Сәрһати 33
Исраели Бәʹра Сорва Дәрбаз Дьбьн
БЬНЬҺЕРʹӘ чь дьԛәԝьмә! Муса шьвдар бәржери Бәʹра Сор кьрийә. Щьмәʹта Исраел хоф накьн, чьмки әԝана тʹәви Муса хьлаз бунә. Ле Фьрәԝьн у әскәред ԝи дь бәʹреда дьхәньԛьн. Ԝәрә пебьһʹәсьн ча әв йәк ԛәԝьми.
Ча әм пеһʹәсийан, паши бәла 10-һа йа кӧ Хԝәде ль сәр Мьсьре ани, Фьрәԝьн щьмәʹта Исраел бәрʹда. Ԝәкә 600 000 мере исраели у жьн заред ԝан Мьсьр һиштьн. Ӧса жи тʹәви ԝан гәлә мәрийед дьн жи дәркʹәтьн, чьмки ԝана баԝәрийа хԝә Йаһоԝа ани. Ԝана һʹәмушка тʹәви хԝә һʹәйԝанед хԝә жи һьлдан.
Пешийа ԝе йәке ча исраели Мьсьр һиштьн, ԝана кʹьнщ, ӧса жи тьштед зерʹ у зив жь мьсьрийа хԝәстьн. Чьмки мьсьри жь бәла дәһа гәлә тьрсийайи бун, ԝана кәр-лал һʹәму тьшт данә исраелийа.
Чәнд рʹож дәрбаз бун у исраели гьһиштьн бәʹра сор у ԝе дәре һеса дьбун. Ве дәме Фьрәԝьн әскәред хԝәва пʹошман бун кӧ исраелийа бәрʹдан. Ԝана дьгот: «Мә чьрʹа диле хԝә бәрʹда!?»
Фьрәԝьн диса дәрбәки нете хԝә гӧһаст. Әԝи ләзә-ләз әʹрәбед хԝә бь әскәред хԝәва һазьр кьр, у пәй исраелийа кʹәт, бь гәлә әскәра у һʹәму әʹрәбед Мьсьре, нав кʹижани 600 әʹрәбед башԛә һәбун.
Чахе исраели дитьн кӧ Фьрәԝьн бь әскәред хԝәва пәй ԝан тен, әԝана гәләк тьрсийан. Чьмки аликива Бәʹра Сор бу у алийе дьнва жи Фьрәԝьн тʹәви әскәра, у ԝана ньзаньбу кʹидәре бьрʹәвьн хԝә вәшерьн. Ле Йаһоԝа ортʹа ԝан у мьсьрийа стуна әԝьр чекьр, у мьсьрийа нькарьбун нә ԝана бьдита у нә жи бьгьртана.
Паше Йаһоԝа готә Муса, кӧ әԝ шьвдаре бәржери Бәʹра Сор бькә. Чахе Муса ӧса кьр байе рʹоһьлате рʹабу. Йаһоԝа Бәʹра Сор ортʹеда кьрә дӧ кәра у ава бәʹре дӧ алийава мина диԝара сәкьнин.
Исраелийа дәстпекьрьн ль сәр әʹрде зьһарʹа дәрбаз бьн. Сәва кӧ бь мьлиона мәри тʹәви һʹәму һʹәйԝанед хԝәва дәрбази алийе дьне бьн, гәлә сьһʹәт лазьм һат. Хьлазийе әԝьр жь бәр чʹәʹве мьсьрийа чу у әԝана диса дькарьбун исраелийа бьдитана. Чахе мьсьрийа дит кӧ исраели жь ԝан дьрʹәвьн, ԝана да пәй ԝан у кʹәтьнә бәʹре.
Чахе әԝана кʹәтьнә бәʹре, Хԝәде чәрхед әʹрәба шкенанд. Мьсьрийа гәлә тьрсийан у ԛужини дькьрьн: «Йаһоԝа тʹәви мә шәрʹ дькә сәва щьмәʹта хԝә, әм гәрәке жь вьр бьрʹәвьн!» Ле ида гәлә дәрәнг бу.
Һәма ве дәме Хԝәде готә Муса, кӧ әԝ шьвдаре бәржери Бәʹра Сор бькә. Әв йәк ль сәр шькьл рʹьнд те кʹьвше. Чахе Муса ӧса кьр диԝаре аве, ль сәр мьсьрийа у әʹрәбед ԝан, жорда һатә хԝаре. Һʹәму әскәр, йе кӧ кʹәтьбун бәʹре пәй исраелийа, хәньԛин. Ԛә йәк жи сагʹ нә ма!
Дә бьдә һʹәсаве хԝә щьмәʹта исраели чьԛа ша дьбун, кӧ әԝана хьлаз бун. Мере исраели кʹӧлама шькьрдайине бь рʹазибуне Йаһоԝарʹа дьготьн: «Йаһоԝа бь рʹумәте сәр мьсьрийа кʹәт. Һәспед у сийаред ԝан авитә бәʹре». Хушка Муса Мәрйәм дәстпекьр дәфе хә у жьнед дьн жи чʹәʹв данә ԝе. Әԝана бь шабуне дьрәԛьсин у һьн жи әԝ кʹӧлам дьготьн йе кӧ мер дьстьран: «Йаһоԝа бь рʹумәте сәр мьсьрийа кʹәт. Һәспед у сийаред ԝан авитә бәʹре»
Дәркʹәтьн сәре 12 һʹәта 15.