Сәрһати 49

Рʹо Начә Ава

ҺӘЛА бьньһерʹә ль сәр Йешу. Әԝ дьвежә: «Рʹо, нәчә ава!» У рʹо тʹәмамийа рʹоже нәдьчу ава. Әв йәк бь дәсте Йаһоԝа һатә кьрьне! Ле гәло, чьрʹа лазьми Йешу һат кӧ рʹо нәчә ава у рʹонайа хԝә бьдә? Ԝәрә әм пебьһʹәсьн.

Чахе пенщ пʹадше хьрав жь әʹрде Кәнане дәркʹәтьн кӧ тʹәви Гибонийа шәрʹ бькьн, гибонийа мерәк шандьн бал Йешу сәва аликʹарийе. Әԝи готә Йешу: «Ләз кʹәвә, ԝәрә! Мә хьлаз кә! Пʹадшед һʹәму ԝәлатед ль сәр чʹийа, тен кӧ тʹәви хӧламе тә шәрʹ бькьн».

Йешу тʹәви һʹәму әскәред хԝәва ләзә-ләз кʹәтьнә рʹе. Әԝана тʹәмамийа шәве дь рʹеда бун. Чахе әԝана ида незики Гибоне бун, әскәред пенщ пʹадша тьрсийан у дәстпекьрьн бьрʹәвьн. Ԝи чахи Йаһоԝа тәйрока ԛайим жорда ль сәр ԝан ани у һʹәчʹи зәʹф жь тәйроке мьрьн, йе дьне жи бь дәсте әскәред Йешу дьһатьнә кӧштьне.

Ле Йешу дина хԝә дайе кӧ рʹо дьчә ава, у һәрге тәʹри ԝе бькʹәвә әʹрде, әскәред пʹадшед хьрав ԝе бькарьбьн бьрʹәвьн. Ләма жи әԝ Хԝәдерʹа дӧа дькә у паше дьвежә: «Рʹо, нәчә ава!» Һʹәта рʹо нәдьчу ава, исраели дьжмьнед хԝә ԛьрʹ кьрьн у дь ви шәрʹида ԝана данә дәр.

Ле дь Кәнанеда диса пʹадшед хьрав һәбун, йе кӧ нәфрʹәти щьмәʹта Хԝәде дькьрьн. Сәва Йешу у әскәред ԝи ԝәкә шәш сал лазьм һат кӧ 31 пʹадша бьдана алт кьрьне. Чахе ԝана әʹрде ԝан пʹадшатийа зәфт кьр, Йешу сафи кьр кӧ ви әʹрди нава ԝан бәрәка пʹарә вәкә әʹрде кʹе жи һе тʹӧнә бу.

Гәлә сал дәрбаз бун, у Йешуйе 110 сали мьр. Һʹәта әԝ у һәвалед ԝи сах бун щьмәʹт гӧрʹа Йаһоԝа дькьр. Ле чахе әв меред ԛәнщ мьрьн, щьмәʹт кʹәтьнә нав шьхӧлед хьрав у бунә хԝәйе кӧл-дәрда. Ԝи чахи ԝанарʹа рʹасти жи аликʹарийа Хԝәде лазьм бу.

Йешуа 10:6-15; 12:7-24; 14:1-5; Һ’акьмти 2:8-13.