Сәрһати 56
Шаԝул Пʹадшайе Пешьн Ә Дь Исраеледа
БЬНЬҺЕРʹӘ ча Самуйел сәре Шаԝул рʹун дькә. Йаһоԝа готә Самуйел кӧ әԝ Шаԝул рʹун кә. Һәма ӧса, демәк бь рʹуне бинхԝәш, дь Исраеледа пʹадша дьһатьн кʹьвш кьрьне.
Ле Шаԝул тʹьре кӧ әԝ нәһежа йә бьбә пʹадша. Ләма жи әԝи гот: «Ча әзе бьбьм пʹадша? Нә әз жь бәрәка Бьнйамин ьм, йе кӧ һәри бьчʹук ә дь Исраеледа». Шаԝул дьле Йаһоԝа хԝәш һат. Чьмки әԝ бабах нибу, ле мьлук бу. Ләма жи Йаһоԝа ԝи кьрә пʹадша.
Ле бь рʹастийе Шаԝул жь малбатәкә гәлә дәԝләти у навдар бу. Һьн жи әԝ хoртәки гәлә бәдәԝ у бәжьн бьльнд бу. Әԝ нава исраелийа жь һʹәмушка бьльндтьр бу! Ӧса жи Шаԝул гәлә ԛәԝат бу у зу дьрʹәвийа. Щьмәʹта Исраел пʹьрʹ ша дьбун, кӧ Йаһоԝа Шаԝул кʹьвш кьр ча пʹадша. Әԝана бь дьл у щан дәстпекьрьн бь дәнге бьльнд бежьн: «Әʹмьре пʹадша бьра дьреж бә!»
Дьжмьнед исраелийа, мина бәре диса жи ԛайим у ԛәԝат бун. Әԝана зорбә исраелийа дькьрьн у ԝана гәлә дьчәрчьрандьн. Паши ԝе йәке ча Шаԝул бу пʹадша, аммонийа пешбәри исраелийа пе шәрʹ дәркʹәтьн. Шаԝул гәлә әскәр тʹоп кьр у аммонийа да дәр. Ләма жи щьмәʹта исраели ша дьбу кӧ Шаԝул пʹадше ԝан ә.
Пәй ван саларʹа щьмәʹта исраели бь сәркʹартийа Шаԝул гәлә шәрʹ дьбьрьн. Кӧрʹәки Шаԝул жи гәләки мерхас һәбу, наве ԝи Йонатʹан бу. Йонатʹан исраелийа пешда дьбьр у нава гәлә шәрʹ дьжмьнед хԝә алт дькьр. Щьмәʹта фьльстиан диса жи дьжмьне исраелийа бун. Дәрбәки ԝана һʹәзар-һʹәзара әскәр тʹоп кьрьн у пешбәри исраелийа дәркʹәтьн шәрʹ.
Самуйел готә Шаԝулрʹа, кӧ әԝ гәрәке һивийа ԝи бә. Самуйел жи гәрәке бьһата, сәва кӧ Йаһоԝарʹа ԛӧрбан бьдә. Ле чахе Самуйел дәрәнги кʹәт, Шаԝул жь тьрса кӧ фьльстиан дькарьн шәрʹ дәстпекьн, һьлда у хԝәха ԛӧрбан Хԝәдерʹа да. Гава Самуйел вәгәрʹийа, әԝи готә Шаԝул кӧ кьред ԝи нәрʹаст бун. Чьмки Шаԝул йа хԝә кьр, Самуйел готә ԝи: «Йаһоԝа ль сәр һʹәму Исраелийа ԝе пʹадшаки дьне кʹьвш кә».
Пашԝәхтийе Шаԝул диса дәрбәки гӧрʹа Хԝәде нәкьр. Ләма жи Самуйел ԝирʹа дьвежә: «Һе башә тӧ гӧрʹа Хԝәде бьки, нә кӧ пәзед баш ԝирʹа ԛӧрбан ки. Чьмки тӧ гӧрʹа Йаһоԝа наки, Хԝәде ԝе наһелә, ԝәки тӧ дь исраеледа пʹадшатийе бьки».
Жь ве сәрһатийе әм чь дькарьн сәва хԝә һин бьн? Бәле, әԝ нишани мә дькә кӧ чьԛаси фәрзә тʹьме гӧрʹа Йаһоԝа бькьн. Гәрәке мьԛати хԝә бьн, чьмки әм дьвиньн кӧ пешийе Шаԝул чьԛа мәрики баш бу, ле паше ча һатә гӧһастьне у хьрав бу. Әм тʹӧ щар нахԝазьн мина ԝи бьн! Ӧса нинә?
1 Самуйел сәре 9 һʹәта 11; 13:5-14; 14:47-52; 15:1-35; 2 Самуйел 1:23.