Сәрһати 32
10 Бәла Мьсьре
БЬНЬҺЕРʹӘ сәр шькьл. Һәр шькьләк нишани мә дькә ԝан дәһә бәла, йе кӧ Хԝәде ль сәр Мьсьре ани. Ль сәр шькьле пешьн тӧ дькари бьвини ча Һарун шьвдар чʹәме Нил дьхә. Паши ве йәке ава Нил бу хун. Мәʹсийе чʹәме тʹәмам мьрьн у жь чʹәме Нил бина мьрʹдарʹ дьһат.
Паше Хԝәде ӧса кьр, кӧ жь чʹәме Нил бәԛ дәрдькʹәтьн. Әԝана гәләк бун у дькʹәтьнә мала һʹәму мәрийа, нав щи у ньвинед ԝан, нав фьрʹнә у сәр тʹәхтед ԝан, әԝана дь һʹәму щийада бун. Чахе бәԛ мьрьн, мьсьрийа ԝана щики тʹоп кьрьн у дь тʹәмамийа ԝәлатида бина гәни дьһат.
Паше Һарун шьвдар әʹрде хьст у вьзьк жь тʹоза әʹрде дәркʹәтьн. Әԝана ча мина тʹәхтәбитийа бьчʹук, мәрийава дьзәльԛин у ԝана дьгәстьн. Вьзьк дь Мьсьреда бәла сьсийа бу.
Бәлед дьне ль сәр исраелийа ида бәла нәдьбун, ле тʹәне ль сәр мьсьрийа. Бәла чара әв мешед мәзьн бун, йе кӧ бь кʹомва дькʹәтьнә мала һʹәму мьсьрийа. Бәла пенща тʹәне ль сәр һʹәйԝана бәла бу. Гәләк дәԝар, пәз у бьзьн дь Мьсьреда мьрьн.
Ԝәʹде бәла шәша Муса у Һарун тʹоза әʹрде һьлдан у ль сәр һәԝа рʹәшандьн. Жь ве йәке нәхԝәшийа хьрав бәла бу, ча ль сәр мәрийа ӧса жи ль сәр һʹәйԝана.
Паши ве йәке Муса дәсте хԝә бәрбь әʹзмана һьлбьранд у Йаһоԝа жь әʹзмана бьруск у тәйрока ԛайим шандә әʹрде. Дь Мьсьреда тофане ӧса ԛайим тʹӧ щар тʹӧнә бунә.
Ԝәʹде бәла һʹәйшта кӧлийед мәзьн дь Мьсьреда тʹьжә бун. Пешийа ве йәке дь Мьсьреда һаԛа кӧли тʹӧ щар тʹӧнә бунә. Ԝана ԛьрʹа һʹәму тьшти, йе кӧ паши тәйроке мабу, анин.
Ле ԝәʹде бәла нәһа тәʹри кʹәтә әʹрде. Се рʹожа дь тʹәмамийа ԝәлатда тәʹри-тәʹристан бу. Ле щьмәʹта Исраел дь нав рʹонайеда бун.
Хьлазийе, Хԝәде готә щьмәʹта хԝә кӧ әԝана хуна бьзьна щаһьл, йан жи хуна бәхька дәрийе хԝә хьн. Паше мьлйакʹәте Хԝәде дәрбази тʹәмамийа Мьсьре дьбу у кʹидәре хуне дьдит дәсте хԝә нәдьда ԝан. Ле дәрийе кʹе жи бь хуне хьсти нибу, мьлйакʹәт һʹәму нӧхрийе ԝан мәрийа у һʹәйԝана дькӧшт. Әва бәла дәһа бу.
Паши бәла дәһа Фьрәԝьн изьн да исраелийа кӧ әԝана һәрʹьн. Тʹәмамийа щьмәʹта Хԝәде ида һазьр бу кӧ һәрʹьн, ԝана һәма ԝе шәве кʹаре хԝә кьр у жь Мьсьре дәркʹәтьн.
Дәркʹәтьн сәре 7 һʹәта 12.