Сәрһати 58
Даԝьд У Голйатʹ
ЩЬМӘʹТА фьльстиан диса жи мьԛабьли исраелийа дьчун. Ԝи чахи се бьред Даԝьд бунә әскәр. Дәрбәки баве Даԝьд Йеша готә Даԝьд: «Һәрʹә сәрики бьред хԝә хә, у дәсте хԝәрʹа сәва ԝан һьнә гәньм у нан жи һьлдә».
Чахе Даԝьд незики чадьред әскәра бу, әԝи дит кӧ әскәр ль бәр мәйдана шәрʹкьрьне бун у әԝи перʹа-перʹа рʹәви кӧ бьред хԝә бьвинә. Ль ԝьр әскәрәки тәрʹьки жь фьльстиана, бь наве Голйатʹ, ԛәрфе хԝә исраелийа дькьр. Әԝ ида 40 рʹож бу, һәр шәбәԛ у евар, ль сәр ԝан дькʹәнийа у дьгот: «Жь нав әскәред хԝә мерәки бьжберьн, йе кӧ бькарьбә тʹәви мьн шәрʹ кә. Һәрге әԝ мьн алт кә, әме бьбьнә диле ԝә. Ле һәрге әз ԝи алт кьм у ԝи бькӧжьм, һуне бьбьн диле мә. Дә ньһа әзе бьньһерʹьм, мерхасийа кʹе дьгьһижә пешбәри мьн дәркʹәвә».
Ԝи чахи Даԝьд жь һьнә әскәра пьрс кьр: «Гәло әԝе кӧ Голйатʹ бькӧжә у бь ве йәке исраелийа жь робәтийе хьлаз кә, чь ԝе бьстинә?»
Әскәра жи ԝирʹа готьн: «Шаԝул пʹадша, һәбунәкә мәзьн ԝе бьдә ԝи у ԛиза хԝәйә һʹәлал жи бьдә ԝирʹа жьнти».
Ле тʹәмамийа әскәред исраелийа жь Голйатʹе гәлә дьтьрсийан. Чьмки әԝ хԝәха бәжьнеда ԝәкә 3 метьр бу у әскәрәк жи мәртʹала ԝи дьгьрт.
Һьнә әскәра чубун щәм Шаԝул у ԝирʹа готьн, кӧ Даԝьд дьхԝазә тʹәви Голйатʹ шәрʹ бькә. Һинге Шаԝул готә Даԝьд: «Тӧ һе щаһьл и, ле Голйатʹ тʹәмамийа әʹмьре хԝә әскәрийе дькә. Ләма жи те нькарьби тʹәви ԝи шәрʹ бьки». Ле Даԝьд щава хԝәда гот: «Чахе әз бәр пәзед баве хԝә бум, мьн сәва кӧ пәз хьлаз кьра һʹьрчʹ у шер кӧшт. Ләма жи бь аликʹарийа Йаһоԝа әзе Голйатʹ жи бькарьбьм бькӧжьм». Һинге Шаԝул готә ԝи: «Һәрә, у бьра Йаһоԝа пьштоване тә бә».
Даԝьд жи чу у бәр чʹем пенщ кәвьре пәʹн тʹоп кьр у кьрә кʹисе хԝә. Паше әԝи шьдана хԝә һьлда у чу кӧ рʹасти Голйатʹ бе. Чахе Голйатʹ Даԝьд дит, әԝ әщевмайи ма, чьмки Даԝьд жь ԝи гәлә бьчʹук бу. Әԝи тʹьре кӧ һеса ԝе бькарьбә Даԝьд бькӧжә.
Голйатʹ готә Даԝьд: «Һәла ԝәрә, әзе бәдәна тә бькьмә пʹара тәрәԝьла». Ле Даԝьд щава хԝәда гот: «Тӧ тʹәви мьн пе шур у рʹьме хԝә дәркʹәти. Ле әзе бь наве Йаһоԝа дәрдькʹәвьм пешбәри тә. Ижар Йаһоԝа ԝе әʹмьре тә бьдә дәсте мьн у иро әзе тә әʹрде хьм».
Паши ван гьлийа Даԝьд пешбәри Голйатʹ рʹәви. Әԝи жь кʹисе хԝә кәвьр дәрхьст, кьрә шьдана хԝә у бь һʹәму ԛәԝата хԝә авитә Голйатʹ. Гава кәвьр әʹнийа Голйатʹ кʹәт, әԝ жорда һатә хԝәре у мьр! Чахе фьльстиана дитьн, кӧ Голйатʹе тәрʹьки һатә кӧштьне, әԝана жь тьрса рʹәвин. Ле исраелийа данә пәй ԝан у ԛьрʹа ԝан һʹәмушка анин.
1 Самуйел 17:1-54.