Сәрһати 27
Дь Мьсьреда Пʹадшаки Хьрав Сәркʹарти Дькә
ҺӘЛА бьньһерʹә ль сәр ԝан мера, йе кӧ хәватчийа дькʹӧтьн! Әԝана хәватчийа зоре дьдьнә хәвате. Әв хәватчи мәрийед Аԛуб ьн, йе кӧ һатьнә нав кьрьне ча Исраели. Ле әԝ, йе кӧ ԝана дьхьн, мьсьри нә. Исраели дь Мьсьреда бунә дил. Гәло әв йәк ча ԛәԝьми?
Малбата Аԛуб дь Мьсьреда гәлә сал хер сьламәт дьжитьн. Усьв дь Мьсьреда мәрики мәзьн бу у әԝ мьԛати ԝан дьбу. Ле пашԝәхтийе чахе Усьв у Фьрәԝьне баш мьрьн, дь Мьсьреда Фьрәԝьне тʹәзә һатә кʹьвш кьрьне, йе кӧ исраелийа һʹәз нәдькьр.
Әв Фьрәԝьне хьрав исраелийа кьрә дил. Әԝи ль сәр ԝан сәрԝера кʹьвш кьр, йе кӧ гәлә берʹәʹм бун. Әԝана бь зорбәтийе хәватәкә гьран у чәтьн исраелийа дьданә кьрьне. Исраели Фьрәԝьнрʹа шәһәр гәрәке ава кьрана. Ле щьмәʹта Исраел йәкә жь бәр һәв зедә дьбун, у мьсьрийа дәстпекьрьн бьтьрсьн, кӧ исраели дькарьн жь ԝан һе зедә бьн у һе ԛайим бьн.
Ләма жи Фьрәԝьн хәвәр да тʹәви ԝан жьна, йе кӧ ԝәʹде буйина зарʹа али жьнед Исраели дькьрьн. Гәло әԝи чь готә ԝан? Фьрәԝьн гот: «Һун гәрәке һәр кӧрʹәки исраели, йе кӧ тʹәзә ԝе бенә буйине, бькӧжьн». Ле әв жьнед баш гӧне хԝә зарʹа дьанин у ԝана нәдькӧштьн.
Паши ве йәке Фьрәԝьн ида һʹәму мәрийарʹа фәрман да: «Һун гәрәке һʹәму кӧрʹед бьчʹук нав Исраелийа бьгьрьн у бькӧжьн. Бьра нав ԝан тʹәне ԛиз бьминьн». Чьԛас фәрманәкә бехӧдети йә, ӧса нинә? Ԝәрә әм пебьһʹәсьн йәк жь ван кӧрʹа ча хьлаз бу.
Дәрк’әтьн 1:6-22.