әԝи сәр чʹәʹве мьнрʹа тедәрхьст, ԝәки дӧдьлибун мьн дьчәрчьринә. Сәва кӧ әԝ бәр дьле мьнда бе у шьке жь дьле мьн дәрхә, әԝи мьнрʹа нәʹмәкә дьреж сәр дәһә рʹупʹела ньвиси у шанд. Ԛәнщийа ԝи ӧса дьле мьн гьрт, кӧ һесьр жь чʹәʹве мьн барин. Һʹәта ньһа жи әз щар-щара әве нәʹме дьхуньм.
Щарәкә мьн жь бәрпьрсийаре мьһале, наве кʹижани Одел бу, һиви кьр, ԝәки әԝ мьнрʹа шьровәкә рʹезед Ишайа 3:18-23 у 1 Пәтрус 3:3, 4. Мьн жь ԝи пьрси: «Нә әв рʹез нишан дькьн, ԝәки сәва кӧ Хԝәде хԝәш бен, гәрәке кʹьнщед садә хԝә кьн?» Әԝи гот: «Нә ԝан рʹезада дәрһәԛа лачʹьке жи те готьне, ԝәки изьн тʹӧнә бьдьнә сәре хԝә у гәрәке пʹорʹе хԝә жи вәнәгьрьн. Щәм Баптистед ԛәйдед бәре әʹдәт ә, ԝәки кәчʹькед бьчʹукрʹа гӧлийа вәргьрьн у кʹӧлфәт жи гәрәке бь лачʹька сәре хԝә гьредьн. Мьн фәʹм кьр ԝәки ньһерʹандьна мьн у ньһерʹандьна Кʹьтеба Пироз һәв нагьрьн. Ӧса жи ԛәнщи у сәбьра бәрпьрсийаре мьһале гәләк дьле мьн гьрт.
Һеди-һеди мьн дәстпекьр баԝәр кьм, ԝәки мьн рʹасти дитийә. Ле диса пьрсәке әз дьчәрчьрандьм: «Гәло изьн ә, ԝәки кʹӧлфәт пʹорʹе хԝә бьбьрʹә?» Рʹуспийа тʹәви мьн ӧса шеԝьр дькьрьн: «Мәсәлә, пʹорʹе һьнә кʹӧлфәта гәләк дьреж набьн, ле пʹорʹе кʹӧлфәтед дьн зәʹф дьреж дьбьн. Гәло әв йәк те һʹәсабе кӧ пʹорʹе һьнәка жь йед майин дьһа баштьр ьн?» Ԝана ӧса жи али мьн кьр, ԝәки әз фәʹм бькьм кӧ кʹьнщхԝәкьрьн у хәмьландьн чь щурʹәйи исафа мәрьвава гьредайи йә. Ԝана һьм жи һьнә әʹдәбйәтед дәрһәԛа ве йәке данә мьн, сәва кӧ әз малда бьхуньм.
Ль Гора Һинкьрьнед Тʹәзә Дьжин
Мә мәрьвед ӧса дьгәрʹийан, йед кӧ ль гора рʹастийе дьжин у мә әԝ дитьн. Иса гот: «Бь ве йәке һʹәмуйе заньбьн һун шагьртед мьн ьн, һәгәр һун һәвдӧ һʹьз бькьн» (Йуһʹәнна 13:35). Әм баԝәр бун, ԝәки Шәʹдед Йаһоԝа һʹьзкьрьна рʹаст дьдьнә кʹьфше. Бона дӧ зарʹед мәйә мәзьн Натʹан у Ребекайе, әв ԝәʹдә нә һеса бу, чьмки әԝана религийа Баптистед ԛәйдед кәвьнда һатьбун ньхӧмандьне у хԝә ль ве баԝәрийе дьгьртьн. Ахьрийе рʹастийа жь Кʹьтеба Пироз, кʹижан кӧ мә ԝанарʹа гьли дькьр ӧса жи әԝ һʹьзкьрьна кӧ нава Шәʹдед Йаһоԝада бу, дьле ԝан гьрт.
