«Бьра Фәʹмкʹарийа Тә Пироз бә»

ӘW ГЬЛИ Даwьд готә wе жьньке йа кö рʹасти wи һат. Наве wе Абигаил бу. Ле гәло чь Даwьд һелан кьр кö пʹайе wе бьдә, у чь дәрсе әм дькарьн жь wе һин бьн?

Чахе Даwьд рʹасти Абигаиле һат, һьнге әw жь Шаwул пʹадша дьрʹәвийа. Мере Абигаиле һәбу, наве кʹижани Набал бу. Әw мәрьвәки дәwләти бу у гәләк кәрийед пәзе wи һәбун. Даwьд у әскәред wи, шьванед Набал у кәрийед пәзед wи хwәй дькьрьн. Wәʹдә шунда, Даwьд мәрьвед хwә шандә щәм Набал, у һиви кьр wәки Набал чьqас дькарә хwарьне бьдә wан (1 Сам. 25:8, 15, 16). Әw хwәстьна мәзьн нибу, чьмки Даwьд у әскәред wи Набалрʹа qәнщийа мәзьн кьрьбун.

Ле Набал, наве кʹижани те һʹәсабе «Берʹәʹм», йан жи «Бефәʹм», рʹасти жи йәки öса бу. Әwи хwәстьна Даwьд пьшт гöһе хwәва авит, у сәрда жи Даwьд беһöрмәт кьр у сәр wи гьлийед хьраб гот. Һерса Даwьд рʹабу сәр Набал у әwи хwәст wи щәза бькә, чьмки әwи Даwьд беһöрмәт кьр. Набал у малбәта wи гәрәке бона сәрһʹьшкийа wи һәqе хwә бьстандана (1 Сам. 25:2-13, 21, 22).

Абигаиле фәʹм кьр wәки һʹал хьраб ә, у әwе сафи кьр әви шьхöли һьлдә дәсте хwә. Әwе бь qәдьр тʹәви Даwьд хәбәр да, йе кö паше гәрәке бьбуйа пʹадша, у жь wи лава кьр кö сәва ве нәһәqийе, һәләqәтийа хwә тʹәви Йаһоwа öнда нәкә. Әwе öса жи Даwьд у әскәред wирʹа гәләк хwарьн ани. Даwьд фәʹм кьр wәки Йаһоwа бь сайа Абигаел wи жь гöне мәзьн хwәй кьр. Даwьд готә wе: «Бьра фәʹмкʹарийа тә пироз бә у тö пироз бә; жь рʹьжандьна хуне . . . тә мьн сәкьнанд!» (1 Сам. 25:18, 19, 23-35)

Жь ве сәрһатийе әм хwәрʹа дькарьн дәрсе һин бьн. Тʹö кәс жь мә нахwазә мина Набал бә, чьмки әw бешекьр бу у бәр тьштәки һʹәсаб нәкьр qәнщийа кö жерʹа һатә кьрьне. Һьн жи, чахе әм тедәрдьхьн кö проблемәк пешда те, wе баш бә чь дәсте мә те бькьн, сәва әве проблеме сафи кьн. У әм жи мина зәбурбеж дькарьн жь Хwәде һиви кьн: «Занәбун, сәрwахтийа qәнщ мьн һин кә» (Зәб. 119:66).

Мәрьв дькарьн пе кьред мә бьвиньн, wәки сәрwахти, демәк фәʹмкʹарийа мә һәйә. Дьбәкә әwана әве йәке мәрʹа рʹастә-рʹаст нәбежьн, ле мина Даwьд бьфькьрьн, кʹижани гот: «Бьра фәʹмкʹарийа тә пироз бә».