Сәрһати 60

Абигаил У Даԝьд

ТӦ ӘԜЕ кʹӧлфәте нас дьки, йа кӧ бәрбь Даԝьд те? Зани кӧ наве ԝе Абигаил ә, у әԝ жьнәкә гәлә сәрԝахт ә. Дәрбәке әԝе Даԝьд жь гӧнәкьрьне хьлаз кьр. Ле һʹәта әме дәрһәԛа ԝе сәрһатийе хәбәр дьн, әме пебьһʹәсьн һәла чь сәре Даԝьд һат.

Чахе Даԝьд жь Шаԝул рʹәви, әԝи хԝә дь шкәфтеда вәдьшарт. Бьред ԝи у нәфәред мала ԝи тʹәмам бунә йәк у һатьн щәм Даԝьд. Ԝәкә 400 мер һатьбун кӧ пьшта ԝи бьгьрьн, у ӧса Даԝьд бу сәркʹаре ԝан. Паше Даԝьд чу бал пʹадше Моԝабе у ԝирʹа гот: «Бь кʹәрәма хԝә, бьһелә кӧ де-баве мьн ль вьр бьминьн, һʹәта бьньһерʹьм һәла ча бә һʹале мьн». Паши ве йәке Даԝьд у меред кӧ пьшта ԝи дьгьртьн хԝә дь чʹийада вәдьшартьн.

Аһан чаԝа Даԝьд рʹасти Абигаил һат. Мере Абигаил, Набал, мәрики гәлә дәԝләти у хԝәйе әʹрдәки мәзьн бу. Ԝәкә 3 000 пәз у 1 000 дәԝаред ԝи һәбун. Набал мәрики хьрав бу. Ле жьна ԝи һьн аԛьл бу у һьн жи гәлә бәдәԝ. Дәрбәке әԝе малбата хԝә жь мьрьне хьлаз кьр. Кʹа әм пебьһʹәсьн ча әв йәк ԛәԝьми.

Даԝьд у меред пьштовани ԝи, мьԛати пәзед Набал дьбун, у бь ԝе йәке ԛәнщи ԝирʹа дькьрьн. Дәрбәке Даԝьд чәнд мер шандә щәм Набал кӧ тьштәки жь ԝи бьхԝазьн. Мәрийед Даԝьд жи һатьбун щәм Набал чахе әԝана һьрийа пез дьбьрʹин. Ԝи чахи щәм ԝан шайи у кʹефа мәзьн бу, у ләма жи хԝарьна ԝан тʹер-тʹьжә бу. Мәрийед Даԝьд готьнә Набал: «Мә ԛәнщикә мәзьн тәрʹа кьрийә. Әм тʹьме бәр пәзед тә бун, ле мә ԛә пәзәк жи хԝәрʹа һьлнәдайә. Ләма жи бь кʹәрәма хԝә, һьнә хԝарьн бьдә мә».

Набал готә ԝан: «Әз хԝарьна хԝә тʹӧ щар надьмә мәрийед мина ԝә». Әԝи гәлә беԛәдьр ԝанрʹа хәбәр да, у һьн жи гьлийе хьрав гот сәр Даԝьд. Чахе әԝана вәгәрʹийан у һʹәму тьшт Даԝьдрʹа гьли кьрьн, Даԝьд гәлә һерс кʹәт. Әԝи готә ԝан: «Шуред хԝә һазьр кьн!» У әԝана бь ве нете рʹе кʹәтьн кӧ Набал у малбата ԝи бькӧжьн.

Ле ԛӧльхкʹарәки Набал, йе кӧ бьһистьбу хәбәрдана Набалә беԛәдьр, чу бал Абигаил у һʹәму тьшт ԝерʹа гьли кьр. Абигаил перʹа-перʹа һьнә хԝарьне һазьр дькә, датинә ль сәр кʹәра у рʹе дькʹәвә. Чахе Абигаил рʹасти Даԝьд һат, әԝ жь кʹәре пәйа бу у готә Даԝьд: «Хԝәйе мьн, һиви тә дькьм дина хԝә нәдә мере мьн. Әԝ бефәʹм ә у тьштед бефәʹм дькә. Бь кʹәрәма хԝә ван пʹешкʹеша һьлдә у сәва кьред мә бьбахшинә мә».

Даԝьд готе: «Тӧ жьнәкә аԛьл и. Чьмки тә нәһишт кӧ әз Набал жь бо нәһәԛийа ԝи бькӧжьм. Ньһа дькари бь хер у сьламәт вәгәрʹи мал». Пашԝәхтийе, чахе Набал мьр, Абигаил бу жьнәкә Даԝьд.

1 Самуйел 22:1-4; 25:1-43.