Сәрһати 48

Гибонийед Аԛьл

ГӘЛӘ жь шәһәре Кәнане ида һазьр бун кӧ пешбәри исраелийа шәрʹ кьн. Ԝана тʹьре кӧ ԝе бькарьбьн исраелийа алт кьн. Ле щьмәʹта шәһәре Гибон, йе кӧ незики исраелийа бу, ӧса дьшьрмиш нәдьбун. Ԝана баԝәр дькьр кӧ Хԝәде али исраелийа дькә, ләма жи ԝана нәдьхԝәст пешбәри Хԝәде шәрʹ кьра. Зани гибонийа чь кьрьн?

Ԝана ԛьрар кьрьн, кӧ хԝә ӧса чекьн те бежи әԝана жь ԝәлатәки дур тен. Чәнд мера һьлдан кʹьнщед рʹьзи хԝә кьрьн у чарьхед гәлә кәвьн пʹе кьрьн. Ԝана ӧса жи кʹисе кәвьн һьлдан у нане һʹьшкбуйи, ль сәр кʹәра рʹуньштьн у чун. Әԝана һатьн бал Йешу у готьн: «Әм жь ԝәлатәки дур һатьнә вьр, чьмки мә бьһистьбу дәрһәԛа Хԝәдайе ԝә һьмзор, Йаһоԝа. Әм пеһʹәсийан дәрһәԛа һʹәму тьшта, йе кӧ әԝи сәва ԝә дь Мьсьреда кьр. Ләма жи сәркʹаред мә готьнә мә кӧ әм һьнә нан хԝәрʹа һьлдьн, рʹе кʹәвьн, бенә щәм тә у тәрʹа бежьн: ‹Әм хӧламе тә бьн. Тʹәне соз бьдә кӧ шәрʹ наки тʹәви мә›. Аһан бьньһерʹә, кʹьнщед мә рʹева ча машийанә у нане мә жи ча һʹьшк буйә».

Йешу у сәркʹаред дьне баԝәрийа хԝә ԝан анин. Ԝана соз да кӧ тʹәви ԝан ԝе шәрʹ накьн. Ле се рʹож шунда әԝана пеһʹәсийан кӧ гибони бь рʹастийе незики ԝан дьжин.

Ләма жи Йешу пьрс да ԝан: «Ԝә чьрʹа сәре мә хапанд, кӧ һун жь ԝәлатәки гәлә дур һатьн?»

Ԝана жи щава хԝә да: «Чьмки, мәрʹа готьбун кӧ Хԝәдайе ԝә Йаһоԝа тʹәмамийа әʹрде Кәнане ԝәрʹа соз дабу. Ләма жи әм тьрсийан кӧ һуне мә жи бькӧжьн». Ле исраелийа жь созе хԝә вәнәгәрʹийан, у гибонийа нәкӧштьн. Дәԝса ве йәке гибони исраелийарʹа хӧламти дькьрьн.

Жь ве йәке пʹадше Оршәлиме ль сәр гибонийа гәлә һерс кʹәт. Әԝи готә чар пʹадшед дьненарʹа: «Ԝәрʹен аликʹарийе бьдьнә мьн, тʹәви гибонийа шәрʹ кьн». Ԝана ӧса жи кьр. Ньһа пенщ пʹадша ԝе һәрʹьн шәрʹ тʹәви гибонийа. Ләма жи пьрса ӧса пешда те: «Гәло әԝ йәк кӧ гибони тʹәви исраелийа пәймана әʹдьлайийе данин, бь рʹастийе аԛьли бу йан на?» Дә ԝәрә әм пебьһʹәсьн.

Йешуа 9:1-27; 10:1-5.