Сәрһати 63
Сьлеман Пʹадшайе Билан
СЬЛЕМАН һе гәлә щаһьл бу чахе бу пʹадша. Әԝи Йаһоԝа һʹәз дькьр, у ширәте баве хԝә Даԝьд дьда хәвате. Йаһоԝа ԝи гәлә ԛәбул дькьр, у дәрбәке Йаһоԝа дь хәԝнеда жь ԝи пьрс кьр: «Сьлеман, тӧ чь дьхԝази кӧ әз тәрʹа бьдьм?»
Сьлеман щава хԝәда гот: «Хԝәдайе мьн Йаһоԝа, әз һе гәлә щаһьл ьм у ньзаньм ча пʹадшатийе бькьм. Ләма жи дьхԝазьм ԝәки тӧ биланийе мьнрʹа бьди, кӧ бькарьбьм рʹаст сәрԝертийа щьмәʹта тә бькьм».
Йаһоԝа хԝастьна Сьлеман бәгәм кьр. Әԝи готе: «Чьмки тә жь мьн әʹмьре дьреж у дәԝләтийе хԝәрʹа нәхԝәст, ле дәԝса ве йәке тә билани хԝәрʹа хԝәст, әзе тә ӧса билан кьм кӧ тʹӧ кәс жь тә билантьр тʹӧнә бә. Ле сәрда жи әз тьштед кӧ тә жь мьн нәхԝәстийә бьдьмә тә, һьн навдарийе һьн жи дәԝләтийе».
Һьнә ԝәʹдә шунда дӧ жьн һатьбун щәм Сьлеман пе пьрсәкә гәлә чәтьн. Йәке жь ԝан готе: «Әз тʹәви ве жьнке дь маләкида дьжим. Мьнрʹа кӧрʹәк һатә буйине, у паше дӧ рʹож шунда әԝе жи кӧрʹәк ани. Ле кӧрʹе ԝе мьр, у шәве гава әз рʹаза бум әԝе кӧрʹе хԝә ани дани бәр мьн, ле кӧрʹе мьнә сах-сьламәт һьлда хԝәрʹа. Чахе әз һʹьшйар бум, мьн дина хԝә дайе кӧ зарʹа бәр мьн мьрийә у мьн те дәрхьст кӧ әв зарʹа мьн нинә».
Ле жьнка дьне гот: «На! Кӧрʹе сах йе мьнә, ле кӧрʹе ԝе мьрийә». Паше жьнка пешьн щава хԝәда готе: «На! Әԝ кӧрʹе тә мьрьбу ле йе мьн сах ә!» Аһан сәва чь ортʹа ԝан шәрʹ вәбьбу. Гәло Сьлеман ви пьрси ԝе ча сафи кә?
Сьлеман готә хӧламе хԝә кӧ шур бинә, у гава әԝи ани Сьлеман готә ԝи: «Зарʹоке бькә дӧ кәра, у һәр йәкерʹа кәрики бьде».
«На!» Бь гьринва дийа зарʹейә һʹәлал готә ԝан: «Һиви ԝә дькьм зарʹе нәкӧжьн. Ԝи бьдьнә ԝе жьнке!» Ле жьнка дьне гот: «Зарʹоке нәдьнә нә мьн нә ԝе, ԝи бькьнә дӧ кәра».
Хьлазийе Сьлеман дьвежә: «Зарʹоке нәкӧжә! Ԝи бьдә жьнка пешьн. Чьмки әԝ ә дийа ԝийә һʹәлал». Сьлеман заньбу кӧ де, зарʹа хԝә ӧса һʹәз дькә, ԝәки һазьр ә ԝи бьдә кәсәки дьне, тʹәне бьра әԝ нәйе кӧштьне. Чахе щьмәʹте бьһист, кӧ Сьлеман ча бь аԛьли әв пьрс сафи кьр, әԝана ша дьбун кӧ пʹадшаки ӧса щәм ԝан һәйә.
Ԝәʹде пʹадшатийа Сьлеман, Хԝәде щьмәʹт кʹәрәм дькьр у һʹәму щурʹа хԝарьне бәрәкʹәт дькьр мәсәлә: Гәньм у щәһ, тьри у һежир, у диса гәләк тьшт. Кʹьнщед баш щәм мәрийа һәбу у малед ԝан жи бәдәԝ бун. Һʹәму тьштед баш щәм һәр кәса тʹер-тʹьжә һәбу.
1 Пʹадшати 3:3-28; 4:29-34.