Даwьд нә Дьтьрсийа

Чахе тö дьтьрси, тö чь дьки?~ Дьбәкә дьчи щәм де у баве хwә, wәки әwана али тә бькьн. Ле зани wәки хенщи де-баве тә диса кәсәк һәйә, йе кö дькарә али тә бькә. Әw жь һʹәмушка qәwаттьр ә. Тö зани әв кʹи йә?~ Бәле, әв Йаһоwа Хwәде йә. Wәре әм ньһа дәрһәqа хортәки хәбәр дьн. Дәрһәqа wи дь Кʹьтеба Пирозда ньвисар ә. У наве wи Даwьд ә. Даwьд заньбу, wәки Йаһоwа тʹьме wе али wи бькә, ләма жи әw нә дьтьрсийа.

Чахе Даwьд һе зарʹ бу, де-баве wи әw һин дькьрьн, wәки Йаһоwа һʹьз бькә. Әв йәк али Даwьд дькьр кö әw нәтьрсә һәла һе wи чахи, гава һьнә тьштед хьраб жи дьһатьнә пешийа wи. Даwьд заньбу кö Йаһоwа досте wи бу, у wәки әw wе али wи бькьра. Щарәке чахе Даwьд мьqати пәзед хwә бу, ньшкева шерәки мәзьн дәркʹәт у пәзәки wи гьрт! Ле тö зани Даwьд чь кьр? Әwи да пәй шер, у бь дәстед хwә әw кöшт! Щарәке жи, һʹьрчʹ пәза wи гьрт, ле Даwьд әв һʹьрчʹ жи кöшт! Ча тö дьшьрмиш дьби, кʹи али Даwьд дькьр?~ Бәле, Йаһоwа али wи дькьр.

Диса wәʹдәки öса һәбу, чахе Даwьд мерхасийа хwә да кʹьфше. Щьмәʹта Исрайели мьqабьли щьмәʹта дьн дәрдькʹәт. Әв Фьльстийа бун. Йәк жь әскәред Фьльстийа гәләки бьльнд у тәрьки бу! Наве wи Голийатʹ бу. Голийатʹ qәрфе хwә Исрайелийа у Йаһоwа дькьр. Әwи дьготә әскәред Исрайелийа, wәки дәркʹәвьн у тʹәви wи шәрʹ кьн. Тʹö кәс жь Исрайелийа нәверьбу тʹәви wи шәрʹ кьра, чьмки әwана дьтьрсийан. Ле чахе Даwьд дәрһәqа wе йәке бьһист, әwи готә Голийатʹ: ‹Әзе дәркʹәвьм тʹәви тә шәрʹ бькьм! Йаһоwа wе али мьн бькә, у әзе тә алт кьм!› Ча тö дьшьрмиш дьби Даwьд мерхас бу?~ Әре, Даwьд гәләк мерхас бу. Дьхwази пебьһʹәси паше чь qәwьми?

Даwьд пенщ кәвьред пәʹн у шьдан һьлда, у чу сәва кö тʹәви Голийатʹ шәрʹ бькә. Чахе Голийатʹ, Даwьд дит, әw әʹщебмайи ма у дәстпекьр qәрфе хwә wи бинә, чьмки Даwьд һе гәләк щаһьл бу. Ле Даwьд готә wи: ‹Тö тʹәви мьн пе шур у рʹьме хwә дәркʹәти, ле әз бь наве Йаһоwа дәрдькʹәвьм мьqабьли тә!› Паше Даwьд кәвьр дәрхьст, кьрә шьдана хwә, бәрбь Голийатʹ рʹәви у әв кәвьр авитә wи. Әв кәвьр рʹаст ә-рʹаст анийа Голийатʹ кʹәт! Һьнге Голийатʹ әʹрде кʹәт у мьр! Чахе Фьльстийа әв йәк дитьн, әwана һʹәмушк жь тьрса рʹәвин. Гәло чаwа Даwьд карьбу Голийатʹе тәрьки алт кьра, нә әw һе гәләк щаһьл бу?~ Йаһоwа али wи кьр. У Йаһоwа жь ви Голийатʹе тәрьки жи, зәʹф qәwаттьр бу!

Чь тö дькари жь мәсәла Даwьд һин би?~ Йаһоwа жь һʹәмушка qәwаттьр ә. У әw досте тә йә. Һәрге öса бьqәwьмә кö тö бьтьрси, бькә бира хwә wәки Йаһоwа дькарә али тә бькә кö мерхас би!