Мәсәлә, Ребекайе тʹьме дьхԝәст незики Хԝәде бә. Чахе әԝ пеһʹәсийа кӧ Хԝәде гавед мә у йазийа мә пешда сафи накә, ԝерʹа дьһа һеса бу, кӧ Хԝәдерʹа дӧа бькә. Әԝ ӧса жи һьнге дьһа незики Хԝәде бу, чахе пеһʹәсийа ԝәки әԝ пʹарәкә сейаканә нинә, ле кәсе реали йә, жь кʹижани әԝ дькарә һин бә (Әфәси 5:1). Ребека бәхтәԝар бу, кӧ ида дькарьбу бь гьлийе хԝә Хԝәдерʹа дӧа бькә, нә кӧ бь зьмане кәвьн жь ԝәлгәрʹандьна Щеймс Кинг. Әԝ дьһа незики Хԝәде бу, чахе пеһʹәсийа кӧ әԝ чь щурʹәйи гәрәке дӧа бькә, у ӧса жи пеһʹәсийа дәрһәԛа ԛьрара Хԝәде кӧ инсанәт ԝе щьнәтеда сәр әʹрде һʹәта-һʹәтайе бьжи (Зәбур 37:29; Әʹйанти 21:3, 4).
Кʹәрәмед кӧ Мә Станд
Һавине сала 1987 Щеймс у әз, ӧса жи пенщ зарʹед мәйи мәзьн: Натʹан, Ребека, Щорщ, Денийел у Щон, ча Шәʹдед Йаһоԝа һатьнә ньхӧмандьне. Сала 1989 Харли һатә ньхӧмандьне у сала 1994-да жи Саймон. Тʹәмамийа малбәта мә бь хирәт тинә сери әԝ тʹәмийа Иса, кʹижан кӧ гот ԝәки әм гәрәке мьзгинийа хере дәрһәԛа Пʹадшатийа Хԝәде әʹлам кьн.
Пенщ кӧрʹед мә: Натʹан, Щорщ, Денийел, Щон у Харли ӧса жи ԛиза мә Ребека, хьзмәт дькьрьн Бәйтʹәла Шәʹдед Йаһоԝада йа Дәԝләтед Йәкбуйи. Ида 14 сал ә, кӧ Щорщ ԝедәре хьзмәт дькә. Ле Саймон, кʹижани кӧ сала 2001 мәкʹтәб хьлаз кьр, ԝан пашԝәхтийа дәстпекьр Бәйтʹәледа хьзмәт кә. Һʹәму кӧрʹед мә щьватед Шәʹдед Йаһоԝада ча рʹуспи йан бәрдәстийед щьвате хьзмәт дькьн. Малхе мьн жи рʹуспийе щьвата бажаре Тайер ә, штата Мисури. Ле әз бь хирәт мьзгинийа хере бәла дькьм.
Ньһа ида се нәвийед мә һәнә: Щесика, Латиша у Кʹалеб. Әм гәләк ша нә, кӧ де-бавед ԝан, һʹьзкьрьна һьндава Йаһоԝа дьле зарʹед хԝәда пешда тиньн. Әм ӧса жи гәләк ша нә, ԝәки Йаһоԝа тʹәмамийа малбәта мә кʹьшандә бәрбь хԝә у али мә кьр щьмәʹта ԝи бьвиньн, кʹижан кӧ бь һʹьзкьрьне әʹйан дьбә.
Дьле мә сәр ԝан мәрьва дьшәԝьтә, йед кӧ һʹьзрәт ьн Хԝәдерʹа хьзмәт кьн, ле жь бо дәрәщед әʹмьре ԝан, исафа ԝан бь щурʹе нәрʹаст һатийә һинкьрьне, нә кӧ сәр һʹиме Кʹьтеба Пироз. Әм һивийе нә, ԝәки ԝе рʹожәке әԝана жи ве шабуне сәр хԝә тʹәхмин кьн, кʹижан кӧ әм сәр хԝә тʹәхмин дькьн гава мал бь мал мьзгинийа Пʹадшатийе бәла дькьн. Әм ида дьгәрʹьн нә кӧ сәва тьшта бьфьрошьн, ле сәва кӧ дәрһәԛа ԝан кʹәрәма гьли кьн, кʹижан кӧ Пʹадшатийа Хԝәде ԝе бинә. Һәр щар чахе әз тиньм бира хԝә әԝ сәбьр у һʹьзкьрьна кӧ Шәʹдед Йаһоԝа һьндава мәда дьданә кʹьфше, чʹәʹве мьн тʹьжә һесьр дьбьн у дьле мьн бь рʹазибуне тʹьжә дьбә!
[Шькьл]
Чахе әз ԝәкә һʹәфт сали бум, у паше дьһа мәзьн
[Шькьл]
Щеймс, Щорщ, Харли у Саймон бь кʹьнщед садә
[Шькьл]
Сәр ԝи шькьли әз хӧрәк дьбьм, ԝәки бьфьрошьм у әв шькьл рʹожнамеда һатьбу нәшьркьрьне
[Әламәти Дәрһәԛа Кани]
«Journal and Courier», Lafayette, Indiana
[Шькьл]
Тʹәви малбәта хԝә иро